Iner so Nepeg a Kawalaan Mo No Onsabi Anggaan?

SANO deralen la nen Jehova iyan mauges a sistema diad Armagedon, anto kasi nagawa ed saray maptek? Oniay ebat na Uliran 2:21, 22: “Say maptek manayam naani dia ed dalin, tan say ayadyari [odino, andi-kabalawan] mansiansia naani ed sikato. Balet say marelmeng napegpeg a manlapu ed dalin, tan saray liputan nabagot ira ed sikato.”

Panon balet a mansiansia ed dalin iray andi-kabalawan? Wala kasi liktar a pasen parad sikara? Iner kasi nepeg a kawalaan da no onsabi anggaan? Walay apatiran salaysay ed Biblia ya ontulong ed sikatayon naebatan iraya.

Sanen Importante so Kawalaan

Oniay nabasa tayo ed 2 Pedro 2:5-7 nipaakar ed impangiliktar ed saray patriarkan di Noe tan Lot: “[Say Dios] agto intepel so daan a mundo bangbalet inlaban to si Noe, a pati arum nin pitora, sakey a managpulong na katunongan, dia ed impangitarok to na delap ed mundo na saray momoan. Tan no dinusa to ra, dia ed impaneral to, ed saray syudad na Sodoma tan Gomorra, impagmaliw to ra a dapol, tan ginawa to ra a panuliranan na saray totoo a manbilay na marumsis. Tan inlaban to si matunong a Lot, nen apaermen a tuloy na sankaugsan ya impanbilay na saray mauges a totoo.”

Panon a niliktar si Noe ed Delap? Inkuan na Dios ed sikato: “Say anggaan na amin a laman sinmabi ed arapan ko, ta say dalin napno na karawalan lapu ed sikara. Et nia, gaygayen ko ran pati dalin. Manggawa ka na sakey a biong a kiew a cipres.” (Gen. 6:13, 14) Ginawa nen Noe so biong unong ed ingganggan nen Jehova. Pitoy agew antis na uran, sikatoy binilin nen Jehova a mangiloob na ayayep ed biong tan onloob met iran sampamilya ditan. Diad komapiton agew, inkapot so puerta na biong, tan “say uran wala nensaman ed dalin ya apataploy agew tan apataploy labi.” (Gen. 7:1-4, 11, 12, 16) Si Noe tan say pamilya to et ‘nilaban ed danum.’ (1 Ped. 3:20) Sikaray niliktar lapud wadman ira’d loob na biong. Anggapo lay arum nin maligen a pasen a nabatikan da.​—Gen. 7:19, 20.

Diad kaso nen Lot, medyo miduma so instruksion. Impaamta ed sikato na duaran anghel no iner so agto nepeg a pansiansiaan. Inkuan da: “Antokaman a kien mo dia ed syudad [na Sodoma], ipaway mo ra ed sayan pasen. Ta deralen mi so saya a pasen.” Kaukolan ya apuraen day ‘onla’d palandey.’​—Gen. 19:12, 13, 17.

Ipapanengneng na saray agawa’d si Noe tan Lot ya “amta na Katawan so pangiliktar to ed saray masantos ed katukso, tan mangikana ed saray aliwan matunong ed leksab na kadudusa no nasabi agew na panangukom.” (2 Ped. 2:9) Diad sayan duaran kaso, importante no iner so kawalaan da pian niliktar ira. Kaukolan nen Noe so onloob ed biong. Kaukolan met nen Lot so ompaway ed Sodoma. Balet, onia kasin naynay so panangiliktar nen Jehova? Sarag to kasin isalba iray matunong inerman so kawalaan da, ya agda la kaukolay onalis? Pian naebatan itan, imanoen pa so duara nin salaysay.

Importante Kasin Naynay No Iner so Kawalaan na Sakey?

Antis a dinusa nen Jehova so Ehipto diad samay koma-samplon salot diad panaon nen Moises, ingganggan To iray Israelita a say dala na ayep a parad Paskua et iwalsik da ed saray patukok tan hamba na puertay kaabungan da. Akin? Pian no ‘onlabas si Jehova a mamakbak ed saray Ehipsios, et nanengneng toy dala a  walad dapit tagey na pinto tan saray nantupag a pasindeg, labsanan to itan a pinto tan agto abuloyan ya onloob so manamatey ed kaabungan da a mankabil ed sikara.’ Diad saman a mismon labi, “dinusa nen Jehova so saray amin a panguloan ya anak diman ed dalin ya Ehipto, nanlapu ed panguloan ya anak nen Faraon a nanyurong ed trono to, angga ed panguloan [na] dinakep a wadman ed pangawan, tan amin na saray panguloan ya anak na ayayep.” Saray panguloan na Israelita et niliktar anggan agla ra inmalis.​—Ex. 12:22, 23, 29.

Imanoen pa met so kaso nen Rahab, sakey a balangkantis a taga’d syudad a Jerico. Magano la’d saman a sakopen na Israelita so Insipan a Dalin. Sanen amoria nen Rahab a segurado lay kaderal na Jerico, imbaga to ed saramay duaran espiya ya amin a taga’dman et pinasyay kebbiew da ed iyaabante na armaday Israel. Inyamot to irayan espiya tan akikasi ed sikaran ipaseguro da a sano deralen da lay Jerico, sikato tan say pamilya to et agda komon ipilanor. Sikatoy binilin na saray espiya a tiponen toy interon pamilya to diad abung to a walad padir na syudad. No onalis ira’dtan, seguradon napilanor ira’d kaderal na interon syudad. (Jos. 2:8-13, 15, 18, 19) Balet, diad saginonor et inkuan nen Jehova ed si Josue a say “kuta na syudad, onggeba a marandantal.” (Jos. 6:5) Samay inisip na saray espiyan liktar a pasen et singa la napepeligro natan. Panon kasin niliktar si Rahab tan say sankaabungan to?

Sanen asabi lay panaon a panakop ed Jerico, inmeyag iray Israelita tan pinapaknol day tambuyog da. “Et agawa, sanen say baley [na Israel], nadngel to so tanol na tambuyog,” so inkuan na Josue 6:20, “say baley inmeyag na baleg ya eyag, [tan] say kuta nagba a marandantal.” Anggapo lay toon makapuger ed ikukusbo na padir. Balet say makapakelaw, tinmunda itan kasabi’d samay abung nen Rahab. Natan et ingganggan nen Josue imay duaran espiya: “Onloob kayo ed abung na balangkantis, tan ipaway yod’man so bii, tan amin a wala ed sikato, ya unong na sinambaan yo ed sikato.” (Jos. 6:22) Amin a walad loob na abung nen Rahab et nisalba.

Anto so Sankaimportantian?

Antoy naaral tayo ed sarayan salaysay na impangiliktar ed kinen Noe, Lot, tan saray Israelita ed panaon nen Moises, ontan met ed si Rahab? Panon irayan ontulong ed sikatayon naamtaan no iner so nepeg a kawalaan tayo sano onsabi so anggaan na sayan sistema?

Tua, niliktar si Noe lapud wadman ed biong. Balet, akin et wadman si Noe? Agta lapud pananisia tan katutulok to? “Ginawa nen Noe [so] unong na amin ya ingganggan na Dios ed sikato,” so kuan na Biblia. “Ontan so ginawa to.” (Gen. 6:22; Heb. 11:7) Sikatayo  balet ey? Gagawaen tayo kasin amin so ingganggan ed sikatayo na Dios? Si Noe et “sakey [met] a managpulong na katunongan.” (2 Ped. 2:5) Singa sikato, maseseg itayo met kasi ed panagpulong anggano ag-ondengel iray totoo?

Ag-aderal si Lot lapud tinaynan toy Sodoma. Sikatoy niliktar lapud matunong ed imaton na Dios tan nanermen a maong ed mauges a panagbilay na saray taga Sodoma tan Gomorra a masumlang ed ganggan. Sikatayo ey? Pakakagonigonan tayo met kasi so andi-baing a kagagawa na totoo natan? Odino, singa anggapo labat la’d sikatayo iratan? Gagawaen tayo kasi anggaay nayarian tayo pian mansiasiansian ‘andi-matik tan andi-dumsis, tan walad kareenan’?​—2 Ped. 3:14.

Diad kaso na saray Israelita ed Ehipto tan ed si Rahab a taga Jerico, niliktar ira ta nansiansia ra’d kaabungan da. Tan diad satan et kaukolan so pananisia tan katutulok. (Heb. 11:28, 30, 31) Seguro, kada Israelitan pamilya ed saman et ag-onkirekirem, ya agda alisay mata iray panguloan da legan dan narerengel so mantutumbokan a panugaog ed kaabungan na saray Ehipsio. (Exo. 12:30) Isipen pa labat no antoy alikna nen Rahab tan say pamilya to legan dan nalilikas so panasingger lan panasingger na ikukusboy padir na Jerico. No aglabat baleg so pananisia to, agto akapansiansian matulok tan inmalis la komon ed abung to.

Maganggano lan naderal iyan mauges a mundo nen Satanas. Agtayo ni amta no panon kasi panalimbeng nen Jehova ed totoo to diad satan a makapataktakot ya ‘agew na sanok to.’ (Sof. 2:3) Balet, inerman so kawalaan tayo tan antokaman so kipapasen tayo ed satan a bekta, seguradon nilaban itayo no walaan itayoy pananisia tan matulok itayo ed si Jehova. Balet, anggad agni itan sinmabi, nepeg a nawalaan tayoy dugan awawey nipaakar ed samay “silir” a tinukoy nen Isaias ed propesiya to.

“Onloob Ka ed Saray Silir Mo”

“Gala, baley ko, onloob ka ed saray silir mo tan ikapot mo so saray silir mo, tan ikapot mo so saray pintom ed liberliber mo,” so kuan na Isaias 26:20. “Yamot mo so inkasika ed daiset a panaon angga ed say kasanokan onlabas.” Nayarin primeron asumpal iyan propesiya nen 539 B.C.E. sanen sinakop na Medo-Persia so Babilonia. Kaloob nen Ciro a Persiano ed Babilonia, ompatnag ya ingganggan to ray totoo ya ag-ompapaway ed abung da lapud binilin to ray sundalo to a pateyen day siopaman a walad paway.

Diad panaon tayo, say nayarin tutukoyen na “silir” ed sayan propesiya et say masulok a 100,000 a kongregasyon na saray Tasi nen Jehova ed interon mundo. Walay importantin betang na sarayan kongregasyon ed bilay tayo, tan mantultuloy itan anggad idalan na “baleg ya irap.” (Apo. 7:14) Niganggan iray totoo na Dios ya onloob tan onamot ed saray “silir” da “angga ed say kasanokan onlabas.” Importante a nawalaan tayoy dugan panmoria ed kongregasyon tan pansiansiaen tayo itan. Nepeg met a determinado itayo lawas a mikasakey ed satan. Ipapuso tayo so impaseseg nen Pablo: “Tan manpapagalangan itayo ed sakey tan sakey pian manaayatan itayo ed aro tan dia ed saray maabig a gawa. Ya agtayo paulyan so saray panmumuyong tayo, singa ugali na saray arum, noag ingen mansisimbawaan itayo, tan nagkalalo la, lapud nanengneng yo a manasingger so agew.”​—Heb. 10:24, 25.

[Saray litrato ed pahina 7]

Anto so naaralan tayo ed saray panangiliktar na Dios nensaman?

[Litrato ed pahina 8]

Diad panaon tayo, anto so nayarin tutukoyen na saray “silir”?