Say Mesias​—Imbaki na Dios Pian Nilaban Itayo

“Lapud kinen Adan so pateyan na amin, ontan met diad kinen Kristo onoli ra ed bilay.”​—1 COR. 15:22.

1, 2. (a) Anto so reaksion di Andres tan Felipe sanen akabat day Jesus? (b) Akin a nibaga tayo a mas dakel so ebidensya tayo natan a si Jesus so Mesias nen saramay Kristiano nensaman?

“AROMOG mi Mesias.” Oniay inkuan na agi nen Pedro a si Andres lapud sikatoy kombinsido a si Jesus a taga Nazaret imay Nilanaan na Dios. Si Felipe et anisia met tan inanap toy kaaro ton si Natanael tan imbaga to: ‘Aromog mi imay insulat nen Moises diad ganggan, tan na saray propetas, si Jesus a taga Nazaret, ya anak nen Jose.’​—Juan 1:40, 41, 45.

² Sika ey? Kombinsido ka met kasin maong a si Jesus so insipan a Mesias, say usaren nen Jehova a “Manunan Manangitonton ed kilalaban”? (Heb. 2:10, NW) Diad tua, natan et mas dakel so ebidensya tayo a si Jesus so Mesias nen saramay inmunan siglon papatumbok to. Manlapud inkianak anggad inkioli nen Jesus, say Salita na Dios so akapangiter na agnakuestion ya ebidensya a sikato so Kristo. (Basaen so Juan 20:30, 31.) Ipapanengneng met na Biblia a kapawil nen Jesus ed tawen et itultuloy ton sumpalen so betang to bilang Mesias. (Juan 6:40; basaen so 1 Corinto 15:22.) Base ed saray naaralan mo ed Biblia, nibagam met ya ‘aromog mo lay Mesias.’ Balet pantongtongan tayo ni no panon a nibaga na saramay inmuunan disipulo ya aromog da so Mesias.

Kalkalnan Nipaamta so Sagradon Sekreto Nipaakar ed Mesias

3, 4. (a) Panon a ‘naromog’ na saray inmunan-siglon disipulo so Mesias? (b) Akin et nibaga tayo a si Jesus labat so makasumpal ed amin a Mesianikon propesiya?

³ Panon kasin nasegurado na saray inmunan-siglon papatumbok nen Jesus a sikato so Mesias? Panamegley na saray propeta, kalkalnan impaamta nen Jehova so pakabidbiran na onsabin Mesias. Inkompara iya na sakey ya iskolar na Biblia ed panagtuop na estatua a gawa’d pigapigaran piraso na marmol. Isipen pan walaray lalakin agnin balot akapankakabat tan balang sakey ed sikara et nan-awit na akurtian a piraso na marmol ed sakey a kuarto. Sanen pinantutuop da iramay awit dan piraso na marmol, atuop so balibalin estatua. Siempre, natural labat ya isipen mon ag-iya nibanbana noagta walay sakey a toon angidirehi ed satan, a nan-kurti tan angipawit ed saratan a piraso diad saramay lalaki. No panon a kada piraso na marmol et nakaukolan pian natuop imay estatua, kada Mesianikon propesiya et makapangiter na importantin impormasyon nipaakar ed Mesias.

⁴ Posible kasin say pakasumpal na saksakey a too ed amin a Mesianikon propesiya et nibanbana labat? Unong ed sakey a manag-research, imposible itan​—agbalot nayarin nibanbana labat so pakasumpal na saksakey a too ed amin a Mesianikon propesiya. “Si Jesus labat, diad amin a totoo, so akasumpal ed sarayan amin.”

5, 6. (a) Panon a nagawa so pangukom ed si Satanas? (b) Panon a kalkalnan impaamta na Dios so polin panlapuan na samay insipan ya “ilalak”?

⁵ Say akasentroan na saray Mesianikon propesiya et say sagradon sekreto a mangapekta ed amin a totoo. (Col. 1:26, 27; Gen. 3:15) Kalaktip ed sayan sagradon sekreto so pangukom ed si Satanas a Diablo, say “daan ya uleg” a lapud sikato et naplag so katooan ed kasalanan tan patey. (Apo. 12:9) Panon a gawaen nen Jehova iyan panangukom? Impropesiya to a say “ilalak” na “bii” et manugat ed ulo nen Satanas. Mekmeken  na sayan “ilalak” so ulo na uleg, kanian sigpot lan naekal so sengegan na rebelyon, sakit, tan patey. Balet, iyabuloy na Dios a sugaten ni nen Satanas so simbolikon mukor na “ilalak” na bii.

⁶ Kalkalnan impaamta nen Jehova no siopa iyan “ilalak.” Insipan na Dios ed si Abraham: “Dia ed ilalak mo so pakapipalaranan [“pakabendisyonan,” NW] na saray amin a nasyon.” (Gen. 22:18) Ontan met, impropesiya nen Moises a sayan “ilalak” et magmaliw a “propeta,” tan saya et mas matalonggaring nen say si Moises. (Deu. 18:18, 19) Impaseguro met ed si David, a kinompirma na saray propeta ed saginonor, a say Mesias et manlapud poli to tan manawir ed trono to ed andi-angga.​—2 Sam. 7:12, 16; Jer. 23:5, 6.

Saray Paneknek a si Jesus so Mesias

7. Dian anton paraan a si Jesus et nanlapud “bii” a pinagka-asawa na Dios?

⁷ Say imbaki nen Jehova a magmaliw ya insipan ya “ilalak” et say Anak to, say panguloan a palsa a nanlapud organisasyon na saray espiritun pinalsa ed tawen a pinagka-asawa na Dios. Kabaliksan na saya a say bogtong ya Anak na Dios et ‘lukposen’ toy bilay to ed tawen tan nianak bilang perpekton too. (Fil. 2:5-7; Juan 1:14) Si Maria et ‘tinarongan’ na masanton espiritu kanian agarantiyaan a say iyanak to et “ningaran naani santo, say Anak na Dios.”​—Luc. 1:35.

8. Panon a sinumpal nen Jesus so Mesianikon propesiya sanen linman nampabautismo?

⁸ Impabitar na saray Mesianikon propesiya so nipaakar ed kianak nen Jesus tan arum nin nagawa ed bilay to, a singa say bautismo to tan say panlana ed sikato. Singa nipropesiya, inyanak si Jesus ed Betlehem. (Miq. 5:2) Nen inmunan siglo, atagey so iilaloan na saray Judio nipaakar ed Mesias. Lapud pitalaran day isabi na Mesias, walaray nantepet nipaakar ed si Juan a Managbautismo: “Sikato la kasi imay Kristo?” Balet ta inmebat si Juan: “Onsabi imay mas mabiskeg nen siak.” (Luc. 3:15, 16, NW) Sanen 29 C.E., nila nen Jesus si Juan pian manpabautismo diad edad a 30. Diad saman et impresenta nen Jesus so inkasikato bilang Mesias diad eksakton panaon. (Dan. 9:25) Insan to la inggapoy ministeryo to, ya impulong to: “Say panaon asumpal la, tan say panarian na Dios asingger la.”​—Mar. 1:14, 15.

9. Anggaman ag-amta na saray disipulo nen Jesus so amin a detalye, antoy mapekder a papanisiaan da?

⁹ Kaukolan balet ya ipetek na saray Judio so panmoria ra. Tua a makanepegan labat so impamidbir da ed si Jesus bilang Ari, balet agda ni’d saman sigpot ya atalosan a say panuley to et diad tawen tan diad arapen ni. (Juan 12:12-16; 16:12, 13; Gawa 2:32-36) Anggaman ontan, sanen intepet nen Jesus ya, “Siopa ak ed kuan yo?” et inmebat a tampol si Pedro: “Sika so Kristo, ya Anak na Dios a mabilay.” (Mat. 16:13-16) Siansia nin ag-anguman iyan talindeg nen Pedro sanen  dakel so anaynan ed si Jesus lapud walay akagapolan dan bangat to.​—Basaen so Juan 6:68, 69.

Dengelen so Mesias

10. Akin et indanet nen Jehova a kaukolan tayon dengelen so Anak to?

¹⁰ Diad tawen, say bogbogtong ya anak na Dios et sakey a makapanyarin espiritun persona. Diad dalin, sikato so angirepresenta ed si Ama to. (Juan 16:27, 28) Inkuan to: “Say bangat ko agko kien, balet kien na angibaki ed siak.” (Juan 7:16) Diad samay transpigurasyon, kinompirma nen Jehova a si Jesus so Mesias tan oniay ingganggan To: “Sikato so denglen yo.” (Luc. 9:35) On, nepeg tayon dengelen, odino unoren iyan Pinili na Dios. Pian nagawaan iya, kaukolan so pananisia tan maabig iran gawa, a talagan importante pian napaliket tayoy Dios tan nagamoray bilay ya andi-anggaan.​—Juan 3:16, 35, 36.

11, 12. (a) Akin a karaklan ed saray Judio nen inmunan siglo et agda inawat a si Jesus so Mesias? (b) Sioparay anisia ed si Jesus?

¹¹ Anggaman dakdakel so paneknek a si Jesus so Mesias, sikatoy ag-inawat na karaklan a Judio nen inmunan siglo. Akin? Lapud wala lay sarili dan panmoria nipaakar ed Mesias. Singa bilang, sikato kunoy magmaliw a lider a mangibulos ed sikara ed panamairap na saray Romano. (Basaen so Juan 12:34.) Sirin et agda naawat so Mesias ya anumpal ed saray propesiya a sikatoy namudmora, ikaindan na saray totoo, sakey a toon makaamta ed ermen, tan diad kaunoran et pateyen. (Isa. 53:3, 5) Wala ni ra ingey matoor a disipulo nen Jesus ya adismaya nen naamtaan dan agto ra ibulos. Balet ta nansiansia iran matoor, tan diad dugan panaon et impagamor ed sikara so suston pakatalos.​—Luc. 24:21.

¹² Say sakey nin rason no akin a dakel a totoo so ag-anisia a si Jesus imay insipan a Mesias et lapud mairap dan awaten iray bangat to. Alimbawa, imbaga ton pian makaloob ed Panarian, kaukolan a say sakey et ‘iburi toy inkasikato,’ “mangan” na laman tan dala nen Jesus, ‘nianak lamet,’ tan ‘aliwan taga mundo.’ (Mar. 8:34; Juan 3:3; 6:53; 17:14, 16) Ipapasen na saray mapaatagey, mayaman, tan mansimpisimpitan a mairap irayan gawaen. Balet saray mapaabeban Judio et inawat dan si Jesus so Mesias, a singa met ed arum a Samaritano ya angikuan: “Amta mi a saya sikaton tua so manangilaban na mundo.”​—Juan 4:25, 26, 41, 42; 7:31.

13. Panon a ‘sinugatan’ si Jesus ed mukor?

¹³ Impasakbay nen Jesus a sikatoy sentensiaan na saray manunan saserdote tan ipasak na saray Gentil, balet diad komatlon agew et sikatoy onoli. (Mat. 20:17-19) Sanen kinompirma to ed Sanhedrin a sikato so “Kristo, ya Anak na Dios,” impasen da a nansalita sumpa ed Dios. (Mat. 26:63-66) Parad si Pilato, “anggapoy ginawa [nen Jesus a] manepeg ed pamatey,” balet lapud inakusaan na saray Judio a sikatoy onlalaban ed gobierno, sikatoy ‘inyawat nen Pilato ed panlabay da.’ (Luc. 23:13-15, 25) Kanian anggaman dakdakel so paneknek a si Jesus so imbaki na Dios, sikatoy “impulisay” da tan nankakasakeyan dan ipapatey so “Manunan Manangitonton ed bilay.” (Gawa 3:13-15, NW) Say Mesias et “nakal” odino pinatey a singa impropesiya, ya impasak ed panamairapan a kiew nen Paskua na 33 C.E. (Dan. 9:26, 27; Gawa 2:22, 23) Diad sayan maruksan impamatey ed Jesus, sikatoy ‘sinugatan ed mukor’ unong ya impropesiya ed Genesis 3:15.

No Akin a Kaukolan ya Ompatey so Mesias

14, 15. (a) Antoy duaran rason no akin ya inyabuloy nen Jehova ya ompatey si Jesus? (b) Antoy ginawa nen Jesus kayari inkioli to?

¹⁴ Walay duaran manunan rason no akin ya inyabuloy nen Jehova ya ompatey si Jesus. Unona, diad impanmatoor nen Jesus anggad ipapatey et aresolbe so sakey ya importantin aspekto na sagradon sekreto. Sigpot ton apaneknekan a sarag na sakey a perpekton too so mansiansia ed “kasantosan” tan iyalangon so soberanya na Dios anggaman ed sankagrabian iran subok ya iter nen Satanas. (1 Tim. 3:16) Komadua, imbagan mismo nen Jesus a ‘say Anak na too linma dia pian iter toy bilay to a panondon ed amayamay.’ (Mat. 20:28) Say bilay to so kinmanan dondon pian nibulos itayo ed kasalanan ya impatawir nen Adan. Ontan met, posible lan makagamor  na andi-anggaan a bilay so amin a manisia ya imbaki nen Jehova si Jesus pian nilaban itayo.​—1 Tim. 2:5, 6.

¹⁵ Kayari taloy agew ed lubok, pinaoli so Kristo, tan diad loob na 40 ya agew et nampanengneng ed saray disipulo to pian paneknekan a sikatoy mabilay tan pian ikdan to ra na kaaruman nin instruksion. (Gawa 1:3-5) Insan sikatoy pinmawil ed tawen pian ipresenta ed si Jehova so balor na mablin dondon to tan nanalagar na aturon panaon sano onggapo lay kiwawala to bilang Mesianikon Ari. Sakbay a nagawa itan, dakdakel ni kaukolan ton gawaen.

Sigpot Ton Sumpalen so Betang To Bilang Mesias

16, 17. Kapawil nen Jesus ed tawen, antoray sinumpal ton betang bilang Mesias?

¹⁶ Diad inlalabas na siglo manlapud inkioli nen Jesus, matoor ton indaulo so kimey na Kristianon kongregasyon, a diad saman et uuleyan to la bilang Ari. (Col. 1:13) Diad aturon panaon to ni gapoan ya usaren so pakayari to bilang Ari ed Panarian na Dios. Napatnagan ed saray propesiya ed Biblia tan ed nagagawa’d mundo a say presensia to bilang Ari tan say “anggaan na [sistema na] mundo” et ginmapo nen 1914. (Mat. 24:3; Apo. 11:15) Ag-abayag kayari na satan, sikatoy angidaulo ed saray anghel pian ibantak si Satanas tan saray demonyo diad dalin.​—Apo. 12:7-10.

¹⁷ Asingsingger lay panampot na kimey a panagpulong tan panagbangat ya inggapo nen Jesus nen 29 C.E. Magano to lan ‘ibiig iray karnero ed saray kanding.’ Insan oniay ikuan to ed saray kinmarneron totoo a manisian sikatoy imbaki nen Jehova bilang manangilaban: “Tawiren yoy panarian ya imparaan ed sikayo a nanlapu ed inletneg na mundo.” (Mat. 25:31-34, 41) Saramay agmangawat ed si Jesus bilang Ari et naderal sano idaulo to lay armada to’d tawen sumpad amin a mauges. Insan to la baloren tan ibasileng si Satanas kaiba iray demonyo diad “kaaralman.”​—Apo. 19:11-14; 20:1-3.

18, 19. Anto ni ray gawaen nen Jesus diad panusumpal to ed betang to bilang Mesias, tan lapud satan et antoy nagamoran na matulok a katooan?

¹⁸ Diad Sanlibon Taon ya Uley nen Jesus, sigpot ton sumpalen so amin a betang to, a singa say pagmaliw ton ‘Makapakelaw a Mananimbawa, Makapanyarin Dios, Andi-anggaan ya Ama, Prinsipe na Kareenan.’ (Isa. 9:6, 7) Bilang resulta na uley to ed Panarian, magmaliw lan perpekto so totoo, kaiba la iramay paolien to. (Juan 5:26-29) Itonton na Mesias iramay mauyamon totoo diad “saray subol na danudanum na bilay,” diad ontan et panggayagaan na matulok a katooan so maabig a relasyon ed si Jehova. (Basaen so Apocalipsis 7:16, 17.) Kayari na unor a subok,  amin a rebelde, kaibay Satanas tan saray demonyo to et “nibantak ed dayat na apuy.” Sigpot lan naderal si Satanas. On, saya la imay panmekmek ed ulo na “uleg.”​—Apo. 20:10.

¹⁹ Talagan makapadinayew tan alay abig so panumpal nen Jesus ed betang to bilang Mesias! Say dinondon a katooan et manbilay na andi-anggaan diad paraison dalin, a walaay perpekton bunigas tan liket a manleppua. Say sagradon ngaran nen Jehova et nalinisan la ed amin a panagpauges, tan sigpot lan niyalangon so kanepegan to bilang soberano ed uniberso. On, balbaleg a bendisyon so manaalagar ed amin ya ontulok ed Nilanaan na Dios!

Aromog Mo La Kasi Mesias?

20, 21. Antoray rason mo no akin a labay mon itongtong so nipaakar ed Mesias?

²⁰ Manlapu la’d 1914 et manbibilay itayo la ed samay panaon a tatawagen a pa·rou·siʹa, odino kiwawala nen Kristo. Anggaman agtayo nanengneng so presensia to bilang Ari ed Panarian na Dios, napatnagan itan ed saray nasusumpal a propesiya. (Apo. 6:2-8) Balet, singa saramay Judio nensaman, dakel a totoo natan so mangibabaliwala ed ebidensya na kiwawala na Mesias. Labay da met so nawalaay sakey a lider odino anggan sakey a toon walay koneksion to’d saray politiko. Ingen, sika et akabatan mo lan manuuley lay Jesus natan bilang Ari ed Panarian na Dios. Agta aliketan ka sanen akabatan mo itan? Singa saramay disipulo nen inmunan siglo, apakiwas kan mangibagan: “Aromog mi Mesias.”

²¹ Sano ipupulong moy katuaan, idadanet mo kasi betang nen Jesus bilang Mesias? No gawaen mo itan, mas naapresyam iray agawaan to parad sika, no antoray gagawaen to natan, tan saray gawaen to ni ed arapen. Singa si Andres tan Felipe, seguradon nitongtong mo la ed saray kakanayon tan kakaarom so nipaakar ed Mesias. Maabig no mitongtong ka lamet tekep na apasimbalon seseg tan ipanengneng mo’d sikara a talagan si Jesu-Kristo so insipan a Mesias, say imbaki na Dios pian nilaban itayo.

Kasin Nipaliwawam?

• Panon a naromog na saramay disipulo nen inmunan siglo so Mesias?

• Diad anton duaran manunan rason ya inatey si Jesus?

• Anto ni gawaen nen Jesus diad panumpal to ed betang to bilang Mesias?

[Tepetepet Parad Panagaral]

[Saray litrato ed pahina 21]

Panon a nibaga na saray totoo nen inmunan siglo a si Jesus imay insipan a Mesias?

[Litrato ed pahina 23]

Idadanet mo kasi so betang nen Jesus bilang Mesias diad pitotongtong mo?