Sakey ya Ugaw a Maiter

NAMBULON so siameran taon ya ugaw a biin taga Brazil a pankaduaen so atipon ton kuarta​—18 a dolyar tan 25 a dolyar. Impelag to imay 18 a dolyar ed kahon parad kontribusyon a walad Kingdom Hall pian nausar ed gastos na kongregasyon. Insan to balet impawit imay 25 a dolyar ed sangan opisina na saray Tasi nen Jehova, a tekep toy antikey a sulat. Oniay inkuan to: “Labay kon idonasyon iya parad sankamundoan a kimey. Labay kon natulongan so dakel ya agagi ed interon mundo diad panagpulong na maong a balita. Iter ko iya lapud inad-arok si Jehova.”

Sayan ugaw et imbangat na saray atateng to ya importante so panggaway anggaay nayarian parad kimey a panagpulong na Panarian. Impurek da met ed sikato a kaukolan ton ‘igalang si Jehova panamegley na saray kayarian to.’ (Uli. 3:9) Singa sayan ugaw, komon ta amin tayo et manseseg parad Panarian, dia man ed lugar tayo tan diad sankamundoan!