Paliisan Iray Pakaabalaan Diad Sayan ‘Agew na Maong a Balita’

NONONOTEN na apatiran akating no anto so gawaen da. Anggapoy mangiiter na payabol ed sikara diad wangalan na syudad. Walay baleg ya eras ed syudad na Samaria lapud kinubkob ira na saray Siryano. Anggapo met lanlamang so gunggona na iloob ed syudad ta mabmabli tagano. Wala ni ingen iray totoon inaakan da ray anak da.​—2 Ara. 6:24-29.

‘Anto kasi no onla tayo ed kampo na saray Siryano, nen say ompatey tayo dia?’ so kuan na saramay akating. Sanen sinmirunget la, amaarap la ra’d kampo. Kasabi da diman et makapakelaw ta marendeen. Anggapoy manbabantay ed kampo. Akataker iray kabayo tan asno, balet ta anggapo anggan sakey a sundalo. Linmoob ira’d sakey a tolda, tan anggapo met so too diman. Balet, dakerakel so naakan tan nainum. Kanian, angan tan inminum ira. Wala ray nalmo ran balitok, pilak, kawekawes, tan arum ni ran ankablin bengatla. Inaala da iratan, inyamot da, insan lamet ira amawil pian makapangala ni. Tinaynan manaya na saray sundalon Siryano so interon kampo. Diad mamilagron paraan et imparengel nen Jehova ed saray Siryano so tanol na nitan lan dakerakel a sundalo. Abaloan da et aatakien la ra, kanian batik iran tampol. Atilak so amin a kayarian da!

Inaakukos na saramay akating iray ankablin bengatla. Balet, sanen anonotan da a saray totoo ed Samaria et nanaerasan, akonsiensia ra. Oniay inkuan da ed sakey tan sakey: ‘Aliwan maong iyay gagawaen tayo. Saya et agew na maong a balita!’ Tampol iran pinmawil ed Samaria, tan inreport da so maong a balita.​—2 Ara. 7:1-11.

Manbibilay itayo met natan ed panaon a nayarin tawagen ya ‘agew na maong a balita.’ Oniay inkuan nen Jesus nipaakar ed nikadkaduman kabiangan na “tanda ed . . . anggaan [na sistema] na mundo”: “Saya ya ebanghelyo [odino, maong a balita] na panarian nipulong naani ed sankamundoan ya onkanan pamintuaan ed saray amin a nasyones; et saman la onsabi so anggaan.” (Mat. 24:3, 14) Antoy epekto na saya ed sikatayo?

Nayarin Napabelatan Itayo na Kapagaan ed Bilay

Lapud liket na saramay akating ed nalmo ra, alingwanan da laingen so kipapasen na Samaria. Say sankanonot da et say naala ra. Nayari met kasin nagawa itan ed sikatayo? Sakey ed saray kabiangan na tanda na anggaan na sistema na bengabengatla et say “eras.” (Luc. 21:7, 11) Pinasakbayan nen Jesus iray disipulo to: “Manlikas kayo ed inkasikayo ompan saray puso yo napano ed inkasiba, tan panagbuek, tan saray kapagaan ed sayan bilay.” (Luc. 21:34) Bilang Kristiano, nepeg a manlikas itayo, ya agtayo abuloyan so inagew-agew a kapagaan tan kimkimey a sengegay pakalingwan tayo a manbibilay tayo la ed ‘agew na maong a balita.’

Ag-inabuloyan na sakey a Kristianon manngaran na Blessing a sikatoy napabelatan na inagew-agew a kapagaan ed bilay. Sikatoy nampayunir legan ton maneeskuela. Diad saginonor et sikatoy akiasawa ed sakey a Bethelite, tan naaprobaan met a magmaliw a membro na pamilyan Bethel diad Benin. Inkuan to: “Housekeeper ak, tan labalabay ko iyan asainmin ko.” Malikeliket si Blessing sano nononoten toy 12 taon ya impanlingkor  to bilang sigpot panaon, tan sikatoy maliket met lapud inyapasakey toy imano to ed ‘agew na maong a balita’ a pambibilayan tayo natan.

Paliisan Iray Pakaabalaan

Oniay imbaga nen Jesus sanen imbaki to iray 70 a disipulo to: “Say anien peteg a daakan, ingen saray komikimey daiset; pikasi yo sirin ed Katawan na anien, ta mangibaki komikimey ed anien to.” (Luc. 10:2) No agtampol anien iray tanem, nayarin naperdi iratan. Ontan to met, no napaulyanan tayoy panagpulong, bilay so naperdi. Kanian oniay imbaga ni nen Jesus: “Anggapo so too ya ibano yo ed dalan.” (Luc. 10:4) Say Griegon salita ya inusar parad “ibano” et aglabat mankabaliksay basta iyimis odino pangibagay “kabuasa’d sika.” Kaiba met ed satan so ilakap ed sakey a naabet mon kaaro tan pantongtong a mabayag. Kanian binilin nen Jesus iray papatumbok to a paliisan da iray ontan a pakaabalaan, tan usaren dan maong so panaon da. Say mensahen kaukolan dan ipulong et agnayarin ibayanbayan.

Nonoten tayo pay karakel na panaon a nadadarak lapud saray pakaabalaan. Abayag la a say telebisyon so manunan manguupot na panaon na saray totoo. Saray cell phone tan kompyuter balet ey? Diad sakey a survey ed 1,000 ya adulto diad Britanya, nalmoan a kada sakey ed sikara et manguusar na 88 a minuto kada agew diad pitotongtong ed telepono, 62 a minuto ed cell phone, 53 a minuto ed panag-e-mail tan 22 a minuto ed panag-text. No pantutugyopen iya, mas doble ni so nauusar dan panaon nen say nauusar na sakey ya auxiliary payunir ed ministeryo diad kada agew! Sikayo ey, kaunongan karakel so panaon a nauusar yo ed itawag, pan-e-mail, tan pan-text?

Si Ernst tan Hildegard Seliger et sinegurado ran maabig so panangusar da ed panaon da. No panibaen so kabayag na inkipriso ra ed kampoy Nazi tan ed prisoay Komunista, masulok itan a 40 a taon. Sanen nibulos la ra, nampayunir ira anggad inkasumpal na mangaraldalin a bilay da.

Amayamay so malabay a misulatan ed sayan sanasawa. Sarag da komon ya iyuna so pambasa ed saray sulat a nanaawat da tan balesen iratan. Balet ta say prayuridad da ed bilay et say panagdayew ed si Jehova.

Siempre, labalabay tayoy makaawat na sulat odino tawag na saray inad-aro tayo ed bilay, tan anggapoy makapuy ed satan. Makatulong met no diad kada agew et walaray gawaen tayon pangumanan na rotina tayo. Balet, diad sayan panaon a kakkaukolan ya ipulong so maong a balita, maabig no alerto itayo ta ompan magmaliw la irayan pakaabalaan.

Nagnap ya Ipulong so Maong a Balita

Baleg a bendisyon so pambilay diad sayan ‘agew na maong a balita.’ Agkomon nabalang so imano tayo, a singa saramay apatiran akating. Tandaan ya oniay inkuan da met lanlamang: ‘Aliwan maong iyay gagawaen tayo.’ Mipadpara, aliwan maong no abuloyan tayo iray personal a kimey odino pakaabalaan a sengegan na agtayo la sigpot a pakapibiang ed ministeryo.

No nipaakar ed saya et walay maabig ya ehemplo tayo. Saya et si apostol Pablo. Sanen nonodnonoten to imay inmunan 20 a taon na impanpulong to, oniay inkuan to: “Impulong ko a nagnap so ebanghelyo nen [odino, maong a balitan nipaakar ed] Kristo.” (Roma 15:19) Agton balot inabuloyan so antokaman a mamakapuy ed seseg to. Komon ta ontan met so inkaseseg tayon mangipulong ed mensahe na Panarian diad sayan ‘agew na maong a balita.’

[Litrato ed pahina 28]

Ag-inabuloyan nen Blessing so personal iran kapagaan a mangabala ed sigpot-panaon a panaglingkor to

[Litrato ed pahina 29]

Sinegurado na sanasawan Seliger a maabig so panangusar da ed panaon da