Ipatnag Yoy Iyaaligwas Yo

“Seetan mo so sarayan bengatla, sikara labat so arapen mo; pian say ibubunam [odino iyaaligwas mo] nipatnag komon ed saray ganagana.”​—1 TIM. 4:15.

1, 2. Antoran impormasyon so amta tayo ed impanugaw nen Timoteo tan antoy agawan pananguman sanen sikatoy manga 20 años?

SANEN ugaw ni Timoteo, sikatoy nanayam ed probinsya na Roma a Galacia, a tatawagen la natan a Turkey. Ditan et aporma so dakel a Kristianon kongregasyon pigaran dekada kayari impatey nen Jesus. Diad sarayan panaon, say ugaw nin si Timoteo, say nanay to, tan say bai to so nagmaliw a Kristiano tan aktibon membro na sakey ed saratan a kongregasyon. (2 Tim. 1:5; 3:14, 15) Diad onian kipapasen et seguradon nanggayagaan nen Timoteo so bilay to bilang sakey a kalangweran a Kristiano. Balet, biglan walay agawan pananguman.

² Agawa itan diad samay komaduan imbisita nen apostol Pablo ed lugar da. Diad saman et nayarin manga 20 años nen Timoteo. Legan na imbisita nen Pablo, a posiblin diad Listra, naimano to ya alay abig so ibabaga na saray agagi ditan nipaakar ed si Timoteo. (Gawa 16:2) Anggan kalangweran ni Timoteo, sikatoy angipatnag na inkatatken ed espiritual. Kanian, diad panangigiya na masanton espiritu, si Pablo tan say ulop na mamatatken diman et ‘intapew day lima da’ ed si Timoteo pian ikdan na nikabkabiig a kimey ed kongregasyon.​—1 Tim. 4:14; 2 Tim. 1:6.

3. Anton nikabkabiig a pribilehyo so naawat nen Timoteo?

³ Si Timoteo et akaawat na nikabkabiig ya imbitasyon. Sikatoy intagar nen apostol Pablo a manbiahen kaiba to. (Gawa 16:3) Nonot yo pa labat so impakasurprisa tan liket nen Timoteo! Diad ontumbok iran taon, nakaiba ton manbiahe si Pablo tan arum ni pian sumpalen so nanduruman asainmin ya impabtang ed sikato na saray apostol tan saray mamatatken. Binisita nen Pablo tan Timoteo iray nanduruman kongregasyon kanian saray agagi et apaseseg a maong ed espiritual. (Basaen so Gawa 16:4, 5.) Bilang resulta, si Timoteo et akabkabat na dakel a Kristiano lapud espiritual ya iyaaligwas to. Kayari manga samploy taon ya impaniba da nen Timoteo, oniay insulat nen apostol Pablo ed saray taga Filipos: ‘Anggapoy toon kaparay kalakal ko [a singa si Timoteo], a mangiyansakit a peteg ed kipapasen yo. Kabat yoy impakasalsali la ed sikato, a singa sakey ya ugaw a manlingkor ed ama, ontan so impiulop to ed siak a nanlingkor ed kikayat na ebanghelyo.’​—Fil. 2:20-22.

4. (a) Anton ambelat a responsabilidad so inmatalek ed si Timoteo? (b) Antoray apalesan tepet lapud samay imbaga nen Pablo a walad 1 Timoteo 4:15?

⁴ Sanen sinmulat si Pablo ed saray taga Filipos, saman met imay panaon ya inmatalek to’d si Timoteo so ambelat a responsabilidad​—say panuro na mamatatken tan ministeryal iran lingkor. (1 Tim. 3:1; 5:22) Malinew sirin a si Timoteo et nagmaliw a napanpiyaan tan napandependian a Kristianon manangasikaso. Ingen diad satan met lanlamang a sulat, sinimbawa  nen Pablo si Timoteo ‘ya ipatnag to komon so [iyaaligwas to] ed saray ganagana.’ (1 Tim. 4:15) Agta makapadinayew la so iyaaligwas ya impatnag nen Timoteo? Kanian, anto kasi kabaliksan na sarayan salita nen Pablo, tan panon itayon nagunggonaan ed sayan simbawa to?

Ipatnag Iray Espiritual a Kualidad

5, 6. Panon a niiyan ed peligro so espiritual a kalinisan na kongregasyon ed Efeso, tan antoy nagawaan nen Timoteo pian naprotektaan itan?

⁵ Nengnengen tayo pay konteksto na 1 Timoteo 4:15. (Basaen so 1 Timoteo 4:11-16.) Antis irayan insulat nen Pablo, sikatoy linma’d Macedonia balet ta pinatilak toy Timoteo ed Efeso. Akin? Ditan et walaray manederal ed pankakasakey na kongregasyon diad pangikakayat na saray palson bangat. Kanian kaukolan a protektaan nen Timoteo so espiritual a kalinisan na kongregasyon. Panon ton nagawaan itan? Say sakey a paraan et say pangipanengneng toy maabig ya alimbawa.

⁶ Insulat nen Pablo ed si Timoteo: “Sika komon so uliran ed saray manisia, dia ed salita, dia ed panagbilay, dia ed aro, dia ed pananisia, dia ed kasimpitan.” Inyarum to ni: “Seetan mo so sarayan bengatla, sikara labat so arapen mo; pian say ibubunam [odino iyaaligwas mo] nipatnag komon ed saray ganagana.” (1 Tim. 4:12, 15) Say tutukoyen na sayan iyaaligwas et aliwan saray pribilehyo nen Timoteo ed kongregasyon noagta saray espiritual a kualidad to. Saya so klase na iyaaligwas a nepeg a pirawaten na amin a Kristiano.

7. Anto so iilaloan ed amin a Kristiano?

⁷ Singa ed panaon nen Timoteo, nanduruma met iray responsabilidad ed kongregasyon natan. Walaray manlilingkor bilang elder odino ministeryal a lingkor. Say arum et payunir. Wala met iramay niasain bilang ombiabiahen manangasikaso tan misionero, tan say arum et manlilingkor ed Bethel. Saray elder et naiikdan na betang ed panagbangat, a singa diad saray asemblea tan kombension. Anggaman ontan, amin a Kristiano​—lalaki, bibii, o kalangweran man​—et sarag dan ipatnag so espiritual ya iyaaligwas. (Mat. 5:16) Diad tua, singa si Timoteo, anggan saray Kristianon walaan na nikaduman pribilehyo et iilaloan met a mangipatnag na espiritual iran kualidad ed amin a totoo.

Magmaliw ya Uliran ed Panagsalita

8. Antoy epekto na panagsalita tayo diad panagdayew tayo?

⁸ Say sakey ya aspekto a nepeg a napanuliranan si Timoteo et diad panagsalita. Panon tayon nipatnag so iyaaligwas tayo ed sayan pamaakaran? Nanengneng ed panagsalita tayo no anton klase itayo na too. Oniay matukoy ya imbaga nen Jesus: “Dia ed inkadaakan na puso say sangi mansalita.” (Mat. 12:34) Say agi nen Jesus ed ina a si Santiago et binidbir to met a baleg so epektoy panagsalita tayo diad panagdayew tayo. Insulat to: “No siopan too ed sikayo so mannonot ya ompasen a marelihyon, et agto pokpokan so dila to, noag ingen tilatilaan to so puso ton dili, say relihyon [odino panagdayew] na sayan too andi-kakanaan.”​—Sant. 1:26.

9. Diad antoran paraan a nepeg a napanuliranan so panagsalita tayo?

⁹ Say sakey a pakapatnagan na agagi no kaunongan lay inyaligwas tayo ed espiritual et diad panagsalita tayo. Kanian, imbes a mansalitay negatibo, mabanday, mabalaw, odino makapasakit, panggugunaetan na saray matatken ed espiritual a Kristiano so mansalitay positibo, makapaseseg, makatambayo, tan makaligliwa. (Uli. 12:18; Efe. 4:29; 1 Tim. 6:3-5, 20) No akaparaan itayon idepensa so ataragey iran estandarte na Dios tan ipaamta ed arum so pilalek tayon manbilay unong ed saratan, napatnagan so debosyon tayo ed Dios. (Roma 1:15, 16) Seguradon naimano na saray maptek-impanpuso so panagsalita tayo tan nayarin aligen day alimbawa tayo.​—Fil. 4:8, 9.

Uliran ed Panagbilay tan ed Kasimpitan

10. Akin et importante so pananisian aliwan mansimpisimpitan pian onaligwas ed espiritual?

¹⁰ Aliwa labat a say makapaseseg a panagsalita so kaukolan pian magmaliw a maabig ya  ehemplo so sakey a Kristiano. No dugay ibabaga na sakey a too balet aliway gagawaen to, nibagan sikatoy mansimpisimpitan. Pamilyar si Pablo ed pansimpisimpitan na saray Fariseo tan ed mauges a resulta na satan a kagagawa ra. Aliwa labat lan aminsan a pinanonotan toy Timoteo a manalwar ed ontan a pankunkunwari tan ag-inkamatua. (1 Tim. 1:5; 4:1, 2) Ingen ta aliwan mansimpisimpitan si Timoteo. Oniay nabasa tayo ed samay komaduan sulat nen Pablo ed si Timoteo: “Pinonot ko so pananisia a matua a wala ed sika.” (2 Tim. 1:5) Balet, siansia nin kaukolan ya ipatnag nen Timoteo ed arum a sikatoy talagan peteg a Kristiano. Nepeg a napanuliranan so panagbilay to.

11. Anto so insulat nen Pablo ed si Timoteo nipaakar ed kayamanan?

¹¹ Diad samay duaran sulat nen Pablo ed si Timoteo, sikatoy angiter na simbawa nipaakar ed nanduruman aspekto na panagbilay. Singa bilang, nepeg a paliisan nen Timoteo so materyalismo. Oniay insulat nen Pablo: “Say aro ed pilak sikato so sakey a lamot na saray amin a nengneng na mauges; sikato a sanen inaguman na saray arum, abalbalang ira ed pananisia, tan atalos ira na dakel a kaermenan.” (1 Tim. 6:10) Say aro ed kayamanan et tanda na kaleteyan ed espiritual. Balet, no say sakey Kristiano et kontento ed simplin bilay, basta ‘walay pantagano tan kawesen,’ nipapatnag toy iyaaligwas ed espiritual.​—1 Tim. 6:6-8; Fil. 4:11-13.

12. Panon tayon nipatnag so iyaaligwas tayo no nipaakar ed personal a kabibilay tayo?

¹² Sinalambit met nen Pablo ed si Timoteo ya importante a saray Kristianon bibii et ‘manpales na masimpit tan madangka.’ (1 Tim. 2:9) Alay abig ya alimbawa iray bibiin masimpit tan maalwar ed panagkawes tan panag-ayos da, ontan met ed arum nin aspekto na bilay da. (1 Tim. 3:11) Sayan prinsipyo et onaplika met ed Kristianon lalaki. Binilin nen Pablo iray manangasikaso a magmaliw a “maadia ed saray kagagawa [ra], maabig so panagnonot  [da], mauksoy.” (1 Tim. 3:2) No ipanengneng tayo irayan kualidad ed inagew-agew a kabibilay tayo, nipatnag tayo ed amin so iyaaligwas tayo.

13. Panon itayon magmaliw a napanuliranan ed kasimpitan a singa si Timoteo?

¹³ Nepeg a napanuliranan met si Timoteo ed kasimpitan. Sanen inusar nen Pablo iyan salita, say espisipikon tutukoyen to et nipaakar ed seksual a moralidad. Nepeg ya anggapon balot so nabalaw ed pidedeneng nen Timoteo lalo la ed saray bibii. Kaukolan ton ipasen iray ‘akukulaw a singa to ra ina, saray mamarikit a singa to ra agagi, diad amin a kasimpitan.’ (1 Tim. 4:12; 5:2) Anggano parad sakey et sekreto so panggagawa toy imoralidad, amta itan na Dios tan seguradon naamtaan lanlamang na arum. Balet, no say sakey a Kristiano et maabig iray gawa to, agmet iratan niyamot. (1 Tim. 5:24, 25) Amin tayo et walaan na pankanawnawan ipatnag so iyaaligwas tayo panamegley na kasimpitan tan diad kabibilay tayo.

Importante so Aro tan Pananisia

14. Panon ya indanet na Kasulatan a nepeg tayon ipatnag so aro ed sakey tan sakey?

¹⁴ Say sakey a manunan aspekto na tuan Inkakristiano et say aro. Oniay inkuan nen Jesus ed saray disipulo to: “Lapu ed saya amin a too nabirbiran da a sikayo ray babangatan ko, no wala so aro yo ed sakey tan sakey.” (Juan 13:35) Panon tayon nipatnag iyan aro? Papasesegen itayo na Salitay Dios a ‘manaanosan, mapangasi, manpeperdonaan,’ tan magmaliw itayon maparawes. (Efe. 4:32; Heb. 13:1, 2) “Nipaakar ed aroan na sanaagi, matamoy komon so aroan na sakey tan sakey,” so insulat nen apostol Pablo.​—Roma 12:10.

15. Akin ya importantin ipatnag na amin so aro, nagkalalo la ray manangasikaso?

¹⁵ No makapuy odino aliwliway impideneng nen Timoteo ed saray kapara ton Kristiano, anggapo lanlamang so kana na saray agawaan to bilang managbangat tan manangasikaso. (Basaen so 1 Corinto 13:1-3.) Ingen ta seguradon nipabitar so espiritual ya iyaaligwas to lapud impatnag toy peteg a panangiyansakit ed saray agagi to, a tinekepan toy inkamaparawes tan maabig iran gawa. Manepeg labat sirin a diad samay sulat nen Pablo ed si Timoteo, espisipiko ton tinukoy so aro bilang sakey ed saray kualidad a nepeg a napanuliranan si Timoteo.

16. Akin et kaukolan nen Timoteo ya ipatnag so mabiskeg a pananisia?

¹⁶ Legan a walad Efeso si Timoteo, asubok so pananisia to. Walaray mangibabangat na saray doktrinan agmitunosan ed katuaan. Say arum et mangikakayat na “sananey a bangat” odino manaaral na saray ideyan anggapon balot so nitulong to ed espiritualidad na kongregasyon. (Basaen so 1 Timoteo 1:3, 4.) Deneskribe nen Pablo irayan indibidual bilang “mapangta, ya anggapoy amta [ra], noag ingen kinmalog so ulo [ra] nisengeg ed saray pikokolkol tan pisangsangan.” (1 Tim. 6:3, 4) Inabuloyan kasi nen Timoteo a makaloob ed nonot to irayan makaderal ya ideya a kalkalnan onkakayat ed kongregasyon? Andi, ta sikatoy pinaseseg nen Pablo a ‘mibakal ed maabig a pibabakal na pananisia’ tan arawian iray ‘tongtong ya ag-onnepeg ed Dios tan saray siblangan a nginaranan a kakabatan balet aliwan tua.’ (1 Tim. 6:12, 20, 21) Andi duaruwan tinulok nen Timoteo iyan makabat a bilin nen Pablo.​—1 Cor. 10:12.

17. Panon a nayarin nasubok so pananisia tayo natan?

¹⁷ Makapainteres ta pinasakbayan nen Pablo si Timoteo a diad “arapen a panaon saray arum onsian ira ed pananisia, a dengelen da so saray espiritu a manangilawan tan saray bangat na saray demonyo.” (1 Tim. 4:1) Amin tayo, kaiba  la iramay walaay responsabilidad ed kongregasyon, et kaukolan a mangipatnag na mapekder tan mabiskeg a pananisia a singa si Timoteo. No desidido itayon paliisan tan labanan so apostasya, nipatnag tayoy iyaaligwas tayo tan napanuliranan so pananisia tayo.

Panggunaetan ya Ipatnag so Iyaaligwas Yo

18, 19. (a) Panon yon nipatnag ed amin so iyaaligwas yo? (b) Antoy pantongtongan tayo ed ontumbok ya artikulo?

¹⁸ Malinlinew sirin a say espiritual ya iyaaligwas na sakey a tuan Kristiano et ag-akadepende ed personal ya itsura, abilidad, odino inkaprominente to. Agto met labay ya ibagan daput no sikatoy abayag lan manlilingkor et nipapatnag to la itan. Noagta, say peteg ya espiritual ya iyaaligwas et nipapatnag no matulok tayo’d si Jehova diad panagnonot, panagsalita, tan panagbilay tayo. (Roma 16:19) Nepeg tayon unoren so ganggan ya aroen so sakey tan sakey tan pabiskegen so pananisia tayo. On, dalepdepen tayo iray bilin nen Pablo ed si Timoteo pian nipatnag so iyaaligwas tayo ed amin.

¹⁹ Say sakey nin kualidad a nipatnag tayoy iyaaligwas tan itatatken tayo’d espiritual et say liket, ya aspekto na bungay masanton espiritu na Dios. (Gal. 5:22, 23) Pantongtongan tayo’d ontumbok ya artikulo no panon tayon nabayuboan tan napansiansia so liket tayo diad sarayan mairap a panaon.

Panon Yon Ebatan?

• Antoy naamtaan na arum nipaakar ed sikatayo base’d panagsalita tayo?

• Panon a nipapatnag so iyaaligwas tayo panamegley na kasimpitan tan diad kabibilay tayo?

• Akin et nepeg a napanuliranan iray Kristiano ed aro tan pananisia?

[Tepetepet Parad Panagaral]

[Litrato ed pahina 11]

Anggan kalangweran ni Timoteo, sikatoy matatken la’d espiritual

[Saray litrato ed pahina 13]

Nipapatnag yo kasi ed arum so iyaaligwas yo?