Agnaparaan so Kablian na Edukasyon a Manlalapud Dios
Agnaparaan so Kablian na Edukasyon a Manlalapud Dios
“Ipapasen ko met so amin a bengatla bilang anggapoy kakanaan nisengeg ed mabmablin pikakabat ed si Kristo Jesus.—FIL. 3:8, NW.
1, 2. Anto so desisyon na arum a Kristiano, tan akin?
MANLAPU la’d impaneskuela nen Robert et talagan sikatoy marundunong ya estudyante. Sanen mantaon ni labat na walora, sikatoy nila’d abung na sakey ed saray maestra to tan imbaga ton sarag nen Robert a gamoran so antokaman a labay to. Iilaloan ton diad arapen komon et magmaliw a doktor si Robert. Sanen haiskul lay Robert, talagan ataragey iray grado to, kanian sarag toy manaral ed anggan dinan ed saray sankaabigan ya unibersidad ed bansa ra. Balet, denesidi nen Robert ya italirak so oportunidad a parad karaklan et agnepeg a palampasen pian makapanregular payunir.
2 Singa si Robert, dakel a Kristiano, ugaw man o matatken, so awalaan na saray oportunidad ya onasenso ed sayan kaplesan a sistema. Pinili na arum ya ag-anamoten so amin na saratan pian unaen so espiritual iran kalat. (1 Cor. 7:29-31) Anto so amakiwas ed saray Kristiano a singa si Robert ya usaren so bilay da ed kimey a panagpulong? Say manunan rason et say panangaro ra ed si Jehova. Say sakey nin rason et aapresyaen da so agnaparaan a kablian na edukasyon a manlalapud Dios. Naisip mo ta la no anto kasi nansumpalan mo no agmo naamtaan so katuaan? No nodnonoten tayo so pigara’d saray alay abig a bendisyon a naaawat tayo lapud ibabangat itayo nen Jehova, ontulong iya pian lawas tayon pabpablien so maong a balita tan maseseg ya ipulong itan.
Pribilehyo so Nabangatan na Dios
3. Akin a segurado itayo a mabulbulos si Jehova a mangibangat ed saray agperpekton totoo?
3 Lapud kaabigan nen Jehova, sikatoy mabulbulos a mangibabangat ed saray agperpekton totoo. Oniay mapropetikon inkuan na Isaias 54:13 nipaakar ed saray alanaan a Kristiano: “Amin iray anak mo nibangat ira [nen] Jehova, et baleg naani deen na saray anak mo.” Onaaplika met iya ed ‘arum a karnero.’ (Juan 10:16) Ontan so malinlinew ya ipapabitar na sakey a propesiyan nasusumpal diad panaon tayo. Diad pasingawey et anengneng nen Isaias iray totoon nanlapud amin a nasyon ya ‘onaagus’ ed tuan panagdayew. Oniay ibabaga ra ed sakey tan sakey: “Ontatdang itayo ed palandey nen Jehova, ed abung na Dios nen Jacob, ta ibangat to itayo ed saray dalan to, tan manakar itayo dia ed saray basbas to.” (Isa. 2:1-3) Talagan baleg a pribilehyo so nabangatan na Dios!
4. Anto so kakaukolanen nen Jehova ed saramay bangatan to?
4 Anto so kakaukolanen nen Jehova ed saramay bangatan to? Nia so manuna: Nepeg a mauyamo tan mabulos itayon paibangat. Oniay insulat nen salmistan David: “Maong tan matunong si Jehova. . . . Ibangat to ed mauyamo so dalan to.” (Sal. 25:8, 9) Tan inkuan nen Jesus: “Misalamat ak ed sika, O Ama, Katawan na tawen tan dalin, ta inyamot mo so sarayan bengatla ed saray makabat tan makatalos, et sikara so impasingawey mo ed saray ugugaw.” (Luc. 10:21) Agta napapaapit so liknaan mo ed Dios a ‘mangiiter na grasya ed saray mapaabeba’?—1 Ped. 5:5.
5. Antoy mogmon paraan a nagamoran na sakey so pikakabat na Dios?
5 Bilang lingkor nen Jehova, nibaga tayo kasin lapud abilidad odino dunong tayo kanian naamtaan tayo so katuaan? Andi. Diad tua, no diad inkasikatayo labat, agtayon balot nagamoran so pikakabat na Dios. Inkuan nen Jesus: “Anggapo so too a makadago ed siak, likud no say Ama ya angibaki ed siak, sikato so iyasingger to.” (Juan 6:44) Panamegley na panagpulong a kimey tan masanton espiritu, iyaasingger nen Jehova iray mauyamon indibidual, salanti, “saray mabli a bengatla na saray amin a nasyon.” (Ag. 2:7) Agta misalsalamat ka ta sakey ka ed saramay inyasingger nen Jehova ed Anak to?—Basaen so Jeremias 9:23, 24.
Napapaaligwas na Biblia so Bilay na Totoo
6. Anto so makapadinayew ya epekto ed totoo na impakagamor day “pikakabat ed Jehova”?
6 Marakdakep ya inyilustra na propesiya nen Isaias iray pananguman ed personalidad na totoo a nagagawa ed panaon tayo. Saramay datin bayolenti et nagmaliw lan mareen a totoo. (Basaen so Isaias 11:6-9.) Saramay datin manbubusolan lapud pandurumaay poli, bansa, tribu odino kultura et naaralan day mankasakey. Aliling to et, ‘pinitpit da la ray kampilan da pian gawaen a lukoy.’ (Isa. 2:4) Antoy sengegan na sarayan makapadinayew a pananguman? Agamoran na totoo so “pikakabat ed Jehova” tan inyaplika da itan ed bilay da. Anggaman agperpekto iray lingkor na Dios, walaan ira na peteg a sankamundoan ya impanaagi. Say maong a balita et makasagyat ed amin a klase na totoo tan maabig so resulta to, sirin et peteg ya agnaparaan so kablian na edukasyon a manlalapud Dios.—Mat. 11:19.
7, 8. (a) Antoray pigara ed saray “bengatlan malmalet ya akaletneg” ya ‘abagbag’ na totoo lapud edukasyon a manlalapud Dios? (b) Anto so mangipapanengneng a say edukasyon a manlalapud si Jehova et kirarayewan to?
7 Inkompara nen apostol Pablo so kimey tayon panagpulong diad espiritual a pibabakal. Insulat to: “Say ayura na saray pibabakal mi aliwa ran kien na mangaraldalin, balet makapanyari ra ed arap na Dios, a mamagbag na saray [“bengatlan malmalet ya akaletneg,” NW]. Bagbagen mi so kaisipan, tan balang atagey a bengatla ya onalagey ya onsumpa ed kakabatan na Dios.” (2 Cor. 10:4, 5) Antoray pigara a “bengatlan malmalet ya akaletneg” a pakakalukposan na saray totoo lapud edukasyon a manlalapud Dios? Say pigara labat ed saraya et saray makapabelat a palson bangat, anito, tan pilosopiya na totoo. (Col. 2:8) Say edukasyon a manlalapud Dios et ontutulong ed totoo a nitunda iray mauges a kagagawa tan bayuboan iray maridios a kualidad. (1 Cor. 6:9-11) Lapud satan ya edukasyon et magmamaliw a maliket so pamilya tan magmamaliw a makabaliksan so bilay na saramay andiay ilalo. Saya so klase na edukasyon a kakkaukolan tayo natan.
8 Say sakey ed saray kualidad a nababayuboan na totoo lapud tulong nen Jehova et say inkamatua. (Heb. 13:18) Nia so sakey ya eksperiensya: Walay sakey a biin taga India ya impaiyaralan na Biblia tan nagmaliw ya agbautismadon manangipalapag. Sakey ya agew, sanen pasempet la manlapud impanboluntaryo to ed panagpaalagey na Kingdom Hall, sikatoy akadokdok na alahas a mankantidad na walon lasus a dolyar (U.S.). Anggaman mairap so bilay to, inyakar to itan ed istasyon na pulis. Agmakapanisia so pulis ed ginawa na sayan bii! Diad saginonor, walay sananey nin pulis a nantepet ed sikato: “Akin et ipawil mo ni iyan alahas?” Oniay ebat to: “Anguman ak lapud bangat na Biblia, kanian matua ak lan too natan.” Diad pandinayew na pulis, oniay inkuan to ed samay elder ya angiba ed bii dima’d istasyon: “Walay masulok a 38 milyon a totoo ed sayan lugar. Balbaleg so nagawaan mo no walay samploran natulongan mon magmaliw a singa sayan bii.” No nodnonoten tayo so minilyon lan bilay ya apasimbalo na edukasyon a manlalapud Dios, agta dakdakel so rason tayon dayewen si Jehova?
9. Panon ya ayarian na totoo so manggawa na baleg iran pananguman ed bilay da?
9 Lapud pakayari na Salita na Dios, laktip lay tulong nen Jehova panamegley na masanton espiritu to, makakagaway baleg a pananguman iray totoo. (Roma 12:2; Gal. 5:22, 23) Oniay inkuan na Kasulatan: “Kawesan yoy inkasikayo na balon personalidad, a diad panamegley na suston pikakabat et napapasimbalo itan unong ed ereng na samay Sakey ya amalsa ed satan.” (Col 3:10, NW) Say mensahen walad Salita na Dios, say Biblia, et walay pakayari ton iparungtal no anton talagay inkatoo na sakey, tan sarag na satan ya umanen so panagnonot tan anggan say panmoria na too ed saray bengatla. (Basaen so Hebreos 4:12.) No nagamoran na sakey so suston pikakabat ed Kasulatan tan no manbilay unong ed saray estandarte nen Jehova, sikatoy magmaliw a kaaro na Dios tan nawalaay ilalon manbilay ya andi-anggaan.
Ipaparaan Itayo nen Jehova Parad Arapen
10. (a) Akin a si Jehova labat so makatulong ed sikatayon manparaan parad arapen? (b) Antoran balbaleg a pananguman so asingger lan nagawa ed dalin?
10 Si Jehova labat so makatulong ed sikatayon manparaan parad arapen ta amta to no antoy magano lan nagawa. Akadepende ed sikato so arapen na katooan. (Isa. 46:9, 10) Ipaparungtal na propesiya na Biblia a “say baleg ya agew nen Jehova asingger” la. (Sof. 1:14) Diad satan ya agew et nasumpal imay akasulat ed Uliran 11:4: “Saray kayamanan andi kakanaan da ed agew na sanok, balet say inkatunong mangilaban a manlapu ed patey.” Sano onsabi lay panaon ya ipaakseb nen Jehova so panangukom ed mundo nen Satanas, say sankaimportantian et say talindeg tayo ed arapan na Dios. Anggapo lay kana na kuarta. Diad tua, oniay ibabaga na Ezequiel 7:19: “Ibantak da naani so pilak da ed saray pulong, tan say balitok da singa naani marutak a bengatla.” Say pakaamta ed saya et ontulong ed sikatayon makabat ya onkiwas natan.
11. Anto so sakey a paraan a say edukasyon a manlalapud Dios et ipaparaan to itayo parad arapen?
11 Tutulongan itayo na edukasyon a manlalapud Dios pian nawalaay dugan prayuridad. Sakey itan a paraan pian akaparaan itayo ed onsasabin agew nen Jehova. Oniay insulat nen apostol Pablo ed si Timoteo: “Dia ed saray mangayaman dia ed mundo, ibilin mo ed sikara ya ag-ira mantagey na linawa, tan agda met igaton so ilalo ra ed saray kayamanan a panduaruwaan, noag dia ed Dios.” No aliwa itayon mayaman, siansia nin nagunggonaan itayo ed satan ya impuyan a simbawa. Anto so nalalanor ed satan? Imbes a mantipon na materyal iran kayamanan, nepeg a panggunaetan tayoy ‘manggawa na maabig’ tan magmaliw a ‘mayaman ed saray maabig a gawa.’ No iyuna tayo iray espiritual a bengatla, ‘mantitipon itayo na maabig a pangiletnegan ed panaon ya onsabi.’ (1 Tim. 6:17-19) Say ontan a panagsakripisyo et pakapatnagay praktikal a karunongan ta inkuan nen Jesus, “Anto tay pinanabang na sakey a too, no naala toy sankamundoan, et nabalang toy bilay to?” (Mat. 16:26, 27) Lapud asingsingger lay agew nen Jehova, oniay nepeg ya itepet na balang sakey ed inkasikato: ‘Iner so pantitiponan koy kayamanan? Siopay panlilingkoran ko, say Dios o say Kuarta?’—Mat. 6:19, 20, 24.
12. Akin et agtayo nadidismaya no walaray mamabalaw ed ministeryo tayo?
12 Say sankaimportantian ed ‘maabig iran gawa’ na saray Kristiano ya asalambit ed Salita na Dios et say manangiliktar-bilay a kimey a panangipulong na Panarian tan panaggaway babangatan. (Mat. 24:14; 28:19, 20) Singa met nen inmunan siglo, nayarin balbalawen na totoo so ministeryo tayo. (Basaen so 1 Corinto 1:18-21.) Balet, ag-umanen na satan so balor na mensahe tayo, tan agmet nabawasan na satan so kaimportantian na pangiter na pankanawnawa ed amin a totoo a manisia legan a wala ni panaon. (Roma 10:13, 14) Legan tayon tutulongan so arum pian minabang ed edukasyon a manlalapud Dios, makaawat itayo na dakel a bendisyon.
Nabebendisyonan Iray Mansasakripisyo
13. Antoray insakripisyo nen apostol Pablo parad maong a balita?
13 Antis a nagmaliw a Kristiano si apostol Pablo, sikatoy impanaral tan impasal pian magmaliw a matalona ed limog na saray Judio. Nen manga 13 años to, sikatoy inmalis ed nianakan ton syudad na Tarso tan linma ed Jerusalem pian manaral ed “salian nen Gamaliel,” sakey a dederlengen a managbangat na Ganggan. (Gawa 22:3) Diad inlabas na panaon, nakakabat lay Pablo na saray kapanaonan to, tan no intuloy to itan, nayarin sikatoy nagmaliw a lider na saray Judio. (Gal. 1:13, 14) Balet ta sanen inawat toy maong a balita, inkaindan to lan amin iratan. Nagbabawian kasi nen Pablo so desisyon to? Andi. Diad tua, oniay insulat to: “Ipapasen ko met so amin a bengatla bilang anggapoy kakanaan nisengeg ed mabmablin pikakabat ed si Kristo Jesus a Katawan ko. Nisengeg ed sikato et agko kawkawanan a naandi so amin a bengatla tan impasen ko iratan bilang dakerakel a dutak.”—Fil. 3:8, NW.
14, 15. Antoray bendisyon ed sikatayo bilang “kakimeyan na Dios”?
14 Singa si Pablo, saray Kristiano natan et mansasakripisyo parad maong a balita. (Mar. 10:29, 30) Kasin onkukulang itayo odino walay nasasaew tayo lapud satan? Oniay alikna nen Robert, ya abitla ed gapo, a mipadpara met ed nalilikna na arum ni: “Anggapon balot so pagbabawian ko. Lapud sigpot-panaon a ministeryo, nagmaliw ak a maliket tan napnek, tan awalaan ak na pankanawnawan ‘natawayan tan nanengneng a si Jehova et maong.’ Kapagno walaray materyal ya isasakripisyok pian niyunak iray espiritual a kalat, naynay ak a bebendisyonan nen Jehova na mas ni nen samay insakripisyok. Say pakaliknak ingen et agak nansakripisyo. Say pinmawil ed siak et mas masulok ni!”—Sal. 34:8; Uli. 10:22.
15 No abayag ka lan mibibiang ed panagpulong tan panagbangat a kimey, seguradon wala met la ray pankanawnawan atawayan tan anengneng mo a si Jehova et maong. Asalim ta lan alikna so tulong na espiritu to legan mon itotongtong so maong a balita? Odino, anengneng mon aliketan so arum legan a lulukasan nen Jehova so kapusoan da ed mensahe tayo? (Gawa 16:14) Kasin tinulongan ka nen Jehova a talonaan iray makaamper ed ministeryom, a nayarin sikatoy nanggawa na dalan pian napalaknab mo itan? Kasin tinulongan to ka diad panaon na irap, kanian akapantultuloy kan nanlingkor anggano say pakaliknam et makapkapuy ka la? (Fil. 4:13) No personal tayon naeeksperiensya so tulong nen Jehova diad panusumpal tayo ed ministeryo, sikatoy lalon magmamaliw a tua ed sikatayo tan lalon onapit so liknaan tayo ed sikato. (Isa. 41:10) Agta baleg a bendisyon so pagmaliw a “kakimeyan na Dios” ed sayan baleg a kimey a pananginabang ed edukasyon a manlalapud Dios?—1 Cor. 3:9.
16. Anto so naliliknam ed pansasagpot tan pansasakripisyom parad kimey a panagbangat ed totoo nipaakar ed si Jehova?
16 Dakel so totoon manpipirawat a makagawa na bengatlan agnalinglingwanan. Ingen ta amta tayon agmanbayag et nalingwanan met lanlamang iray makapadinayew ya agawaan na sakey a too diad sayan mundo. Balet, saray kimey a susumpalen nen Jehova natan parad kapasantos na ngaran to et agbalot nalingwanan tan permanente lan kabiangan na rekord na saray totoo na Dios. Lawas irayan nanodnonotan. (Uli. 10:7; Heb. 6:10) Komon ta pablien tayo so pribilehyon mibiang ed makatantandan kimey a panagbangat ed totoo nipaakar ed si Jehova.
Panon Mon Ebatan?
• Anto so kakaukolanen nen Jehova ed saramay ibabangat to?
• Panon a napapaaligwas na edukasyon a manlalapud Dios iray bilay na totoo?
• Antoray bendisyon ed sikatayo diad panutulong tayo ed arum a minabang ed edukasyon a manlalapud Dios?
[Tepetepet Parad Panagaral]
[Litrato ed pahina 23]
Saramay ibabangat nen Jehova et walaan na peteg a sankamundoan ya impanaagi
[Litrato ed pahina 24]
Agta bendisyon so pagmaliw a “kakimeyan na Dios”?