Magmaliw a Matulok tan Makpel a Singa si Kristo

“Manpakpel kayo! Tinalok [so] mundo.”​—JUAN 16:33, NW.

1. Akin a nibagan nagnap so katutulok nen Jesus ed Dios?

LAWAS gagawaen nen Jesu-Kristo so linawa na Dios. Agbalot sinmebang ed nonot to a sumlangen so Ama to a walad tawen. (Juan 4:34; Heb. 7:26) Balet aliwan mainomay parad sikato so ontulok sanen sikatoy wadiad dalin lapud saray asagsagmak to dia. Diad gapo ni labat na ministeryo nen Jesus, saray mamubusol ed sikato, kaiba lay Satanas, et analin sikatoy lagyaten, puersaen, odino palikdoen pian agla manmatoor. (Mat. 4:1-11; Luc. 20:20-25) Lapud saya et asagmak nen Jesus so pinasyan gonigon, paga, tan ot-ot ed laman. Diad kaunoran, sarayan mamubusol ed si Jesus et asarag dan sikatoy ipapatey ed panamairapan a kiew. (Mat. 26:37, 38; Luc. 22:44; Juan 19:1, 17, 18) Diad amin na saraya, tan anggaman pinasyay irap ya asagmak to, sikatoy “matulok ya anggad say ipapatey.”​—Fil. 2:8.

2, 3. Antoy naaralan tayo ed intulok nen Jesus anggaman akasagmak na kairapan?

² Lapud saray naeksperiensya nen Jesus bilang too diad dalin, naaralan to so ontulok anggaman mair-irap iray kipapasen, ya agto nin balot asagmak iratan nensaman. (Heb. 5:8) Nayarin isipen yon anggapo lay kaukolan nin aralen nen Jesus no nipaakar ed panaglingkor ed si  Jehova ta abaybayag la ran maapit a sankaiba. Sakey ni, sikato so “uloen a komikimey” na Dios legan na panamalsa. (Uli. 8:30) Balet, bilang too, apaneknekan a talagan nagnap so katooran to sanen sinungdoan to so irap tekep na pananisia. Lalon inmapit so Anak na Dios ed Ama to. Antoy naaralan tayo ed saya?

³ Anggaman si Jesus et perpekton too, agto nanmatalek ed inkasikato pian makapansiansian matulok. Noagta, kinerew toy tulong na Dios pian nagawaan itan. (Basaen so Hebreos 5:7.) Pian mansiansia itayon matulok, kaukolan tayo met so magmaliw a mapaabeba tan maparanay a manpikasi. Lapud saya, binilin nen apostol Pablo iray Kristiano: “Yatol yo so sayan kalakal [odino, kanonotan] ed sikayo, a wala met nensaman ed Kristo Jesus,” a “nampaabeba [tan] nagmaliw a matulok ya anggad say ipapatey.” (Fil. 2:5-8) Diad saray ginawa nen Jesus, pinaneknekan to a sarag na too so ontulok anggaman mauges so kaliberliber to. Perpekto si Jesus, panon to balet iray agperpekton totoo a singa sikatayo?

Sarag Tayoy Ontulok Anggaman Agperpekto

4. Antoy kabaliksan na impamalsa ed sikatayo bilang totoon walaay kawayangan a mandesisyon?

⁴ Pinalsa na Dios si Adan tan Eva bilang intelihentin totoo a walaan na kawayangan a mandesisyon. Lapud ananak da itayo, walaan itayo met na ontan a kawayangan. Antoy kabaliksan na satan? Kabaliksan na satan a sarag tayoy mandesisyon no kasin maong odino mauges so gawaen tayo. Diad arum a salita, inikdan itayo na Dios na kawayangan a manpili no kasin sikatoy tuloken tayo odino andi. Balet, sayan baleg a kawayangan et walay katekep ton responsabilidad, tan walay eebatan tayo ed Dios. On, saray gawaen tayon desisyon et mankabaliksan na bilay odino patey. Tan saratan et walaan met na epekto ed totoon maapit ed sikatayo.

5. Akin a nanairapan itayon ontulok, balet ta antoy makatulong ed sikatayo?

⁵ Lapud atawir tayo so ag-inkaperpekto, aliwan mainomay so ontulok ed saray ganggan na Dios. Anggan si Pablo et nairapan met ya ontulok. Oniay insulat to: “Wala so nanengneng ko a sananey a ganggan ed saray kabiangan ko, a mibakal ya onsumpa ed ganggan na isip ko, tan adakep to ak ed ganggan na kasalanan a wala ed saray kabiangan ko.” (Roma 7:23) Siempre, mas mainomay so ontulok no mainaway kipapasen, anggapoy irap, odino panagsakripisyo. Ingen, anto kasi gawaen tayo no pilalek tayoy ontulok balet ta pipilaleken tayo met so “kilalawan na laman tan kilalawan na mata”? Walaan itayo na onia ran makapuy a pilalek lapud ag-itayo perpekto tan lapud “espiritu na mundo.” Baleg so impluensya na sarayan pilalek ed sikatayo. (1 Juan 2:16; 1 Cor. 2:12) Pian naresistian tayo iraya, kaukolan tayon ‘iparaan so puso tayo’ antis tayon nipaarap ed mairap iran situasyon odino pakatuksoan. Tan nepeg a determinado itayon tuloken si Jehova, antokaman ni nagawa. (Sal. 78:8, NW) Dakel so alimbawan nabasa ed Biblia nipaakar ed saramay tinmulok lapud imparaan day puso ra.​—Esd. 7:10; Dan. 1:8.

6, 7. Iyilustra no panon a makatulong so personal a panagaral pian duga iray desisyon tayo.

⁶ Say sakey a paraan a niparaan so puso tayo et diad makulin panaral na Kasulatan tan saray publikasyon a base ed Biblia. Isip mo pa iyan situasyon. Kunwari et eskedyul na panaral moy Biblia ed sayan labi. Kinerew mo ed si Jehova ya ipagamor to komon so espiritu to pian niyaplikam so naaralan mo ed Salita to. Planom a bantayan so sakey a pelikula ed TV nabuas na labi. Dakel so mangibabagan marakep itan a palabas, balet antam met a walaray laok ton imoral tan bayulentin eksena.

⁷ Minorekdek mo so simbawa nen Pablo a walad Efeso 5:3: “Say lawan, tan say amin a nengneng na karumsisan, odino say agum, agla komon nabitla ed sikayo, unong a manepeg ed saray sasantos.” Anonotan mo met imay bilin nen Pablo diad Filipos 4:8. (Basaen.) Legan mon dadalepdepen irayan simbawa, tinepetan moy inkasika, ‘No gagalaen kon panoen so pusok tan nonot ko na onia ran palabas, nibagak kasin tutumboken koy alimbawa nen Jesus ed nagnap a  katutulok ed Dios?’ Antoy gawaen mo? Ituloy mo ni kasin bantayan itan a pelikula?

8. Akin et nepeg a pansiansiaen tayoy atagey a moral tan espiritual iran estandarte?

⁸ Ompan isipen tayon aliwan makapuy so pangiyabebay moral tan espiritual iran estandarte tayo, ya abaloan tayo et mabiskeg itayo kanian sarag tayon resistian iray epekto na mauges a kaulop, kaiba lay bayolenti tan imoral iran panagligliwaan. Lingo itan a panmoria. Imbes, nepeg tayon protektaan so inkasikatayo tan saray anak tayo ed sarayan makaderal ya impluensya a pakapatnagay awawey nen Satanas. Singa bilang, manaalwar a maong iray walaan na kompyuter pian agnaloobay virus so kompyuter da, ta deralen toy karga tan igana na satan. Sarag ni ingen na virus a kontroley interon sistema na kompyuter tan lanoren toy arum nin kompyuter. Agta mas alerto itayon protektaay inkasikatayo ed saray ‘panangalot’ nen Satanas?​—Efe. 6:11.

9. Akin et nepeg a determinado itayon tulokey Jehova diad kada agew?

⁹ Diad kada agew lawari et kaukolan tayoy manpili no gawaen tayoy linawa nen Jehova odino andi. Pian nagamoray kililiktar, nepeg tayon unoren so Dios tan manbilay unong ed maptek iran prinsipyo to. No aligen tayoy Kristo a tinmulok ‘angga ni ingen ed ipapatey,’ nipapanengneng tayo a peteg so pananisia tayo. Tumangan nen Jehova so katooran tayo. Insipan nen Jesus: “Say misungdo ya angga ed kasampotan, sikato lanlamang so nilaban naani.” (Mat. 24:13) Pian nagawaan iya, kaukolan tayon bayuboan so tuan inkakpel, a singa si Jesus.​—Sal. 31:24.

Jesus​—Say Manunan Ehemplo na Inkakpel

10. Antoray nayarin pakadesdesan tayo, tan antoy nepeg a reaksion tayo ed saratan?

¹⁰ Apaliberan itayo na awawey tan ugali na sayan mundo kanian kaukolan tayoy manpakpel pian ag-itayo nasamalan. Saray Kristiano et nadedesdes no nipaakar ed moralidad, kuarta, relihyon, tan diad komunidad a kawalaan da. Lapud saratan, nayarin makaarawi ira ed maptek iran estandarte nen Jehova. Dakel so susumpaen ni ingen na kapamilyaan. Diad arum a bansa, talagan nipupurek ed saray eskuelaan so bangat ya ebolusyon, tan dakel la ray manisian anggapoy Dios. Sano nadedesdes, agnayarin anggapoy gawaen tayo. Kaukolan ya onkiwas itayo pian nalabanan iratan tan sirin et naprotektaan itayo. Makaaral itayo ed alimbawa nen Jesus no panon itan a nagawaan.

11. Panon itayon lalon makapanpakpel no dalepdepen tayoy alimbawa nen Jesus?

¹¹ Oniay imbaga nen Jesus ed saray disipulo to: “Diad mundo et walaan kayo na kairapan, balet manpakpel kayo! Tinalok [so] mundo.” (Juan 16:33, NW) Agton balot nampaimpluensya ed mundo. Agton balot inabuloyan so mundo a mamatunda ed sikaton manpulong nisay inyabeba toy estandarte to parad dugan panagdayew tan kondukta. Nepeg ya ontan itayo met. Diad pikakasi et oniay inkuan nen Jesus nipaakar ed saray disipulo to: “Ag-ira kabiangan na mundo, a singa siak ya agkabiangan na mundo.” (Juan 17:16, NW) No aralen tan dalepdepen tayo so inkakpel nen Kristo, magmaliw  itayo met a makpel pian mansiansian agkabiangan na sayan mundo.

Makaaral ed Inkakpel nen Jesus

12-14. Mangiter na saray alimbawa a mangipapanengneng a makpel si Jesus.

¹² Napatnagan diad interon ministeryo nen Jesus a sikatoy talagan makpel. Inusar to so autoridad to bilang Anak na Dios sanen sikatoy andi-takot a ‘linmoob ed templo na Dios, tan pinapaway to ray amin a nantagtagilako tan nansasaliw dia ed templo, tan inggeba to so saray dulang na saray managsalat na pilak, tan saray yurongan na saray managtagilako na malmalapati.” (Mat. 21:12) Sanen erelen la na saray sundalo diad samay unor a labi to diad dalin, sikatoy makpel ya akiarapan pian naprotektaan iray disipulo to, a kuan to: “No siak so anapen yo . . . , paulyan yo so saraya ya onla.” (Juan 18:8) Insan to ingganggan si Pedro ya ipawil to la’d kaluban so espada to, a mangipapanengneng a say panmamatalkan nen Jesus et aliwan saray armas, noagta si Jehova.​—Juan 18:11.

¹³ Andi-takot met ya inwalwal nen Jesus iray mauges a kagagawa tan tilan bangat na saray kapanaonan ton palson managbangat. “Kasi kayo la, ya eskribas tan Fariseos, a mansimpisimpitan! ta kapotan yo so panarian na tawen sumpa ed saray totoo,” so kuan nen Jesus ed sikara. “Pinaulyan yo ya agsinumpal so saray ambelbelat a pamaakaray katunongan salanti, kaalasan, tan panangasi tan pananisia. . . . Urasan yoy paway na baso tan lipong, say dalem da balet napno na kasibaan tan inkaalablabas.” (Mat. 23:13, 23, 25) Kaukolan na saray disipulo nen Jesus so ontan met a pakpel lapud pasegsegangen met ira na saray palson lider na relihyon, tan say arum ed sikara et ipapatey da ni ingen.​—Mat. 23:34; 24:9.

¹⁴ Anggan saray demonyo et makpel met a sinumpa nen Jesus. Aminsan, walay nabet ton laki a sinelepay demonyo. Ontan lay kabiskeg to iyan laki ya anggapoy makagolonggolong ed sikato. Ag-apagyaw si Jesus, tan pinapaway toy dakerakel a demonyon mangokontrol ed saman a laki. (Mar. 5:1-13) Diad panaon tayo, agla mangipapagamor so Dios ed saray Kristiano na pakayarin manggaway ontan iran milagro. Anggaman ontan, diad panagpulong tan pambabangat tayo, nepeg a mibakal itayo met ed si Satanas, ya ‘amulag ed kaisipan na saray agmanisia.’ (2 Cor. 4:4) Singa met ed si Jesus, saray armas tayo et ‘aliwan minumundo, noagta say pakayari a manlalapud Dios, pian nigeba iray bengatlan malmalet ya akaletneg,’ salanti, saray nigalet ingen ta lingon sisisiaen. (2 Cor. 10:4, NW) Aralen tayo pa no panon ya inusar nen Jesus irayan espiritual ya armas, tan no panon tayon naalig so alimbawa to.

15. Antoy akabasian na inkakpel nen Jesus?

¹⁵ Say inkakpel nen Jesus et aliwan lapud inkalastog, noagta akabase itan ed pananisia. Nepeg ya ontan met ed sikatayo. (Mar. 4:40) Panon tayon nawalaan na peteg a pananisia? Makaaral tayo lamet ed ehemplo nen Jesus. Kabkabisado to so Kasulatan tan sigpot ton nanmatalekan itan. Si Jesus et ag-angusar na literal ya espada, noagta espada na espiritu, salanti say Salita na Dios. Lawas ton pepekderan iray bangat to panamegley na Kasulatan. Mabetbet ton ibabaga so onia: “Walan nisulat,” salanti, diad Salita na Dios. *

16. Panon tayon napabiskeg so pananisia tayo?

¹⁶ Pian ombiskeg so pananisia tayo, diad ontan et makatalindeg tayo ed saray subsubok a katekep na pagmaliw a babangatan, nepeg tayon aralen tan basaen so Biblia ed inagew-agew  tan atendian iray Kristianon pantitipon. Nepeg tayon ipaslep ed isip tayo iray katuaan a basiyan na pananisia. (Roma 10:17) Nepeg tayo met a nodnonoten a maong odino dalepdepen so nanaaralan tayo, ya abuloyan itan ya ontanek ed puso tayo. Makapanpakpel itayo labat no mabiskeg so pananisia tayo. (Sant. 2:17) Tan nepeg tayo met a kerewen so masanton espiritu lapud say pananisia et kabiangan na bunga na espiritu.​—Gal. 5:22.

17, 18. Panon ya impanengneng na sakey a kalangweran so inkakpel diad eskuelaan?

¹⁷ Naeksperiensya na sakey a kalangweran ya agi a manngaran na Kitty no panon a mangiter na inkakpel so peteg a pananisia. Manlapu la’d inkaugaw et amta ton agto nepeg ya “ibaing so ebanghelyo” diad eskuelaan, tan labalabay ton napulongan iray kaeskuela to. (Roma 1:16) Diad ilalabas na taon et mas pipilaleken ton ipulong so maong a balita, balet agto nagagawaan itan lapud anggapoy pakpel to. Kayari pigaran taon, sikatoy inmalis ed arum ya eskuelaan. Oniay inkuan to: “Dakdakel lay pinalampas kon pankanawnawa, balet natan talagan gawaen ko lay anggaay nayarian ko.” Impikasi nen Kitty a sikato komoy nawalaan na singa-Kriston pakpel, pakatebek, tan dugan pankanawnawa.

¹⁸ Diad unonan agew na eskuela, kinerew ed saray estudyante ya ipakabat day inkasikara. Sinalambit na arum a kaklase nen Kitty no antoy relihyon da, balet ta kuan da met ya ag-ira aktibo ed satan. Amoria nen Kitty a saya la imay ipipikasi ton pankanawnawa. Nen sikato lay onsublay a mansalita, oniay matalek ya imbaga to: “Sakey ak ed saray Tasi nen Jehova, tan say Biblia so pangaalaan koy espiritual tan moral iran giya.” Legan ton mansasalita, walaray kaklase to a mankubibit. Balet, wala met iray dinmengel tan nantepet kayari impansalita to. Inkuan ni ingen na maestro nen Kitty a maong so ehemplo to ta sarag ton talindegan so relihyon to. Malikeliket si Kitty ta inalig toy inkakpel nen Jesus.

Ipanengneng so Singa-Kriston Pananisia tan Inkakpel

19. (a) Antoy kabaliksan na pakawalaay peteg a pananisia? (b) Panon tayon napaliket si Jehova?

¹⁹ Amoria met na saray apostol a say inkakpel da et nepeg ya akabase ed pananisia. Akikasi ira ed si Jesus: “Aruman mo so pananisia mi.” (Basaen so Lucas 17:5, 6.) Say peteg a pananisia et aliwa labat lan panisia a walay Dios. Mankabaliksan itan na iyapit tan panmatalek ed si Jehova, a singa ed relasyon na ugaw ed maomaong tan maaron ama to. Pinuyanan si Solomon a mangisulat na onia: “Anak ko, no say pusom makabat, say pusok manggayaga, anggan siak. On, say pusok, manliket, sano saray bibil mo mansalita na maptek a bengabengatla.” (Uli. 23:15, 16) Mipadpara, no makpel tayon talindegan iray maptek a prinsipyo, naliketan si Jehova, tan say pakaamta’d satan et lalon mangiter na pakpel ed sikatayo. Kanian, lawas tayon aligen si Jesus, a makpel tayon talindegan no anto so maptek!

[Paimano ed leksab]

Kasin Nipaliwawa Yo?

• Anto so ontulong pian makapansiansia itayon matulok anggaman ag-itayo perpekto?

• Antoy akabasian na peteg a pananisia, tan panon itan a makatulong pian magmaliw itayon makpel?

• Antoy resulta na katutulok tayo tan say pangipanengneng na singa-Kriston inkakpel?

[Tepetepet Parad Panagaral]

[Litrato ed pahina 13]

Kasin ‘ipaparaan moy pusom’ pian naresistian iray tukso?

[Litrato ed pahina 15]

Singa si Jesus, sarag tayon ipanengneng so inkakpel a base ed pananisia