Relihyon Ko​—Siak so Amili Odino Saray Ateng Ko?

DIAD Poland, dakel so nakakatongtong na saray Tasi nen Jehova a mangibabaga na onia, “Aya lay relihyon ya abangonan ko, aya met lay pateyan ko.” Ipapanengneng na sayan panmoria ra a say relihyon et ipapatawir na saray ateng ed ananak. Ontan met kasi ed lugar yo? Antoy kaslakan a sengegan na saya? Mabetbet a say relihyon et nagmaliw labat lan pormalidad tan parte na tradisyoy pamilya. Nayari met kasin nagawa iya ed saray Tasi nen Jehova ya akaawat na mablin espiritual a tawir ed atateng da odino ed laki o bai ra?

Ag-itan agawa ed si Timoteo, ya imbangat na relihyoson ina tan bai to pian manisia tan mangaro ed tuan Dios. Amta nen Timoteo so masanton sulsulat “manlapud inkaugaw” to. Diad saginonor, akombinse si Timoteo, ontan met ed ina tan bai to, a say Inkakristiano so katuaan. Sikatoy ‘atangguyor a manisia’ lapud saray naaralan to ed Kasulatan nipaakar ed si Jesu-Kristo. (2 Tim. 1:5; 3:14, 15, NW) Kanian, anggaman gagawaen na saray Kristianon ateng natan so anggaay nayarian da a tulongan iray anak dan magmaliw a lingkor nen Jehova, nepeg a pilaleken a mismo na ananak so magmaliw a Kristiano.​—Mar. 8:34.

Pian say sakey et napanlingkoran toy Jehova lapud aro tan napansiansia toy integridad to antokaman so nagawa, nepeg a sikatoy ‘natangguyor a manisia’ panamegley na makakombinsin panagkatunongan. Diad ontan et ombiskeg tan malet a ‘nilamut’ so pananisia to.​—Efe. 3:17; Col. 2:6, 7.

Say Betang na Ananak

“Sipor ko lan panisiaan a Tasi nen Jehova so tuan relihyon,” so kuan nen Albert, * a pinabaleg na pamilyan Tasi, “balet nairapan ak ya ontulok ed ibabaga ra a dugan paraan na kabibilay.” No sakey kan kalangweran, nayarin ontan met so naliliknam. Balet, akin ta no salien mon aralen no anto so labay na Dios a paraan na kabibilay, insan maliket mon gawaen so linawa to? (Sal. 40:8) “Ginapoan koy manpikasi,” so kuan nen Albert. “Diad primero, nanairapan ak. Kaukolan ko nin pasooten so sarilik. Balet agnambayag, amoriak a magmaliw ak a mabli ed imaton na Dios no panggunaetan kon gawaen so duga. Saya so amabiskeg ed siak a manguman.” No onapit ka ed si Jehova, nawalaan kay pilalek a gawaen so kakaukolanen to.​—Sal. 25:14; Sant. 4:8.

Manisip ka pay labalabay mon galaw, a singa  say chess. No agmo amta itan a galawen odino agka tanton marunong ed satan, nayarin agmo paglabayen itan. Ingen, no naaral mo tan nagmaliw ka lan marunong ed satan, seguradon labalabay mo lay manggalaw, tan ipanaon mo ni ingen itan. Mipara itan ed kimkimey tan panaglingkor na saray Kristiano. Seetan mo sirin so manparaan parad saray Kristianon pantitipon. Mibiang ka. On, anggan ugaw ka ni et napaseseg moy arum ed ehemplom!​—Heb. 10:24, 25.

Onaplika met itan no nipaakar ed panagpulong. Nepeg mo met iyan gawaen lapud aro, aliwan lapud napipilitan ka. Tepetan mo pay inkasika: ‘Akin et labay kon itongtong ed arum so nipaakar ed si Jehova? Akin et inarok si Jehova?’ Kaukolan mon kabaten si Jehova bilang maaron Ama. Oniay inkuan to panamegley nen Jeremias: “Anapen yo ak naani, et naromog yo ak, sano anapen yo ak ed simoon a puso yo.” (Jer. 29:13, 14) Pian nagawaan mo itan, antoy nakaukolan? “Kaukolan kon umanen so panagnonot ko,” so kuan nen Jakub. “Manlapud inkaugaw et mimiaral tan mimila ak lan manpulong, balet nagmaliw labat irayan singa rotina ed siak. Nibagak a talagan nipapusok so katuaan sanen akabat ko lan maong si Jehova tan awalaan ak na maapit a relasyon ed sikato.”

Baleg so nagawaan na maabig tan makapaseseg iran kaulop pian naliketan ka ed ministeryom. “Miulop ka ed saray makabat a totoo, et sika naani makabat,” so kuan na impuyan a proverbio. (Uli. 13:20) Kanian mikaaro ka’d saramay uunaen day espiritual iran kalat tan maliket a manlilingkor ed si Jehova. Inkuan nen Jola: “Apaseseg ak diad pililimog ko’d dakel a maespiritual iran kalangweran. Diman ak ginmapon akaliknay baleg a liket ed regular a pibiang ed ministeryo.”

Say Betang na Atateng

“Misalsalamat ak ed atateng ko ta imbangat da’d siak so nipaakar ed si Jehova,” so kuan nen Jola. On, baleg so impluensya na atateng ed desisyon na ananak da. Oniay insulat nen apostol Pablo: ‘Sikayoran kaamaan, itultuloy yon pabalegen iray anak yo diad panagdisiplina tan panamilin nen Jehova.’ (Efe. 6:4, NW) Malinlinew ed sayan impuyan a bilin a say betang na atateng et ibangat ed ananak da iray dalan nen Jehova, aliwan say mismon kanonotan da. Imbes ya ibaga’d ananak yo no antoy labay yon nagawa, agaylay abig no tulongan yo ran nawalaan na pampirawat a manbilay unong ed linawa nen Jehova!

Sarag yon ipurek so salita nen Jehova ed ananak yo tan ‘nitongtong yo iratan kapagno manyurong kayo ed abung yo, manaakar kayo ed dalan, mandukdukol kayo tan no ombangon kayo.’ (Deu. 6:6, 7) Oniay natandaan na sanasawan Ewa tan Ryszard, a walaay taloran anak a lalaki: “Lanang min pantotongtongan iray nanduruman klase na sigpot panaon a serbisyo.” Antoy resulta? “Ugugaw ni ra et nilabay da lay manpalista ed Teokratikon Eskuelaan Parad Ministeryo, nagmaliw iran manangipalapag, tan agnambayag et sikaran mismoy nandesisyon a manpabautismo. Diad saginonor et walay nagmaliw  a Bethelite, wala met so nagmaliw a payunir.”

Importante so maabig ya ehemplo na atateng. Oniay kuan nen Ryszard: “Determinado kamin agnawalaay doblin panagbilay, a dumay ipapanengneng mi ed abung tan duma met ed kongregasyon.” Kanian tepetan pay inkasika: ‘Anto kasi naoobserbaan na ananak ko’d kabibilay ko? Nanenengneng da kasin talagan inarok si Jehova? Nalilikna da kasi iyan aro diad saray pikakasik tan diad regular a personal a panagaral ko? Naiimano da kasi iya ed no antoy panmoriak ed panagpulong, panagligliwaan, materyal iran bengatla, tan ed saray ibabagak nipaakar ed arum ya agagi ed kongregasyon?’ (Luc. 6:40) On, naoobserbaan na ananak yoy inagew-agew a kabibilay yo tan naiimano da no dumay ibabaga yo ed gagawaen yo.

Importante so panagdisiplina ed panamabaleg na ananak. Ingen ta ibabaga na pinuyanan a Salita na Dios ya “ipasal mo so ugaw unong ed paraan a manepeg parad sikato.” (Uli. 22:6, NW) Oniay inkuan nen Ewa tan Ryszard: “Impanaon min sansakey ya iyaralan na Biblia iray anak mi.” Siempre, walad saray ateng so desisyon no kasin kaukolan ya iyaralan a sansakey so ananak da. Antokaman ni desisyon yo, kaukolan yon tratoen iray ananak bilang nanduruman indibidual. Mankaukolan iya na panangitukoy-tukoy tan inkamakatunongan. Alimbawa, imbes a basta labat ibagan mauges so sakey a klase na musika, akin ta no ibangat yo ra no panoy panggaway makabat iran desisyon, tan no panon dan niyaplika iray prinsipyo na Biblia?

Nayarin amta na ananak yo no antoy iilaloan yo ed sikara tan ompan uunoren da met iray panlabayan yo. Ingen, siansia nin nepeg yon sabien so puso ra. Tandaan, “say simbawa ed puso na too sikato so singa aralem a danum, balet say too a makatalos sikato so naagwat to.” (Uli. 20:5) Magmaliw kayon malikas. Nepeg ya alerto kayo’d saray sinyalis na problema a nayarin ag-ibebesngaw na ananak yo, tan kiwas kayon tampol. Agyo ra aakusaan, ipanengneng yon iyaansakit yo ra, tan mangusar na matukoy iran tepet. Balet asikaso yo met, ompan masyado kayo lan maupapet. No ipatnag yoy masimoon a panangiyansakit, nasabi yoy puso ra tan natulongan kayon ontulong ed sikara.

 Say Betang na Kongregasyon

Bilang sakey a lingkor na Dios, sarag mo kasin tulongan iray kalangweran ed kongregasyon a mangapresya ed espiritual a tawir da? Anggaman responsabilidad na atateng so pangipasal ed ananak da, makatulong met iray agagi ed kongregasyon, lalo la ray mamatatken. Nagkalalon importante a tulongan iramay sakey labat ed saray ateng da so Tasi.

Anto so nagawaan na saray mamatatken pian natulongan iray kalangweran a mangaro ed si Jehova tan nalikna da a kaukolan tan papablien ira? Inkuan nen Mariusz, matatken ed kongregasyon diad Poland: “Saray mamatatken et nepeg a mitongtong, mitongtong, mitongtong ed saray kalangweran, aliwa labat a sano walaray problema noagta pati ed arum nin situasyon​—diad pulongan, kayari aral, tan anggan sano manmemerienda.” Akin ta no tepetan yo ra no antoy nibaga ra ed kongregasyon? Say ontan iran tongtongan et iyapit to ray kalangweran ed kongregasyon tan ontulong pian nalikna ran kabiangan ira na satan.

No sakey kan matatken, kakabaten mo kasi iray kalangweran ed kongregasyon yo? Anggaman elder la natan si Albert ya asalambit niman, sikatoy dinmalan met ed nanduruman subok nen kalangweran ni. Oniay imbaga to: “Diad saman et kaukolan koy nadalaw na saray mamatatken.” Nipatnag met na saray mamatatken so panangiyansakit ed saray kalangweran no ipikasi ran onaligwas komon so espiritualidad da.​—2 Tim. 1:3.

Maabig no mibiang ed aktibidades na kongregasyon iray kalangweran. Ta no andi, ompan niteen day imano ra ed saray minumundon kalat. Sikayo ran wala la’d edad, nayari yo ra kasin ibaan ed ministeryo tan mikaaro’d sikara? Nayari yo ran ipila anggan sano panaoy panagrelaks, diad ontan et naala yoy liknaan da tan nakaaro yo ra. Oniay atandaan nen Jola: “Walay biin payunir ya akikaaro ed siak. Sikato so pinilik a nakaiba diad samay pirprimeron pankanawnawa a nambulon ak a nampulong.”

Sika so Mandesisyon

Sikayoran kalangweran, tepetan pay inkasikayo: ‘Antoray planok ed bilay? No agak ni bautismado, plaplanoen ko la kasi manpabautismo?’ Nepeg a say rason na pampabautismom et lapud inad-arom si Jehova, aliwan lapud obligado kan tumboken so sakey a tradisyon.

On, komon ta magmaliw mon tuan Kaaro si Jehova, tan ipasen mon kayamanan so katuaan. Oniay inyabawag nen Jehova panamegley nen propeta Isaias: “Agka napagaan, ta siak so Dios mo.” Anggad kaaro ka nen Jehova, agto kan balot taynan. On, pabiskegen to ka tan “ampayaen [to] ka ed nikawanan a lima na inkatunong [to].”​—Isa. 41:10.

[Paimano ed leksab]

[Litrato ed pahina 4]

Panggunaetan yon tebeken so walad puso na anak yo

[Litrato ed pahina 6]

Nepeg a say rason na pampabautismom et lapud inad-arom si Jehova