Pablien so Betang Mo ed Kongregasyon

“Inyan na Dios diad laman so kada sakey ed saratan a kabiangan, unong ed panliketan to.”​—1 COR. 12:18, NW.

1, 2. (a) Antoy mangipapatnag ya amin ed kongregasyon et walaan na makanan betang? (b) Antoran tepet so pantongtongan tayo ed sayan artikulo?

NANLAPU la’d panaon na bansan Israel nensaman, say kongregasyon so uusaren nen Jehova pian iwanwan tan asikasoen so espiritual a pankaukolan na totoo to. Singa bilang, sanen tinalo na saray Israelita so syudad na Ai, “binasa [nen Josue] so amin a salsalita na ganggan, say bendisyon tan say ayew, unong na amin a wala a nisulat ed libro na ganggan . . . ed arap na amin a dagup [odino, kongregasyon] na Israel.”​—Jos. 8:34, 35.

² Nen inmunan siglo C.E., imbaga nen apostol Pablo ed Kristianon elder a si Timoteo a say Kristianon kongregasyon et “sankaabungan na Dios” tan “lusek tan seklang na katuaan.” (1 Tim. 3:15, NW) Say “sankaabungan” na Dios natan et say sankamundoan ya impanaagi na saray tuan Kristiano. Diad kapitulo 12 na unonan pinuyanan a sulat nen Pablo ed saray taga Corinto, inkompara to so kongregasyon ed laman na too. Imbaga to ya anggaman kada kabiangan na laman et walaan na nanduruman usar, amin da et makana. Insulat nen Pablo ya “inyan na Dios diad laman so kada sakey ed saratan a kabiangan, unong ed panliketan to.” Indanet to ni ingen a “saray kabiangan na  laman ya iisipen tayon agtanto mapagalang et mas lalon papagalangan tayo.” (1 Cor. 12:18, 23, NW) Kanian, say betang na sakey a maptek a too ed sankaabungan na Dios et aliwan mas maabig odino mas abebbeba nen say betang na arum a matoor a Kristiano. Noagta, nandumaan labat so betang na balang sakey. Panon tayo sirin a napabli so betang tayo ed uksoyan na Dios? Antoray bengatlan makaapekto ed betang tayo ed kongregasyon? Tan panon tayon ‘nipatnag ed amin so iyaaligwas tayo’?​—1 Tim. 4:15.

Panon Tayon Napabli so Betang Tayo?

3. Antoy sakey a paraan pian nipanengneng a papablien tayoy betang tayo ed kongregasyon?

³ Say sakey a paraan pian nipanengneng a papablien tayoy betang tayo ed kongregasyon et say sigpot a pikoopera ed “matoor tan makabat ya aripen” tan ed Mananguley ya Ulop a mangirerepresenta ed satan. (Basaen so Mateo 24:45-47.) Kaukolan ya usisaen tayo so reaksion tayo ed saray instruksion a naaawat tayo ed aripen a klase. Singa bilang, diad apalabas et akaawat tayo na saray direktan instruksion ed panangawes, panag-ayos, panagligliwaan, tan pasakbay sumpad lingon panangusar ed Internet. Kasin maap-apit tayon tutumboken irayan maabig a simbawa pian nasalimbengay espiritualidad tayo? Panon to met imay ipapaseseg dan pakawalaan na regular ya eskedyul parad panagdayew na pamilya? Kasin impapuso tayo itan a bilin tan angigana tayoy sakey a labi parad satan? No andian tayo ni na asawa, kasin walay eskedyul tayo parad personal a panagaral na Biblia? Bendisyonan nen Jehova so balang sakey ed sikatayo tan say pamilya tayo no tumboken tayo so panangiwanwan na aripen a klase.

4. Antoy nepeg tayon ikonsidera sano manggawa na personal iran desisyon?

⁴ Nayarin ikatunongan na arum a say panagpili na panagligliwaan, panangawes tan panag-ayos et personal a desisyon. Balet, parad sakey a dedikadon Kristiano a mamapabli ed betang to ed kongregasyon, saray desisyon et nepeg ya aglabat akadepende ed personal a panlabayan. Kaukolan a say nagkalalo lan ikonsidera et say panmoria nen Jehova ya impaamta to panamegley na Salita to, say Biblia. Say mensahe na satan et nepeg ya onkanan ‘silew ed saray sali tayo, tan liwawa ed basbas tayo.’ (Sal. 119:105) Maabig met no ikonsidera tayo no panon a naapektoan na saray desisyon tayo so ministeryo tayo tan arum a totoo, balanglan diad loob odino paway na kongregasyon.​—Basaen so 2 Corinto 6:3, 4.

5. Akin a nepeg tayon paliisan so pakawalaan na agmapasakop ya awawey?

⁵ Say ‘espiritu a natan et onkukurang ed saray anak na kasusumpa’ et kasmak lan tuloy a singa say dagem a susungapen tayo. (Efe. 2:2) Nayarin naimpluensyaan itayo na satan ya espiritu pian isipen ya agtayo la kaukolan so panangiwanwan na organisasyon nen Jehova. Seguradon agtayo labay so magmaliw a singa si Diotrefes, ya ‘agto inawat si apostol Juan’ tekep na respeto. (3 Juan 9, 10) Kaukolan a paliisan tayoy pakawalaan na agmapasakop ya awawey. Diad salita man odino kiwas tayo, komon ta agtayon balot kukuestionen so aripen a klase ya uusaren nen Jehova. (Num. 16:1-3) Imbes, nepeg tayon pablien so pribilehyon mikoopera ed sikara. Tan agta manepeg labat ya ontulok tan manpasakop itayo met ed saray mangidadaulo ed kongregasyon tayo?​—Basaen so Hebreos 13:7, 17.

6. Akin a nepeg tayon usisaen so kipapasen tayo?

⁶ Say sakey nin paraan pian nipanengneng a papablien tayoy betang tayo ed kongregasyon et diad pangusisan maong ed kipapasen tayo tan ed panggaway anggaay nayarian a ‘nigloriay ministeryo tayo’ tan pagalangan si Jehova. (Roma 11:13, NW) Walaray nanregular payunir, tan arum so manlilingkor bilang misionero, ombiabiahen manangasikaso, tan membro na sankamundoan a pamilyan Bethel. Dakel ya agagin lalaki tan bibii so ontutulong ed panagpaalagey na Kingdom Hall. Ontan met, gagawaen na karaklan ed saray lingkor nen Jehova  so anggaay nayarian da pian naasikasoy espiritual a pankaukolan na pamilya ra tan sigpot a makapibiang ed ministeryo kada simba. (Basaen so Colosas 3:23, 24.) Matalek itayo a no mabulos, sigpot-kamarerwa, tan sankaabigan so panaglingkor tayo ed Dios, talagan walay betang tayo ed organisasyon to.

No Antoray Makaapekto ed Betang Tayo

7. Ipaliwawa no panon a saray kipapasen tayo et makaapekto ed betang tayo ed kongregasyon.

⁷ Importantin usisaen a maong iray kipapasen tayo lapud say betang tayo ed kongregasyon et akadepende ed no antoy sarag tayon gawaen tan ed no antoy niyabuloy ed sikatayon gawaen. Alimbawa, say betang na sakey ya agin laki ed kongregasyon et midumaan ed agin bii. Say edad, bunigas, tan arum ni ran bengatla so nayarin manitermina no anto ni nagawaan tayo diad panaglingkor ed si Jehova. “Say gayaga na saray tobonbalon lalaki sikato so biskeg da,” kuan na Uliran 20:29, tan “say kalimgasan na saray mamasiken sikato so ubanan ya ulo.” Nayarin mas dakel a kimey so nagawaan na saray mas ug-ugaw ni a membro na kongregasyon lapud wala ni ra’d kaksilan, balet ta nagugunggonaan met so kongregasyon ed kakabatan tan eksperiensya na saray maedad la. Kaukolan tayo met a tandaan ya antokaman a panaglingkor a gagawaen tayo’d organisasyon nen Jehova et akadepende ed “grasya” odino agnaparaan a kaabigan na Dios.​—Roma 12:6-8.

8. Akin a say pilalek et apektaen to so nagawaan tayo ed kongregasyon?

⁸ Wala ni sakey a bengatlan manitermina ed betang tayo ed kongregasyon, a singa napatnagan ed sayan alimbawa: Walay sanagin bii a parehon nangraduar ed haiskul. Nampara so kipapasen da. Ginawa na atateng da so anggaay nayarian da pian napaseseg iran manregular payunir kapangraduar da. Samay sakey et nampayunir, balet samay sakey et nantrabaho a full-time. Akin et nandumaay desisyon da? Lapud nandumaan so pilalek da. Ginawa na balang sakey ed sikara no antoy labay to. Agta tua a no antoy labay tayo et sikatoy gagawaen tayo? Kanian, kaukolan tayon nonoten a maong no antoy labay tayon gawaen no nipaakar ed panaglingkor ed Dios. Sarag tayo ni kasin palaknaben itan, anggaman mankabaliksan iya na pangiyareglo ed saray kipapasen tayo?​—2 Cor. 9:7.

9, 10. Antoy nepeg tayon gawaen no anggapoy tanton pilalek tayo a palaknaben so panaglingkor tayo’d si Jehova?

⁹ Balet, panon to no mimiulop-ulop tayo labat ed kongregasyon tan anggapoy tanton pilalek tayo a palaknaben so panaglingkor ed si Jehova? Oniay inkuan nen Pablo diad samay sulat to ed saray taga Filipos: “Say Dios so mankimey ed loob yo ed panlabay tan say panggawa, ed maong a kaliktan to.” On, sarag itayon pakiwasen nen Jehova pian ‘labayen tan gawaen’ so linawa to.​—Fil. 2:13; 4:13.

¹⁰ Agta manepeg labat sirin ya ipikasi tayo’d si Jehova a pakiwasen to itayon pilaleken so panggaway linawa to? Ontan a mismo so ginawa nen Arin David. Impikasi to: “Iparungtal mo ed siak so saray dalan mo, O Jehova; ibangat mo ed siak so saray basbas mo. Itonton mo ak ed katuaan mo, tan ibangat mo ak, ta sika so Dios na kilalaban ko; mantalaran ak ed amin ya agew.” (Sal. 25:4, 5) Nagawaan tayo met so ontan diad pampikasi tayo’d si Jehova a tulongan to itayon pilaleken a gawaen iray bengatlan makapaliket ed sikato. Sano dadalepdepen tayo a talagan papablien nen Jehova a  Dios tan say Anak to so panaglingkor tayo, nagkalalo tayo iran naaapresya. (Mat. 26:6-10; Luc. 21:1-4) Satan a panangapresya so mamakiwas ed sikatayon mikasi ed si Jehova pian pilaleken tayoy onaligwas ed espiritual. Nepeg tayon aligen so maabig ya awawey ya impanengneng nen propetan Isaias. Sanen nadngel to so tepet nen Jehova ya: “Siopa so ibakik, tan siopa so onla a nipaakar ed sikatayo?” inmebat so propeta: “Wadia ak; ibaki mo ak.”​—Isa. 6:8.

No Panon Itayon Onaligwas

11. (a) Akin a nakaukolan a dampoten na saray agagin lalaki iray responsabilidad ed organisasyon? (b) Panon a nadampot na sakey ya agin laki iray pribilehyo?

¹¹ Nen 2008 a serbisyon taon et walay 289,678 ya abautismoan ed sankamundoan. Ipapanengneng na saya a talagan kakkaukolan iray agagin lalaki a mangidaulo. Panon so nepeg ya ikiwas na saray agagin lalaki ed sayan pankaukolan? Nepeg a maseseg dan dampoten iray kualipikasyon a walad Kasulatan parad saray ministeryal a lingkor tan elder. (1 Tim. 3:1-10, 12, 13; Tito 1:5-9) Panon a nipanengneng na agin laki a pampepelengan ton dampoten iratan a kualipikasyon? Diad aktibon pibiang ed ministeryo, diad maseet a pangasikaso ed saray asainmin to ed kongregasyon, diad pansagpot ton mamaaligwas ed kalidad na saray komento to ed aral, tan diad pangiyansakit to ed saray agagi. No gawaen to iratan, ipapatnag ton papablien toy betang to ed kongregasyon.

12. Panon a nipanengneng na saray kalangweran so seseg da ed katuaan?

¹² Pian onaligwas ed espiritual, antoy nagawaan na saray kalangweran ya agagin lalaki, nagkalalo la iramay tin-edyer ni labat? Nepeg iran mansagpot a manaral na Kasulatan pian nawalaan iray ‘karunongan tan maespiritun pakatalos.’ (Col. 1:9) Say makulin panaral ed Salitay Dios tan aktibon pibibiang ed saray aral et seguradon ontulong ed sikaran onaligwas. Sarag met na saray tobonbalon lalaki a dampoten iray kualipikasyon pian makaloob ed “baleg a puerta a mangitonton ed kimey” parad nanduruman sigpot-panaon a serbisyo. (1 Cor. 16:9, NW) Talagan makapnek so bilay no iyuna tayoy panaglingkor ed si Jehova, tan manresulta iya ed dakerakel a bendisyon!​—Basaen so Eclesiastes 12:1.

13, 14. Diad antoran paraan a nipanengneng na agagin bibii a papablien day betang da ed kongregasyon?

¹³ Nipanengneng met na agagin bibii a papablien day pribilehyo ran mibiang ed samay kasumpalan na propesiya a walad Salmo 68:11. Ditan et oniay nabasa tayo: “Say Katawan iter to so salita; saray bibii a mangipapaamta na saray balbalita, sikara . . . so sakey ya abalbaleg ya ulop.” Say sakey ed saray importantin paraan a nipanengneng na agagin bibii so apresasyon ed betang da’d kongregasyon et diad pibiang da’d kimey a panaggaway babangatan. (Mat. 28:19, 20) Kanian, no saray agagin bibii et sigpot a mibibiang ed ministeryo tan mabulos a  mansasakripisyo parad satan a kimey, papaneknekan da a talagan papablien day betang da’d kongregasyon.

¹⁴ Diad samay sulat nen Pablo ed si Tito, oniay inkuan to: ‘Komon ta saray akukulaw masimpit ira ed panagbilay da, managbangat iray kaabigan, ya ibangat da so saray malangwer a bibii ya aroen da so saray kaasawaan da, ya aroen da so saray anak da, a mankalakal ira, malinis ira, maasikaso ra ed abung, makuli ra, pauleyan ira ed saray asawa ra, pian agnaayew so salita na Dios.’ (Tito 2:3-5) Talagan maabig ya impluensya ed kongregasyon iray matatken ed espiritual ya agagin bibii! No respetoen da iray agagin lalaki a mangidadaulo tan no makabat iray desisyon da no nipaakar ed panangawes, panag-ayos, tan panagligliwaan, maabig so ipapanengneng dan alimbawa ed arum tan papaneknekan dan papablien dan maong so betang da ed kongregasyon.

15. Anto so nayarin gawaen na agagin bii ya andiay asawa pian nalabanan day ermen da?

¹⁵ No maminsan, nayarin nairapan so agin bii ya andian na asawa a pablien so betang to ed kongregasyon. Oniay nalilikna na sakey ya agin ontan so kipapasen to: “Walaray pankanawnawan talagan maermen so bilay na andiay-asawa.” Sanen sikatoy tinepetan no panon ton tatalonaan iyan situasyon to, inkuan to: “Say pikakasi tan panagaral so tinmulong ed siak pian napablik lamet so pasen ko ed kongregasyon. Inaral ko no panon ak a momoriaen nen Jehova. Insan panggugunaetan koy ontulong ed saray agagi ed kongregasyon. Tinmulong iya pian agko la pinonot so situasyon ko.” Unong ed Salmo 32:8, inkuan nen Jehova ed David: “Simbawaen ta ka a sinenengneng so matak ed sika.” On, iyaansakit nen Jehova so balang sakey ed saray lingkor to, laktip la ray agagin bibii ya andiay asawa. Tutulongan nen Jehova so amin a lingkor to a napabli so betang da ed kongregasyon.

Lawas Pablien so Betang Mo!

16, 17. (a) Akin a say impangawat ed imbitasyon nen Jehova so sankaabigan lan desisyon a ginawa tayo? (b) Panon tayon napansiansia so betang tayo ed organisasyon nen Jehova?

¹⁶ Maaron inyasingger nen Jehova so kada lingkor to ed sikato. Inkuan nen Jesus: “Anggapo so too a makadago ed siak, likud no say Ama ya angibaki ed siak sikato so iyasingger to.” (Juan 6:44) Nonot yo pa labat a diad binilyon a totoo ed dalin et iimbitaan itayon mismo nen Jehova pian magmaliw a kabiangan na organisasyon to. Say impangawat tayo’d sayan imbitasyon so sankaabigan lan desisyon a ginawa tayo. Saya so rason no akin a walaan na gagala tan kabaliksan so bilay tayo. Tan agaylan liket tan inkapnek so nalilikna tayo lapud walaan itayo na betang ed kongregasyon!

¹⁷ ‘Jehova, inarok so panayam ed abung mo,’ so inkuan na salmista. Inkanta to ni: “Say salik manalalagey ed sakey a mapatar a pasen; dia ed saray muyong igalang ko si Jehova.” (Sal. 26:8, 12) Say tuan Dios et angigana na pasen parad balang sakey ed sikatayo diad organisasyon to. No lawas tayon tumboken iray teokratikon instruksion tan no lanang itayon okupado diad panaglingkor ed Dios, napansiansia tayo so mablin betang tayo ed uksoyan nen Jehova.

Kasin Nanonotan Yo?

• Akin a nibagan amin a Kristiano et walaan na betang ed kongregasyon?

• Panon tayon nipanengneng a papablien tayoy betang tayo ed organisasyon na Dios?

• Antoray bengatlan makaapekto ed betang tayo ed kongregasyon?

• Panon a nipatnag na saray kalangweran tan adulto lan Kristiano a papablien day betang da ed uksoyan na Dios?

[Tepetepet Parad Panagaral]

[Saray litrato ed pahina 16]

Panon a nadampot na agagin lalaki iray pribilehyo ed kongregasyon?

[Litrato ed pahina 17]

Panon a nipanengneng na agagin bibii a papablien day betang da ed kongregasyon?