Aligen si Jesus​—Tekepay Aro so Panagbangat Yo

“Anggapo ni too a nansalita na onia.”​—JUAN 7:46.

1. Antoy reaksion na totoo ed panagbangat nen Jesus?

ANTO kasi reaksion mo no aktual a walad arapan mo si Jesus a manbabangat? Seguradon madengedengel ka! Diad Biblia et nabasa tayo no antoy reaksion na saramay akadngel ed panagbangat to. Singa bilang, inkuan nen Lucas a saray taga Nazaret et “nikelkelawan . . . ed makapasagyat iran salita ya imbabalikas to.” Tan inkuan nen Mateo a saramay akadngel ed Sermon nen Jesus ed Palandey et “nankelkelaw ed panagbangat to.” Ontan met, unong ed si Juan, saramay imbakin opisyal a mangerel ed si Jesus a pinmawil a paoypaoy et nankuan: “Anggapo ni too a nansalita na onia.”​—Luc. 4:22; Mat. 7:28; Juan 7:46.

2. Panon so impanbangat nen Jesus?

² Ag-alingo-lingo iraman ya opisyal ed imbaga ra. Si Jesus so sankatalonggaringan a Managbangat ed anggan kapigan. Say panagbangat to et malinew, simpli, tan anggapon balot so makasuppiat ed panagkatunongan to. Agaylay dunong ton angusar na saray ilustrasyon tan tepetepet. Intukoy toy panagbangat to ed saray katongtong to, prominente man ira odino ordinaryon totoo. Anggaman aralem iran katuaan so imbangat to, mainomay iratan a talosan. Balet, aliwa labat lan saratan so rason no akin a matalonggaring a Managbangat si Jesus.

Aro so Sankaimportantian a Kualidad

3. Bilang managbangat, antoy pidumaan nen Jesus ed saray kapanaonan ton lider na relihyon?

³ Nayarin walara met iray eskriba tan Fariseo ya intelihente tan maong a manbangat. Ingen, akin a say panagbangat nen Jesus et talagan midumaan ed sikara? Lapud anggapoy panangaro na saraman a lider na relihyon ed ordinaryon totoo. Kabkabusol da iratan a totoo tan ipapasen da iran “naayew.” (Juan 7:49) Balet si Jesus et inabagey to ra lapud “maermen tan abuybuyak ira, a singa saray karnero ya anggapoy pastol” da. (Mat. 9:36) Sikatoy maaro, mapangasi, tan maomaong. Saramay lider na relihyon et anggapoy tuan panangaro ra ed Dios. (Juan 5:42) Bangta si Jesus et inaro toy Ama to tan nanliketan ton sinumpal so linawa To. Pinikewet na saray lider na relihyon so salita na Dios parad pakagunggonaan da. Miduma si Jesus ed sikara ta inaro toy “salita na Dios,” imbangat to itan, impaliwawa to, indepensa to, tan nambilay unong ed satan. (Luc. 11:28) On, mabitabitar ed personalidad nen Kristo so panangaro. Sankapatnagan itan ed saray bangat to, ed  pidedeneng to’d saray totoo, tan ed paraan na impanbangat to.

4, 5. (a) Akin et importante a tekepay panangaro so panagbangat tayo? (b) Sano manbabangat, akin et importante met so kakabatan tan dunong?

⁴ Sikatayo ey? Bilang papatumbok nen Kristo, pampipilalekan tayon aligen so ehemplo to diad bilay tan ministeryo tayo. (1 Ped. 2:21) Kanian, sano ibabangat tayo ed arum so Biblia, say gagala tayo et aliwa labat lan pian mangiter na impormasyon noagta labay tayo met ya ipatnag iray kualidad nen Jehova, nagkalalo la say panangaro to. Dakel man odino daiset so kakabatan tayo, marundunong itayo man a manbangat odino agtanto, say aron ipapanengneng tayo so ontulong pian nasabi kapusoan na saray pupulongan tayo. Pian talagan epektibo itayo ed panaggaway babangatan, nepeg tayon aligen si Jesus diad pambangat tekep na aro.

⁵ Siempre, pian magmaliw a maong a managbangat, kaukolan tayoy kakabatan, salanti, amta tayo no antoy ibabangat tayo, tan kaukolan tayo met so dunong diad panginabang ed satan. Tinulongan nen Jesus iray disipulo to a nagawaan itan a dua. Tutulongan itayo met nen Jehova natan panamegley na organisasyon to. (Basaen so Isaias 54:13; Lucas 12:42.) Balet, siansian say gagala tayo et say pambangat ya aliwan say nonot labat so usaren noagta pati puso. Balibali resulta na panagbangat tayo no maniiba so kakabatan, dunong, tan panangaro. Kanian, antoray paraan a nipanengneng tayoy panangaro sano manbabangat itayo? Panon itan ya impatnag nen Jesus tan saray disipulo to? Nengnengen tayo.

Nepeg Tayon Aroen si Jehova

6. Panon tayon itotongtong so nipaakar ed sakey ya inad-aro tayo?

⁶ Panlikliketan tayon itongtong ed arum iray bengatlan importante ed sikatayo. Tan sano mangiistorya itayo nipaakar ed saratan, mabilabilay tan maligligsa itayo. Nagkalalo lan tua iya no say iistoryaen tayo et nipaakar ed sakey ya inad-aro tayo. Natural labat a labalabay tayon ibaga ed arum iray amta tayo nipaakar ed sikato. Sikatoy rerespetoen tan idedepensa tayo, tan puro positibo iray ibabaga tayo nipaakar ed sikato. Gagawaen tayo itan lapud labay tayon onapit met so liknaan na arum ed sikato.

7. Antoray ginawa nen Jesus lapud panangaro to ed Dios?

⁷ Pian natulongan tayo so totoo a naaro met si Jehova, kaukolan a sikatoy kabat tayo tan aaroen tayon mismo. Lautla ta say dugan panagdayew et akabase ed panangaro ed Dios. (Mat. 22:36-38) Diad saya et si Jesus so sankaabigan ya ehemplo. Inaro to si Jehova ed interon puso, nonot, kamarerwa, tan biskeg. Nayarin binilyon a taon ya akaiba nen Jesus so mangatatawen ya Ama to, kanian nibagan Sikatoy kabkabat to. Antoy resulta? Oniay inkuan nen Jesus: “Inarok so Ama.” (Juan 14:31) Satan a panangaro et napatnagan ed amin ya imbaga tan ginawa nen Jesus. Satan so amakiwas ed sikaton lawas a gawaen iray bengatlan makapaliket ed Dios. (Juan 8:29) Lapud satan, kinondena to iray mansimpisimpitan a lider na relihyon a mangibabagan irerepresenta ra kunoy Dios. Satan met so amakiwas ed sikaton ibangat so nipaakar ed si Jehova tan tulongan met so arum a Sikatoy kabaten tan aroen da.

8. Antoy ginawa na saray disipulo nen Jesus lapud panangaro ra ed Dios?

⁸ Singa si Jesus, inaro na saray inmunan siglon disipulo to si Jehova, tan satan a panangaro so amakiwas ed sikaran makpel tan maseseg ya ipulong so maong a balita. Pinano ra so Jerusalem na saray bangat da, anggaman onsusumpa ed sikara iray maimpluensyan lider na relihyon. Ag-ira napatundan mangibaga ed saray bengatlan anengneng tan nadngel da. (Gawa 4:20; 5:28) Amta ran susuportaan tan bebendisyonan ira nen Jehova. Tan talagan benendisyonan ira nen Jehova! Diad tua, anggapo ni 30 taon kayari impatey nen Jesus, insulat nen apostol Pablo a say maong a balita et nipulong la “ed amin a pinalsa ed leksab na tawen.”​—Col. 1:23.

9. Panon tayon napabiskeg so panangaro tayo ed Dios?

⁹ No labay tayoy magmaliw a talagan epektibon managbangat, kaukolan tayo met a seguroen a lawas tayon papabiskegen so panangaro tayo ed Dios. Panon tayon nagawaan itan? Panamegley na mabetbet a pitongtong tayo ed sikato  diad pikakasi. Napabiskeg tayo met so panangaro tayo ed Dios diad panaral ed Salita to, pambasa ed saray base ed Biblian publikasyon, tan iyatendi ed saray Kristianon pantitipon. Leleg ya ondarakel so kakabatan tayo ed Dios, mas lalon onaaralem so panangaro tayo ed sikato. Bilang resulta, sano ipapanengneng tayoy panangaro tayo ed Dios diad salita tan gawa, naimano itan na arum tan nayarin onapit met ira ed si Jehova.​—Basaen so Salmo 104:33, 34.

Nepeg Tayon Aroen so Katuaan

10. Panon a nibagan say sakey et maong a manbangat?

¹⁰ Nibagan say sakey et maong a manbangat no aaroen toy bengatlan ibabangat to. Kaukolan a papanisiaan ton tua, importante, tan makana itan. No papablien na sakey a managbangat so bengatlan ibabangat to, napatnagay inkaligsa to, tan say resulta et pablien met itan na saray estudyante to. Balet, no say mismon managbangat et agto aapresyaen no antoy ibabangat to, nailaloan to kasin pablien itan na estudyante to? Tandaan a bilang managbangat na Salita na Dios, baleg so epekto na ehemplom ed saray iyaaralan mo. Oniay inkuan nen Jesus: “Balang babangatan ya asumpal to lay aral to, mipara la’d bumabangat to.”​—Luc. 6:40, Maung a Balita.

11. Akin et inaro nen Jesus iray katuaan ya imbangat to?

¹¹ Inaro nen Jesus iray katuaan ya imbangat to. Amta ton mabmabli iratan a katuaan, salanti, say nipaakar ed Ama ton walad tawen, say mismon “salita na Dios,” tan “saray salita na maando a bilay.” (Juan 3:34; 6:68) Saray imbangat to et singa masmasnag a liwawa ya angiwalwal ed kaugsan tan angipabitar ed kamaongan. Saratan a katuaan et angiter na ilalo tan ligliwa ed saray mapaabeban totoo a pinalikdo na saray palson lider na relihyon tan pinairap na Diablo. (Gawa 10:38) Aglabat napatnagan so panangaro nen Jesus diad saray bangat to noag pati diad amin a ginawa to.

12. Panoy impangipasen nen apostol Pablo ed maong a balita?

¹² Singa si Jesus, ontan lay impangaro tan impamabli na saray disipulo to ed katuaan nipaakar ed si Jehova tan ed Kristo, kanian ag-iran balot apatunda na saray onsusumpa ed panagpulong da. Insulat nen Pablo ed saray kaagian to ed Roma: “Atadia ak a mangipakabat na ebanghelyo . . . Ta agko ibaing so ebanghelyo; ta sikato so pakayari Dios ed kilalaban na balang sakey a manisia.” (Roma 1:15, 16) Impasen nen Pablo a baleg a kagalangan so pangiyabawag ed katuaan. Insulat to: “Dia ed siak, . . . niiter so saya a grasya, pian ipulong ko ed saray Gentiles so saray agnatukor a kayamanan nen Kristo.” (Efe. 3:8) Mapatpatnag ed sarayan imbaga nen Pablo a maligligsa ton imbangat ed arum so nipaakar ed si Jehova tan ed saray gagala To.

13. Akin et papablien tayo so maong a balita?

¹³ Lapud maong a balita a naaralan tayo ed Salita na Dios, akabat tayo so Manamalsa tan awalaan itayo na maapit a relasyon ed sikato. Ontan met, naebatan iray importantin tepet tayo tan anguman so bilay tayo. Awalaan itayo na ilalo tan satan so mamapabiskeg ed sikatayo sano walaray problema. Sakey ni, itotonton itayo na satan ed makabkabaliksan a bilay ya agbalot mangangga. Talagan anggapo lay mas mabli odino mas importante nin nakabatan nen say maong a balita. Regalo itan ya agnaparaan so balor to, a mamapaliket a maong ed sikatayo. Tan nagkalalo lan naliketan itayo sano inabang tayo itan a regalo ed arum.​—Gawa 20:35.

14. Panon tayon napaaralem so panangaro tayo ed saray katuaan ya ibabangat tayo?

¹⁴ Antoy gawaen mo pian lalom nin napaaralem so panangarom ed maong a balita? Legan mon manbabasa na Salita na Dios, ontunda kan magano pian dalepdepen so babasaen mo. Singa bilang, isip mon aktual a kaulop moy Jesus legan na panmiministeryo to diad dalin, odino si apostol Pablo legan na panmimisionero to. Isip mon wala ka la’d balon mundo, a talagan duma lay bilay. Nodnonot mo ray bendisyon ed sika lapud indengel mo ed maong a balita. No pansiansiaen mon mabiskeg so panangarom ed maong a balita, nalikas itan na saray iyaaralan mo. Walaan itayo sirin na maabig a rason a morekdeken a maong iray nanaaralan tayo tan  imanoen iray katuaan ya ibabangat tayo.​—Basaen so 1 Timoteo 4:15, 16.

Nepeg Tayon Aroen Iray Totoo

15. Akin et kaukolan ya aroen na managbangat iray estudyante to?

¹⁵ Nibaga met a say sakey et maong a manbangat no saray estudyante to et agnatatakot a mangibalikas na liknaan da ed sikato. Say sakey a maaron managbangat et inanabang toy kakabatan lapud panangiyansakit to ed saray estudyante to. Say panagbangat to et itutukoy to ed saray pankaukolan da tan diad paraan a sarag dan talosan. Ikokonsidera toy abilidad tan kipapasen da. No ontan a panangaro so ipapanengneng na sakey a managbangat, nalikas itan na saray estudyante. Niarum ni, mas makapnek so pambangat tan mas maliket so panaral.

16. Panon ya impanengneng nen Jesus so panangaro to ed saray totoo?

¹⁶ Ontan so panangaron impanengneng nen Jesus. Say sankabalgan a pakapatnagan na panangaro to et sanen inter toy ayadyarin bilay to bilang too pian niliktar itayo. (Juan 15:13) Legan na ministeryo to, sikatoy lawas akaparaan ya ontulong tan manbangat ed saray totoo nipaakar ed Ama to. Agto la inalagar iray totoo ya ondago ed sikato, noagta nanakar na nilasus a kilometro pian nipasabi so maong a balita ed sikara. (Mat. 4:23-25; Luc. 8:1) Sikatoy maanos tan makonsidera. Sano kaukolan na saray disipulo to so panangipetek, gagawaen to itan tekep na aro. (Mar. 9:33-37) Pinaseseg to ra diad impangibalikas toy talek to a magmaliw iran epektibon manangipulong na maong a balita. Anggapo lay toon makapipara ed maaron panagbangat nen Jesus. Say panangaro to ed saray disipulo to so amakiwas ed sikaran mangaro met ed sikato tan mangunor ed saray ganggan to.​—Basaen so Juan 14:15.

17. Panon ya impanengneng na saray disipulo nen Jesus so panangaro ed totoo?

¹⁷ Singa si Jesus, inad-aro met na saray disipulo to iray totoon pinulongan da. Sinungdoan da ray panamasegsegang tan inrisga da ni ingey bilay da pian nipulong so maong a balita, tan tinmalona ira ed satan a kimey. Talagan inad-aro da iramay tinulongan dan onkamang ed katuaan! Singa bilang, oniay maad-aron insulat nen apostol Pablo: “Mauyamo kami ed pegley yo, a singa sakey a sigsiwa [odino, manpapasuson ina] a managano na dilin anak to. Ontan mi met, maib-ibeg kamin mangaro ed sikayo, apaliket kamin tuloy a mangipanabang ed sikayo, na aliwan say ebanghelyo na Dios labat, noag met saray dilin kakamarerwa mi, ta nagmaliw kayo a sankablian ed sikami.”​—1 Tes. 2:7, 8.

18, 19. (a) Akin a mabulos itayon mansakripisyo pian nasumpal tayoy panagpulong a kimey? (b) Mangiter na eksperiensya a mamapaneknek a say panangaro tayo et papablien na arum.

¹⁸ Mipadpara met natan, saray Tasi nen Jehova et manpupulong ed interon mundo pian anapen iramay manpilalek a kabaten tan lingkoran  so Dios. Diad tua, diad apalabas a nantutumbokan a 17 taon, masulok a sakey bilyon ya oras kada taon so uusaren tayo ed panagpulong tan panaggaway babangatan, tan siansia nin itutultuloy tayo itan a kimey. Mabulbulos tayon susumpalen itan, anggaman kaukolan tayon isakripisyoy panaon, biskeg, tan kaykayarian tayo. Singa si Jesus, amta tayon pilalek na maaron Ama tayo ed tawen a nawalaan iray totoo na kakabatan a mangitonton ed bilay ya andi-anggaan. (Juan 17:3; 1 Tim. 2:3, 4) Say panangaro so mamakiwas ed sikatayo a tulongan iray maptek impanpuson totoo a kabaten tan aroen met si Jehova.

¹⁹ Papablien na arum so panangaro tayo. Alimbawa, walay sakey a payunir diad Estados Unidos a susulaten to ray inateyan pian naligliwa ira. Sikatoy binales na sakey a laki, ya angikuan: “Nen unona et agak makapanisia a walay toon pansagpotan ton sulatan so agto kabat pian naligliwa to. Say nibagak labat et inarom so kaparam a too tan say Dios a mangiwawanwan ed sikatayo.”

20. Antoy epekto’d sikatayo no manbangat itayo tekep na aro?

²⁰ Walay autor ya angikuan a no panibaen so aro tan dunong, say pansumpalan et sakey ya obra maestra. Sano manbabangat itayo, panggunaetan tayon tulongan iray iyaaralan tayo a nakabat a maong si Jehova tan sikatoy impapuson aroen da. On, pian magmaliw itayon epektibon managbangat, kaukolan tayon aroen so Dios, say katuaan, tan saray totoo. No walay ontan a panangaro tayo tan no ipapanengneng tayo itan ed ministeryo, nalikna tayoy liket na panangiter. Sakey ni, makalikna itayoy inkapnek lapud amta tayon aaligen tayo si Jesus tan napapaliket tayo si Jehova.

Antoy Ebat Mo?

• Sano ibabangat tayo so maong a balita ed totoo, akin et importante so . . .

panangaro ed Dios?

panangaro ed katuaan?

panangaro ed saray iyaaralan tayo?

[Tepetepet Parad Panagaral]

[Litrato ed pahina 15]

Akin a say panagbangat nen Jesus et midumaan ed saray eskriba tan Fariseo?

[Litrato ed pahina 18]

Pian magmaliw a maong a manbangat, kaukolan so kakabatan, dunong, tan nagkalalo ed amin, say aro