Panagdayew na Pamilya​—Importante Parad Kililiktar!

NONOTEN pa so makapakebbiew a “bakal na baleg ya agew na Dios, a Makapanyarin-amin”! (Apo. 16:14) Malinlinew so impangiyaliling nen propetan Miqueas ed saya. Oniay insulat to: “Saray palandey natunaw ira . . . , et saray lawak onletak ira naani, a singa say lilin ed arap na apuy, singa saray danum a nikalbo ed sakey a pangdel.” (Miq. 1:4) Antoy pansumpalan na saray agmanlilingkor ed si Jehova? Imbaga na Salita na Dios: “Saray pinatey nen Jehova sikara naani ed satan ya agew manlapu ed sakey a sampot na dalin angga met lanlamang ed sananey a sampot na dalin.”​—Jer. 25:33.

Lapud saratan a pasakbay, maabig no saray ulo na pamilya ya arum ed sikara et mansusulon ateng, et tepetan day inkasikara, ‘Kasin saray anak ko a wala la’d suston edad et makaliktar ed Armagedon?’ Papaseguroan itayo na Biblia a makaliktar ira no mabiskeg so espiritualidad da, antokaman so edad da.​—Mat. 24:21.

Importantin Ipanaon so Panagdayew na Pamilya

Bilang ateng, seguroen yon gawaey anggaay nayarian yon pabalegen iray anak yo “diad panagdisiplina tan panamilin nen Jehova.” (Efe. 6:4, NW) Talagan importante so panagaral na Biblia a kaiba iray anak yo. Labay tayon saray anak tayo et magmaliw a singa saramay Kristiano ed Filipos, a kinomendaan nen Pablo lapud mabulos iran tinmulok ed si Jehova. Insulat to: “Inad-arok, . . . sikayo so wala lawas ed katutulok, aliwa a diad akaarap ak labat, noag ingen nagkalalo natan ed kaandik ed arap yo, isumpal yo so dili a kilalaban yo ed takot tan giwgiw.”​—Fil. 2:12.

Kasin uunoren na ananak yo iray ganggan nen Jehova, anggan sano agda kayo kaiba? Panon to no wala ra’d eskuelaan? Panon yon nakombinse iray anak yo a talagan parad pankaabigan da iray ganggan nen Jehova, diad ontan et paigiya ira ed saratan anggan sano anggapo kayo’d abay da?

Diad sayan pamaakaran, baleg so nagawaan na panagdayew na pamilya pian napabiskeg so pananisia na ananak. Kanian, aralen tayo pa so taloran importantin bengatla ya ontulong ed sikatayo pian magmaliw a matalona so panagaral na pamilya ed Biblia.

Lawas Tumboken so Eskedyul Yo

Diad Hebreon lenguahe, samay balikas a nipatalos ya “agew” ed Job 1:6 et mangipapanengneng a saray anghel ya ananak na Dios et tatawagen ya onarap ed sikato diad nigana iran panaon. (Job 1:6) Ontan met so gawa yo. Mangiyeskedyul na espisipikon agew tan oras parad Panagdayew na Pamilya yo diad labi, tan lawas a tumboken itan ya eskedyul. Niarum ni, mangigana na sananey nin eskedyul pian siansia nin makapanaral kayo no bilang ta walaray ag-iilaloan a nagawa.

Diad ilalabas na bulan, agyo aabuloyan a magmaliw ya aliwan regular so panagaral yo. Tandaan, saray anak yo so sankaimportantian ya iyaaralan yo na Biblia. Balet, tandaan met a labay iran buagen nen Satanas. (1 Ped. 5:8) No napaulyanan yo iyan importantin Panagdayew na Pamilya yo diad labi lapud panagbantay na TV odino arum ni ran agtanto makanan kimey, manalo si Satanas.​—Efe. 5:15, 16; 6:12; Fil. 1:10.

Gawaen Itan Praktikal

Nepeg a say gagala na Panagdayew na Pamilya yo diad labi et aliwa labat a pian makaaral. Panggunaetan a gawaen itan a praktikal, salanti, nausar tan napinabangan da. Panon? No maminsan, pantongtongan iray bengatlan naeksperiensya na ananak yo diad ontutumbok iran  agew odino simba. Singa bilang, akin ta a no manpraktis kayo parad ministeryo? Labalabay a gawaen na saray kalangweran iray bengatlan kabkabisado ra. Kanian no ipraktis yo ray presentasyon tan no panon ya ebatan iray isusumpa, mas nawalaan iray kompiyansa legan iran mibibiang ed nanduruman paraan na panagpulong ed Panarian.​—2 Tim. 2:15.

Nayarian yo met ya ipraktis iray anak yo no panon dan natalonaan so pananesdes na kaedaran. Diad pantotongtong yo bilang pamilya, sarag yon usaren imay kapitulo 15 na libron Questions Young People Ask​—Answers That Work, Volume 2. Walaray suhestion ed “Peer-Pressure Planner” diad pahina 132 tan 133. Ditan et walay pankanawnawa na saray anak ya isulat no antoray nalilikna tan walad isip da. Oniay ipapaseseg na samay walad leksab na pahina 133 ed saray kalangweran: “Ipraktis iray ebat yo a kaibay ateng odino maespiritual a kaaro.” Akin ta no sagpaminsan et ilaktip yo irayan panagpraktis diad Panagdayew na Pamilya yo?

Diad Panagdayew na Pamilya, nidanet met na saray atateng so gunggona na pakawalaay espiritual iran kalat. Maabig imay impormasyon a walad Young People Ask, Volume 2, kapitulo 38, ya apauloan na “What Will I Do With My Life?” Legan yon pantotongtongan itan a kapitulo, tulongan iray anak yon namoria a sankaabigan so sigpot a pangusar ed bilay diad panaglingkor ed si Jehova. Bayuboan ed puso na anak yo so pilalek a manpayunir, manlingkor ed Bethel, manaral ed Ministerial Training School, odino arum nin sigpot panaon a serbisyo.

Nia balet so sakey a pasakbay: Walaray atateng ya anggaman maabig met so intension da, say piimano ra et no antoy labay dan pagmaliwan na anak da, aliwan say no anto la ray nagagawaan to. Siempre, anggapoy uges to no pasesegen iray ananak a dampoten day kalat a singa say panlingkor ed Bethel tan panmisionero. Balet, legan yon gagawaen itan, manalwar kayo ompan naingongotan laingen iray anak yo tan sirin et nadismaya ira. (Col. 3:21) Lawas tandaan a nepeg ya aroen na saray anak yo si Jehova lapud ta labay da, aliwan lapud labay yo. (Mat. 22:37) Kanian, komendaan yo ray anak yo lapud maabig a nagagawaan da, tan agyo iyaapasakey so imano yo ed saray agda nagagawaan. Tulongan yo ran naapresya iray amin a ginawa nen Jehova. Insan abuloyan yon mabulos a napakiwas so puso na ananak yo ed kaabigan nen Jehova.

Gawaen Itan a Makapaliket

Say komatlon makatulong pian magmaliw a matalona so Panagdayew na Pamilya diad labi et nepeg a gawaen itan a makapaliket. Panon? Nayarin no maminsan et ondengel kayo na saray audio drama odino bantayan yo so sakey ed saray video na saray Tasi nen Jehova tan pantongtongan iratan. Odino basaen a sankakaiba so Biblia, a nayari yon ipabetang ed kada membro na pamilya yo iray karakter a walad Biblia.

Walaray artikulo ed Say Panag-Bantayan tan Awake! a marakep a pantongtongan na pamilya yo. Singa bilang, nayari yon usaren so serye ed pahina 31 na kada isyu na Awake! ya apauloan na “How Would You Answer?” Diad edisyon na Say Panag-Bantayan a parad publiko, walay  nausar na saray kalangweran ed panagaral da ya apauloan na “Parad Saray Kalangweran,” tan wala met iray parad ugugaw ya apauloan na “Ibangat Iray Anak Yo.”

Saray artikulon “Young People Ask” diad Awake! et nagkalalo lan makapainteres ed atateng a katayatdang ni iray anak da, ontan met ed libron Young People Ask, Volume 2. Sano aaralen yo iyan libro, agyo lilingwanan a pantongtongan imay kahon a “What Do You Think?” diad sampot na kada kapitulo. Aliwa labat itan a parad panrepaso, noagta nausar yo iray wadtan a tepet diad panagaral na pamilya.

Balet, manalwar kayo ta ompan diad panagaral na pamilya et nasobraan yoy panagtepet. Alimbawa, agyo papasuoten so anak yo a basaen ton maksil so insulat to ed saray pahinan apauloan na “My Journal” odino diad arum nin kabiangan na libro. Diad “A Note to Parents,” a walad pahina 3 na satan a libro et oniay inkuan to: “Pian napaseseg yo ray anak yo ya isulat da ed libro ra iray nalilikna ra, agyo uupapeten iray isusulat da. Agmanbayag et nayarin ibaga ra lanlamang ed sikayo no antoray insulat da.”

No lawas yon tumboken so eskedyul na panagdayew na pamilya yo tan pansiansiaen itan a praktikal tan makapaliket, daakan a bendisyonan nen Jehova iray sagpot yo. Makatulong iyan inggana yon panaon pian mansiansian mabiskeg so espiritualidad na pamilya yo.

[Kahon ed pahina 31]

Gawaen Itan a Makapainteres

“Sano manaaral kami a kaiba iray ugugaw nin anak mi, pantotongtongan mi nen masiken ko iray aralen parad miting ed kongregasyon, insan mi pai-drowing ed saray anak mi no antoy naaralan da. No maminsan et iyakto mi iray eksena ed Biblia odino ipraktis mi iray presentasyon parad lawak na kimeyan. Itutukoy mi so panagaral unong ed edad da, tan no antoy makapainteres tan makapaliket ed sikara.”​—J.M., United States.

“Pian natalosan na ugaw nin anak na iyaaralan koy Biblia so panangusar ed lukot nensaman, inekal mi so numero na kapitulo tan bersikulo na libron Isaias, insan mi itan inimprinta. Impansusuldongan mi ray pahina, tan say nantupag a sampot et impeket mi ed duaran tubo, insan mi nilukot. Sinalin inalig na ugaw imay ginawa nen Jesus diad sinagoga ed Nazaret. Unong ed Lucas 4:16-21, ‘binuskag nen Jesus so libron Isaias, tan aromog to so pasen’ ya aanapen to. (Isa. 61:1, 2) Balet, nairapan imay ugaw ya anapen so Isaias 61 diad samay andukey a lukot ya anggapoy akaiyan a kapitulo tan bersikulo. Nandinayewan toy dunong nen Jesus ed panangusar ed saray lukot, tan inkuan to: ‘Makapabilib si Jesus!’”​—Y.T., Japan.

[Litrato ed pahina 30]

Makatulong ed saray anak yo so pampraktis pian natalonaan so pananesdes na kaedaran da

[Litrato ed pahina 31]

Pagmaliwen a makapaliket so Panagdayew na Pamilya yo ed labi