Tepetepet na Saray Manbabasa

Antoy naaralan tayo ed Uliran 24:27?

Oniay bilin na nansulat ed Uliran ed sakey a balolaki: “Itadiam so gawam ed paway, tan sikato so gawaen mo a maganggano nipaakar ed sika ed uma; et kayari to ipaalagey mo so abung mo.” Antoy idadanet na sayan pinuyanan a proverbio? Nepeg a say sakey a balolaki et manparaan a maong antis a mangasawa tan manpamilya. Kaukolan ya amta to iray responsabilidad a katekep na panangasawa tan sarag ton sumpalen iratan.

Diad apalabas, walaray pankanawnawan say impangipaliwawa ed sayan bersikulo et kaukolan ya aglabat legpeten na ulo na pamilya so sankaabungan to, noagta kaukolan to met itan ya ipaalagey odino pabiskegen diad pambangat to nipaakar ed Dios tan ed Biblia. Anggaman duga tan Makasulatan itan, aliwan satan so manunan punto na sayan bersikulo. Akin et ontan so nibaga tayo? Nia so duaran rason.

Unona, say sinalambit na sayan bersikulo a panagpaalagey et agmanutukoy ed panamaseseg odino panamabiskeg ed pamilya. Noagta, sayan ideya et manutukoy ed literal a panagpaalagey na abung. Say salitan nipatalos ya “ipaalagey” et nayarin mankabaliksan met na pangiletneg na sankaabungan, salanti, say pangasawa tan panpamilya.

Komadua, idadanet na sayan bersikulo no antoray manepeg ya iyuna, a singa to ibabagan, “Gawam ni iyan unona, insan kayari to et saya.” No ontan sirin, kasin say labay ya ibaga na sayan proverbio et manunaan so panlegpet ed pamilya nen say espiritual iran bengatla? Seguradon andi!

Nensaman, no labay na sakey a laki so ‘manpaalagey na sankaabungan to,’ odino manpamilya, kaukolan ton tepetay inkasikato, ‘Sarag ko la kasin asikasoen tan legpeten so naasawak tan saray magmaliw ya anak mi?’ Antis a manpamilya, kaukolan toy mankimey, salanti, iparaan toy daralusan to tan asikasoen to iray tanem to. Oniay malinew ya impangipatalos na bersion na Biblia a Maung a Balita ed sayan teksto: “Mananap ka ni pankimeyan mo, iparaan moy alog mo, kasakbayan a mangipaalagey kay abung mo tan manpamilya ka.” Onaplika met kasi iyan prinsipyo natan?

On. No labay na sakey a laki so mangasawa, kaukolan toy manparaan parad satan a responsabilidad. Nepeg a mantrabaho anggad sarag na laman to. Siempre, aliwa labat lan materyal a bengatla so pansagpotan ya itarya na sakey a laki pian naasikasoy pamilya to. Ipapanengneng na Salita na Dios a say lakin agto taryaay pisikal, emosyonal, tan espiritual iran pankaukolan na pamilya to et mas mauges ni nen say too ya andian na pananisia! (1 Tim. 5:8, NW) Kanian no plaplanoen la na balolaki so mangasawa tan manpamilya, nia ray nepeg ya itepet to ed inkasikato: ‘Talaga ta’n akaparaan ak lan manlegpet na pamilya? Sarag ko kasin idaulo so pamilyak diad panagdayew ed Dios? Sarag ko kasin sakbaten so responsabilidad a pangikondukta na regular a panagaral na Biblia ed asawak tan ananak ko?’ Ipupurek na Salita na Dios irayan importantin responsabilidad.​—Deu. 6:6-8; Efe. 6:4.

Sirin, no say sakey a balolaki et manaanap lay magmaliw ya asawa to, nepeg ton nodnonoten so prinsipyon walad Uliran 24:27. Mipadpara, maabig no tepetan na marikit so inkasikato no kasin akaparaan la ed saray responsabilidad to bilang asawan bii tan ina. Nayarin nonoten met na sanasawa irayan bengatla no plaplanoen da lay nawalaan na anak. (Luc. 14:28) No unoren na totoo na Dios so ontan iran pinuyanan a simbawa, napaliisan day problema tan nawalaan ira na maliket a pamilya.

[Blurb ed pahina 12]

Antoray nepeg ya itepet na balolaki ed inkasikato no plaplanoen to lay mangasawa?