Tepetepet na Saray Manbabasa

Anta nampulong si Jesus ed interon Israel, akin et imbaga nen apostol Pedro a saray Judio tan saray mananguley da et kinmiwas ya ‘anggapoy pikakabat’ sanen sikatoy impapatey da?​—Gawa 3:17.

Sanen kakatongtongen nen apostol Pedro so grupo na saray Judio nipaakar ed eebatan da’d impatey na Mesias, inkuan to: “Amtak a lapu ed agyo pikakabat, ginawa yo so singa ginawa met na saray makauley yo.” (Gawa 3:14-17) Nayarin walaray Judion ag-akatebek a si Jesus so Mesias odino agda atalosan iray bangat to. Saray arum balet et anggapoy pilalek dan paliketen so Dios, manlalabi ira, maimon, tan binusol day Jesus, kanian agda binidbir a sikato so Mesias.

Nengnengen tayo pa no panon a naapektoay panmoria na dakel a Judio ed ibabangat nen Jesus lapud anggapoy pilalek dan paliketen si Jehova. Mabetbet a manbabangat si Jesus panamegley na saray ilustrasyon, ya ipapaliwawa to lanlamang itan ed saramay malabay a makaaral. Balet, arum ed saray totoo et ag-interesado tan tinaynan day Jesus, ya ag-ira nansagpot a talosay imbaga to. Aminsan ni ingen et asyodotan so arum ed saray disipulo to lapud ilustrasyon ya inusar to. (Juan 6:52-66) Ag-amoria na saratan a totoo ya aamtaen labat nen Jesus no kasin akaparaan iran umanen so kanonotan tan kagagawa ra. (Isa. 6:9, 10; 44:18; Mat. 13:10-15) Imbaliwala da met so propesiya a say Mesias et manbangat panamegley na saray ilustrasyon.​—Sal. 78:2.

Lapud panaglabi, ag-inawat na arum so bangabangat nen Jesus. Sanen sikatoy nambangat ed sinagoga na binalegan ton baley a Nazaret, “nikelawan” iray totoo. Balet ta imbes a bidbiren dan si Jesus so Mesias, kinuestion da ni ingen so nipaakar ed pamilya to, a kuan dan: “Iner so angalaan na sayan too na sarayan bengatla? . . . Aliwa ta’n saya man so panday [odino, karpentero], ya anak nen Maria, tan agi nen Santiago, tan Jose, tan Judas, tan Simon? Tan andi ta ra dia ed sikatayo so saray agi ton bibii?” (Mar. 6:1-3) Lapud mairap labat so pamilyan nanlapuan nen Jesus, minoria na saray taga Nazaret a saray bangat to et anggapoy kana.

Saray lider na relihyon balet ey? Karaklan ed sikara et agdinmengel ed si Jesus lapu met ed panaglabi tan anggapo met so pilalek dan paliketen so Dios. (Juan 7:47-52) Sakey ni, agda inawat iray bangat nen Jesus lapud imon da, ta naaala toy imano na totoo. (Mar. 15:10) Tan seguradon pansyodotan a maong na dakel a prominentin totoo so impangiwalwal tan impangondena to’d pansimpisimpitan tan panamalikdo ra. (Mat. 23:13-36) Manepeg labat so impangukom nen Jesus ed sikara lapud ginagala ran agkabaten so Mesias. Inkuan to’d sikara: “Abagey kayo la makakabat ed ganggan! Ta inekal yo so tombok na kakabatan; agkayo linmoob lanlamang [ed Panarian] et sinebelan yo so saray onloob komon.”​—Luc. 11:37-52.

Diad loob na talora tan kapalduan taon et impulong nen Jesus so maong a balita diad interon Israel. Sikatoy angipasal met na dakel pian mangituloy ni ed satan a kimey. (Luc. 9:1, 2; 10:1, 16, 17) Talagan epektibo so impanpulong nen Jesus tan saray disipulo to, ta oniay inreklamo na saray Fariseo: “Nia! Say mundo tinmumbok ed sikato.” (Juan 12:19) Kanian agto labay ya ibagan anggapon balot so amta na karaklan a Judio ed mensahen impulong nen Jesus. Ingen ta nibagan ‘anggapoy pikakabat’ da nipaakar ed si Jesus bilang Mesias. Sarag da pan kabaten tan aroen komon so Mesias, balet ta agda ginawa itan. Akinonong so arum ed sikara pian ipapatey si Jesus. Kanian oniay impaseseg nen apostol Pedro a gawaen da: “Magbabawi kayo sirin, tan manpataoli kayo, pian napunas so saray kasalanan yo, pian onsabi so saray panaon na painawa a manlapu ed arap na Katawan. Tan ibaki to so Kristo a tinandaan nipaakar ed sikayo, salanti [si] Jesus.” (Gawa 3:19, 20) Mapatpatnag a dinengel itan na nilibon Judio, a pati say “baleg ya ulop na saray saserdotes.” Nagbabawi ira tan agamoran day panangabobon nen Jehova. Sirin et agla ra kinmiwas a singa andian na pikakabat.​—Gawa 2:41; 4:4; 5:14; 6:7.