Paaligwasey Kalidad na Pikakasim Diad Panaral Moy Biblia

“O Katawan, pikasik ed sika, natan say layag mo ontalineng komon ed pikakasi na aripen mo.”​—NEH. 1:11.

1, 2. Akin et makagunggonan aralen so pigaran pikakasi a nirekord ed Biblia?

SAY pikakasi tan panagaral na Biblia et importantin kabiangan na tuan panagdayew. (1 Tes. 5:17; 2 Tim. 3:16, 17) Anggaman say Biblia et aliwan libro na pikakasi, akarekord ditan so dakel iran pikakasi, a kaslakan et naromog ed libro na Salmos.

² Legan mon babasaen tan aaralen so Biblia, nayarin makabasa ka na saray pikakasin matukoy ed situasyon mo. Diad tua, napaaligwas moy kalidad na pikakasim no usaren mo ray balikas ed saray pikakasin naromog ed Kasulatan. Antoy naaralan tayo ed saramay totoon naebatan so pikakasi ra tan ed samay mismon pikakasi ra?

Anapen tan Tumboken so Panangiwanwan na Dios

3, 4. Antoy inganggan nen Abraham ed aripen to, tan antoy naaralan tayo ed impangebat nen Jehova ed pikakasi na sayan aripen?

³ Diad panaaral moy Biblia, akabatan mo a nepeg mon kerewen a naynay so panangiwanwan na Dios. Alaen pan alimbawa so pikakasi na sankamasikenan ya aripen nen patriarkan Abraham,  a posiblin si Eliezer. Sikatoy imbaki nen Abraham ed Mesopotamia pian mamili na biin matakot ed Dios a magmaliw ya asawa nen Isaac. Sanen walaray bibiin onasol ed bobon, oniay impikasi na sayan aripen: “O Jehova, . . . komon a say marikit a pangibagaan ko naani onia, Iyepas mo so buyog mo, pikasik ed sika, ta pian makapiinum ak; et ibaga to pa naani, Inum ka tan painumen ko so saray kamelyom met; sikato ‘tan pa so bii a tinurom a nipaakar ed aripen mo ya Isaac; tan ditan ko napatnagan so pangipanengneng mo na abig na linawa ed katawan ko.”​—Gen. 24:12-14.

⁴ Naebatan so pikakasi na aripen nen Abraham sanen pinainum nen Rebeca iray kamelyo to. Ag-abayag et akila si Rebeca ed Canaan tan nagmaliw ya inad-aron asawa nen Isaac. Siempre, agmo met iilaloan a makaawat ka na saray tanda manlapud Dios. Balet, iwanwan ka na Dios no manpikasi ka tan lawas paigiya ed espiritu to.​—Gal. 5:18.

Ontulong so Pikakasi Pian Nabawasay Kapagaan

5, 6. Antoy naimano tayo ed pikakasi nen Jacob sanen asingger lan minengnengan ed si Esau?

⁵ Napakepa na pikakasi so alablabas a kapagaan. Lapud natatakot si Jacob ed kambal ton si Esau, oniay impikasi to: “O Jehova, . . . aliwa ak a makana ed kamelagan ed saray amin a maaro ya abig na linawa tan amin a katuaan ya impatnag mo ed saya so aripen mo . . . Pikasik ed sika ya iliktar mo ak ed lima nen agik, iliktar mo ak ed lima nen Esau; ta sikato so tatakotan ko, ompan onla dia et bakalen to ak, a pati ina tan saray anak. Et sika inkuan mo, Andi duaruwa a gawaen ko ed sika so maabig, tan gawaen ko so binim a singa saray buer na dayat, ya ag-ira nabilang lapu ed kinarakel.”​—Gen. 32:9-12.

⁶ Kayari na impanpikasi nen Jacob, sikatoy nanggawa na paraan pian naprotektaay pamilya to, tan naebatan so pikakasi to sanen namperdonaan la ra nen Esau. (Gen. 33:1-4) No basaen yon maong imay pikakasi nen Jacob, naimano yon agto labat kinmerew na tulong, noagta imbalikas to met so pananisia ed insipan a Bini tan say panangapresya ed abig na linawa ya impanengneng na Dios ed sikato. Kasin wala met iray ‘katatakotan’ yo? (2 Cor. 7:5) No ontan, ipanonot na samay kerew nen Jacob a napakepa na pikakasi so kapagaan. Balet, nepeg a diad pikakasim et agka labat onkerew, noagta ibalikas mo met so pananisiam.

Onkerew na Kakabatan

7. Akin et kinerew nen Moises a nakabatan to komon iray dalan nen Jehova?

⁷ Say pampilalek a napaliket si Jehova so nepeg a mamakiwas ed sikan onkerew na kakabatan. Nampikasi si Moises pian nakabatan to iray dalan na Dios. Oniay kerew to: “Nengneng mo Katawan [a Jehova], kuan mo ed siak so, Alam so sayan katooan [manlapud Ehipto] . . . Natan sirin, kerewen ko ed sika, no aromog ko so panangaro ed arapan mo, ipaimanom pa ed siak so saray dalan mo, . . . pian naromog ko so panangaro ed arap mo.” (Exo. 33:12, 13) Bilang resulta, inikdan na Dios si Moises na mas malaknab a kakabatan ed saray dalan To. Tan kaukolan nen Moises itan a kakabatan pian nidaulo to iray totoo nen Jehova.

8. Panon kan minabang sano dalepdepen moy 1 Arari 3:7-14?

⁸ Onia met so impikasi nen David: “Iparungtal  mo ed siak so saray dalan mo, O Jehova.” (Sal. 25:4) Say anak nen David a si Solomon et kinmerew ed Dios na pakatalos odino kakabatan pian nasumpal to iray kimey to bilang Ari ed Israel. Aliketan si Jehova ed pikakasi nen Solomon, kanian aliwan samay kinerew to labat so inter na Dios noagta pati kayamanan tan galang. (Basaen so 1 Arari 3:7-14.) No akaawat ka na saray pribilehyo a liknaen mon agmo sarag a gawaen, manpikasi pian nawalaan kay kakabatan tan mansiansia kan mapaabeba. Diad ontan et tulongan ka na Dios a nawalaan na pikakabat tan onkiwas tekep na kakabatan. Nakaukolan mo iraya pian nagawaan mo ray responsabilidad mo ed duga tan maaron paraan.

Impapuson Manpikasi

9, 10. Antoy naaralan tayo ed samay impapuson pikakasi nen Solomon sanen indedika imay templo?

⁹ Pian naebatan so pikakasi, nepeg a manlapu itan ed puso. Diad 1 Arari kapitulo 8, nabasa so impapuson pikakasi nen Solomon diad arap na saray nandaragup ya Israelita sanen indedika so templo nen Jehova diad Jerusalem nen 1026 B.C.E. Indaydayew nen Solomon so Dios sanen niiyan la’d Sankasantosan a Pasen imay kaban na sipan tan napno so templo na lurem nen Jehova.

¹⁰ Imanoen pa no panon ya impabitar nen Solomon a nalalanor so puso diad panagpikasi. Binidbir to a si Jehova labat so makaamta no antoy walad puso na sakey a too. (1 Ara. 8:38, 39) Ipapanengneng met na pikakasi to a say nankasalanan et walaan na ilalo no ‘manpataoli ed Dios diad masimoon a puso.’ No bilang ta saray totoo na Dios et daegen na saray kalaban da, dengelen nen Jehova iray pikakasi ra no sigpot-puso iran onasingger ed sikato. (1 Ara. 8:48, 58, 61) On, nepeg ya impapuso iray pikakasi tayo.

No Panon a Napaaligwas na Salmos so Kalidad na Pikakasim

11, 12. Antoy naaralan tayo ed pikakasi na samay Levita ya agmakaonla ed templo na Dios?

¹¹ Say panaral ed Salmos et mamaaligwas ed kalidad na pikakasim tan ontulong ed sikan manilalo ya ebatan iratan na Dios. Imanoen pa so inkamaanos na samay Levita ya akautibo. Anggaman agto makaonla ed templo nen Jehova, oniay inkanta to: “Akin et onia lay paneermen ko? Akin et mapalaloy kagogonigon ko? Say Dios so panilaloan ko, tan sikato lamet so idayew ko, say manangilaban ko tan Dios ko.”​—Sal. 42:5, 11; 43:5, Maung a Balita.

¹² Antoy naaralan tayo ed sayan Levita? Sano napriso itayo lapud inkatunong tan sirin et agmakapilimog ed saray agagi, maanos a manilalo ed ikiwas na Dios. (Sal. 37:5) Nodnonot moy liket mo ed apalabas iran serbisyom tan ipikasim a makapansungdo ka komon legan a ‘maniilalo ka ed Dios’ a napilimogan mo lamet iray agagi.

Manpikasi Tekep na Pananisia

13. Unong ed Santiago 1:5-8, akin a nepeg itayon manpikasi tekep na pananisia?

¹³ Antokaman so sirkumstansyam, lawas a manpikasi tekep na pananisia. No nasusubok so katooran mo, iyaplikam imay simbawa na disipulo a si Santiago. Onasingger ed si Jehova diad pikakasi, tan agmo panduaruwaan a sarag ton iter so kakabatan a nakaukolan mo pian nasungdoan itan a subok. (Basaen so Santiago 1:5-8.) Amta na Dios iray subok a sasagmaken mo. Iwanwan tan ligliwaen to ka panamegley na espiritu to. Tekep na sigpot a pananisia et ibalikas mo’d sikato so walad utel na pusom, ya ‘agkan balot manduaruwa.’ Awat mo so panangiwanwan na espiritu na Dios tan say simbawa na Salita to.

14, 15. Akin a nibagan nampikasi tan kinmiwas si Ana tekep na pananisia?

¹⁴ Si Ana, a sakey ed saray duaran asawa na Levitan si Elkana, et nampikasi tan kinmiwas tekep na pananisia. Anggapoy anak nen Ana kanian sikatoy balbalawen na sakey nin asawa nen Elkana a si Penina, a walaan na saray anak. Sanen wadman ed tabernakulo si Ana, insipan to a no sikatoy nawalaan na anak, iter to itan ed si Jehova. Manggiwgiw so bibil to legan a manpipikasi, kanian inisip na Atagey a Saserdoten si Eli a sikatoy abuek. Sanen naamtaan nen Eli ya andi manaya, inkuan to ed si Ana: ‘Say Dios na Israel abobonan to komon so kerew mo.’ Anggaman ag-amta nen Ana so eksakton pansumpalan na kerew to, sikatoy nanilalon ebatan nen Jehova so pikakasi to. Kanian, ‘aliwa lan maermen so lupa to,’ tan agla agonigon.​—1 Sam. 1:9-18.

 ¹⁵ Ag-abayag et inyanak nen Ana si Samuel tan sanen apakso la, sikatoy impresenta nen Ana ed si Jehova parad sagradon serbisyo ed tabernakulo. (1 Sam. 1:19-28) Sano dalepdepen mo imay pikakasi nen Ana, napaaligwas mo iray dilin pikakasim. Tan natulongan ka na satan a namorian sarag mon labanan so ermen lapud makapagonigon a problema no manpikasi ka tekep na pananisian ebatan ka nen Jehova.​—1 Sam. 2:1-10.

16, 17. Antoy resulta na impanpikasi tan inkiwas nen Nehemias tekep na pananisia?

¹⁶ Say matunong a lakin si Nehemias a nambilay nen koma liman siglo B.C.E. et nampikasi tan kinmiwas tekep na pananisia. Oniay inyey-ey to: “O Katawan, pikasik ed sika, natan say layag mo ontalineng komon ed pikakasi na aripen mo, tan ed pikakasi na saray ariripen mo, a maliket ya ontakot ed ngaran mo; et paaligwasen mo komon, pikasik ed sika, so aripen mo ed sayan agew, tan iyabuloy mo ed sikato so panangasi ed pakanengneng na saya a laki.” Siopa iyan “laki”? Saya et say ari na Persia a si Artaxerxes, a panlilingkoran nen Nehemias bilang manag-awit na kopa to.​—Neh. 1:11.

¹⁷ Diad loob na pigaran agew et nampikasi si Nehemias tekep na pananisia sanen naamtaan ton saramay Judion nibulos manlapud inkakautibo ed Babilonia et ‘niiyan ed kairapan tan kababaingan tan say bakor na Jerusalem et nagba.’ (Neh. 1:3, 4) Mas ni nen say inilaloan nen Nehemias so ebat nen Jehova ed pikakasi to. Sikatoy inabuloyan nen Arin Artaxerxes ya onla ed Jerusalem pian ipaalagey lamet so bakor na satan. (Neh. 2:1-8) Ag-abayag et naapiger so bakor. Saray pikakasi nen Nehemias et naebatan lapud akasentro itan ed tuan panagdayew tan atekepan na pananisia. Ontan met kasi iray pikakasim?

Lawas Idayew tan Pisalamatan si Jehova

18, 19. Akin et nepeg a saray lingkor nen Jehova et mangidayew tan misalamat ed sikato?

¹⁸ Lawas tayon idayew tan pisalamatan si Jehova diad pikakasi. Dakel so rason tayo a gawaen itan! Singa bilang, indaydayew nen David si Jehova lapud ‘gloria na Panarian To.’ (Basaen so Salmo 145:10-13.) Ipapatnag kasi na saray pikakasim ya aapresyaen moy pribilehyon ipulong so Panarian nen Jehova? Say imbalikas na saray salmista et nayarin ontulong met ed sika ya impapuson ibalikas ed si Jehova ya aapresyaen mo iray aral, asemblea, tan kombension.​—Sal. 27:4; 122:1.

¹⁹ Say panamablim ed maapit a relasyon mo ed Dios so mamakiwas ed sikan impapuson ipikasi so oniaran balikas: “O Katawan, dia ed leet na saray nasyones kantaan ta ka. Ta say panangasim abalbaleg a sabien to so angga ed saray katawenan, tan say katuaan mo angga ed saray lurelurem. Nitandoro ka, O Dios, ed tagey na saray katawenan; say gloriam wala ed labas na amin a dalin.” (Sal. 57:9-11) Talagan makapaseseg irayan balikas! Agta miabobon ka a say ontan iran makapakiwas a balikas ed libro na Salmos et mamaaligwas ed kalidad na pikakasim?

Marespeton Mikasi ed Dios

20. Panon ya imbalikas nen Maria so respeto to ed Dios?

²⁰ Nepeg a napatnagan so respetom ed Dios diad saray pikakasim. Say marespeton pikakasi nen Maria kayarin tuloy na impakaamta to a sikatoy magmaliw ya ina na Mesias et mipara ed samay  pikakasi nen Ana sanen impresenta toy Samuel a manlingkor ed tabernakulo. Sankapatnagan so panamagalang nen Maria ed Dios diad sarayan salita to: “Itandoro na kamarerwak so Katawan, tan say espirituk nanliket ed Dios a Manangilaban ko.” (Luc. 1:46, 47) Napaaligwas mo met kasi so kalidad na pikakasim diad pangilaktip mo’d oniaran balikas? Agla pankelawan a say matakot ed Dios a si Maria so pinili pian magmaliw ya ina nen Jesus, say Mesias!

21. Panon a napatnagan ed saray pikakasi nen Jesus so respeto tan pananisia?

²¹ Marespeton nampikasi si Jesus tekep na sigpot a pananisia. Singa bilang, antis ton pinaoli si Lazaro et “intangay to so saray mata to tan inkuanto, Ama, misalamat ak ed sika ta dinengel mo ak. Tan amtak a sika dengelen mo ak lawas.” (Juan 11:41, 42) Ipapanengneng kasi na saray pikakasim so ontan a respeto tan pananisia? No aralen tayo imay marespeto a modelon pikakasi nen Jesus, naimano tayon inlaktip to so pamasantos ed ngaran nen Jehova, say isabi na Panarian To, tan say pakasumpal na linawa To. (Mat. 6:9, 10) Natan et ikonsideram pa met iray pikakasim. Kasin say manuna met ya ipipikasim et say Panarian nen Jehova, say pakasumpal na linawa to, tan say pamasantos ed ngaran to? Nepeg ya ontan.

22. Akin et makaseguro itayon ikdan itayo nen Jehova na pakpel pian iyabawag so maong a balita?

²² Lapud panamasegsegang tan subsubok, mabetbet a kalaktip ed saray pikakasi tayo so ikerew na tulong pian makpel a makapanlingkor ed si Jehova. Sanen ingganggan na Sanhedrin ira di Pedro tan Juan ya ontunda la ran ‘manbangat ed ngaran nen Jesus,’ siansia nin nambangat ira tekep na pakpel. (Gawa 4:18-20) Kayari na inkibulos da, imbaga ra ed saray agagi no anto so agawa. Insan amin ya akadngel et kinmerew na tulong ed Dios pian makpel dan nipulong so Salita to. Agaylay liket da sanen naebatan so pikakasi ra, lapud “napno ra ya amin na espiritu santo, et sinalita ra so salita na Dios a makmakpel”! (Basaen so Gawa 4:24-31.) Bilang resulta, dakel so nagmaliw a managdayew nen Jehova. Pabiskegen ka met natan na pikakasi pian makpel ya iyabawag so maong a balita.

Itultuloy Mon Paaligwasen so Kalidad Pikakasim

23, 24. (a) Manalambit na arum niran alimbawa a mangipapanengneng a say panaral moy Biblia et mamaaligwas ed kalidad na pikakasim. (b) Anto so gawaen mo pian napaaligwas so kalidad na pikakasim?

²³ Dakel niray alimbawa a mangipanengneng a say panagbasa tan panagaral ed Biblia et mamaaligwas ed kalidad na pikakasim. Nayarin diad pikakasim et bidbiren mon say “panangilaban [et] manlapu ed kinen Jehova,” a singa ginawa nen Jonas. (Jon. 2:1-10) No nagogonigon ka lapud seryoson kasalanan tan kinmerew kay tulong na saray elder, saray liknaan ya imbesngaw nen David et ontulong ed sikan ibalikas met so panagbabawim diad personal a pikakasim. (Sal. 51:1-12) Walaray pankanawnawan nidayew mo si Jehova ed saray pikakasim, a singa ginawa nen Jeremias. (Jer. 32:16-19) No manaanap kay magmaliw a kapareha, say panaral ed pikakasin akarekord ed Esdras kapitulo 9, tekep na personal ya ikerew mo’d si Jehova, so mamabiskeg ed determinasyon mon tuloken so ganggan to a ‘miasawa lambengat dia ed linawa na Katawan.’​—1 Cor. 7:39; Esd. 9:6, 10-15.

²⁴ Itultuloy mon basaen, aralen tan sukimaten so katuaan a walad Biblia. Anapen iray punton nilaktip mo ed pikakasim. Nayarin usaren mo irayan Makasulatan a punto ed saray kerew tan pikakasim a kalaktip toy pisasalamat tan panangidayew. Seguradon mas onapit so relasyon mo ed si Jehova no paaligwasen moy kalidad na pikakasim panamegley na panagaral na Biblia.

Panon Yon Ebatan?

• Akin a kaukolan tayon anapen tan tumboken so panangiwanwan na Dios?

• Anto so mamakiwas ed sikatayon manpikasi parad kakabatan?

• Panon a napaaligwas na libro na Salmos so kalidad na pikakasi tayo?

• Akin a manpikasi tayo tekep na pananisia tan respeto?

[Tepetepet Parad Panagaral]

[Litrato ed pahina 8]

Kinerew na aripen nen Abraham so panangiwanwan na Dios. Sika ey?

[Litrato ed pahina 10]

Say Panagdayew na Pamilya et mamaaligwas ed kalidad na pikakasi yo