Antoy Ipapatnag na Saray Pikakasim Nipaakar ed Sika?

‘O sika a Dumerengel na pikakasi, amin a laman ondago ed sika.’​—SAL. 65:2.

1, 2. Akin et matalek a manpipikasi iray lingkor nen Jehova ed sikato?

AGBALOT ibabaliwala nen Jehova iray pikakasi na saray matoor a lingkor to. Matalek itayon dedengelen to iratan. Anggan manbabansag a manpikasi iray minilyon a Tasi nen Jehova, sarag ton talinengen so balang sakey ed sikara.

² Lapud matalek si salmistan David a dedengelen na Dios iray pikakasi to, oniay inkanta to: ‘O sika a Dumerengel na pikakasi, amin a laman ondago ed sika.’ (Sal. 65:2) Naebatan iray pikakasi nen David lapud sikatoy matoor a managdayew nen Jehova. Nepeg tayon tepetay inkasikatayo: ‘Kasin ipapatnag na saray pikakasik a manmamatalek ak ed si Jehova tan iyuunak so tuan panagdayew? Antoy ipapatnag na saray pikakasik nipaakar ed relasyon ko’d si Jehova?’

Mapaabeban Onasingger ed si Jehova

3, 4. (a) Antoy nepeg ya awawey tayo sano manpipikasi itayo ed Dios? (b) Antoy nepeg tayon gawaen no ‘nagogonigon so nonot’ tayo lapud seryoson kasalanan?

³ No labay tayon naebatan iray pikakasi tayo, nepeg a mapaabeba itayon onasingger ed Dios. (Sal. 138:6) Kaukolan a kerewen tayo’d si Jehova ya usisaen to itayo, a singa samay kerew nen David: “Sukayan mo ak, O Dios, et naamtaan mo so pusok; salsalien mo ak et naamtaan mo so [“nagogonigon a,” NW] nodnonot ko; tan nengneng mo no wala so anto a bagel a kagagawa ed inkasiak, et ibasbas mo ak ed maando lawas a dalan.” (Sal. 139:23, 24) Agtayo labat manpikasi, noagta, nepeg ya awaten tayo met so panangusisa na Dios tan simbawa na Salita to. Diad ontan et iwanwan itayo nen Jehova ed “maando lawas a dalan,” a tulongan to itayon mantultuloy ed basbas a mamaarap ed andi-anggaan a bilay.

⁴ Panon to balet no ‘nagogonigon so nonot’ tayo lapud seryoson kasalanan? (Basaen so Salmo 32:1-5.) No piliten tayon ibaliwala so pakakakonsiensia tayo, onkapuy itayo, a singa say kiew a namagaan lapud pirmin petang ed panaoy tiagew. Sanen akapankasalanan si David, naandi so liket to tan nayarin nansakit ni ingen. Balet ta sikatoy nainawaan a tuloy sanen impatua to itan ed Dios! Nonot yo pa labat so liket nen David sanen ‘pinerdona nen Jehova iray impakasumlang to.’ Nainawaan so sakey sano ipatua toy kasalanan to ed Dios tan diad tulong met na saray Kristianon mamatatken et nipawil so espiritual a bunigas to.​—Uli. 28:13; Sant. 5:13-16.

Mikasi tan Misalamat ed Dios

5. Diad orihinal a Griegon lenguahe, antoy kabaliksan na samay salitan nipatalos a “pikekerew” ed Filipos 4:6?

⁵ No napapagaan itayon maong lapud antokaman a rason, nepeg tayon iyaplika iyan simbawa nen Pablo: “Agkayo mapaga ed antokaman; noag dia ed ganagana lapu ed pikakasi tan pikekerew a tekep na pisasalamat nipakabat komon ed Dios so saray kerew yo.” (Fil. 4:6) Diad orihinal a Griegon lenguahe, say salitan nipatalos a “pikekerew” et mankabaliksan na ‘inyey-ey a pikakasi.’ Laktipen na saya so magunaet ya ikerew ed si Jehova. Nepeg itayon mikasi ed si Jehova parad tulong tan panangigiya nagkalautla no walaray peligro odino panamasegsegang.

6, 7. Antoray rason no akin a nepeg tayon ibalikas so pisasalamat ed saray pikakasi tayo?

⁶ Balet, sano manpipikasi itayo labat no walay kaukolan tayo, antoy ipapatnag na satan nipaakar ed motibo tayo? Imbaga nen Pablo a kaukolan tayon ipaamta ed Dios iray kerew tayo “tekep na pisasalamat.” Talagan walaan itayoy rason pian ibalikas so pisasalamat, a singa samay imbalikas nen David: “Kien mo, O Jehova,  so kinabalgan, tan saray pakayari, tan say gloria; tan say palabo, tan say katageyan; ta amin a wala ed saray tawen tan dia ed dalin sikato so kien mo; kien mo so nanarian, O Jehova, tan nipaatagey ka a singa ulo ed labas na amin. . . . Dios mi misalsalamat kami ed sika, tan idayew mi so magloria a ngaran mo.”​—1 Awa. 29:11-13.

⁷ Akisalamat si Jesus ed Dios lapud tagano, tan lapud samay tinapay tan alak ya inusar ed Pangdem na Katawan. (Mat. 15:36; Mar. 14: 22, 23) Likud ni ed pisalamat tayo’d Dios lapud pangitatarya toy tagano, nepeg tayoy ‘mangiyapay na pisasalamat ed sikato’ lapud “makapakelkelaw ira a gawa to ed saray anak na totoo,” lapud “matunong a bilibilin” to, tan lapud salita odino mensahe to a walad Biblia.​—Sal. 107:15; 119:62, 105.

Ipikasi so Arum

8, 9. Akin et kaukolan tayon ipikasi iray kapara tayon Kristiano?

⁸ Seguradon ipipikasi tayoy inkasikatayo, balet ta kaukolan tayo met ya ipikasi so arum, anggan saray agagin agtayo personal a kabat. Anggaman agkabat nen apostol Pablo so amin ya agagi ed Colosas, oniay insulat to: “Naynay kamin misasalamat ed Dios ya Ama na Katawan tayon Jesu-Kristo sano ipipikasi mi kayo, ta nadngelan mi so pananisia yo nipaakar ed si Kristo Jesus tan say panangaro yo ed amin a masanto.” (Col. 1:3, 4, NW) Impikasi met nen Pablo iray Kristianon taga Tesalonica. (2 Tes. 1:11, 12) Sano ipipikasi tayo ray agagi, nipapanengneng tayo no anton talagay walad puso tayo tan say panmoria tayo ed sikara.

⁹ Say pangipikasi tayo ed saray alanaan a Kristiano tan ed kaiba ran ‘arum a karnero’ et pakapatnagan ya iyaansakit tayoy organisasyon na Dios. (Juan 10:16) Kinerew nen Pablo ed saray kapananisiaan to a sikatoy ipikasi ra pian ‘niiter komon ed sikato so abilidad a mansalita pian nipakabat toy misteryo na ebanghelyo.’ (Efe. 6:17-20) Kasin ipipikasi tayo met so arum ed ontan a paraan?

10. Anto so epekto ed sikatayo na pangipikasi ed arum?

¹⁰ Nayarin manguman so awawey tayo ed arum no ipikasi tayo ra. Agta posiblin naekal la so agtayo panlabay ed sakey ya agi no ipikasi tayon naynay? (1 Juan 4:20, 21) Say panggawa na ontan et makapabiskeg tan mamawalay pankakasakey. Kaaruman ni, ipapatnag na satan a walaan itayoy singa-Kriston aro. (Juan 13:34, 35) Sayan kalidad et kabiangan na bungay espiritu na Dios. Kasin ipipikasi na balang sakey ed sikatayo so masanton espiritu, a kekerewen tayo’d si Jehova a tulongan to itayon ipatnag so bunga na satan, salanti, say aro, liket, deen, kasungdoan, kauyamoan, kaabigan, pananisia, tayadno, tan dangka? (Luc. 11:13; Gal. 5:22, 23) No ontan, napatnagan ed saray salita tan kiwas tayo a manaakar tan manbibilay itayo unong ed espiritu.​—Basaen so Galacia 5:16, 25.

11. Akin et nibagan duga a kerewen tayo ed arum ya ipikasi da itayo?

¹¹ No naamtaan tayon natutukso iray ananak tayon mansaol diad saray eksamin da ed eskuelaan, nepeg ya ipikasi tayo ra tan simbawaen ira base’d Biblia pian magmaliw iran matua tan ag-ira manggaway antokaman a mauges. Oniay imbaga  nen Pablo ed saray Kristiano ed Corinto: “Mikasi kami ed Dios pian agkayo manggawa na mauges.” (2 Cor. 13:7) Saray ontan a mapaabeban pikakasi et mamaliket ed si Jehova tan ipabitar toy walad puso tayo. (Basaen so Uliran 15:8.) Nayari met a kerewen tayo’d arum ya ipikasi da itayo, a singa ginawa nen apostol Pablo. Insulat to: “Pikasi yo kami, ta ilaloan mi a wala so maabig a konsiensia mi, a pampirawatan mi so manbilay a sigagalang dia ed saray amin a bengatla.”​—Heb. 13:18.

Arum nin Bengatla a Napatnagan ed Pikakasi Tayo

12. Antoray nepeg ya ilaktip ed pikakasi tayo?

¹² Napatnagan kasi ed saray pikakasi tayo a maliket tan maseseg itayon Tasi nen Jehova? Say manuna tayo kasin ipipikasi et say pakasumpal tayo ed linawa na Dios, kipulong na mensahe na Panarian, kiyalangon na inkasoberano nen Jehova, tan say pamasantos ed ngaran to? Saraya et importantin ilaktip ed saray pikakasi tayo, a singa samay modelon pikakasi nen Jesus, ya oniay impangigapo to: “Ama min wala ka ed tawen, nagalang komon so ngaran mo. Onsabi komon so panarian mo. Nagawa komon so linawam, unong ed tawen, ontan met ed dalin.”​—Mat. 6:9, 10.

13, 14. Antoy ipapatnag na saray pikakasi tayo nipaakar ed sikatayo?

¹³ Ipapatnag na saray pikakasi tayo’d Dios iray motibo, panlabayan, tan pilalek tayo. Amta nen Jehova so inkatoo tayo. Oniay inkuan na Uliran 17:3: “Say panaggogolan [odino, panagdalisayan] sikato so nipaakar ed pilak, tan say palbaan nipaakar ed balitok; balet si Jehova salien to so saray kapusoan.” Nababasa na Dios iray walad puso tayo. (1 Sam. 16:7) Amta to no antoy panmoria tayo’d saray pantitipon, ministeryo, tan agagi tayo. Kabat met nen Jehova no antoy iisipen tayo nipaakar ed saray ‘agagi’ nen Kristo. (Mat. 25:40) Amta to met no kasin talagan sinsero itayo ed ipipikasi tayo odino uulit-uliten tayo labat iray ibabaga tayo. Oniay inkuan nen Jesus: “Diad panagpikasi, agmo agamilen so andi kakanaan a pangolioli na salita, a singa gawa na saray Gentiles lapud [lingon] isisipen dan natalineng ira nisengeg ed dakel a panagsalita ra.”​—Mat. 6:7.

¹⁴ Saray ibabalikas tayo’d pikakasi tayo et mangipapatnag no kaunongan kabaleg so talek tayo’d Dios. Oniay inkuan nen David: “Sika [Jehova] so pinmasen a sakey a salimbeng ya onkana ed siak, tan sakey a malet ya ilang a pakapaliisan ed kabusol. Manayam ak ed [toldam] lawas; manmatalek ak ed silong na saray payapayak mo.” (Sal. 61:3, 4) Sano ‘ibuskag na Dios so tolda to ed sikatayo,’ a singa panangibaga, napanggayagaan tayoy kaligenan tan panangasikaso to. (Apo. 7:15) Talagan makaligliwa so iyasingger ed Dios diad pikakasi tekep na talek a sikatoy ‘walad abay tayo’ no nasusubok so pananisia tayo!​—Basaen so Salmo 118:5-9.

15, 16. Panon itayon natulongan na pikakasi no nipaakar ed pilalek tayon nawalaay pribilehyo?

¹⁵ Say matuan pangipikasi ed si Jehova nipaakar ed saray motibo tayo so ontulong pian naamtaan tayo so peteg a walad puso tayo. Singa bilang, kasin say pilalek tayon nawalaay pribilehyo ed organisasyon na Dios et lapud talagan labay tayoy ontulong tan gawaen so anggaay nayarian tayo diad kongregasyon tan ed panagpulong a kimey? Odino labay tayo labat so posisyon a “katagtageyan” tan ‘pakatawan’ ni ingen ed arum? Aliwa komon ya ontan so motibo tayo. (Basaen so 3 Juan 9, 10; Lucas 22:24-27.) No walaray lingon motibo tayo, say matuan pampikasi ed si Jehova so mangiwalwal ed saratan tan natulongan itayon manguman sakbay nin nigalet iratan ed puso tayo.

 ¹⁶ Nayarin labalabay na Kristianon kaasawaan a bibii a magmaliw a ministeryal a lingkor so kaasawaan da, tan diad ilabas na panaon et magmaliw a manangasikaso, odino elder. Sarayan agagin bibii et onkikiwas unong ed pikakasi ra no gagawaen day anggaay nayarian dan magmaliw a maabig ya ehemplo. Importanti iya lapud say panagsalita tan kondukta na pamilya na asawan laki et walaan na epekto ed reputasyon to ed kongregasyon.

Sano Mangidadaulo na Pikakasi

17. Akin et maabig so pambukbukor parad personal a panagpikasi?

¹⁷ Inmarawi si Jesus manlapud dakel a totoo pian makapanpikasi a bukor ed Ama to. (Mat. 14:13; Luc. 5:16; 6:12) Kaukolan tayo met so panaon pian makapanbukbukor. No masimoon itayon manpikasi diad mareen a pasen, makapanggawa itayo na saray desisyon a mamaliket ed si Jehova tan ontulong ed sikatayon mansiansian mabiskeg ed espiritual. Ingen ta angidaulo met si Jesus na mapublikon pikakasi, tan maabig no aralen tayo no panon so dugan panggawa ed satan.

18. Antoray nepeg a tandaan na agagin lalaki sano mangidadaulo na pikakasi ed kongregasyon?

¹⁸ Saray matoor a lalaki so mangidadaulo na pikakasi diad saray aral ed kongregasyon. (1 Tim. 2:8) Kaukolan a nibaga na saray kapananisiaan tayo so “amen” a kabaliksan toy “ontan pa komon” kayari na pikakasi. Balet pian nibaga ra itan, nepeg ya onaabobon ira ed samay impikasi. Diad samay modelon pikakasi nen Jesus, anggapoy makapabigla odino makapaopendi ya imbaga to. (Luc. 11:2-4) Sakey ni, agto sinansakey a binitla so pankaukolan tan problema na saray dumerengel to. Matukoy ya ilaktip iray dilin kapagaan tayo diad personal a pikakasi, aliwan diad mapublikon pikakasi. Tan sano mangidadaulo itayo na pikakasi, agtayo sasalambiten iray kompidensial a bengatla.

19. Panon so nepeg ya ikiwas tayo legan na mapublikon pikakasi?

¹⁹ Sano walay mangidadaulo ed sikatayo diad pikakasi, kaukolan ya ipatnag tayoy mapagalang a ‘takot ed Dios.’ (1 Ped. 2:17) Nayarin walaray kakikiwas a matukoy ed arum a pankanawnawa, balet ta agmatukoy diad Kristianon pantitipon. (Ecl. 3:1) Singa bilang, ompan walay grupon manbebembenay lima legay pikakasi. Nayarin makaopendi odino makadisturbo iya ed arum, laktip la ray bisita ya agni mananisia. Sarag to met a mambembenay lima so sanasawa, balet no manlakapan ira legay mapublikon pikakasi, ompan nagapol so arum a makaimano’d satan. Tan isipen da laingen a say pangiteteenay imano na sanasawa et say romantikon relasyon da, aliwan say pamagalang ed si Jehova. Lapud baleg so respeto tayo ed Dios, ‘gawaen tayo sirin so amin parad kigloria to’ tan paliisan  so konduktan mangibalang na imano, makapabigla, odino pakagapolay arum.​—1 Cor. 10:31, 32; 2 Cor. 6:3.

Anto so Ipikasi?

20. Ipaliwawa so ibabaga na Roma 8:26, 27.

²⁰ No maminsan et agtayo amtay ibaga tayo ed saray personal a pikakasi tayo. Oniay insulat nen Pablo: “Walaray panaon a nakaukolan tayoy manpikasi balet agtayo amtay ipikasi tayo. Balet, say [masanton] espiritu a mismo so ontulong ed sikatayo anggano agtayo amta so ibalikas tayo ed saray ey-ey tayo. Ingen ta samay manguusisa ed kapusoan et amta to so kabaliksan na espiritu.” (Roma 8:26, 27, NW) Impaisulat nen Jehova iray dakel a pikakasi diad Kasulatan. Sarayan pinuyanan a pikakasi et ipapasen ton kerew a manlalapud sikatayon mismo, kanian ebatan to iratan. Kabkabat itayo na Dios tan amta to so kabaliksan na saramay salitan impuyan to panamegley na espiritu to ed saray managsulat na Biblia. Ebatan nen Jehova iray kerew tayo no say espiritu so “ontulong” odino mikasi parad sikatayo. Balet, legan ya ondarakel so kakabatan tayo ed Salita na Dios, mas mainomay tayo lan nanonotan no antoray nepeg ya ipikasi tayo.

21. Antoy aralen tayo ed onsublay ya artikulo?

²¹ Unong ed naaralan tayo, dakel so ipapatnag na saray pikakasi tayo nipaakar ed relasyon tayo’d si Jehova. Singa bilang, ipatnag na saratan no talaga kasin maapit itayo ed si Jehova tan no kasin kabisado tayoy Salita to. (Sant. 4:8) Diad onsublay ya artikulo, pantongtongan tayo so pigara ed saray kerew tan pikakasi ya akarekord ed Biblia. Anto kasi epekto na panaral tayo ed sarayan pikakasi diad kalidad na saray mismon pikakasi tayo?

Panon Yon Ebatan?

• Anto so nepeg ya awawey tayo sano manpipikasi itayo’d si Jehova?

• Akin et nepeg tayon ipikasi iray kapananisiaan tayo?

• Antoy ipapatnag na saray pikakasi tayo nipaakar ed inkatoo tan motibo tayo?

• Panon so nepeg ya ikiwas tayo legan na mapublikon pikakasi?

[Tepetepet Parad Panagaral]

[Litrato ed pahina 4]

Kasin naynay mon idadayew tan pisasalamatan si Jehova?

[Litrato ed pahina 6]

Say awawey tayo legay mapublikon pikakasi et nepeg a lawas mamapagalang ed si Jehova