Kasin Ipapatnag Mo so “Sankaabigan” ya Aro?

“SAY Dios sikato so aro.” Tutukoyen na sarayan balikas nen apostol Juan so sankamanunaan a kualidad na Dios. (1 Juan 4:8) Lapud panangaro na Dios ed totoo, posible itayon makaasingger tan nawalaan na personal a relasyon ed sikato. Anto ni ray arum a paraan a naapektoan itayo na panangaro na Dios? Tua a naiimpluensyaan itayo na saray bengatlan aaroen tayo. Balet tua met a naiimpluensyaan itayo na saramay mangaaro ed sikatayo tan na saramay inad-aro tayo. Lapud pinalsa itayo na Dios unong ed indengan to, sarag tayo met ya ipatnag so panangaro to. (Gen. 1:27) Kanian, insulat nen apostol Juan ya inaro tayo so Dios “ta sikato so angaro ed sikatayo ya inmuna.”​—1 Juan 4:19.

Apatiran Salita a Manutukoy ed Aro

Inkuan nen apostol Pablo a say aro so ‘sankaabigan a dalan.’ (1 Cor. 12:31) Akin et ontan so impaneskribe to ed aro? Anton klase na aro so tutukoyen to? Pian naamtaan tayo, aralen tayo pan maong so salitan “aro.”

Diad Griegon lenguahe nensaman, walay apatiran salitan manutukoy ed aro, ingen ta nandurumay inkausar to: stor·geʹ, eʹros, phi·liʹa, tan a·gaʹpe. Diad saraya, say a·gaʹpe so salitan uusaren pian deskribien so Dios, a “sikato so aro.” * Oniay imbaga nen Propesor William Barclay diad insulat ton New Testament Words nipaakar ed sayan aro: “Say agapē et lalanoren toy nonot: aliwa labat itan ya emosyon a basta biglan nalikna tayo ed kapusoan; sakey itan a prinsipyo a labay tayon mangigiya ed bilay tayo. Baleg so pikonektaan na agapē ed determinasyon tayo.” Base ed saya, say a·gaʹpe et aro ya iimpluensyaan odino igigiya na prinsipyo, ingen ta nalalanor met so emosyon. Siempre, walaray maong tan mauges a prinsipyo, kanian nepeg a paiwanwan iray Kristiano ed saray maong a prinsipyon impaisulat a mismo nen Jehova a Dios diad Biblia. Lalo tayon natalosan so aron nepeg tayon ipanengneng no ikompara tayo so a·gaʹpe ed arum ni ran terminon inusar na Biblia pian deskribien so aro.

Aroan ed Pamilya

Talagan makapalikliket no say sankapamilyaan et manaaroan tan maapit ed sakey tan sakey! Say Griegon salita ya stor·geʹ so mabetbet ya uusaren pian tukoyen so panaaroan na sankapamilyaan. Panggugunaetan na saray Kristiano ya ipanengneng so aro ed kapamilyaan da. Impropesiya  nen Pablo a diad kaunoran iran agew, maslak a totoo et “anggapo so aro ra a nianakan.” *​—2 Tim. 3:1, 3.

Makapaermen ta diad sayan panaon tayo, naaandi lay panaaroan a wala komon ed saray sankapamilyaan. Singa bilang, akin kasi et dakel so manpapaekal? Akin et dakel lan pamilya natan so mamapaulyan ed saray maedad lan atateng da? Akin et ontan lay idarakel na saray mandidiborsyo? Say ebat et, “anggapo so aro ra a nianakan.”

Sakey ni, ibabangat na Biblia a “say puso manamalingo, alabas nen saray amin a bengatla.” (Jer. 17:9) Say aro ed kapamilyaan et lalanoren toy puso tan liknaan tayo. Balet, makapainteres ta say salitan inusar nen Pablo pian deskribien so panangaron nepeg ya ipanengneng na asawan laki ed akulaw to et say a·gaʹpe. Sayan panangaro et inkompara nen Pablo ed panangaro nen Kristo ed kongregasyon. (Efe. 5:28, 29) Saya so aro a base’d saray prinsipyo a nanlapud si Jehova, say Angigapo ed uksoyan na pamilya.

No puro so panangaro tayo’d saray kapamilya tayo, napakiwas itayon asikasoen iray maedad lan atateng odino legpeten iray ananak tayo. Pakiwasen met na satan iray atateng a maaron disiplinaen iray anak da no nakaukolan. No puros liknaan labat so mandikta ed sikara, kaslakan lan manreresulta itan ed sobran inkamapaulyan odino inkamaabuloy ed ananak da.​—Efe. 6:1-4.

Say Romantikon Aro tan Saray Prinsipyo ed Biblia

Say aroan ed baetan na sanasawa et peteg a regalo na Dios. (Uli. 5:15-17) Anggaman ontan, say salitan eʹros ya ontutukoy ed romantikon aro, et agbalot inusar na saray pinuyanan a managsulat na Biblia. Akin? Pigaran taon lay apalabas et oniay inkuan na The Watchtower: “Diad sayan panaon, singa uuliten na interon mundo so lingo na saray Griego nensaman. Ginawa ran dios si Eros, a tinmalimukor ira ed altar to tan angiyapay ira ed sikato na saray bagat. . . . Balet ta ipapanengneng na saray agawgawa nensaman a say ontan a panagdayew ed aro a base ed sekso et nanresulta’d kabandayan, karutakan, tan inkaapag-apag. Nayarin satan so rason ya ag-inusar na saray managsulat na Biblia itan a salita.” Pian napaliisan tayoy pirelasyon lapu labat ed itsura, nepeg a say mangontrol ed romantikon liknaan et saray prinsipyo na Biblia. Kanian tepetan tayoy inkasikatayo, ‘Kasin say naliliknak a romantikon aro ed asawak et tetekepan koy tuan panangaro?’

 Diad “bolaklak na taon” na inkatobonbalo, say seksual a pilalek et mabisbiskeg. Balet, makapansiansian malinis ed moral iray kalangweran no tuloken day prinsipyo na Biblia. (1 Cor. 7:36; Col. 3:5) Momoriaen tayo a sagradon regalo nen Jehova so panangasawa. Oniay inkuan nen Jesus nipaakar ed saray sanasawa: “Say impantipon na Dios sirin, aleg a sianen na too.” (Mat. 19:6) Saray sanasawa et aglabat maniba legan a wala ni pisikal tan seksual a pilalek da, noagta determinado iran manmatoor ed impansipanan da. Sano walaray problema ed panamaley tayo, agtayo iisipen a say solusyon et pansian. Imbes, panseetan tayon ipatnag iray kualidad na Dios pian magmaliw a maliket so pamilya tayo. No mansagpot itayon gawaen itan, lawas a magmaliw a maliket so panamaley.​—Efe. 5:33; Heb. 13:4.

Aroan na Sankakaaro

Maer-ermen so bilay no anggapo ray kaarom! Oniay inkuan na sakey a proverbio ed Biblia: “Wala so kaaro a lalon maapit nen say agi.” (Uli. 18:24) Labay nen Jehova a nawalaan itayo na tuan kakaaro. Sakey ed saray kabkabat a malet a sankaaro et si David tan Jonatan. (1 Sam. 18:1) Ontan met, ibabaga na Biblia ya “inaro” nen Jesus si apostol Juan. (Juan 20:2) Say Griegon salita parad “panangaro ed kaaro” et phi·liʹa. Anggapoy uges na pakawalaay maapit a kaaro ed kongregasyon. Balet, papasesegen itayo na Biblia ya itekep tayo so a·gaʹpe ed “aroan na sanaagi.” (2 Ped. 1:7, NW) Diad Griego, satan a balikas et phi·la·del·phiʹa, a pinan-iba a salitan phiʹlos a mankabaliksay “kaaro,” tan a·del·phosʹ a mankabaliksay “agi.” Pian mansiansiay pankakaaro, kaukolan tayon iyaplika itan a simbawa na Biblia. Maabig no tepetan tayoy inkasikatayo, ‘Kasin say pikakaarok et babalansien na saray prinsipyo ed Biblia?’

Makatulong so Salita na Dios pian napaliisan tayoy panaglabi. Singa bilang, ompan is-istrikto tayo ed saray agtayo kaaro, balet ta no kaaro tayo et andi. Sakey ni, agtayo manlalarog pian nawalaan labat na kakaaro. Nagkalalo ed amin, no iyaplika tayo iray prinsipyo ed Biblia, nawalaan itayo na pakatebek a nakaukolan diad panagpili na saray kakaaro tan pian napaliisan ‘iray mauges a kaulop a maneral ed maong ya ug-ugali.’​—1 Cor. 15:33.

Say Nikadkaduman Bedber na Aro!

Talagan nikadkaduma so bedber a sengegan na pankakasakey na saray Kristiano! Oniay insulat nen apostol Pablo: “Say aro aleg a tekepan na pangunkunwari. . . . Nipaakar ed aroan na sanaagi, matamoy komon so aroan na sakey tan sakey.” (Roma 12:9, 10) On, saray Kristiano et walaan na ‘aro (a·gaʹpe) ya andiay pangunkunwari.’ Saya et aliwa labat lan puros emosyon, noagta akabase ed saray prinsipyo na Biblia. Balet, sinalambit met nen apostol Pablo so nipaakar ed “aroan na sanaagi” (phi·la·del·phiʹa) tan ‘matamoy a panangaro’ (phi·loʹstor·gos, pinan-iban salita a phiʹlos tan stor·geʹ). Unong ed sakey ya iskolar na Biblia, say “aroan na sanaagi” et “panangipanengneng na kaabigan, simpatya, pangiyopresi tulong.” No tekepan itan na a·gaʹpe, lalon onasingger so liknaan na saray managdayew nen Jehova ed sakey tan sakey. (1 Tes. 4:9, 10) Tan say balikas a nipatalos a ‘matamoy a panangaro,’ ya aminpinsan ya inusar ed Biblia et ontutukoy ed inkamaapit, a singa diad limog pamilya.

Say bedber a sengegan na pankakasakey na saray tuan Kristiano et pinantetekep a panangaro ed kapamilyaan tan ed tuan kakaaro, tan amin iraya et igigiya na panangaron base ed saray prinsipyo ed Biblia. Say Kristianon kongregasyon et aliwan sakey ya organisasyon pian labat nakabat so arum, noagta sakey a pamilyan nankakasakey diad panagdayew ed si Jehova a Dios. Ipapasen tayon kapamilya iray kapananisiaan tayo, kanian tatawagen tayo ira ya agagi. Sikara so espiritual a pamilya tayo, inad-aro tayo ira bilang kakaaro, tan lawas tayo ran tratratoen a mitunosan ed saray prinsipyo na Biblia. Komon ta itultuloy tayon paeleten so bedber na aro a sengegay pankakasakey tayo tan mangipapabidbir ed tuan Kristianon kongregasyon.​—Juan 13:35.

[Saray paimano ed leksab]

[Blurb ed pahina 12]

Panon mon napaelet so bedber na aro a sengegay pankakasakey tayo?