Lawas Aligen so Kanonotan nen Kristo

‘Nawalaan kayo komon na kanonotan a mipadpara ed si Kristo Jesus.’​—ROMA 15:5, NW.

1. Akin et nepeg tayon panggunaetan ya aligen so kanonotan nen Kristo?

“DAGO kayo’d siak,” so kuan nen Jesu-Kristo. “Manaral kayo’d siak, ta mauyamo ak tan mapaabeba ak [ed] puso, et naromog yoy inawa nipaakar ed saray kamarerwa yo.” (Mat. 11:28, 29) Sayan alay-abig ya imbitasyon et mangipapatnag ed maaron awawey nen Jesus. Anggapo lay toon mas maabig nin ehemplo a naalig tayo. Anggaman sikatoy makapanyarin Anak na Dios, walay pililikna tan panangiyansakit to, nagkalalo la ed saray nanairapan.

2. Antoran limaran aspekto na awawey nen Jesus so aralen tayo?

² Diad sayan artikulo tan ed duara nin ontumbok, aralen tayo no panon a niwalad sikatayo so “kanonotan nen Kristo,” no panon a napansiansia itan, tan no panon a nipatnag itan ed kabibilay tayo. (1 Cor. 2:16) Walay limaran aspekto ya usisaen tayo: (1) say inkauyamo tan inkamapaabeba nen Jesus, (2) kaabigan to, (3) katutulok to ed Dios, (4) pakpel to, tan (5) say ag-onsasaew a panangaro to.

Makaaral ed Inkauyamo nen Kristo

3. (a) Anton leksion nipaakar ed inkamapaabeba so imbangat nen Jesus ed saray disipulo to? (b) Antoy reaksion nen Jesus ed saray kakapuyan na saray disipulo to?

³ Si Jesus, say perpekton Anak na Dios, so mabulos a linma diad dalin pian manlingkor ed limog na agperpekto tan makasalanan a totoo. Arum ed saratan a totoo et mamatey ed sikato diad saginonor. Anggaman ontan, apansiansia nen Jesus so liket to tan akontrol toy inkasikato. (1 Ped. 2:21-23) No “akateen so imano tayo” ed ehemplo nen Jesus, nagawaan tayo met itan anggaman naaapektoan itayo na kalilingoan tan ag-inkaperpekto na arum. (Heb. 12:2, NW) Inimbitaan nen Jesus iray disipulo to ya ‘alaen day pako to’ tan sirin et makaaral ed sikato. (Mat. 11:29) Antoy naaralan da? Say sakey et sikatoy mauyamo tan maanos ed sikara anggaman walaray kalilingoan da. Diad samay labi antis na impatey nen Jesus, inurasan to ray kasalian da, diad ontan et imbangat to so agdan balot nalingwanan a leksion nipaakar ed pagmaliw a ‘mapaabeba ed puso.’ (Basaen so Juan 13:14-17.) Diad saginonor, sanen ag-ayarian nen Pedro, Santiago, tan Juan so “manbantay,” makonsideran binidbir nen Jesus so kakapuyan da. “Simon, naugip ka?” so intepet to. “Manbantay kayo tan manpikasi kayo, pian agkayo onloob ed katutukso. Say espiritu tua a maabuloy, balet say laman makapuy.”​—Mar. 14:32-38.

4, 5. Panon itayon natulongan na alimbawa nen Jesus pian napidenengay kalilingoan na arum?

⁴ Antoy reaksion tayo sano say sakey a agi et makompetensia, masinti, odino agtampol mangawat na simbawa na mamatatken odino na “matoor tan makabat ya aripen”? (Mat. 24:45-47) Nayarin mabulos tayon palabasen iray makapuy a kagagawa na totoo ed sayan mundo, balet no saray agagi tayo lay nalingo et ompan mairap tayon palabasen. No mainomay tayon nasyodotan ed kalilingoan na arum, kaukolan tayon tepetay inkasikatayo, ‘Panon kon nagkalalon nipatnag so “kanonotan nen Kristo”?’ Tandaan ya agnaingongotan si Jesus ed saray disipulo to anggaman walaray kakapuyan da ed espiritual.

⁵ Imanoen tayo pay apostol Pedro. Sanen sikatoy tinawag nen Jesus ya onepas ed baloto tan manakar ed danum paonla ed kawalaan To, diad unona et asarag itan nen Pedro. Kabebekta balet et inimano nen Pedro so maksil a dagem kanian  sikatoy ginmapon linmereg. Sinmanok kasi Jesus tan imbaga ton: “Gunggonam! Panderyaan mo ‘tan a”? Andi! “Tampol ya inyunat nen Jesus so lima to, tan sikato so siningkat to, tan kuan to ed sikato, O sika makulang na pananisia, akin et nanduaruwa ka?” (Mat. 14:28-31) No bilang ta kaukolan tayon pidenengan so makapuy a pananisia na sakey ya agi, sarag tayo met kasin iyunat so lima tayo, a singa panangibaga, tan tulongan ya ombiskeg so pananisia to? Samay impanulong nen Jesus ed si Pedro et seguradon pakaaralan tayo.

6. Antoy imbangat nen Jesus ed saray apostol to nipaakar ed pampilalek dan magmaliw a manunaan?

⁶ Kaiba met si Pedro ed mabetbet a pansasangsang na saray apostol nipaakar ed no siopay sankatalonggaringan ed sikara. Labay nen Santiago tan Juan so onyurong ed nikawanan tan nikawigi nen Jesus diad Panarian to. Sanen nadngelan iya nen Pedro tan arum ya apostol, sinmanok iran maong. Amta nen Jesus a posiblin oniay ugali ra lapud binalegan da. Kanian tinawag to ra tan inkuan to: “Amta yo a saray makauley na saray Gentiles sikara so katawan ed sikara, tan saray manunaan agamilen da so pakauley da ed sikara. Aliwan ontan naani dia ed sikayo; noag ingen siopaman a labay toy magmaliw a baleg ed sikayo sikato naani managlingkor yo. Tan siopaman a labay toy unaan ed sikayo sikato naani aripen yo.” Insan to impaimano so mismon alimbawa to: “Singa say Anak na too ya agdia linma a panlingkoran, noag say manlingkor, tan iter toy bilay to a panondon ed amayamay.”​—Mat. 20:20-28.

7. Panon a makatulong so balang sakey ed sikatayo pian niwalay pankakasakey ed kongregasyon?

⁷ No dalepdepen tayoy kapaabebaan nen Jesus, onkiwas itayon “kamelagan” ed saray agagi tayo. (Luc. 9:46-48) Diad ontan et niwalay pankakasakey. Si Jehova et aliling toy ama na baleg a pamilya tan labay ton ‘manayam ed inkasaksakey’ iray anak to, a maong so panuulopan da. (Sal. 133:1) Oniay impikasi nen Jesus ed Ama to nipaakar ed amin a tuan Kristiano: “Akikasakey ak ed sikara tan akikasakey ka ed siak, ta pian magmaliw iran peteg a nankakasakey, tan nakabatan na mundo a siak so imbakim tan inarom ira a singa impangarom ed siak.” (Juan 17:23, NW) Kanian, say pankakasakey tayo et mangipapabidbir a papatumbok itayo nen Kristo. Pian niwala so pankakasakey, nepeg a say panmoria tayo ed ag-inkaperpekto na arum et mipara ed si Kristo. Si Jesus et mabulos a mamerdona, tan imbangat ton naperdona itayo labat no mamerdona itayo.​—Basaen so Mateo 6:14, 15.

8. Antoy naaralan tayo ed ehemplo na saray abayag lan lingkor na Dios?

⁸ Dakel met so naaralan tayo no aligen tayoy pananisia na saramay abayag lan mangaalig ed si Kristo. Singa si Jesus, natatalosan na sarayan lingkor na Dios so ag-inkaperpekto na arum. Naaralan dan say pangipanengneng na singa-Kriston panangabagey so aglabat ontulong ed sikatayo pian ‘nasungdoan so kaleteyan na makapuy,’ noagta mamawala met itan na pankakasakey. (Roma 15:1) Sakey ni, satan so mamaseseg ed interon kongregasyon pian ipatnag so kanonotan nen Kristo. Mipara ed samay kaliktan nen apostol Pablo ed saray Kristiano ed Roma so pilalek na sarayan lingkor ed agagi da: “Iyabuloy komon na Dios a mangitatarya na panagsungdo tan ligliwa a sikayoy nawalaan na panagnonot a mipadpara ed si Kristo Jesus, ta pian diad panamegley na saksakey a sangi et sikayo so mankakasakey a mangigloria ed Dios tan Ama na Katawan tayon Jesu-Kristo.” (Roma 15: 5, 6, NW) On, say nankakasakey a panagdayew tayo et mangiglogloria ed si Jehova.

9. Akin et kaukolan tayo so masanton espiritu pian naalig so alimbawa nen Jesus?

⁹ Impankonektaan nen Jesus so ‘inkamapaabeba ed puso’ tan kauyamoan, a kabiangan na bunga na masanton espiritu na Dios. Kanian, nilikud ni ed panaral ed alimbawa nen Jesus, kaukolan tayo so masanton espiritu nen Jehova pian duga so pangalig tayo ed satan ya alimbawa. Nepeg tayon kerewen so masanton espiritu na Dios tan pampelengan tayon bayuboan so bunga na satan​—“aro, liket, deen, kasungdoan, kauyamoan, kaabigan, sisia, tayadno, dangka.” (Gal. 5:22, 23) No aligen tayoy kapaabebaan tan kauyamoan nen Jesus, napaliket tayo so Ama tayo ed tawen, si Jehova.

Maabig so Impantrato nen Jesus ed Totoo

10. Panon ya impanengneng nen Jesus so kaabigan?

¹⁰ Say kaabigan et kabiangan met na bunga na masanton espiritu. Lawas a maabig so impantrato nen Jesus ed totoo. Naimatonan na amin a masimoon a tinmumbok ed si Jesus so maabig ya ‘impangawat to ed sikara.’ (Basaen so Lucas 9:11.) Antoy naaralan tayo ed impanengneng nen Jesus a kaabigan? Say toon mangipapanengneng na kaabigan et makaaro, maulimek, masimpatiya, tan makonsidera. Ontan si Jesus. Inabagey to iray totoo “lapud maermen tan abuybuyak ira, a singa saray karnero ya anggapoy pastol da.”​—Mat. 9:35, 36.

11, 12. (a) Isalaysay so sakey ya alimbawa no panon a tinekepan nen Jesus na gawa so panangabagey to. (b) Antoy naaralan mo ed sayan alimbawa?

¹¹ Say alikna nen Jesus a panangabagey tan panangasi et tinekepan toy gawa. Nia so sakey ya alimbawa. Walay sakey a bii a 12 a taon lan manpaparala. Amta to a diad Mosaikon Ganggan, sikato tan siopaman a makadiwit ed sikato et marumsis tan agnayarin mibiang ed relihyoso iran seremonya. (Lev. 15:25-27) Anggaman ontan, nayarin lapud reputasyon tan maabig a panagtrato nen Jesus ed totoo, sikatoy akombinse a sarag tan labay nen Jesus a sikatoy paabigen. Oniay lanang ton ibabaga ed inkasikato: “No nadiwit ko lambengat so saray kawes to, onabig ak.” Kanian sikatoy nampakpel, diniwit toy kawes nen Jesus, tan alikna ton tampol a sikatoy inmabig.

¹² Amta nen Jesus a walay aniwit ed sikato, tan nilingaw to no siopa iman. Nayarin natatakot imay bii a sikatoy napampasnokan lapud sinumlang toy Ganggan, kanian sikatoy manggiwgiw a dinmakmomo ed si Jesus tan imbaga toy amin a katuaan. Nantamian kasi nen Jesus iyan pakaskasi tan maniirap a bii? Andin balot! Oniay impaseguro nen Jesus: “Anak, say pananisiam pinaabig to ka, onla ka’d kareenan.” (Mar. 5:25-34) Seguradon nainawaan so bii ed saraman a maabig a salita nen Jesus!

13. (a) Antoy pidumaan na awawey nen Jesus ed saray Fariseo? (b) Panon so impantrato nen Jesus ed saray ugugaw?

¹³ Aliwan singa saray Fariseo ya anawet so puso ra, agbalot inusar nen Kristo so autoridad to pian lalon nabelatan so totoo. (Mat. 23:4) Imbes, mapangasi tan maan-anos ton imbangat ed totoo so nipaakar ed saray dalan nen Jehova. Sikatoy maad-aron kaulop na saray papatumbok to, mangiyaansakit tan mao-maong, sakey a tuan kaaro. (Uli. 17:17; Juan 15:11-15) Anggan saray ugugaw et maasingger ed sikato, tan sikatoy maasingger met ed sikara. Anggaman okupado, sikatoy angigana na panaon parad saray ugugaw. Aminsan, lapud atagtagey nin siansiay pakanengneng na saray disipulo to ed inkasikara, a singa saray lider na relihyon, sinebelan da ray totoo ya iyakar so ananak da ed si Jesus pian nabembenan to ra. Ag-agustoan nen Jesus iman a ginawa na saray disipulo to. Oniay inkuan to  ed sikara: “Paulyan yo so saray angkekelag ya ugugaw ya ondago ed siak; agyo ra sebelan, ta sikara so makankien na panariay Dios.” Insan to inusar ya alimbawa iray ugugaw pian mangibangat na importantin leksion: “Tua kuan ko ed sikayo, Siopaman ya agmangawat na panariay Dios a singa sakey a melag ya ugaw, agmakaloob a balot diman.”​—Mar. 10:13-15.

14. Antoy epekto ed saray ugugaw no nalilikna day panangaro?

¹⁴ Isipen pan magano no antoy alikna na saraman ya ugugaw sanen baleg la ra, tan nanonotan dan ‘nilalakap tan benebendisyonan ira nen Jesu-Kristo.’ (Mar. 10:16, NW) Ontan to met ed saray ugugaw natan, diad ibaleg da et panliketan dan nodnonoten so panangaron impanengneng ed sikara na saray mamatatken tan arum ni. Nagkalalo ed amin, no ipapalikna na kongregasyon so panangaro ed sarayan ugugaw, nalikna ra a say espiritu nen Jehova et walad saray lingkor to.

Ipanengneng so Kaabigan Diad Sayan Mauges a Mundo

15. Akin et agtayo pankelawan a matalag lay mangipapanengneng na kaabigan natan?

¹⁵ Liknaen na dakel natan ya anggapoy panaon dan mangipanengneng na kaabigan ed arum. Kanian inagew-agew a diad eskuelaan, trabaho, pambiabiahe, tan diad ministeryo, kaukolan a pidenengan na saray lingkor nen Jehova iyan mundon agmangipapanengneng na kaabigan. Nayarin nadismaya itayo ed magasal ya ugali na totoo, balet ta agtayo la itan pankelawan. Pinuyanan nen Jehova si Pablo pian pasakbayan itayo a diad sarayan mair-irap a “kaunoran ya agew” et agnapaliisan na saray tuan Kristiano so mideneng ed totoon ‘maaro ed saray laman da tan anggapo so aro ra a nianakan.’​—2 Tim. 3:1-3.

16. Panon tayon nipanengneng ed kongregasyon so singa-Kriston kaabigan?

¹⁶ Nidumaduma balet so maabig a kipapasen na tuan Kristianon kongregasyon ed sayan mauges a mundo. No aligen na balang sakey ed sikatayo si Jesus, makatulong itayo pian napansiansia itan a kipapasen. Panon tayon nagawaan itan? Dakel ed kongregasyon so mankaukolan na tulong tan panamaseseg tayo lapud walaray problema da ed bunigas odino arum ni ran mairap a kipapasen. Diad sarayan “kaunoran ya agew,” talagan dakel so ontan iran problema balet ta amta tayon onsabin-onsabi iratan. Saray inmuunan Kristiano et akasagmak met na ontan iran problema. Kanian no panon a kaukolan na saray Kristiano nensaman so tulong, kaukolan tayo met itan natan. Singa bilang, pinaseseg nen Pablo iray Kristiano a ‘ligliwaen da iramay maneermen, tulongan iramay makapuy, tan nawalaan ira komon na andukey a panag-anos ed amin.’ (1 Tes. 5:14, NW) Kabaliksan na saya a say singa-Kriston kaabigan et atekepay gawa.

17, 18. Antoray pigaran paraan a naalig tayo so kaabigan nen Jesus?

¹⁷ Responsabilidad tayo ran Kristiano ya ‘awaten’ iray agagi tayo, a tratoen ira a singa ed pantrato nen Jesus ed sikara. Nepeg tayon ipanengneng so tuan panangiyansakit ed saray abayag tayo lan kabkabat ya agagi tan anggan saray balobalo  ni. (3 Juan 5-8) Agla inalagar nen Jesus ya onkerew na tulong so totoo, sikatoy nambulon lan angipanengneng na panangabagey. Nepeg ya ontan itayo met, a lawas makaligliwa itayo ed arum.​—Isa. 32:2; Mat. 11:28-30.

¹⁸ Nipanengneng na balang sakey ed sikatayo so kaabigan no iyansakit tan tulongan tayo iray agagi. Imanoen iray pankanawnawan natulongan ira. Pansagpotan tayo itan! Oniay impaseseg nen Pablo: “Dia ed aroan na sanaagi, ipatnag yo ed sakey tan sakey so matamoy a panamabli.” Insan to inyarum: “Idaulo yo so panangipanengneng na galang ed sakey tan sakey.” (Roma 12:10, NW) Kabaliksan na satan a kaukolan tayon tumboken so alimbawa nen Kristo, a makonsidera tan maabig so pantrato tayo ed arum, tan aralen ya ipanengneng so “aro a matua.” (2 Cor. 6:6) Oniay impaneskribe nen Pablo ed singa-Kriston aro: “Say aro manangitepel, tan mauyamo; say aro anggapoy siblet to; say aro agto ipasirayew so inkasikato, aliwan mapangta.” (1 Cor. 13:4) Imbes ya onimbel so linawa tayo ed saray agagi, nepeg tayon talinengen iyan simbawa: “Manaanosan kayo ed sakey tan sakey, mapangasi, manpeperdonaan so sakey tan sakey, a singa met say Dios pinerdona to kayo ed Kristo.”​—Efe. 4:32.

19. Antoray maong a resulta sano ipanengneng tayo so singa-Kriston kaabigan?

¹⁹ No diad kada situasyon et lawas tayon pansagpotan a bayuboan tan ipanengneng so singa-Kriston kaabigan, natumangan itayon maong. Mabulos ya onkurang so espiritu nen Jehova ed kongregasyon, diad ontan et natulongan so amin ya ipatnag so bunga na satan. Niarum ni, sano aligen tayoy ehemplon intilak nen Jesus tan tulongan met so arum ya ontan so gawaen da, say magayaga tan nankakasakey a panagdayew tayo so mamaliket ed Dios. Kanian, lawas tayo komon a pampelengan ya ipatnag so inkauyamo tan kaabigan nen Jesus diad pidedeneng tayo ed totoo.

Kasin Nipaliwawa Yo?

• Panon ya impanengneng nen Jesus a sikatoy ‘mauyamo tan mapaabeba ed puso’?

• Panon ya impanengneng nen Jesus so kaabigan?

• Diad sayan agperpekton mundo, antoray pigaran paraan a nipanengneng tayoy singa-Kriston kauyamoan tan kaabigan?

[Tepetepet Parad Panagaral]

[Litrato ed pahina 8]

Sano kinmapuy so pananisia na sakey ya agi, a singa si Pedro, iyunat tayo kasi lima tayo a singa panangibaga?

[Litrato ed pahina 10]

Antoy nagawaan mo pian nipanengneng moy kaabigan ed kongregasyon?