Kaasawaan a Lalaki, Alig Yoy Panangaro nen Kristo!

DIAD samay unor a labi nen Jesus diad dalin, oniay inkuan to ed saray matoor ya apostol to: “Sakey a balon ganggan so iter ko ed sikayo, a manaaroan so sakey tan sakey ed sikayo; salanti unong na impangarok ed sikayo, pian manaaroan met so sakey tan sakey ed sikayo. Lapu ed saya amin a too nabidbiran da a sikayo ray babangatan ko, no wala so aro yo ed sakey tan sakey.” (Juan 13:34, 35) On, kaukolan a manaaroan iray tuan Kristiano.

No nipaakar ed saray Kristianon asawan lalaki, oniay direktan insimbawa nen Pablo: “Asawan lalaki, aroen yo so saray kaasawaan yo, a singa met si Kristo ya inaro to so iglesia, tan insaklang to so inkasikato nisengeg ed [satan].” (Efe. 5:25) Panon a niyaplika na sakey ya asawan lalaki iyan Makasulatan a bilin ed panamaley da, nagkalalo la no say asawa to et dedikadon lingkor nen Jehova?

Pinabpabli nen Kristo so Kongregasyon

Inkuan na Biblia: “Ontan met so nepeg na saray asawan lalaki a panangaro ra ed saray kaasawaan dan dili a singa panangaro ra ed laman dan dili. Say mangaro ed asawa ton dili aroen toy dilin laman to. Ta anggapo ni toon amusol ed laman ton dili, noag ingen sikato so taganoen to tan pablien to a singa met si Kristo a pinabli to so iglesia.” (Efe. 5:28, 29) Inad-aro nen Jesus iray disipulo to tan pinabpabli to ira. Anggaman ag-ira ayadyari, maomaong so impideneng to’d sikara. Lapud labay ton ‘ipresenta ed inkasikato so karakpan na kongregasyon,’ say inimano to et saray maong a kualidad na saray disipulo to.​—Efe. 5:27, NW.

Singa si Kristo ya imbalikas toy panangaro to ed kongregasyon, nepeg a diad salita tan gawa et ipanengneng na asawan laki so panangaro to ed akulaw to. No say asawan laki et lawas ton ibabalikas so panangaro to’d akulaw to, nalikna na asawan bii so panamabli tan liket. Balet, no pappaulyanan o babaliwalaen na asawan laki so akulaw to, natural labat ya agmaliket so asawan bii, anggano mainawa ni kabibilay da.

Panon a nipanengneng na asawan laki a papablien toy asawa to? No diad limog na arum a totoo, marespeto ton ipakabat so akulaw to tan komendaan to lapud suporta to. No akatulong so akulaw to ed intalona na pamilya ra, ipapaamta to itan ed arum. No siksikaran dua labat, sankalikna to met so panangaro na masiken to. Nayarin angkekelag a bengatla labat so pamemben ed lima, imis, lakap, tan pangomenda, balet ta im-importante iratan ed sakey a bii.

‘Agto Imbaing a Tawagen Iran Agagi’

Si Kristo Jesus et “ag-ambaing a manawag ed [saray alanaan a papatumbok to] na agagi.” (Heb. 2:11, 12, 17) No sakey kan Kristianon asawan laki, agmo lilingwanan a say asawam et sakey met a Kristianon kaagian mo. Say dedikasyon to ed si Jehova et mas importante nen say impansipanan yo sanen nankasal kayo, balanglan sikatoy abautismoan sakbay o kayari na satan. Kanian, sano diad aral et sikatoy tawagen mon mankomento, matukoy labat a say panawag mo’d akulaw mo et “Agi” odino “Sister.” Say akulaw mo et kaagian mo met, aliwa labat lan diad Kingdom Hall, noagta pati diad abung. No panon a maomaong tan marespeto ka ed sikato diad Kingdom Hall, ontan met so kaukolan a pideneng mo ed sikato diad abung.

No walaray kaaruman a responsabilidad mo ed kongregasyon, nayarin no maminsan et nairapan kan balansien so responsabilidad mo ed pamilya tan kongregasyon. Say maabig a  kooperasyon na saray mamatatken tan ministeryal a lingkor, ontan met ed say pangiyasain na pigaran responsabilidad ed arum, so makatulong pian mas malaem so panaon mo ed agim a mankakkaukolan a maong ed sika, salanti, say asawam. Tandaan mon sarag na arum ya agagin lalaki a gawaen so kimey a niasain ed sika diad kongregasyon, balet sika labat so alenleneg ya agin inkasakey na panangasawa ed si asawam.

Niarum ni, sika so ulo nen asawam. Oniay ibabaga na Biblia: “Say ulo na balang laki si Kristo; tan say ulo na balang bii say laki.” (1 Cor. 11:3) Panoy dugan pangipatnag mo na inkaulom? Diad maaron paraan, aliwan diad pangulit-ulit ed satan a teksto tan pamaskar ed asawam a respetoen to ka. Duga so pangipatnag mo’d inkaulom no aligen mo si Jesu-Kristo diad pidedeneng mo ed asawam.​—1 Ped. 2:21.

“Sikayo so Kakaarok”

Tinawag nen Jesus iray disipulo to a kakaaro. Inkuan to’d sikara: “Agta kayo la tawagen ya ariripen, ta say aripen agto amta so gawaen na katawan to. Balet tinawag ta kayo a kakaaro, ta amin a bengabengatla a nadngel ko ed Amak impaamtak ed sikayo.” (Juan 15:14, 15) Maong so komunikasyon di Jesus tan saray babangatan to. Diad saray okasyon et sankaiba ira. ‘Si Jesus tan saray babangatan to’ et naimbitaan ed sakey a bansal ed Cana. (Juan 2:2) Wala met iray paborito ran laen, singa diad hardin na Getsemani. Inkuan na Biblia a “si Jesus [et] mabetbet ya akiragup diman ed saray babangatan to.”​—Juan 18:2.

Seguradon labalabay na asawan bii a naliknan sikato so sankaapitan a kaaro na masiken to. Talagan kakkaukolan a sikayon sanasawa et panliketan yoy bilay a sankaiba! Panlingkoran yoy Dios a sankaiba. Panggayagaan yoy panaral na Biblia a sankaiba. Manakar, mantongtong, tan mangan a sankaiba. Komon ta agkayo labat sanasawa, noagta, maapit met a sankaaro.

“Inaro To Ra Angga ed Kasampotan”

‘Inaro nen Jesus iray disipulo to anggad kasampotan.’ (Juan 13:1) Walaray asawan lalaki ya agda inalig si Kristo ed sayan pamaakaran. Nayarin taynan da ni ingen so ‘asawa na inkaugaw da,’ pian mangasawa na mas ug-ugaw.​—Mal. 2:14, 15.

Balet, walaray arum a mangaalig ed si Kristo. Sakey ed sikara et si Willi, a say asawa to et kinmapuy lay bunigas to, kanian sikatoy aasikasoen to ed loob la na dakel a taon. Antoy panmoria nen Willi ed saya? Oniay inkuan to: “Lawas kon ipapasen so akulaw ko a regalo na Dios, tan sikatoy pinabpablik a maong. Sakey ni, 60 taon lay linmabas sanen insipan kon sikatoy asikasoen ko, ed inawa tan ed irap. Agkon balot lingwanan itan a sipan.”

Sikayoran asawan lalaki, alig yoy panangaro nen Kristo. Pabli yoy matakot ed Dios ya asawa yo​—say agi yo tan kaaro yo.

[Litrato ed pahina 20]

Kasin say asawam so sankaapitan a kaarom?

[Litrato ed pahina 20]

Itultuloy yon ‘aroen so kaasawaan yo’