Aligen so Katooran nen Etai

“KATAWAN a Dios a Makapanyarin-amin, matalonggaring tan makapakelkelaw iray gawgawam! Ari da ray bansa, saray dalan mo maptek tan tua ra! Katawan, siopay ag-ontakot ed sika? Siopay agmalabay a mangigalang ed ngaran mo? Sika labat so masanto [“matoor,” NW].” Sayan kanta, a kinansion ed tawen na saramay “analo ed samay ayep tan say talintao to,” et mangipapaimano’d katooran na Dios. (Puyan 15:2-4, MB) Labay nen Jehova ya aligen na saray mandadayew ed sikato iyan marakdakep a kalidad to.

Gagawaen nen Satanas a Diablo balet so anggaay nayarian to pian saray lingkor na Dios diad dalin et agmakapansiansia ed panangaro na Dios a dadayewen da. Ingen ta dakel so nansiansian matoor ed Dios anggaman mairap iray kipapasen. Agaylay pisasalamat tayo ta papablien a maong nen Jehova so ontan a katooran! On, napapaseguroan tayo: “Say Katawan inaro toy kaptekan, tan agto ikakaindan iray matoor a totoo to.” (Sal. 37:28, MB) Pian natulongan itayon mansiansian matoor, impilaktip nen Jehova ed Salita to iray ginawgawa na dakel a matoor  a lingkor to. Sakey ed saratan et samay nipaakar ed si Etai a Geteo.

‘Taga’d Sananey a Bansa Tan Miaayam Labat’

Nayarin si Etai et taga’d Gat, sakey a kabkabat a syudad na Filisteo a lugar met na alan a si Goliat tan arum ni ran aliwan basta-bastan kalaban na Israel. Say sankaunaan a pankanawnawan nabasay nipaakar ed sayan maabilidad a sundalo a si Etai et sanen nanrebelde si Absalom ed si Arin David. Diad saman a panaon, si Etai tan saray 600 a Filisteon bataan to et miaayam diad sakey a lugar ya asingger ed Jerusalem.

Say situasyon nen Etai tan saray bataan to et nayarin angipanonot ed si David ed samay agawan mismo’d sikato tan ed saray 600 Israelitan sundalo to sanen nanamot-amot ira ed teritoryay Filisteo tan akakar ira’d sakop nen Akis ya ari na Gat. (1 Sam. 27:2, 3) Anto kasi gawaen nen Etai tan saray bataan to diad impanrebelde nen Absalom ed si ama ton David? Siopa kasi pilaan da, si Absalom odino si David? Odino anggapo?

Isipen tayo pa imay eksena. Tinaynan nen David so Jerusalem tan akasabi ed lugar a tatawagen a Bet-merac, a mankabaliksay “Say Arawin Abung.” Nayarin satan la so sankaunoran lan abung ed Jerusalem no paarap ka’d Palandey na Olibo antis a nabeltang so Kulos Kidron. (2 Sam. 15:17) Legan ya ondadalan so armada nen David, ninengneng to no siopara kasi akila’d sikato. Et anengneng ton aliwa labat la manayan saray matoor ya Israelita so akila noagta pati amin a Kireteo tan Peleteo. Tan akila met manaya iray amin a Geteo, salanti, si Etai tan saray 600 a sundalo to.​—2 Sam. 15:18.

Lapud natatalosan nen David so situasyon nen Etai, oniay inkuan to’d sikato: “Akin et mimila ka ed sikami? Pawil ka la ta mikasakey ka ed balon ari [mapatnag a say tutukoyen to et si Absalom]. Taga ka sananey a bansa, miaayam ka dia labat, tan arawi ka’d dilin bansam. Aganggano ka nin manaayam dia, kanian akin et panakar-akaren ta kan kaibak? Agko anggan amta no iner so laen ko. Pawil ka la tan itagar mo la ray kabansaan mo. Mapangasi tan matoor komon so Katawan ed sikayo.”​—2 Sam. 15:19, 20, MB.

Insan la’d satan imbalikas nen Etai so sigpot a katooran to. Oniay inyebat to’d David: “Kagalang kon Ari, sambaan ko’d sika diad ngaran na mabilay a Katawan, a mila ak lawas ed sika anggan iner so laen mo, patey ma’y pansumpalan tayo.” (2 Sam. 15:21, MB) Diad sayan ebat to et nayarin anonotan nen David imay imbaga nen bai to’d pueg a si Rut. (Rut 1:16, 17) Lapud atenyeg so puso nen David ed imbaga nen Etai, oniay inkuan to: “Onla ka tan ombaliw ka” ed Kulos Kidron. Kanian, “si Etai a Geteo binmaliw, tan saray amin a totoo to, tan saray amin ya angkelag a wala ed sikato.”​—2 Sam. 15:22.

“Onkana ed Kibangat Tayo”

“Saray bengatla a nisulsulat nensaman, nisulat ira ya onkana ed kibangat tayo,” so kuan na Roma 15:4. Kanian maabig no itepet tayo, Antoray naaralan tayo ed alimbawa nen Etai? Nengnengen tayo pa no akin a sikatoy nanmatoor ed si David. Anggaman taga’d sananey a bansa tan miaayam labat, binidbir ton si Jehova so mabilay a Dios tan si David so nilanaan nen Jehova. Agto inimano so busolan na saray Israelita tan Filisteo. Agto ninonot imay impamatey nen David ed samay maong a bumabakal na Filisteo a si Goliat tan ed dakel niran kabansaan to. (1 Sam. 18:6, 7) Noagta, say sankanonot nen Etai et inad-aro nen David si Jehova tan seguradon inimano toy marakdakep iran kualidad nen David. Tan ontan met nen David, baleg so respeto to ed si Etai. Impudir to ni ingen ed “lima nen Etai” so kakatlo na armada to sanen pinasya lay impilaban da ed armada nen Absalom!​—2 Sam. 18:2.

Ontan tayo met natan, kaukolan tayon pansagpotan ya ag-imanoen so panduruma na kultura, poli, bansan nanlapuan, tan antokaman nin lapuay panangidumaduma tan gula. Say imanoen tayo et saray maong a kalidad na arum. Ipapanengneng na impankaaro di David tan Etai a say pakapikabat tan pangaro ed si  Jehova so makatulong pian napaliisan tayoy panaglabi.

Diad pannodnonot tayon maong ed ehemplo nen Etai, oniay nayarin itepet tayo’d inkasikatayo: ‘Ontan met kasi katooran ko ed Mas Matalonggaring a David, si Kristo Jesus? Ipapanengneng ko ta so katooran ko diad maseseg a pibibiang ko’d panangipulong ed Panarian tan panaggaway babangatan?’ (Mat. 24:14; 28:19, 20) ‘Lawas ko kasin papaneknekay katooran ko, antokaman ni nagawa?’

Nagunggonaan met iray ulo na pamilya diad pandalepdep da ed napanuliranan a katooran nen Etai. Say impanmatoor to ed si David tan say desisyon ton ondapag ed nilanaan na Dios ya ari et maabig so epekto to ed saray bataan to. Mipadpara, saray desisyon na ulo na pamilya pian suportaan so tuan panagdayew et apektaen toy pamilya ra. Tan ompan lapud satan et makasagmak ira na temporaryon kairapan. Ingen ta oniay ipapaseguro na Biblia: “Matoor [si Jehova] ed saray matoor ed [sikato].”​—Sal. 18:25, MB.

Kayari na impibakal nen Absalom ed si David, aglan balot asalambit ed Kasulatan si Etai. Anggaman antikey labat so salaysay na Biblia nipaakar ed sikato, baleg lay naaralan tayo’d inkatoo to legan na samay maprobleman panaon na bilay nen David. Say impakasalambit na Biblia ed si Etai et paneknek a papablien tan tutumangan nen Jehova so ontan a klase na katooran.​—Heb. 6:10.