Dakel so Kimey Ingen Ta Maliket a Manlilingkor

LABAY nen Jehova a magmaliw kan maliket. (Sal. 100:2) Bilang lingkor to, nayarin dakel met so kimey mo. Ompan aliwan ontan so situasyon mo sanen balo ka ni’d katuaan, balet natan et nayarin liknaen mon okupado kan maong lapud sekular tan espiritual iran responsabilidad. Nayarin tetelen mo ni ingey inkasika sano agmo nagawaan so amin a labay mon gawaen. Panon kan magmaliw a balanse tan panon a mansiansian walad sika so “liket nen Jehova”?​—Neh. 8:10.

Manbibilay ka ed mairap a panaon tan dakel iray pakakadesdesan mo, kanian kaukolan a magmaliw kan organisado. No nipaakar ed saya, oniay matukoy a pinuyanan a simbawa nen apostol Pablo: “Nengneng yo sirin a tinekepan na panlikas no panon so panakar yo, aliwan singa andi kalakal, noag ingen singa makalakal; ya anamoten yo so panaon, ta saray agew sikara so mauges.”​—Efe. 5:15, 16.

Base ed satan a makabat a simbawa, panon kan makapanggawa na realistiko iran kalat tan panon mon nabalanse so personal a panagaral, panangasikaso’d pamilya, panagpulong, trabaho, tan arum nin importantin kimey?

Nanonotan mo ni kasi imay aliknam a liket sanen indedikam so sarilim ed Dios tan abautismoan ka? Malikeliket ka lapud naamtaan moy nipaakar ed si Jehova tan saray gagala to. Nayarin pigaran bulan kan nanseet a nanaral pian nagamoran mo itan a pakatalos tan liket. Balet ta seguradon abawbawim so impansagpot mo. Anguman so bilay mo lapud satan ya impanaral mo.

Pian mansiansia kan maliket, nepeg a tuloytuloy kan mangan na espiritual a tagano. No nanairapan kan ipanaon so pambasa tan panaral na Biblia, nengneng mon maong so eskedyul mo. No manaral tan mandalepdep ka anggan pigaran minuto labat ed kada agew, mas onapit ka ed si Jehova, tan lapud satan et mas naliknam so liket.

Maslak ed saray lingkor na Dios et babawasan day panaon ya uusaren da ed saray agtanto importantin bengatla pian usaren ed saray mas makanan kimey. Tepetan moy inkasika, ‘Kaunongan  karakel so uusaren kon panaon ed panagbasa na sekular iran magasin odino dyaryo, panagbantay na TV, pandengel ed musika, odino panagrelaks?’ Nayarin makapaliket irayan gawaen, balet kaukolan a balanse itayo. (1 Tim. 4:8) No namoriam a say problema manaya et say panangusar mo’d panaon mo, manggawa kay paraan pian ni-adjust moy eskedyul mo.

Si Adam, sakey a padre-de-pamilya a taloray anak to tan sakey ya elder, et oniay inkuan ton akatulong ed sikato: “Ginawak so anggaay nayarian kon manbilay a simpli. Pinaliisan ko ray panagrelaks tan kagawaan a manguupot na panaon. Agto labay ya ibagan sisibletan koy sarilik. Noagta, mas panliliketan ko ray simplin panagligliwaan.”

No dalepdepen mo ray maabig a resulta na saray desisyon mo, napasimbaloy liket mo tan natulongan kan mansiansian positibo. Singa bilang, si Mariusz, sakey ya elder a taloray anak to so angikuan: “Nagmaliw ak a positibo sanen nanaral ak na Biblia. Diad pana-panaon et makakaeksperiensya ak nin siansiay problema, a dakel ed saratan et si Jehova labat so makaamta. Aapresyaen koy tulong to, tan maliket ak ya onnenengneng ed arapen lapud satan.”

Singa nanengneng tayo’d situasyon nen Mariusz, agto labay ya ibagan no positibo ka et naandi lan amin so pakakaaburidoan mo. Balet ontulong itan pian onlemew so liknaan mo tan mas nasarag mo iray problema. Oniay nabasa tayo: “Amin iray agew na masegsegang sikara so mauges; balet say magayaga so puso to walaan a naynay na liket.” (Uli. 15:15) Dalepdep mo met so aro ya impatnag la na Dios ed sika. Satan so mamaelet na arom ed sikato tan mangarum na liket mo.​—Mat. 22:37.

Mas maliket so pamilya no iyuuna day Jehova tan say linawa to. Ontan met, nabawasan so tensyon tan mas onelet so ulopan da no ipatnag da iray Kristianon kualidad. Diad ontan, niwalay deen tan pankakasakey ed pamilya.​—Sal. 133:1.

No say pamilya et sankakaiban mibiang ed espiritual iran kimey, mas nalikna day tuan liket. Oniay imbaga nen Mariusz: “Papablien ko iramay panaon a sankakaiba kamin pamilya. Baleg a tulong so akulaw ko. Anggad posible, lanang kon kaiba ed panagpulong, panaglinis na istadyum antis na kombension, tan sano manpapaliwawa ak ed arum a kongregasyon. Napapaseseg ak ed suporta to.”

Ibabaga na Kasulatan a saray Kristiano et nepeg dan taryaan so pamilya da na materyal iran pankaukolan. (1 Tim. 5:8) Balet no nauupot lay panaon tan biskeg mo ed trabahom, nayarin samsamen to lay liket mo’d panaglingkor ed Dios. No ontan so situasyon mo, manpikasi ka’d si Jehova. (Sal. 55:22) Walaray nandesisyon a mananap na arum a trabaho pian niyuna day Panarian na Dios. Mas importante so espiritual iran bengatla, kanian nepeg a say sakey a Kristiano et agto abuloyan a nibaliwala iratan lapud trabaho a baleg so sueldo balet ta manguupot na panaon tan biskeg.​—Uli. 22:3.

Makatulong no ilistam so amin a bentaha tan disbentaha na looban mon trabaho odino anggan say trabahom natan. Siempre, natural labat a say labay tayo et marakep a trabahon baleg so sueldo. Ingen, kasin agmakakasbel so trabahom ed espiritualidad na pamilyam? Ikonsideram a maong so amin ya aspekto, tan say iprayuridad mo no mandesisyon ka la et say relasyon mo’d si Jehova.

No say trabahom natan et mangaamper ed sikan onaligwas ed espiritual, kaukolan mon umaney kipapasen mo. Dakel a Kristiano so nanggaway baleg a pananguman pian niyuna day espiritual iran bengatla. Oniay imbaga na sakey ya agin taga Poland: “Talagan kinaukolan kon taynan so kompanyan pantratrabahoan ko lapud lanang ak a walad biahe. Anggapoy malaem a panaon ko parad espiritual iran bengatla tan parad pamilyak.” Nananap iyan agi na trabahon agla mangaalay dakel ya oras tan biskeg to.

Panliketan so Itulong ed Arum

Imbaga nen Jesus a “mas makapaliket so mangiter nen say mangawat.” (Gawa 20:35, NW) Dakel so pankanawnawa tayon mangiter. No maminsan, magenap la so makaaron iyimis mo, pipasamano, odino impapuson pisasalamat ed pansasagpot na sakey ya agi pian naliketan kayon dua.

Oniay impaseseg nen apostol Pablo ed saray kapara ton Kristiano: “Ligliwa yo iramay  maneermen, tulongan yo iramay makapuy.” (1 Tes. 5:14, NW) Ompan say pakalikna na saray maneermen et agda la nayarian iray problema ra. Labay mo kasi makatulong ed sikara? No naimanom a naaandi lay liket na sakey ya agim ed panaglingkor to ed Jehova, paseseg mo. No ontan so gawaen mo, napaseseg ka met. Tua, walaray probleman agsarag a solusyonan na too. Balet, sarag mon ipalikna’d agim a sikatoy natatalosan mo tan paseseg mon manilalo ed napanmatalkan a suporta nen Jehova. Saramay manmamatalek ed Dios et agbalot nadismaya.​—Sal. 27:10; Isa. 59:1.

Say sakey nin makatulong et no ipilam ed panagpulong iramay nanaimanom a singa agla maliket. Sanen imbaki nen Jesus a manpulong iramay 70 disipulo et “sanderwa” ira. (Luc. 10:1) Agta onabobon kan akatulong itan pian napaseseg day sakey tan sakey? Labay mo met kasin aligen itan a paraan pian natulongan so arum diad ontan et nalikna da lamet so liket?

On, talagan dakel so rason no akin a naaaburido itayo, tan makatunongan met iratan. Balet, siansia nin oniay insimbawa nen Pablo: “Manggayaga kayo ed Katawan lawas. Kuan ko lamet, Manggayaga kayo.” (Fil. 4:4) Lapud inarom tan uunoren moy Dios, tan maseseg ka ed kimey ya inter to, makabkabaliksan so bilay mo. Satan so mamapaliket ed sika. Sakey ni, wadtan a lanang so tulong nen Jehova pian nasarag mo ray problemam tan saray pakakadesdesan mo.​—Roma 2:6, 7. 

Singa tayo la nanenengneng so sipan nen Jehova a balon mundo, ya asingsingger la. Seguradon dakdakel so bendisyon tan rason tayon manliket sano onsabi itan! (Sal. 37:34) Panggagayagaan tayo itan ya ilalo. Tan diad tua, anggan natan ni labat et dakdakel lay naaawat tayon bendisyon ed si Jehova. On, ‘makapanlingkor itayo ed Jehova tekep na liket.’​—Sal. 100:2.

[Diagram ed pahina 8]

(Parad aktual a format, nengnengen so publikasyon)

Nepeg a maong so pangapag moy panaon mo pian mansiansia kan maliket

PANAGRELAKS tan PANAGLIGLIWAAN

PANANGASIKASO’D PAMILYA

TRABAHO

KRISTIANON PANTITIPON

PERSONAL A PANAGARAL

PANAGPULONG

[Saray litrato ed pahina 10]

Tulongan so arum pian nalikna da lamet so liket