Pansiansiaen so Pankakaaro Diad Mundon Andiay Aro

“Sarayan bengatla so iganggan ko ed sikayo, pian makapanaroan so sakey tan sakey ed sikayo.”​—JUAN 15:17.

1. Akin et kaukolan a mansiansian malet a sankakaaro iray Kristiano nen inmunan siglo?

DIAD samay unor lan labi nen Jesus ed dalin, binilin to iray matoor a disipulo to a mansiansia ira komon a sankakaaro. Asasakbay ed saman met lanlamang a labi, inkuan ton nabidbiran iray babangatan to lapud aro ra ed sakey tan sakey. (Juan 13:35) Kaukolan a mansiansian malet a sankakaaro iray apostol pian nasungdoan da iray onsabin subsubok tan pian nasumpal da so kimey ya asingger lan imatalek nen Jesus ed sikara. On, akabkabat iray Kristiano nen inmunan siglo lapud malet a panangaro ra ed Dios tan ed sakey tan sakey.

2. (a) Anto so determinado tayon gawaen, tan akin? (b) Antoran tepet so aralen tayo?

² Diad sayan panaon, malikeliket itayo ta kabiangan itayo na sankamundoan ya organisasyon a saray membro to et manutumbok ed ehemplo na saray Kristiano nen inmunan siglo! Determinado itayon tuloken imay ganggan nen Jesus ya ipanengneng so tuan panangaro ed sakey tan sakey. Balet, diad sarayan kaunoran ya agew, karaklan ed saray totoo et agmatoor tan agmanaaroan. (2 Tim. 3:1-3) Mabetbet a say pikakaaro ra et ataptapew tan lapu labat ed makasarilin motibo. Nepeg ya agtayo aaligen iratan pian napansiansia tayoy pakabidbiran  tayo bilang tuan Kristiano. Kanian, aralen tayo pa irayan tepet: Anto so pundasyon na malet a pankakaaro? Panon itayon nawalaan na maong a kakaaro? Kapigan tayo kaukolan a panganggaen so sakey a pankakaaro? Tan panon tayon napansiansia iray makapabiskeg a pankakaaro?

Anto so Pundasyon na Malet a Pankakaaro?

3, 4. Anto so pundasyon na sankaeletan iran pankakaaro, tan akin?

³ Say pundasyon na sankaeletan iran pankakaaro et say panangaro ed si Jehova. Oniay insulat nen Arin Solomon: “Sarag a taloen na duaran too so agnatalo na saksakey a too. Mairap a pultoten so lubir ya alaga ed taloran bedber.” (Ecl. 4:12, Maung a Balita) Napansiansian malet so pankakaaro no si Jehova so komatlon bedber na satan.

⁴ Tua, anggan saramay agmangaaro ed si Jehova et nayarin maliket met so pankakaaro ra. Balet no inmapit so liknaan na sankaaro ed sakey tan sakey lapud panangaro ra ed Dios, magmaliw a malmalet so pankakaaro ra. No walay agda pantatalosan, tratoen da nin siansia so balang sakey ed paraan a makapaliket ed si Jehova. Sano salien na saray onsusumpa a buyakey pankakasakey na saray lingkor na Dios, diman da namorian agnabuyak so pankakaaro na saray tuan Kristiano. Manlapu la nensaman, pinaneknekan na saray lingkor nen Jehova a mas labayen da ni ompatey nen say traidoren day sakey tan sakey.​—Basaen so 1 Juan 3:16.

5. Akin et malet so impankaaro di Rut tan Noemi?

⁵ Andi-duaruwan napanggayagaan tayo so sankaliketan lan pankakaaro no say kakaaro tayo et saramay mangaaro ed si Jehova. Alaen tayo pan alimbawa so impankaaro di Rut tan Noemi. Say impankaaro na sarayan bibii et sakey ed saray makapadinayew a pankakaaro a nirekord ed Biblia. Akin et malet so impankaaro ra? Naamtaan tayo so rason ed samay imbaga nen Rut ed si Noemi: ‘Say baley mo sikato so baley ko tan say Dios mo et Dios ko. Tan say patey labat so mangisian ed sika diad siak.’ (Rut 1:16, 17) Mapatnag a si Rut tan Noemi et parehon walaan na aralem a panangaro ed Dios, tan say impideneng da ed sakey tan sakey et mitunosan ed satan a panangaro. Bilang resulta, sarayan bibii et benendisyonan nen Jehova.

No Panon a Nawalaay Maong a Kakaaro

6-8. (a) Panon a napawala so malet a pankakaaro? (b) Panon mon nipanengneng a sika lay manggagaway paraan pian makapikaaro ka?

⁶ Ipapanengneng na alimbawa di Rut tan Noemi a say maong a pankakaaro et aglabat nibanbana. Say pundasyon na satan et say panangaro ed si Jehova. Ingen, saray malet a pankakaaro et resulta met na sagpot tan sakripisyo. Anggan saray sanaagin kabiangan na Kristianon pamilya et kaukolan a mansagpot pian magmaliw a maapit a sankaaro. Panon ka sirin a nawalaan na maong a kakaaro?

⁷ Sikayo lay manggaway paraan. Pinaseseg nen apostol Pablo iray kakaaro to ed kongregasyon na Roma a “tumboken [da] so panagparawes.” (Roma 12:13) Kanian pian nawalaan itayo na maong a kakaaro, diad kada  pankanawnawa et ipanengneng tayo so panagparawes. Kaukolan a sikatayon mismo so manggawa ed satan. (Basaen so Uliran 3:27.) Say sakey a paraan a makapikaaro ka et diad pangimbitam ed nanduruman agagi a mangan ed abung yo, anggan simpli labat so niparaan mon tagano. Sarag mo kasin iyugali so pamarawes ed saray kakongregasyon mo?

⁸ Say sakey nin paraan et diad piulop mo ed nanduruman agagi diad panagpulong a kimey. Sano narerengel mo so kaibam ya itotongtong to ed arum so nipaakar ed panangaro to ed si Jehova, seguradon mas onapit so liknaan mo ed satan ya agi.

9, 10. Anton alimbawa so impanengneng nen Pablo, tan panon tayon naalig itan?

⁹ Inatnat so panangaro yo. (Basaen so 2 Corinto 6:12, 13.)  * Liknaen mo kasin anggapon balot so napikaaroan mo diad kongregasyon? No ontan, ompan say rason et lapud lilimitaan mo no siopa labat iray sarag mon kaaroen. Maong so alimbawa nen apostol Pablo no nipaakar ed pananginatnat na panangaro. Agton balot inisip a magmaliw ton maapit a kakaaro iray Gentiles. Balet sinmabi panaon et sikatoy nagmaliw ya ‘apostol na saray Gentiles.’​—Roma 11:13.

¹⁰ Sakey ni, aliwa labat lan saray kaedad nen Pablo so akikaaroan to. Singa bilang, sikato tan si Timoteo et nagmaliw a maapit a sankaaro anggaman baleg so agwat na edad da tan nandumaay abenegan da. Diad sayan panaon, papablien na dakel a kalangweran so pikakaaro ra ed maedad la ran agagi diad kongregasyon. Oniay inkuan nen Vanessa, a manedad na masulok a 20: “Walay maapit a kaarok a manga 50 so edad to. Amin a nibagak ed saray kaedaran ko et nibagak met ed sikato. Tan talagan iyaansakit to ak.” Panon iran nagmaliw a sankaaro? Oniay inkuan ni nen Vanessa: “Kaukolan kon pansagpotan so nawalaan na onian pikakaaro imbes ya alagaren ko labat lan onsabi itan.” Maliket ka ta’n mikaaro ed saray agmo kaedaran? Seguradon bendisyonan ka nen Jehova ed saray sagpot mo.

11. Anto so naaralan tayo ed alimbawa di Jonatan tan David?

¹¹ Magmaliw a matoor. Oniay insulat nen Solomon: “Say kaaro mangaro ed saray amin a panaon, et say agi nianak nipaakar ed kasumlangan [odino, panaoy gonigon].” (Uli. 17:17) Sanen insulat nen Solomon irayan salita, nayarin say sankanonot to et samay maliket ya impankaaro nen ama ton si David tan si Jonatan. (1 Sam. 18:1) Labay nen Arin Saul a tawiren na anak ton si Jonatan so trono ed Israel. Balet ta binidbir nen Jonatan a say pinili nen Jehova parad sayan pribilehyo et si David. Aliwan  singa si Saul, ag-angimon si Jonatan ed si David. Agto met sinmanok lapud indaydayew na totoo si David, tan agto anisia ed saray panagpauges ya ikakaykayat nen Saul nipaakar ed sayan kaaro to. (1 Sam. 20:24-34) Singa tayo met kasi si Jonatan? Sano akaawat na pribilehyo iray kaaro tayo, kasin maliket tayo parad sikara? Sano makakasagmak iray kairapan, kasin liligliwaen tan susuportaan tayo ira? No walay mamapauges ed sakey a kaaro tayo, kasin panisiaan tayo itan a tampol? Odino, matoor tayon idepensa so kaaro tayo, a singa ginawa nen Jonatan?

No Kapigan a Kaukolan Lan Panganggaey Pankakaaro

12-14. Anton subok so nayarin nipaarap ed saray iyaaralan na Biblia, tan panon tayo iran natulongan?

¹² Sano gapoan la na iyaaralan na Biblia ya umanen so kabibilay to, nayarin sikatoy nasubok no nipaakar ed pankakaaro. Ompan walaray labalabay ton kaulop, balet ta ag-ira manbibilay unong ed estandarte na Biblia. Nayarin dati et mabetbet to irayan kaiba ed panliliket. Natan balet et amoria ton saray gagawaen da et walaan na mauges ya impluensya ed sikato, tan kaukolan to lan bawasan so pipiulop to’d sikara. (1 Cor. 15:33) Anggaman ontan, ompan liknaen ton sikatoy agmatoor no agto la ra piulopan.

¹³ No sakey kan iyaaralan na Biblia tan oniay situasyon mo, tandaan mon say tuan kaaro et maliket no nanengneng toy maabig a pananguman ed bilay mo. Nayarin labay to ni ingen a naaralan so nipaakar ed si Jehova a singa sika. Balet saray palson kaaro et “pagpaugesen” da ka lapud agka la mibibiang ed ‘marutak a kabibilay da a singa panagtiblakan.’ (1 Ped. 4:3, 4, NW) Diad katuaan to, aliwan sika so agmatoor, noagta sarayan kakaaro.

¹⁴ No saray iyaaralan na Biblia et taynan na datin kakaaro ra ya agmangaaro ed Dios, saray membro na kongregasyon so magmaliw a balon kakaaro ra. (Gal. 6:10) Personal yo kasin kabat iray iyaaralan na Biblia ya onaatendi la ed kongregasyon yo? Kasin mangigagana kayoy panaon pian napitongtongan tan napiulopan ira?

15, 16. (a) Antoy nepeg a reaksion tayo no say sakey a kaaro et tinmunda lan manlingkor ed si Jehova? (b) Panon tayon napaneknekan so panangaro tayo ed Dios?

¹⁵ Panon to balet no say sakey a kaaro ed loob na kongregasyon et nandesisyon a taynan to lay Jehova, tan ompan kaukolan a nadispelosip? Talagan makapagonigon itan a situasyon. Oniay impaneskribe na sakey ya agin bii ed reaksion to sanen tinmunda lan manlingkor ed si Jehova so maapit a kaaro to: “Singa ak inateyan. Say abaloan ko et malet so pananisia na kaarok, balet ta andi manaya. Iisipen ko no kasin nanlingkor labat ed si Jehova pian paliketey pamilya to. Diman ko met ginapoan ya usisaen iray motibok. Kasin duga so motibok ed panlilingkor ko ed si Jehova?” Panon ton atalonaan iyan situasyon? Oniay inkuan to: “Impaawit ko ed si Jehova iyan kapagaan ko. Determinado ak a paneknekan ed si Jehova a sikatoy talagan inad-arok, aliwan lapu labat ta iikdan to ak na kaaro ed loob na organisasyon to.”

¹⁶ Agtayo nailaloan a mansiansia itayon kaaro na Dios no pilaan tayo iramay akikaaro la ed mundo. Insulat nen disipulon Santiago: “Agyo ta amta a say pikakaaro ed mundo et sikato so pibubusol ed Dios? Kanian siopaman a magmaliw naani a kaaro na mundo sikato so kabusol na Dios.” (Sant. 4:4) Napaneknekan tayoy panangaro tayo ed Dios diad panmatalek a tulongan To itayon nasarag so impakaandi na sakey a kaaro no mansiansia itayon matoor ed Sikato. (Basaen so Hebreos 13:5b.) Oniay inkuan na samay agin bii ya asalambit nen niman: “Amoriak ya agtayo napilit so sakey a too ya  aroen to si Jehova odino aroen to itayo. Sikaton mismo so mandesisyon ed satan.” Anto balet so nagawaan tayo pian napansiansia iray makapabiskeg a pankakaaro ed loob na kongregasyon?

No Panon a Pansiansiaen Iray Maong a Pankakaaro

17. Panon so nepeg a pitotongtong na maong a sankakaaro ed sakey tan sakey?

¹⁷ Mansiansian maapit iray sankakaaro no walay maabig a pantatalosan da. No basaen yoy salaysay na Biblia nipaakar ed Rut tan Noemi, di David tan Jonatan, di Pablo tan Timoteo, naimano yon say maong a sankaaro et nibaga ray labay dan ibaga, balet ta diad marespeton paraan. Oniay insulat nen Pablo nipaakar ed no panon so nepeg tayon pitongtong ed arum: “Say salita yo komon natekepan lawas na liga, alaokan na asin.” Say espisipikon tutukoyen nen Pablo et say paraan na pitotongtong tayo ed “saray wala ed paway,” salanti, saramay agtayo kapananisiaan. (Col. 4:5, 6) No saray agmananisia et rerespetoen tayo, seguradon nagkalalo la’d saray kakaaro tayo ed loob na kongregasyon!

18, 19. Anto so nepeg a panmoria tayo ed simbawa na kaaro tayon Kristiano, tan antoy naaralan tayo ed alimbawa na saramay mamatatken ed kongregasyon na Efeso?

¹⁸ Papablien na maong a sankakaaro so opinyon na balang sakey, kanian say pitongtong da et kaukolan a diretsaan balet ta ‘atekepan na liga’. Insulat nen makabat ya Arin Solomon: “Say larak tan say balingit paliketen da so puso; ontan so kasamitan na kaaro na too a manlapu ed puso so simbawa to.” (Uli. 27:9) Kasin ontan so panmoriam ed simbawa na kaarom? (Basaen so Salmo 141:5.) No ibalikas na kaarom so pampapaga to lapud saray gagawaen mo, antoy reaksion mo? Moriaen mo kasin maaron panangiyansakit itan, odino naopendi ka?

¹⁹ Maapit a kaaro nen apostol Pablo iray mamatatken ed kongregasyon na Efeso. Nayarin kabat to la so arum ed sikara antis ni ran nagmaliw a Kristiano. Diad samay unor lan pakapitongtong to ed sikara et diretsaan to iran sinimbawa. Antoy reaksion da? Agnaopendi irayan kaaro nen Pablo. Imbes, inapresya ray panangiyansakit to ed sikara, tan nanangis ni ra ingen lapud sikatoy agda lan balot napinengnengan.​—Gawa 20:17, 29, 30, 36-38.

20. Anto so gawaen na sakey a maaron kaaro?

²⁰ Aglabat mangaawat na makabat iran simbawa iray maong a kakaaro, noagta manisimbawa met ira. Siempre, kaukolan tayon tebeken no kapigan tayo nepeg ya ‘agpibabalian so gagawaen na arum.’ (1 Tes. 4:11, NW) Tan nepeg tayon bidbiren met a balang sakey ed sikatayo et “mangiyosaosa naani nipaakar ed inkasikaton dili ed arap na Dios.” (Roma 14:12) Balet no nakaukolan, say sakey a maong a kaaro et panonotan to so kaaro to nipaakar ed saray estandarte nen Jehova. (1 Cor. 7:39) Singa bilang, antoy gawaen mo no naiimanom a say kaarom ya andiay asawa et masyadon maapit ed sakey ya agmananisia? Kasin agmo pasakbayan lapud natatakot kan naderal so pankakaaro yo? Panon to no pinasakbayan mo, balet ta imbaliwala to itan, antoy gawaen mo ey? Say sakey a maong a kaaro et ontupleg ed saray maaron pastol pian natulongan so kaaro ton aliwa lay aarapen to. Kaukolan so inkakpel pian nagawaan itan. Balet ta nonoten tayon agnaderal so sakey a pankakaaro no say pundasyon na satan et panangaro ed si Jehova.

21. Anto so nagagawaan tayo ed saray kakaaro tayo no maminsan, balet akin et importante a pansiansiaen tayon malet so pankakaaro ed kongregasyon?

²¹ Basaen so Colosas 3:13, 14. No maminsan, walaray ginawa odino nibaga tayo ya agnagustoan na saray kakaaro tayo, tan makagawa odino makapansalita met ira na pakasyodotan tayo. “Amin tayo et naynay a nalilingo,” so insulat nen Santiago. (Sant. 3:2, NW) Balet, agbibilangen na saray tuan sankaaro so lingo na balang sakey, noagta sigpot iran manpeperdonaan. Talagan importante a paeleten tayoy pankakaaro tayo panamegley na mabulos a pitotongtong tan pampeperdonaan! No ipatnag tayo so ontan a panangaro, satan et magmaliw ya ‘ayadyarin singer’ na pankakasakey.

[Paimano ed leksab]

Panon Yon Ebatan?

• Panon itayon nawalaan na maong a kakaaro?

• Kapigan a kaukolan lan panganggaen so pankakaaro?

• Antoy nepeg tayon gawaen pian mansiansian malet so pankakaaro?

[Tepetepet Parad Panagaral]

[Litrato ed pahina 18]

Anto so pundasyon na malet ya impankaaro di Rut tan Noemi?

[Litrato ed pahina 19]

Kasin iyuugalim so panagparawes?