Say Matoor a Managpaga tan say Mananguley ya Ulop To

“Siopa sirin so managpaga a napanmatalkan tan makalakal, ya iyan na Katawan to a manbantay ed sankaabungan to, pian sano kanepegan to iter to ed sikara so nabebetangan dan tagano?”​—LUC. 12:42.

1, 2. Anto so importantin intepet nen Jesus nipaakar ed kaunoran iran agew?

SANEN iiter nen Jesus iray kabiangan ed tanday kaunoran ya agew, oniay intepet to: “Siopa sirin so matoor tan makabat ya aripen, a sikatoy impasen na katawan to a mangimaton ed sankaabungan to, a mangiter ed sikara na tagano ed panaon a kinepeg to?” Insan to imbaga a sayan aripen et natumangan ed katooran to diad pakaturo to bilang manangasikaso ed amin a kayarian na Katawan.​—Mat. 24:45-47.

² Ontan met so intepet nen Jesus pigay bulan ed asasakbay. (Basaen so Lucas 12:42-44.) Diad saman et tinawag ton “managpaga” imay aripen. Say managpaga et sikato so mayurdomo odino manangasikaso ed saray lingkor, ingen ta sakey met a lingkor. Siopa iyan aripen,  o managpaga, tan panon ton itataryay “tagano ed panaon a kinepeg to”? Importante a naamtaan tayo no antoy uusaren a paralanan pian nitaryay espiritual a tagano.

3. (a) Anto so maslak a panmoria na saray komentaristay Kakristianoan ed saramay imbaga nen Jesus nipaakar ed “aripen”? (b) Siopa imay “managpaga,” o “aripen,” tan anto met so tutukoyen na “sankaabungan”?

³ Unong ed maslak a panmoria na saray komentaristay Kakristianoan, saray imbaga nen Jesus et ontutukoy ed saramay walaay posisyon ed limog na mankuan a Kristianos. Balet si Jesus, samay “katawan” ed ilustrasyon, et agto imbagan amayamay iyan aripen tan nitaytayak ed nanduruman sekta na Kakristianoan. Say malinlinew ya imbaga to et saksakey labat so “managpaga,” odino “aripen,” a pangipudiran toy amin a kayarian to. Kanian unong a naynay ya ipapaliwawa na sayan magasin, irerepresenta na sayan managpaga so “daiset a papastolan,” salanti, saray alanaan a disipulo bilang grupo. Kapkapanukoy nen Jesus ed sarayan papastolan sanen sinalambit toy nipaakar ed managpaga. (Luc. 12:32) Say “sankaabungan” et ontutukoy met lanlamang ed sayan grupo balet ta idadanet to so betang da bilang indibidual. Balet say tepet et, Kasin balang indibidual a membro na sayan aripen a klase et mibibiang ed panangitaryay espiritual a tagano ed dugan panaon? Naamtaan tayo so ebat sano usisaen tayon maong so ibabagay Kasulatan.

Say Aripen nen Jehova Nensaman

4. Panoy impanukoy nen Jehova ed kadaanan a nasyon na Israel, tan antoy nepeg tayon imanoen ed satan a nasyon?

⁴ Tinukoy nen Jehova so totoo to, salanti, say kadaanan a nasyon na Israel, bilang saksakey ya aripen. “Sikayo so saray tasik, kuan nen Jehova tan say aripen ko a pinilik.” (Isa. 43:10) Amin a membro na nasyon na Israel so kaiba ed satan a sakey ya aripen a klase. Balet, nepeg tayon imanoen a say makanresponsabilidad labat ed panagbangat ed nasyon et saray Levita, saserdote man o andi.​—2 Awa. 35:3; Mal. 2:7.

5. Unong ed si Jesus, anto so nagawan baleg a pananguman?

⁵ Say aripen kasi a tutukoyen nen Jesus et say nasyon na Israel? Andi. Nibaga tayoy ontan ta oniay inkuan nen Jesus ed saray Judio ed panaon to: “Say panariay Dios naekal naani ed sikayo, tan niiter naani ed sakey a nasyon a mamapaway na saray bungabunga to.” (Mat. 21:43) On, walay nagawan pananguman. Mangusar si Jehova na balon nasyon. Anggaman ontan, no nipaakar ed uksoyan na espiritual a panagbangat, say responsabilidad na aripen ed ilustrasyon nen Jesus et mipara ed samay “aripen” na Dios ed panaoy kadaanan ya Israel.

Pinmatnag so Matoor ya Aripen

6. Anton balon nasyon so niwala nen Pentecostes 33 C.E., tan sioparay nagmaliw a kabiangan na satan?

⁶ Say balon nasyon, say “Israel na Dios,” et tugyopen na saray espiritual ya Israelita. (Gal. 6:16; Roma 2:28, 29; 9:6) Niwala itan sanen inkalbo so espiritu na Dios nen Pentecostes 33 C.E. Kayari na satan, amin a Kristianon nilanaan na espiritu et nagmaliw a kabiangan na samay nasyon, a natan et manlilingkor bilang aripen a tinuro na Katawan a Jesu-Kristo. Kada membro na satan a nasyon et naikdan na kimey a mangipulong na maong a balita tan manggaway babangatan. (Mat. 28:19, 20) Balet kasin balang membro na satan a grupo et mibibiang ed panangitarya na espiritual a tagano ed dugan panaon? Nengnengen tayo no antoy ebat na Kasulatan.

7. Diad gapo, anto so manunan kimey na saray apostol, tan anto nin responsabilidad so naawat da?

⁷ Sanen tinuro nen Jesus so 12 apostol to, nibaki iran mangipulong na maong a balita, tan saya so manunan kimey da. (Basaen so Marcos 3:13-15.) Sayan asainmin et mitunosan ed manunan kabaliksan na Griegon salita ya apostolos, ya inala ed terminon mankabaliksan na “nibaki.” Balet, diad ilalabas na panaon,  sanen magano lan iletneg so Kristianon kongregasyon, say nagmaliw lan responsabilidad na sakey ya apostol et say “panangasikaso.”​—Gawa 1:20-26, NW.

8, 9. (a) Anto so manunan aasikasoen na 12 apostol? (b) Siopa niray naikdan na kaaruman a responsabilidad, unong a kinompirma na mananguley ya ulop?

⁸ Antoy manunan aasikasoen na saray 12 apostol? Naamtaan so ebat ed saramay agawa kayari agew na Pentecostes. Sanen walaray nansasangsangan nipaakar ed inagew-agew a panagbunog na tagano parad saray balo, pinandaragup na 12 apostol iray disipulo tan inkuan da: “Agmanepeg a paulyan mi so Salita na Dios pian manlingkor kami ed dulang.” (Basaen so Gawa 6:1-6.) Kanian, saray apostol et anuro na kualipikadon lalaki a mangasikaso “ed sayan gawa” ta pian nausar day panaon da ed “panangipulong na salita.” Sayan uksoyan et nanresulta ed panamendisyon nen Jehova legan a “manbaleg so Salita na Dios; et say bilang na saray binangatan dinmakerakel a tuloy ed Jerusalem.” (Gawa 6:7) Kanian say manunan akanresponsabilidad ed panangitarya ed espiritual a tagano et saray apostol.​—Gawa 2:42.

⁹ Diad saginonor, arum so naikdan na ambelat iran responsabilidad. Diad panangigiya na masanton espiritu, imbaki na kongregasyon na Antioquia si Pablo tan Bernabe bilang misionero. Nagmaliw met iran apostol, anggaman ag-ira kaiba ed orihinal a 12. (Gawa 13:1-3; 14:14; Gal. 1:19) Say inkaturo ra et kinompirma na mananguley ya ulop ed Jerusalem. (Gal. 2:7-10) Ag-abayag kayari na satan, akibiang si Pablo ed panangibunog ed espiritual a tagano. Insulat to met so sankaunaan ya apuyanan a sulat to.

10. Nen inmunan siglo, amin kasin Kristianon alanaan et akibiang ed panangitaryay espiritual a tagano? Ipaliwawa.

¹⁰ Anggaman ontan, kasin amin a Kristianon alanaan na espiritu et mibibiang ed panangasikasoy kimey a panagpulong tan ed panangitaryay espiritual a tagano? Andi. Inkuan nen apostol Pablo: “Apostoles ira kasi ya amin? Propetas ira kasi ya amin? Managbangat kasi ira ya amin? Managgawa ra kasi ya amin na pakelaw?” (1 Cor. 12:29) Nensaman, anggaman amin a Kristianon tinagibi na espiritu et nampupulong, say nausar a mansulat ed 27 a libro na Kristianon Griegon Kasulatan et limitado labat, salanti, walwalora.

Say Matoor ya Aripen Diad Panaon Tayo

11. Antoray kaykayarian ya ipapaasikaso ed aripen?

¹¹ Malinlinew ed saramay salita nen Jesus diad Mateo 24:45 a wala nin siansiay matoor tan makabat ya aripen a klase a manbibilay ed dalin legan na panaon na anggaan. Tinukoy iraya na Apocalipsis 12:17 bilang “nakdaan” na bini na bii. Bilang grupo, sayan nakdaan so tinuron mangasikaso ed amin a kaykayarian nen Kristo ed dalin. Sarayan kaykayarian na Katawan diad dalin ya ipapaasikaso ed matoor a managpaga et laktipen toy mangaraldalin a sakop na Panarian tan saray pasilidad ya uusaren ed panangipulong ed maong a balita.

12, 13. Panon a naamtaan na sakey a Kristiano no mangatatawen so ilalo to?

¹² Panon a naamtaan na sakey a Kristiano no mangatatawen so ilalo to tan kabiangan ed nakdaan na espiritual ya Israelita? Say ebat et walad samay imbaga nen apostol Pablo ed saramay kapara ton walaan na mangatatawen ya ilalo: “Ta ganagana ya intonton na espiritu na Dios sikara ya so anak na Dios. Ta agyo inawat lamet so espiritu na inkaaripen, ya onkana a takot, noag inawat yo ingen so espiritu na inkipaanak, a lapud saya yakis tayo, Abba, Ama. Say dilin espiritu so mamatua ed espiritu tayo, ya anak itayo na Dios: Tan no anak itayo, tomatawir itayo met; tomatawir na Dios, tan mitatawir ed Kristo; a no ontan a mantepel itayo pati sikato, pian iba to itayo a nigloria.”​—Roma 8:14-17.

¹³ Diad simplin panangibaga, sarayan indibidual et nilanaan na masanton espiritu na Dios tan akaawat na mangatatawen ya “inkatawag,”  odino imbitasyon. (Heb. 3:1) Say Dios so angimbita ed sikaran mismo. Tan dia met ed biang da et tampol dan inawat so pakatagibi bilang ananak na Dios, ya anggapoy alikna ran duaruwa o takot. (Basaen so 1 Juan 2:20, 21.) Kanian aliwan sikara so mamipili ed sayan ilalo, noagta si Jehova so mangiiter na tatak to, odino masanton espiritu to, ed sikara.​—2 Cor. 1:21, 22; 1 Ped. 1:3, 4.

Say Dugan Panmoria

14. Anto so panmoria na saray alanaan ed inkatawag da?

¹⁴ Anto so nepeg a panmoria na sarayan alanaan ed sarili da legan dan aalagaren so mangatatawen a tumang da? Bibidbiren da ya anggaman akaawat ira na alay abig ya imbitasyon, imbitasyon ni labat itan. Nepeg a mansiansia iran matoor anggad patey pian nagamoran da itan a tumang. Diad kapaabebaan et nalilikna da met so alikna nen Pablo: “Agagik ira, agko ibilang so inkasiak a dili a sikato so akapet ko la: noag sakey so gawaen ko, lingwanan so saray bengatlan abenegan, tan dampoten ko so saray bengatla a wala ed unaan. Ontundas ak a mamaarap ed kalat a nipaakar ed pakalak na tumang na atagey a panatawag na Dios dia ed Kristo Jesus.” (Fil. 3:13, 14) Nepeg a gawaen na saray nakdaan so anggaay nayarian dan ‘manakar a makanakana ed kimey ya akatawagan da tekep na kaabebaay linawa,’ a gawaen da itan “ed takot tan giwgiw.”​—Efe. 4:1, 2; Fil. 2:12; 1 Tes. 2:12.

15. Anto so nepeg a panmoria na saray Kristiano ed saramay mibibiang ed saray emblema diad Memoryal, tan antoy panmoria na saray alanaan ed sarili da?

¹⁵ Diad biek a dapag, anto so nepeg a panmoria na saray Kristiano ed sakey a toon mangibabagan sikatoy alanaan tan ginmapon mibiang ed saray emblema diad Memoryal? Sikatoy agtayo nepeg a husgaan. Sikato tan si Jehova labat lay makaamta ed satan. (Roma 14:12) Anggaman ontan, saramay peteg ya alanaan et agmanpapaimportante. Agda iisipen a daput no alanaan ira et walaan la ray nikadkaduman pakatalos ya agbalot nagamoran na anggan saray eksperiensyado lan membro na “baleg ya ulop.” (Apo. 7:9) Agda met iisipen a kaukolan a mas dakel so masanton espiritun naawat da nen saray kakaiba ran ‘arum a karnero.’ (Juan 10:16) Agda iilaloay espisyal a panagtrato; tan agda met iisipen a daput no mibibiang ira ed  saray emblema et mas atagey la ra nen saray aturon elder ed kongregasyon.

16-18. (a) Amin kasin alanaan et mibibiang ed panangiparungtal na balon espiritual a pakatalos? Iyilustra. (b) Akin et agla kaukolan ya onkonsulta ni so Mananguley ya Ulop ed amin a mibibiang ed emblema?

¹⁶ Amin kasi na sarayan alanaan et regular a mankokonsultaan parad panangiparungtal na balon espiritual a pakatalos? Andi. Anggaman bilang grupo et responsabilidad na sayan aripen so panagano ed espiritual a sankaabungan, aliwan amin a membro na aripen a klase et nampaparay responsabilidad odino kimey da. (Basaen so 1 Corinto 12:14-18.) Singa nibaga la, nen inmunan siglo, anggaman amin da et mibibiang ed importantin kimey a panagpulong, dagdaiset so nausar a mangisulat ed saray libro na Biblia tan mangasikaso ed Kristianon kongregasyon.

¹⁷ Bilang ilustrasyon: No maminsan et ibabaga na Kasulatan a say “kongregasyon” et mangaasikaso ed saray hudisyal a pamaakaran. (Mat. 18:17, NW) Balet diad tua, saray elder labat so talagan mangaasikaso ed satan, ya irerepresenta ra so kongregasyon. Agda la ipapanon iray desisyon da ed kada membro na kongregasyon. Noagta gagawaen da iray kimey da unong ed teokratikon uksoyan, ya onkikiwas ira diad biang na interon kongregasyon.

¹⁸ Mipadpara, natan et pigpigara labat so alanaan a walaay responsabilidad a mangirepresenta ed aripen a klase. Saya iramay membro na Mananguley ya Ulop na saray Tasi nen Jehova. Sarayan lalaki ya alanaan na espiritu so mangaasikaso ed kimey na Panarian tan ed programan espiritual a panagtagano. Balet, singa met nen inmunan siglo, say Mananguley ya Ulop et agla onkokonsulta ed kada membro na aripen a klase sakbay a mandesisyon. (Basaen so Gawa 16:4, 5.) Anggaman ontan, amin ya alanaan a Tasi et sigpot a mibibiang ed importantin kimey a panagani a nagagawa la natan. Bilang grupo, say “matoor tan makabat ya aripen” et saksakey a laman, balet bilang indibidual, et nandurumay kimey da.​—1 Cor. 12:19-26.

19, 20. Anto so balansin panmoria na baleg ya ulop ed “matoor tan makabat ya aripen” tan diad Mananguley ya Ulop to?

¹⁹ Anto so nepeg ya epekto na asalambit iran katuaan ed ondarakel a baleg ya ulop a say ilalo ra et manbilay na andi-anggaan diad dalin? Bilang kabiangan ed kaykayarian na Ari, panliliketan day sigpot a pikoopera ed saray uksoyan a ginawa na Mananguley ya Ulop, a mangirerepresenta ed “matoor tan makabat ya aripen.” Aapresyaen na saray membro na baleg ya ulop so espiritual a tagano ya itatarya diad panangiwanwan na Mananguley ya Ulop. Kabansag na satan, anggaman rerespetoen na baleg ya ulop so aripen a klase, papaliisan dan itandoro so siopaman a mangibabagan sikatoy sakey ed saray alanaan. No peteg ya alanaan na espirituy Dios so sakey a Kristiano, agto labayen odino anapen so ontan a panagtrato.​—Gawa 10:25, 26; 14:14, 15.

²⁰ Balanglan kabiangan itayo ed “sankaabungan,” a kaiba’d saray nakdaan, odino membro itayoy baleg ya ulop, komon ta determinado itayon sigpot a mikoopera ed matoor a managpaga tan say Mananguley ya Ulop to. Komon ta balang sakey ed sikatayo et mantultuloy a manbantay tan manmatoor anggad kasampotan.​—Mat. 24:13, 42.

Nanonotan Mo Kasi?

• Siopa so “matoor tan makabat ya aripen,” tan anto so natutukoy a “sankaabungan”?

• Panon a naamtaan na sakey no sikatoy walaan na mangatatawen ya inkatawag?

• Siopa so manunan responsable ed panangitaryay balon espiritual a tagano?

• Panon a nepeg a moriaen na sakey ya alanaan so inkasikato?

[Tepetepet Parad Panagaral]

[Litrato ed pahina 23]

Natan, say Mananguley ya Ulop so mangirerepresenta ed matoor tan makabat ya aripen. Ontan met so uksoyan nen inmunan siglo