Wala Tay Eskedyul Mo Parad Panagaral na Biblia?

NEN katantaon, inyanunsio na Mananguley ya Ulop so pananguman ed eskedyul na aral ed kongregasyon pian saray pamilya et nawalaan na mas malaglaem a panaon parad panagaral tan pantotongtong nipaakar ed Biblia. No sakey kan ulo na pamilya, seguroen mo a matukoy, makagunggona, tan regular so panagaral yon pamilya. Saray sanasawan andiay anak et uusaren da iyan panaon pian aralen so Biblia a sankaiba. Ontan met, malaem lay panaon na saray andiay asawa parad panagaral na Biblia, lautla ta anggapo ni dilin pamilya ra.

Dakel so angapresya ed uksoyan na Panagdayew na Pamilya ed labi. Singa bilang, oniay insulat nen Kevin a sakey ya elder ed kongregasyon: “Kulang so pangibagay ‘salamat’ pian ibalikas so nalilikna na agagi ed kongregasyon mi. Nantongtongan mi ran elder ya usaren mi imay labin anggapoy aral pian gawaen so mismon imbilin na Mananguley ya Ulop, salanti, a manaral kami a kaibay pamilya mi.”

Oniay insulat nen Jodi ya asawa na sakey ya elder: “Walay taloran anak min bibii, a manedad na 15, 11, tan 2. Kakkaalis mi ni labat ed kongregasyon na sign language. Kaukolay dakel a panaon tan sagpot pian niparaan so amin ya aral. Balet lapud samay pananguman, walay sakey nin labi a nausar mi para labat ed panagdayew na pamilya mi!”

Insulat met na sanasawan payunir a si John tan JoAnn: “Nensaman et mabetbet ya isasaletsalet mi labat so panagaral mi na Biblia bilang sanasawa no anggapoy kimey mi ed kongregasyon. Sayan balon uksoyan et regalo nen Jehova a makaparepresko ed espiritualidad mi, no usaren mi itan a panaon ed peteg a gagala na satan.”

Si Tony, sakey a balolakin manedad na manga 25, et inggana toy Martes na labi pian manaral na Biblia. Sananey met so eskedyul to parad panagparaan ed saray aral. Balet ta oniay inkuan nen Tony: “Pitalaran koy isabi na Martes.” Akin? “On ta satan a labi et para labat ed si Jehova.” Impaliwawa to: “Manga duay oras kon aaralen so nanduruman tema a mamaapit ed siak ed si Jehova. Lapud mas malaem so panaon ko parad panagaral, nadadalepdep kon maong iray tekston nababasak.” Antoy resulta? “Lalon ontatanek ed pusok iray simbawa nen Jehova.” Wala tay niiter ton alimbawa? “Abasak ed libron Insight so impankaaro di David tan Jonatan. Akaaral ak a maong ed masakripisyon awawey nen Jonatan. Atulongan ak na ehemplo to pian mas natalosan so kabaliksan na sakey a tuan kaaro. Talagan pipilaleken koy makaromog ni na ontan iran kayamanan kada Martes na labi!”

Seguradon nagunggonaan a maong so amin a lingkor nen Jehova no sayan kaaruman a panaon et usaren da parad makabaliksan a panagaral na Biblia tan panagdayew na pamilya.