Mansiansian Maliket Diad Mairap Iran Panaon

“Manggayaga komon so saray amin a mangiyan ed sika [Jehova] na panmatalek da, paneyagen mo ra labat nipaakar ed kasayaksakan.”​—SAL. 5:11.

1, 2. (a) Antoray makasengeg no akin a dakel so nagogonigon natan? (b) Likud ni’d saray probleman nasasagmak na katooan, anto ni so nepeg a sungdoan na saray tuan Kristiano?

SARAY Tasi nen Jehova et apektado met na saray probleman nasasagmak na katooan. Dakel so lingkor na Dios ya abiktimay krimen, giyera, tan arum nin ag-inkahustisya. Nagogonigon met ira lapud kalamidad, kairapan, sakit, tan ipapatey. Kanian matukoy labat iyan insulat nen apostol Pablo: ‘Amta tayon say lapag a pinalsa et maniingel tan maniirap anggad natan.’ (Roma 8:22) Apektado itayo met na agtayo inkaperpekto. Singa si Arin David, nibaga tayo met so onia: “Saray kasulitan [odino kasalanan] ko tinmundas ira ed tagey na ulok; ambelat ira a tuloy ed siak a singa sakey ya ambelat a sasakbaten.”​—Sal. 38:4.

² Likud ni ed saray probleman maslak a naeeksperiensya na katooan, sasakbaten na saray tuan Kristiano so aliling to et panamairapan a kiew. (Luc. 14:27, NW) On, saray disipulo nen Jesus et busolen tan pasegsegangen, a singa sikato. (Mat. 10:22, 23; Juan 15:20; 16:2) Kanian, no tumboken tayoy Kristo, kaukolan tayoy mipuligesgesan tan mansungdo legan tayon aalagaren iray bendisyon na balon mundo.​—Mat. 7:13, 14; Luc. 13:24.

3. Akin et agmet kaukolan a puro irap so naeksperiensya na saray Kristiano pian napaliket so Dios?

³ Kabaliksan kasi na saya ya agla makaliknay liket tan gayaga iray tuan Kristiano? Nepeg kasi a say bilay tayo et puro labat irap tan ermen anggad isabi anggaan? Andi, ta labay nen Jehova a maliket itayo legan tayon  aalagaren so kasumpalan na saray sipan to. Diad Biblia, aminpigan adeskribe a maliket iray tuan managdayew. (Basaen so Isaias 65:13, 14.) ‘Manggayaga iray amin a mangiyan ed sika [Jehova] na panmatalek da, paneyagen mo ra ed kasayaksakan,’ so kuan na Salmo 5:11. On, sarag tayoy magmaliw a maliket, kontento, tan nawalaay deen na nonot anggaman walaray problema. Pantongtongan tayo no panon itayon natulongan na Biblia a mansiansian maliket anggaman walaray subok.

Si Jehova et “Maliket a Dios”

4. Antoy nalilikna na Dios sano nibabaliwalay autoridad to?

⁴ Nengnengen tayo pay alimbawa nen Jehova. Sikato so Makapanyarin-amin a Dios kanian walad pakauley to so interon uniberso. Anggapoy kulang ed sikato tan agto kaukolan so siopaman. Balet anggaman agnaparaan so pakayari to, seguradon adismaya sanen nanrebelde so sakey ed saray espiritun ananak to a nagmaliw a Satanas. Seguradon nanermen met sanen atangguyor so arum ya anghel a manrebelde. Asakitan met so Dios sanen sikatoy imbeneg nen Adan tan Eva, ya obra-maestra to ed amin a pinalsa diad dalin. Nanlapu la’d saman, binilyon ed saray anak da so agnampasakop ed autoridad nen Jehova.​—Roma 3:23.

5. Anto so nagkalalo lan mamapaermen ed si Jehova?

⁵ Anggad natan et mantutultuloy ni panrerebelde nen Satanas. Diad loob na manga 6,000 taon, naimatonan nen Jehova so panagtalintao, gulo, panagpatey, tan seksual ya imoralidad. (Gen. 6:5, 6, 11, 12) Ontan met, sikatoy akarengel na nambabangil a tila tan panagpauges. No maminsan, anggan saray tuan lingkor to et nasasakitan day liknaan to. Deneskribe na Biblia so sakey ed saray ontan ya inkagawa: “Mabetbet iran manrerebelde ed sikato diad kalawakan, sinakitan day liknaan to diad kadesiertoan! Aminpiga-piga ran sinubok so Dios, tan sinakitan da so Masanto na Israel.” (Sal. 78:40, 41, NW) Nasasakitan a maong si Jehova sano sikatoy taynan na totoo to. (Jer. 3:1-10) Malinew sirin a talagan walaray nagagawan mauges, tan naeermenan a maong si Jehova ed saratan.​—Basaen so Isaias 63:9, 10.

6. Panoy ikikiwas nen Jehova sano walaray onlelesan problema?

⁶ Ingen, agto labay ya ibagan sano naeermenan tan nadidismaya si Jehova et anggapo lay gagawaen ton aksion. Sanen linmesa iray problema, sikatoy tampol a kinmiwas pian nabawasay mauges a resulta na saratan. Wala met iray ginawa ton solusyon a nasusumpal diad ilalabas  na panaon pian diad kaunoran et nagawa iray gagala to. Lapud sarayan makabat ya inkiwas to, maliket si Jehova ta magano lay kiyalangon na soberanya to tan nagamoran la na saray matoor a lingkor to iray bendisyon a resulta na satan. (Sal. 104:31) On, anggaman ontan lay impamauges ed si Jehova, siansia nin sikatoy “maliket a Dios.”​—1 Tim. 1:11, NW; Sal. 16:11.

7, 8. Panon tayon naalig si Jehova sano walaray onlesan problema?

⁷ Tua, agtayo nikomparay sarili tayo’d si Jehova no nipaakar ed abilidad tayon resolbien iray problema. Balet, siansia nin naalig tayoy Jehova no makakasagmak tayoy irap. Normal labat a naermenan itayo sano walaray problema, balet nepeg ya agtayo mansiansian ontan. Pinalsa itayo diad indengan na Dios, kanian walaan itayo na praktikal a karunongan tan abilidad a mannonot, a makatulong pian naaral tayon maong iray problema tayo tan makapanggaway positibon aksion no posible.

⁸ Say sakey nin makatulong pian nasarag tayo ray problema ed bilay et no bidbiren tayon walaray bengatlan agtayo kontrolado. No lanang itayon manaaburido, mas nadismaya itayo labat tan agtayo naliknay liket ya itarok na tuan panagdayew. No ginawa tayo lay amin a paraan pian naresolbe problema, maabig no agtayo la masyadon pampapagaan itan tan iteen lay imano tayo ed mas makagunggona iran kimey. Nipabitar iyan punto ed pigaran salaysay ed Biblia a pantongtongan tayo.

Importante so Inkamakatunongan

9. Panon ya impatnag nen Ana so inkamakatunongan?

⁹ Nonoten pay alimbawa nen Ana, a diad saginonor et nagmaliw ya ina nen propeta Samuel. Sikatoy maer-ermen lapud agto panlukon. Sikatoy binalaw tan kinantiawan lapud satan. Ontan lay inkadismaya to a no maminsan et sikatoy mannangis tan agmangan. (1 Sam. 1:2-7) Aminsan, sanen binmisitay Ana ed templo nen Jehova, sikatoy “akikasi ed Jehova, tan nannangis a makapasinagem.” (1 Sam. 1:10) Kayari ton imbesngaw so nalilikna to ed si Jehova, sikatoy inasinggeran na atagey a saserdoten si Eli ya angikuan: “Onla ka ed kareenan, et say Dios na Israel iyabobon to komon so kerew mo.” (1 Sam. 1:17) Diad sayan bekta, seguradon amoria nen Ana a ginawa to lay anggaay nayarian to. Agto kontrolado so agto panlukon. Kanian, sikatoy angipatnag na inkamakatunongan tan “linma ed dalan to, tan angan, et say lupa to aliwa lan maermen.”​—1 Sam. 1:18.

10. Panon a nagmaliw a realistiko si Pablo sanen akasagmak na probleman agto naresolbe?

¹⁰ Ontan met so impatnag nen apostol Pablo sanen akaeksperiensya na problema ya impakagonigonan to. Tinukoy to iya a “sabit ed laman.” (2 Cor. 12:7) Antokaman iya, ginawa nen Pablo so anggaay nayarian to pian ekalen iyan sengegan na paniirap to, ya impikasi to’d si Jehova a nainawaan komon. Aminpigan akikasi si Pablo ed si Jehova nipaakar ed saya? Amitlo. Kayari na mikatlo, imbaga na Dios ed si Pablo a sayan “sabit ed laman” et agmamilagron ekalen. Inawat nen Pablo iyan katuaan tan inyapasakey toy imano to ed sigpot a panaglingkor ed si Jehova.​—Basaen so 2 Corinto 12:8-10.

11. Antoy nitulong na pikakasi pian nasarag tayo ray problema tayo?

¹¹ Agto met labay ya ibagan agtayo la ipikasi ed si Jehova iray pakakagonigonan tayo. (Sal. 86:7) Diad tua, oniay ipapaseseg na Salitay Dios: “Agkayo mapaga ed antokaman; noag dia ed ganagana lapu ed pikakasi tan pikekerew a tekep na pisasalamat nipakabat komon ed Dios so saray kerew yo.” Panon ya ebatan nen Jehova irayan pikakasi tan kerew? Oniay inyarum na Biblia: “Tan say deen na Dios, a talonaan ton amin a pakatalos, bantayan to so kapusoan yo tan saray nonot yo ed Kristo Jesus.” (Fil. 4:6, 7) On, nayarin ag-ekalen nen Jehova iray problema tayo, balet ta ebatan to ray pikakasi tayo diad pambantay to ed saray nonot tayo. Kayari tayon ipikasi so sakey a bengatla, mas kalmado lay nonot tayo tan mas namoria tayoy kapeligroan na sobran panagpaga.

 Panliketan so Panggaway Linawa na Dios

12. Akin a mapeligro so mabaybayag a panermen?

¹² Oniay ibabaga na Uliran 24:10: “No onkapuy ka ed agew na kasegsegang, say kasil mo sikato so melag.” Onia met so inkuan na sakey nin proverbio: “Lapu ed ermen na puso say espiritu nabuyak.” (Uli. 15:13) Walaray Kristianon diad sobran ermen da et intunda da lay personal a panagbasay Biblia tan panagdalepdep. Say pikakasi ra et aliwa lan impapuso, tan nayarin ibibiig da lay inkasikara ed saray kaagian. Malinew sirin a say sobra tan mabaybayag a panermen et mapeligro.​—Uli. 18:1, 14.

13. Antoray aktibidad a makatulong pian nalabanay ermen tan makapangiter met na liket?

¹³ Balet, no positibo itayo, ontulong iya pian nisentro tayoy imano tayo ed saray bengatlan panlapuay liket. Oniay insulat nen David: “Makaliket ak a mangunor na linawam, O Dios ko.” (Sal. 40:8) No walaray onsabin ambelat a problema, agtayon balot itutunda so maabig a rotina na panagdayew tayo. Diad tua, say tambal na ermen et say panggawa na saray aktibidad a makapangiter na liket. Ibabaga nen Jehova a magmaliw itayon maliket no basaen tayoy Salita to tan regular ya usisaen itan. (Sal. 1:1, 2; Sant. 1:25) Diad Masanton Kasulatan tan diad saray Kristianon pantitipon et makakaawat itayo na saray “maong a salita” a makatambayo tan mamaliket ed kapusoan tayo.​—Uli. 12:25; 16:24.

14. Antoy impaseguro nen Jehova a mamapaliket ed sikatayo natan?

¹⁴ Iikdan itayo na Dios na dakel a rason pian manliket. Say insipan ton kiliktar tayo et peteg a manunan lapuan na liket. (Sal. 13:5) Amta tayon antokaman so nasasagmak tayo natan, diad kaunoran et tumangan na Dios iray matunong. (Basaen so Salmo 1:6.) Balibali impangibalikas nen propeta Habacuc ed talek to ed satan a sipan: “Anggan say kiew a higos agnaani onlambot, anggan say bunga anggapo naani ed saray ubas; say kimey na olibo onkulang naani. Et saray uma ag-ira naani mamapaway na tagano; say pulok na karkarnero napegpeg naani a manlapu ed panangipukokan, et anggapo  naani so pulok na ayep dia ed saray panangiwian. Anggan ontan manliket ak naani ed Jehova, manliket ak naani dia ed Dios na kilalaban ko.”​—Hab. 3:17, 18.

“Maliket Iramay Totoon say Dios Da et si Jehova!”

15, 16. Mangibagay pigara ed saray panliliketan tayon regalo na Dios legan tayon aalagaren iray bendisyon ed arapen.

¹⁵ Legan tayon aalagaren so alay abig a bilay diad arapen, labay nen Jehova a panliketan tayo iray iiter ton maong a bengatla. Ibabaga na Biblia: “Amtak ya anggapo so bengatla a magmaong nipaakar ed sikara, nen say panliket, tan panggawa na maong ed leleg na panbilay da. Et ontan met a balang too mangan tan oninum, tan manliket a maong ed amin a kimey to, sikato so pamalangkap na Dios.” (Ecl. 3:12, 13) Kaiba ed “panggawa na maong” so panggaway kaabigan ed arum. Inkuan nen Jesus a mas makapaliket so mangiter nen say mangawat. Makalikna itayoy inkapnek no ipatnag tayoy kaabigan ed asawa tayo, ananak, atateng, tan kakanayon. (Uli. 3:27) No mangiyaansakit itayo, maparawes, tan maperdona ed saray agagi, nalikna tayoy liket. (Gal. 6:10; Col. 3:12-14; 1 Ped. 4:8, 9) Ontan met, say masakripisyon panumpal tayo ed ministeryo et talagan makapnek. No gawaen tayo irayan amin, napaliket tayoy Jehova.

¹⁶ Diad saratan a salitan walad Eclesiastes 3:12,13, abitla iray simplin panggagayagaan tayo ed bilay, a singa say pangan tan iyinum. On, anggaman makakasagmak itayoy subok, napanliketan tayo nin siansiay antokaman a materyal a bendisyon a manlalapud si Jehova. Ontan met, anggapoy bayar na inengneng ed balibalin iseselek na agew, ataragey a kapalandeyan, panggagalaw na angkekelag ya ayayep, tan arum nin makapakelaw a palsa, ingen ta saraya so talagan pandidinayewan tan panliliketan tayo. No dalepdepen tayo iraya, ombaleg so panangaro tayo ed si Jehova, lapud sikato so Manangiter na amin a maabig a bengatla.

17. Antoray sigpot a mangibulos ed sikatayo manlapud kairapan, tan kaleganan to, anto so makaligliwa ed sikatayo?

¹⁷ Diad kaunoran, say aro tayo ed Dios, pangunor ed saray ganggan to, tan pananisia ed dondon bagat so sigpot a mangibulos ed sikatayo manlapud panamairap na imperpekton bilay tan saraya so mangiter na magnayon a liket. (1 Juan 5:3) Kaleganan to, makaligliwa so katuaan a talagan amta nen Jehova so amin a kairapan tayo. Oniay insulat nen David: “Maliket ak tan manggayaga ak ed panangasim; ta sika inimanom so gonigon ko: sika akabatan mo so kamarerwak a wala ed saray kasumpaan to.” (Sal. 31:7) Inad-aro itayo nen Jehova kanian iliktar to itayo ed amin a kairapan.​—Sal. 34:19.

18. Akin et maliket iray lingkor na Dios?

¹⁸ Komon ta aligen tayoy Jehova, say maliket a Dios, legan tayon aalagaren so kasumpalan na saray sipan to. Agtayo met komon aabuloyan a lapud negatibo iran liknaan et paulyanan tayo lay espiritualidad tayo. Sano onlesa iray problema, igiya itayo komon na praktikal a karunongan tan abilidad a mannonot. Tulongan itayo nen Jehova pian nakontrol tayoy emosyon tayo tan pian nagawaan tayo iray kundang a mamawas ed mauges iran epekto na saray problema tayo. Panliketan tayo komon iray maabig a bengatlan manlalapud sikato, materyal man itan o espiritual. No mansiansia itayon maapit ed Dios, magmaliw itayon magayaga lapud “maliket iramay totoon say Dios da et si Jehova!”​—Sal. 144:15, NW.

Anto so Naaralan Mo?

• Panon tayon naalig si Jehova sano makakasagmak tayoy problema?

• Panon itayon natulongan na inkamakatunongan pian nasarag tayo ray problema?

• Diad panaon na irap, panon tayon napanliketan so panggaway linawa na Dios?

[Tepetepet Parad Panagaral]

[Saray litrato ed pahina 16]

Naeermenan a maong si Jehova ed saray mauges a nagagawa

[Credit Line]

© G.M.B. Akash/Panos Pictures

[Saray litrato ed pahina 18]

Tutulongan itayo nen Jehova a mansiansian maliket