Napakiwas Itayon Mangaro Lapud Panangaro nen Kristo

‘Inaro nen Jesus iray totoo to a wala ed mundo, inaro to ra angga ed kasampotan.’​—JUAN 13:1.

1, 2. (a) Akin et makapadinayew so panangaro nen Jesus? (b) Antoran aspekto na panangaro so pantongtongan tayo ed sayan artikulo?

IMPANENGNENG nen Jesus so naspot ya alimbawa na panangaro. Impatnag to itan diad amin a ginawa to, salanti, diad pananalita, kakikiwas, bangabangat, tan say masakripisyon impatey to. Anggad sampot na bilay to diad dalin, impanengneng toy panangaro ed saray pinulongan to tan nagkalalo la ed saray disipulo to.

² Say makapadinayew a panangaro nen Jesus et talagan maabig ya alimbawa a naalig na saray papatumbok to. Satan met so mamakiwas ed sikatayon aroen iray agagi tayo tan arum ni. Diad sayan artikulo, pantongtongan tayo no antoy naaralan na saray mamatatken ed kongregasyon ed si Jesus no nipaakar ed pangipanengneng na panangaro ed saray makakagaway lingo, anggan saray akagawa na seryoson kasalanan. Pantongtongan tayo met no panon a pakiwasen na pangaro nen Jesus iray Kristiano pian mantutulongan diad panaon na kairapan, kalamidad, tan sakit.

3. Anggaman akagawa na seryoson lingo si Pedro, panoy impideneng nen Jesus ed sikato?

³ Diad samay labi antis na impatey nen Jesus, sikatoy amitlon imburi na mismon apostol to a si Pedro. (Mar. 14:66-72) Balet, diad bektan akapawil lay Pedro, unong ya impasakbay nen Jesus, sikatoy pinerdona nen Jesus. Inmatalek to ed si Pedro so ambelat iran responsabilidad. (Luc. 22:32; Gawa 2:14; 8:14-17; 10:44, 45) Antoy naaralan tayo ed impideneng nen Jesus ed saray akagaway seryoson kasalanan?

Aligey Panangaro nen Kristo Diad Pidedeneng ed Saray Akapankasalanan

4. Diad anton situasyon a nagkalalon kaukolan so pangipanengneng na singa-Kriston panangaro?

⁴ Talagan kaukolan tayon ipanengneng so singa-Kriston panangaro, ingen ta sakey ed saray makapagonigon et no walay akagawa na seryoson kasalanan, balanglan diad pamilya odino diad kongregasyon. Makapaermen ta legan a manasingger lay anggaan na sistema nen Satanas, lalon onaabebay moralidad lapud impluensya na sayan mundo. Mauge-uges lay ugali na totoo tan baliwala ed sikara no antoy duga tan aliwa. Anggan siopa ed sikatayo et nayarin naimpluensyaan, ya onletey so determinasyon tayon manakar ed mainget a dalan. Diad saray kongregasyon nen inmunan siglo et walaray pigaran kaukolan a dispelosipen, tan saray arum et binaat. Ontan to met natan. (1 Cor. 5:11-13; 1 Tim. 5:20) Balet, anggaman walaray onian situasyon, no ipanengneng na saray mamatatken so singa-Kriston aro, natenyeg so liknaan na samay akapankasalanan.

5. Panon a naalig na saray mamatatken so awawey nen Kristo ed saray akapankasalanan?

⁵ Singa si Jesus, nepeg a lawas tumboken na saray mamatatken iray maptek ya estandarte nen Jehova. Diad ontan et nipapanengneng day kauyamoan, kaabigan, tan panangaro nen Jehova. No say sakey et talagan magbabawi, a lapud kasalanan to et ‘naekalay biskeg na linawa’ tan “sigpot a naandiay ilalo,” nayarin aliwan mairap parad saray mamatatken so ‘pangipetek ed sikato tekep na inkaulimek.’ (Sal. 34:18, Maung a Balita; Gal. 6:1) Panon to balet no say akapankasalanan et agpaipetek tan agtanto magbabawi odino talagan agmagbabawi?

6. Antoy nepeg a paliisan na saray mamatatken diad pidedeneng da ed saray akapankasalanan, tan akin?

⁶ Sano ag-awaten na akapankasalanan so simbawa a manlalapud Biblia odino itetel to ed arum so ginawa ton lingo, nayarin nasyodotan  iray mamatatken tan say arum ni. Lapud amta ray mauges ya epekto na ginawa to, mainomay iran makapangibalikas na liknaan da ed inkiwas tan awawey na satan a too. Balet ta makapuy so isanok, tan ag-itan panangipatnag na “kanonotan nen Kristo.” (1 Cor. 2:16; basaen so Santiago 1:19, 20.) Walaray kapanaonan nen Jesus a diretsaan ton pinasakbayan, balet anggan kapigan et agto nanmudmora odino angibagay bengatlan makapasakit. (1 Ped. 2:23) Imbes, imbaga tan impanengneng ton sarag na saray akapankasalanan so magbabawi tan ompawil ed si Jehova. On, sakey ed saray manunan rason na inyakar nen Jesus diad dalin et pian ‘ilaban iray makasalanan.’​—1 Tim. 1:15.

7, 8. Antoy mangigiya ed saray mamatatken sano walaray aasikasoen dan hudisyal a pamaakaran?

⁷ Antoy naaralan tayo ed si Jesus no nipaakar ed pidedeneng ed saray kaukolan a disiplinaen na kongregasyon? Tandaan a say Makasulatan ya uksoyan ed panagdisiplina diad kongregasyon et manasalimbeng ed pulok tan nayarin mamakiwas ed samay akapankasalanan pian magbabawi. (2 Cor. 2:6-8) Makapaermen ta walaray agmagbabawi tan kaukolan a dispelosipen. Balet ta makapaliket a naamtaan a dakel ed saraya so ompapawil ed si Jehova tan ed kongregasyon. No saray mamatatken et mangipanengneng na singa-Kriston aro, natulongan da so toon akapankasalanan a manguman tan agmanbayag et ompawil. Diad ilabas na panaon, nayarin agla nanonotan na sarayan datin akapankasalanan so amin a Makasulatan a simbawan imbaga na mamatatken ed sikara, balet seguradon agda nalingwanan so respeto tan panangaron impanengneng na saray mamatatken.

⁸ Nepeg sirin ya ipatnag na saray mamatatken so “bunga na espiritu,” nagkalautla say singa-Kriston aro, anggano agmangawat na simbawa imay akapankasalanan. (Gal. 5:22, 23) Nepeg ya ag-iran balot manaapuran mandispelosip. Nepeg dan ipanengneng a labay dan ompawil ed si Jehova so akapankasalanan. Kanian no diad saginonor et magbabawi so akapankasalanan, a maslak a nagagawa, ontan lay pisasalamat to ed si Jehova tan ed “langkap ed saray totoo” a maaron tinmulong ed sikato pian makapawil ed kongregasyon.​—Efe. 4:8, 11, 12.

 Ipanengneng so Singa-Kriston Aro Diad Panaoy Anggaan

9. Mangiter na alimbawa na maaron panangiyansakit nen Jesus ed saray disipulo to.

⁹ Inrekord nen Lucas so sakey ya alimbawa na maaron panangiyansakit nen Jesus. Lapud amta nen Jesus a nasabi panaon et kubkoben na saray Romanon sundalo so syudad na Jerusalem, ya anggapo lay makatakas, oniay maaron impasakbay to ed saray disipulo to: “Sano nanengneng yo so Jerusalem ya [“apaliberan,” NW] na saray ehersito, saman la amtaen yo a say kabagbag to asingger la.” Antoy nepeg dan gawaen? Nia so malinew tan diretsaan iran instruksion nen Jesus: “Saman la saray wala ed Judea ombatik ira ed saray palandey; et saray wala ed pegley to, ontaynan ira; et saray wala ed uma ag-ira onloob ed sikato. Ta saraya sikaray agew na pangibales, pian nasumpal ya amin so nisulat.” (Luc. 21:20-22) Sanen pinaliberan na armada na Roma so Jerusalem nen 66 C.E., inunor na saray matulok a papatumbok irayan instruksion.

10, 11. Panon itayon natulongan a manparaan parad “baleg ya irap” sano nonodnonoten tayo imay intakas na saray Kristiano nensaman?

¹⁰ Legan na itatakas na saray Kristiano manlapud Jerusalem, kaukolan dan ipanengneng so panangaro ed sakey tan sakey, a singa samay impangaro nen Kristo ed sikara. Seguradon kaukolan dan inabang ed arum so antokaman a walad sikara. Balet say propesiya nen Jesus nipaakar ed kaderal na sayan syudad et walaan ni na mas baleg a kasumpalan. Impasakbay to: “Wala naani baleg ya irap ed satan, ya anggapo so ontan a nanlapud gapo na mundo ya angga ed natan, anggapo, anggapo la naani.” (Mat. 24:17, 18, 21) Antis tan kaleganan na satan a “baleg ya irap” a magano lan nagawa, nasagmak tayo met iray kairapan tan kakulangan na materyal iran bengatla. Say singa-Kriston aro so ontulong ed sikatayon makapansungdo.

¹¹ Diad satan a panaon, kaukolan tayon aligey alimbawa nen Jesus, ya ipanengneng tayoy masakripisyon aro. Oniay insimbawa nen Pablo nipaakar ed saya: “Komon ta paliketen na balang sakey ed sikatayo so kapara ton too ed no anto so maong parad pakapabiskegan to. Ta anggan say Kristo et agto pinaliket so inkasikato . . . Natan et iyabuloy komon na Dios a mangitatarya na panagsungdo tan ligliwa a sikayoy nawalaan na panagnonot a mipadpara ed si Kristo Jesus.”​—Roma 15:2, 3, 5, NW.

12. Anton klase na aro so kaukolan a niwalad sikatayo natan, tan akin?

¹² Si Pedro, a sakey ed saray angipanengnengan nen Jesus na panangaro, et amaseseg met  ed saray Kristiano a mangipanengneng na “andiay-pansimpisimpitan a panangaro ed agagi” tan ‘ontulok ed katuaan.’ Nepeg a “manaaroan [iran] maong manlapud puso.” (1 Ped. 1:22, NW) Diad sayan panaon, lalon kaukolan tayon ipanengneng iray kualidad nen Kristo. Lalon onloloor iray pananesdes ed totoo na Dios. Nepeg ya agtayo panmamatalkan so antokaman a kabiangan na sistema na sayan daan a mundo. Singa bilang, diad agano ni et naimatonan tayo so ikukusbo na ekonomya ed interon mundo. (Basaen so 1 Juan 2:15-17.) Legan a manasingger lan manasingger so anggaan na sayan sistema, kaukolan a lalo itayon onapit ed si Jehova tan ed saray kaagian tayo, a lalo tayon paeletey pankakaaro ed kongregasyon. Insimbawa nen Pablo: “Dia ed aroan na sanaagi, ipatnag yo ed sakey tan sakey so matamoy a panamabli. Idaulo yo so panangipanengneng na galang ed sakey tan sakey.” (Roma 12:10, NW) Tan lalon indanet nen Pedro iyan punto sanen inkuan to: “Lalo la a tuloy, agkomon naumas so aro yo ed sakey tan sakey; ta say aro dakel so sakoban ton kasalanan.”​—1 Ped. 4:8.

13-15. Panon ya impanengneng na pigaran agagi so singa-Kriston aro ed saramay naapektoay kalamidad?

¹³ Diad interon mundo, kabkabat iray Tasi nen Jehova ed panangipanengneng day aro ya atekepay gawa. Singa bilang, tinulongan na saray Tasi iray naapektoan na maksil a bagyo diad abalaten a parte na Estados Unidos nen 2005. Lapud apakiwas iran mangalig ed si Jesus, masulok a 20,000 so namboluntaryo, a tinaynan na dakel ed sikara so komportablen ayaman tan marakep a trabaho ra pian tulongan iray maniirap a kaagian da.

¹⁴ Diad sakey a lugar, 80 kilometroy naapektoay delap, tan say kaaralem to ni ingen et 10 metros. Sanen inmatapew lay danum, naamtaan a kakatlo ed saray kaabungan tan arum ni ran bilding so adera-deral. Walaray sinmasabin Tasi a boluntaryo a nanlapud pigaran bansa, tan awi-awit da iray kagawaan tan materyales. Inusar day dunong da ed panagpaalagey tan mabulos dan ginaway antokaman a kimey. Walay sanagin balo ya angimpake ed saray kagawaan da ed melag a trak tan nambiahe na 3,000 kilometro pian ontulong. Sakey ed sikara et agla inmalis ed satan a lugar, a siansia nin ontutulong ed relief committee tan manlilingkor bilang regular payunir.

¹⁵ Masulok a 5,600 ya abung na saray Tasi tan arum ni ed satan a lugar so impaalagey odino inapiger. Antoy alikna na saray Tasi a taga diman lapud agnasabsabaan a panangaro ed sikara? Walay sakey ya agin bii ya aderal so abung to tan inmalis ed melag a trailer a mantedter so atep to tan aderal so lutoan to. Sikatoy impaalageyan na agagi na simpli, balet ta komportablen abung. Legan ton nenengnengen so balon abung to, agto apokpokay makaakis lapud pisasalamat ed si Jehova tan ed saray kaagian to. Maslak ed saray Tasin naandiay abung et nanayam ni ed saray temporaryon pundoan diad loob na sakey taon odino masulok ni anggaman nipaalagey la iray abung da. Akin? Pian napanayaman ni  iratan na saramay manboboluntaryo. Talagan napanuliranan so impanengneng dan singa-Kriston aro!

Ipanengneng so Singa-Kriston Aro ed Saray Mansasakit

16, 17. Panon tayon nipanengneng so singa-Kriston aro ed saray mansasakit?

¹⁶ Aliwan amin et akaeksperiensya la na graben kalamidad. Balet ta ondalan ya ondalan so balang sakey ed sikatayo odino saray kapamilya tayo ed saray problema ed bunigas. Say panangaro nen Jesus ed saray mansasakit et onkanan ehemplo ed sikatayo. Lapud panangaro to et inabagey to ra. Sanen inyakar na saray totoo iray mansasakit, ‘pinaabig to ra.’​—Mat. 8:16; 14:14.

¹⁷ Diad panaon tayo, anggapoy pakayari na saray Kristiano a mamilagron mantambal, balet ta aaligen day panangabagey nen Jesus ed saray mansasakit. Panon dan ipapanengneng itan? Singa bilang, ipapanengneng na saray mamatatken so singa-Kriston aro diad pangiyuuksoy da na tulong ed saray mansasakit a kaagian, tan seseguroen dan natutumbok itan ya uksoyan. Uunoren da imay prinsipyon walad Mateo 25:39, 40. * (Basaen.)

18. Panon ya impanengneng na duaran agagi so tuan panangaro ed sakey ya agin bii, tan antoray resulta?

¹⁸ Siempre, agtayo la kaukolan so magmaliw ya elder pian makagaway kaabigan ed arum. Alaen pan alimbawa imay agawa ed si Charlene a manedad na 44. Walay kanser to tan inkuan na doktor a samploy agew labat lay pambilay to. Lapud oniay kipapasen to tan nanairapan lay masiken ton mangasikaso ed sikato, walay duaran agagin bibii, si Sharon tan Nicolette, a tinmulong legan na unor la ran agew to. Anggaman asabi ni nen Charlene so anem simba, siansia nin impanengneng day panangaro’d sikato. Oniay inkuan nen Sharon: “Ansakisakit so linawam sano antam ya agla onabig so sakey a mansasakit. Balet ta pinabiskeg kami nen Jehova. Say impangasikaso mi ed si Charlene et amaapit ed sikami diad sakey tan sakey.” Oniay inkuan na masiken nen Charlene: “Agkon balot nalingwanan so kaabigan tan tulong na sarayan pinabpablin agagi. Lapud aro tan ligsa ra, agtanto nairapan so matoor a Charlene ko diad sayan unor ya impakasubokan to. Tan saya so akatulong ed siak pian nainawaan ak ed pisikal tan emosyonal. Agmanganggay pisasalamat ko ed sikara. Say inkamasakripisyo ra et amabiskeg ed pananisiak ed si Jehova tan amaelet ed panangarok ed saray agagi.”

19, 20. (a) Antoran limaran aspekto na kanonotan nen Kristo so inaral tayo? (b) Determinado kan gawaen so anto?

¹⁹ Naaralan tayo diad sayan taloran nantutumbokan ya artikulo so limaran aspekto na kanonotan nen Jesus tan no panon tayon naalig so panagnonot tan awawey to. Magmaliw itayon ‘mauyamo tan mapaabeba ed puso’ a singa si Jesus. (Mat. 11:29) Komon ta pampelengan tayon tratoen so arum tekep na kaabigan, anggan sano sankaimanoy kakapuyan tan agda inkaperpekto. Makpel tayon tuloken so amin a kakaukolanen nen Jehova, anggan sano walaray nadadalan tayon subok.

²⁰ Kaunoran, ipanengneng tayo so singa-Kriston aro ed amin ya agagi, a singa ginawa nen Kristo “angga ed kasampotan.” (Juan 13:1, 34, 35) On, ‘mantultuloy tayon manaaroan bilang sanaagi.’ (Heb. 13:1, NW) Gawam so anggaay nayarian mo. Usar moy bilay mo pian idayew si Jehova tan pian tulongan iray totoo! Seguradon bendisyonan nen Jehova iray masimoon a pansasagpot mo.

[Paimano ed leksab]

Kasin Nipaliwawam?

• Panon a nipanengneng na mamatatken so singa-Kriston panangaro ed saray akapankasalanan?

• Akin et nagkalalo lan importante ed sayan panaon na anggaan so pangalig ed panangaro nen Kristo?

• Panon tayon nipatnag so singa-Kriston panangaro ed saray mansasakit?

[Tepetepet Parad Panagaral]

[Litrato ed pahina 17]

Labay na mamatatken ya ompawil ed si Jehova iray akapankasalanan

[Litrato ed pahina 18]

Panon ya impatnag na saray Kristianon anaynan ed Jerusalem so singa-Kriston panangaro?

[Litrato ed pahina 19]

Kabkabat iray Tasi nen Jehova ed panangipanengneng day aro ya atekepay gawa