‘Manayam Kayo ed Kareenan ed Amin a Totoo’

‘No nayari, dia ed anggaan na nayarian yo, manayam kayo ed kareenan ed amin a totoo.’​—ROMA 12:18.

1, 2. (a) Antoy impasakbay nen Jesus ed saray papatumbok to? (b)  Iner so pakaromogan tayo na simbawa no panon so nepeg tayon ikiwas no makasagmak itayo na saray isusumpa?

PINASAKBAYAN nen Jesus iray papatumbok to a sikaray busolen na saray nasyones, tan impaliwawa to so rason. Diad samay labi antis na impatey to et oniay inkuan to ed saray apostol to: “No taga mundo kayo say mundo aroen to so saray kayarian to. Balet lapud aliwa kayo a taga mundo, noag say pinili ta kayo ed mundo, kanian say mundo busolen to kayo.”​—Juan 15:19.

² Apaneknekan a mismo nen apostol Pablo ed saray naeksperiensya to a tua iyan imbaga nen Jesus. Diad samay komaduan sulat to ed kinen Timoteo, oniay inkuan to: “Tinumbok mon maong so bangabangat ko, say panagbilay ko, say getmak, say pananisiak, say abayag ya impantepel ko, say arok, say anos ko, saray inkapasegsegang ko, saray ir-irap ko.” Insan inyarum to ni: ‘On, amin a malabay a manbilay a masanto ed Kristo Jesus, manako ra naani panamasegsegang.’ (2 Tim. 3:10-12) Diad kapitulo 12 na sulat nen Pablo ed saray Kristiano ed Roma, sikatoy angiter na makabat a simbawa no panon so  nepeg dan ikiwas no makasagmak iray isusumpa. Sarayan simbawa et mangigiya met ed sikatayo diad sayan panaon na anggaan.

‘Pansesegan Iray Bengatlan Makapagalang’

3, 4. Panon a say simbawan walad Roma 12:17 so niyaplika (a) diad sankaabungan ya aliwan amin a membro et mandadayew ed si Jehova? (b) diad pidedeneng tayo ed arum a totoo?

³ Basaen so Roma 12:17. Impaliwawa nen Pablo a sano susumpaen itayo, nepeg ya ag-itayo ombabales. Say itulok ed sayan simbawa so nagkalalon importante ed saray sankaabungan ya aliwan amin a membro et mandadayew ed si Jehova. Singa bilang, no asakitan so asawan Kristiano lapud imbaga odino inkiwas na asawa to, nepeg a resistian toy tendensian ombawi. Anggapoy marakep a pansumpalan na ‘pangibales na mauges ed mauges.’ Imbes, say ontan ya awawey et mamaloor labat ed situasyon.

⁴ Impaseseg nen Pablo no anto so mas marakep a gawaen: ‘Pansesegan yo so saray bengatlan makapagalang ed arap na amin a totoo.’ Diad abung, napaliisan so panaalaay makapasakit iran salita no ipanengneng na asawan bii so tuan kaabigan anggaman balbalawen na masiken to iray sisisiaen to. (Uli. 31:12) Insalaysay nen Carlos, a natan et sakey lan Bethelite, no panon ya atalonaan nen Nanay to so graben isusumpa nen Tatay to panamegley na maabig a pidedeneng tan inkamaasikaso ed abung. Oniay inkuan nen Carlos: “Imbangat to kamin sanaagi a magmaliw a marespeto ed si Tatay. Labay ton migalaw ak ed si Tatay na boules (bowling ed France) anggaman agko tanton labay itan a galaw. Balet tua met a lapud satan et manliket si Tatay.” Diad saginonor et nanaral na Biblia so Tatay nen Carlos tan abautismoan. Pampepelengan na saray Tasi nen Jehova a gawaen iray ‘bengatlan makapagalang ed arap na amin a totoo,’ tan mabetbet a naandi so panangidumaduma na saray kakaabay lapud impanulong tayo’d sikara diad saray kalamidad.

Pakepaey Isusumpa Panamegley na “Ngalab na Apuy”

5, 6. (a) Antoy kabaliksan na ‘pangibunton na ngalab na apuy’ ed ulo na mamubusol ed sikatayo? (b) Mangisalaysay na eksperiensya ed lugar yo a mangipapanengneng a say pangiyaplika ed simbawa na Roma 12:20 et mamawala na maabig iran resulta.

⁵ Basaen so Roma 12:20. Diad saray salita nen Pablo ed sayan bersikulo, andi-duaruwan say walad nonot to et samay nabasa ed Uliran 25:21, 22: “No say kabusol mo narasan, sikato so ikdan mo na tinapay a kanen; et no napgaan, sikato so ikdan mo na danum ya inumen. Ta buntonen mo so saray ngalab na apuy ed tapew na ulo to, tan si Jehova tumangan to ka.” No ikonsidera tayo iray simbawan walad kapitulo 12 na Roma, natebek tayon aglabay ya ibaga nen Pablo a say ngalab et ontutukoy ed dusa odino kababaingan a nasagmak na saramay onsusumpa. Imbes, samay nabasa tayo ed Uliran tan saramay miparan imbaga nen Pablo et nipaakar ed paraan na panagtunaw na metal nensaman. Oniay naimano nen Charles Bridges, sakey ya iskolar nen koma-19 a siglo: “Iyan so ngalab diad paliber na anaw-awet a metal, ontan met ed silong tan ed  tapew; aglabat basta iyan so metal ed apuy, noagta buntonan iya na mandarlang iran ngalab. Anggan antoy inkaawet na puso, napalemek a napalemek itan na mabiskeg a pakayari na maanos, masakripisyo, tan mandarlang a panangaro.”

⁶ Singa saray “ngalab na apuy,” sarag ya umanen na saray gawan maabig so awawey na saray onsusumpa tan nayarin ontunda la ran mamusol ed saray lingkor na Dios. Lapud kaabigan ya ipapanengneng tayo, nayarin magmaliw a mas positibo so panmoria na totoo ed sikatayo tan mas ondengel ira ed mensahe na Biblia ya ipupulong tayo. Oniay insulat nen apostol Pedro: “Pansiansia yon maabig so ugali yo ed limog na saray totoo ed mundo, ta anggano ibabaga ran manggagawa kayo na mauges, igloria ran mismo so Dios diad agew na panusisa to lapud nanenengneng da iray maabig a gawa yo.”​—1 Ped. 2:12, NW.

‘Manayam Kayo ed Kareenan ed Amin a Totoo’

7. Anton kareenan so naeksperiensya na saray disipulo nen Kristo, tan nepeg a pakiwasen itayo na satan a gawaen so anto?

⁷ Basaen so Roma 12:18. Diad samay unor lan labin kaiba nen Jesus iray apostol to, imbaga to ed sikara: “Say kareenan so itilak ko ed sikayo, say kareenan ko iter ko ed sikayo.” (Juan 14:27) Sayan kareenan a sinalambit nen Jesus et naeksperiensya na saray disipulo to lapud amta ran sikaray inad-aro tan aabobonan nen Jehova a Dios tan say pinabpabli ton Anak. Saya so nepeg a mamakiwas ed sikatayon manbilay a mareen ed limog na totoo. Saray tuan Kristiano et mareen tan managpareen.​—Mat. 5:9.

8. Panon itayon magmaliw a managpareen ed loob na pamilya tan ed kongregasyon tayo?

⁸ Say sakey a paraan a magmaliw itayon managpareen ed loob na pamilya et sano aaregloen tayon tampol iray agpantatalosan imbes ya abuloyan nin onloor so situasyon. (Uli. 15:18; Efe. 4:26) Onaplika met iya ed loob na kongregasyon. Inkonekta nen apostol Pedro so ‘pananap na kareenan’ ed pamokpok ed dila. (1 Ped. 3:10, 11) Ontan met nen Santiago, kayari ton inter so diretsaan a simbawa nipaakar ed dugan panangusar ed dila tan say ipaliis ed imon tan pankokolkol, et oniay insulat to: “Say kakabatan a wala a manlapu ed tagey, unona, sikato so malinew, insan mareen, masimpit, tan mainomay a pikasian, napno na panangasi tan maong iran bunga, andi labien tan andi pankunkunwari. Tan say bunga na katunongan wala a nitanem ed kareenan ed saray manggawa na kareenan.”​—Sant. 3:17, 18.

9. Antoy nepeg tayon tandaan diad panggugunaet tayon ‘manayam ed kareenan’ ed amin a totoo?

⁹ Diad samay simbawa nen Pablo a walad Roma 12:18, imbaga ton kaukolan itayon ‘manayam ed kareenan’ aliwa labat a diad loob na pamilya tan ed kongregasyon. Inkuan ton nepeg a “manayam [itayo] ed kareenan ed ganaganay [odino, amin a] totoo.” Kaiba ed satan iray kakaabay, katrabaho, kaeskuela, tan saray totoon napupulongan tayo. Onia balet so impalinew na apostol: ‘No nayari, dia ed  anggaan na nayarian yo.’ Kabaliksan na satan a makatunongan tayon gawaen so anggaay nayarian tayo a ‘manayam ed kareenan’ ed amin a totoo, balet ta nepeg ya ag-onsabi’d punto a nikompromiso tayo la iray maptek a prinsipyo na Dios.

Si Jehova so Ombales

10, 11. Akin et nepeg ya ag-itayo ombales?

¹⁰ Basaen so Roma 12:19. Nepeg ya ‘ag-itayo ombabales sano walay manggawa na mauges ed sikatayo’ tan mansiansian “maulimek” anggan diad “saramay agmipakna” ed kimey tan ed mensahe tayo, pati la ed saramay parungtalan ya onsusumpa. (2 Tim. 2:23-25, NW) Bibilinen nen Pablo iray Kristiano ya ag-ira ombabales noagta “ikdan [da] na pasen so sanok na Dios.” Bilang Kristiano, amta tayon anggapoy kanepegan tayon ombales. Insulat na salmista: “Tundaan mo so petang na ulo, tan ikaindan mo so sanok; agmo gonigonen so inkasika ed antokaman a mananangguyor ed panggawa na mauges.” (Sal. 37:8) Tan insimbawa met nen Solomon: “Agmo ikuan, Ibales ko so mauges. Manalagar ka ed Jehova, et ilaban to ka.”​—Uli. 20:22.

¹¹ No mauges so gagawaen ed sikatayo na saray onsusumpa, sankaabigan no ipalima tayo la ed si Jehova so panusa ed sikara, no diad panmoria to et manepeg itan. Malinew a saya so nononoten nen Pablo sanen inyarum to: “Nisulat: Siak so akankien na panamales; siak so ontumang naani, kuan na Katawan.” (Ikompara so Deuteronomio 32:35.) No salien tayoy ombales, ipapanengneng na satan a mapalakbat itayo, ya aalaen tayo so betang ya unong ed si Jehova et sikato labat so makankanepegan. Sakey ni, ipapanengneng tayon agtayo panisiaan imay sipan nen Jehova a: “Siak so akankien na panamales.”

12. Kapigan tan panon a niparungtal so sanok nen Jehova?

¹² Diad bandad gapo na sulat nen Pablo ed saray taga Roma, inkuan to: “Nipatnag so sanok na Dios manlapu ed tawen sumpa ed ganagana ya ag-inkamaridios tan ag-inkatunong na saray totoo, ya amperen da so katuaan ed andi katunongan.” (Roma 1:18) Niparungtal so sanok nen Jehova manlapud tawen panamegley na Anak to kaleganan na “baleg ya irap.” (Apo. 7:14) Satan so magmaliw a “tanda ed kaptekan na panangukom na Dios,” a singa impaliwawa nen Pablo ed sananey nin pinuyanan a sulat to: “Matunong ed Dios so pamales na kaermenan ed saray mamaermen ed sikayo. Tan dia ed sikayo ya apaermen mipainawa kayo ed sikami, sano ompayawar so Katawan tayo a Jesus a manlapu ed tawen ya iba to so saray angheles na pakayari to, a dia ed mandarlang ya apuy. Iter to so panamales ed saray agmikabat ed Dios, tan dia ed saray ag-ontulok ed ebanghelyo na Katawan tayon Jesus.”​—2 Tes. 1:5-8.

Daegen so Mauges Diad Panggawa na Maong

13, 14. (a) Akin et agtayo la pankelawan sano walaray nasagmak tayon isusumpa? (b) Panon tayon nagawaan so ‘pamaabig’ odino ‘pamendisyon’ ed saray mamapasegsegang ed sikatayo?

¹³ Basaen so Roma 12:14, 21. No talagan matalek itayo a sumpalen nen Jehova iray gagala to, napakiwas itayon mansagpot parad kimey ya inter to’d sikatayo, salanti, say pangipulong ed ‘ebanghelyo na panarian ed amin a nasyones.’ (Mat. 24:14) Amta tayon sayan kimey et mamasanok ed saray mamubusol ed sikatayo, ta pinasakbayan tayo la nen Jesus: “Gulaen da kayo naani na saray amin a nasyon nisengeg ed ngaran ko.” (Mat. 24:9) Kanian, agtayo la pankelawan odino nadismaya sano walaray nasagmak tayon isusumpa. Insulat nen apostol Pedro: “Inar-arok ira, agyo komon pankelawan so inmapuy a panali ed sikayo, ya onsabi ed sikayo pian pakasalian yo, singa bilang bengatla a pankelawan a nagawaan ed sikayo. Noag ingen panliketan yo komon so pidamay yo ed saray ir-irap nen Kristo.”​—1 Ped. 4:12, 13.

¹⁴ Imbes a gulaen tayo iray mamapasegsegang ed sikatayo, pansagpotan tayon inabang ed sikara so katuaan, lapud amta tayon walaray arum ya ontan so ikikiwas da ta anggapoy pikakabat da. (2 Cor. 4:4) Panggugunaetan tayon unoren imay simbawa nen Pablo: “Paabigen yo so [odino, mansalita na maabig ed] saray mangusil ed sikayo; mamaabig kayo, ya aleg so mangayew.” (Roma 12:14) Say sakey a paraan na ‘pamaabig’ ed saray onsusumpa et diad pangipikasi ed  sikara. Oniay inkuan nen Jesus diad Sermon to ed Palandey: “Aroen yo so saray kabusol yo, manggawa kayoy maong ed saray mamusol ed sikayo. Bendisyonan yo so saray mangayew ed sikayo, pikasi yo so saray mandamsak ed sikayo.” (Luc. 6:27, 28) Lapud mismon eksperiensya nen apostol Pablo, amta ton say sakey a manamasegsegang et nayarin magmaliw a matoor a disipulo nen Kristo tan maseseg a lingkor nen Jehova. (Gal. 1:13-16, 23) Diad sananey nin sulat nen Pablo et oniay inkuan to: “Anta naayew kami, bendisyonan mi; anta usilan kami, itepel mi; anta aderal so galang mi, mikasi kami.”​—1 Cor. 4:12, 13.

15. Anto so sankaabigan a paraan pian nadaeg so mauges?

¹⁵ Mitunosan ed satan, nepeg a tumboken na saray tuan Kristiano imay unor a bersikulo na Roma kapitulo 12: “Agka padadaeg ed mauges; noag ingen say maong so panaeg mo ed mauges.” Say lamot na amin a kaugsan et si Satanas a Diablo. (Juan 8:44; 1 Juan 5:19) Diad samay puyan ed si apostol Juan, imparungtal nen Jesus a saramay alanaan ya agagi to et “tinalo ra [si Satanas] lapu ed dala na Kordero, tan lapu ed salita na impantasi ra.” (Apo. 12:11) Ipapanengneng na saya a say sankaabigan a paraan pian nadaeg si Satanas tan say mauges iran impluensya to ed sayan sistema na bengabengatla et say panggawa tayoy maabig panamegley na kimey tayon panagtasi, salanti, say pangipulong na maong a balita na Panarian.

Manliket ed Ilalo

16, 17. Antoy naaralan tayo ed Roma kapitulo 12 nipaakar ed no panon tayon nepeg ya (a) usaren so bilay tayo? (b) pidenengan iray agagi diad kongregasyon? (c) tratoen iray onsusumpa ed sikatayo?

¹⁶ Say antikey ya impanaral tayo ed kapitulo 12 na sulat nen Pablo ed saray Kristiano ed Roma et angipanonot ed sikatayo na dakel iran bengatla. Naaralan tayo a bilang dedikadon lingkor nen Jehova, nepeg a mabulos itayon mansakripisyo. Maliket tayon gagawaen iya lapud papakiwasen itayo na espiritu na Dios. Lapud pakayari tayon mankatunongan, akombinse itayo a sayan panangibagat et linawa na Dios. Marlang itayo ed espiritu tan maseseg tayon uusaren iray nanduruman langkap tayo. Mapaabeba itayon manlilingkor, a gagawaen tayoy anggaay nayarian tayo pian napansiansiay Kristianon pankakasakey. Ontan met, ipapanengneng tayoy inkamaparawes tan tuan pililikna ed agagi.

¹⁷ Diad Roma kapitulo 12 et dakel met so simbawa nipaakar ed no panon so ikiwas tayo sano makasagmak itayoy isusumpa. Nepeg ya ag-itayo ombabales. Nepeg a talonaan tayo iray isusumpa panamegley na panggaway kaabigan. Anggad posible, basta anggapoy nasusumlang iran prinsipyo na Biblia, nepeg tayon panggunaetan so manbilay a mareen ed limog na amin a totoo. Onaplika iya diad pamilya, kongregasyon, kakaabay, trabaho, eskuelaan, tan diad lawak na kimeyan. Anggaman makakasagmak itayo na parungtalan a panamusol, gagawaen tayoy anggaay nayarian tayo a daegen so mauges diad panggawa na maong, a nononoten tayon si Jehova labat so makanepegan ya ombales.

18. Anto so taloran bilin a walad Roma 12:12?

¹⁸ Basaen so Roma 12:12. Bilang kaaruman ed sayan makabat tan praktikal iran simbawa, wala ni taloran ipapaseseg nen Pablo. Lapud agtayon balot nagawaan so amin ya insimbawa nen Pablo no anggapoy tulong nen Jehova, bibilinen itayo na apostol a “mansiansia a malet ed pikakasi.” Ontulong iya ed sikatayo pian niyaplika imay sananey nin simbawa to a ‘mansungdo ed kairapan.’ Say kaunoran et kaukolan tayon iyapasakey so nonot tayo ed arapen ya isisipan nen Jehova ed sikatayo tan “manliket ed ilalo” a bilay ya andi-anggaan, balanglan diad tawen odino diad dalin.

Bilang Repaso

• Panon so nepeg ya ikiwas tayo sano makasagmak na saray isusumpa?

• Diad antoran pamaakaran a nepeg itayon magmaliw a managpareen, tan panon?

• Akin et nepeg ya ag-itayo ombales?

[Tepetepet Parad Panagaral]

[Litrato ed pahina 8]

Nayarin naandi panangidumaduma na saray kakaabay tayo sano tulongan tayo ira

[Litrato ed pahina 9]

Gagawaen mo kasi anggaay nayarian mo pian magmaliw kan managpareen ed kongregasyon?