Paneknekan Mon Peteg Kan Patumbok nen Kristo

“Amin a maong a kiew mangiter na maong a bunga, sabalet so aderal a kiew mangiter na aliwan maong a bunga.”​—MAT. 7:17.

1, 2. Panon a napanbiigan iray palso tan tuan patumbok nen Kristo nagkalalo la ed sayan panaon na anggaan?

IMBAGA nen Jesus a nibiig iray palso ed tuan Kristiano panamegley na bunga ra, salanti diad saray ibabangat da tan diad kondukta ra. (Mat. 7:15-17, 20) Tua itan ta naiimpluensyaan iray totoo ed no antoy ikakarga ra ed isip tan puso ra. (Mat. 15:18, 19) Saramay nibabangat na katilaan et mamawalay “aliwan maong a bunga,” balet saramay nibabangat na espiritual a katuaan et mamawalay “maong a bunga.”

² Lalon ombibitar iyan duaran klase na bunga legan na sayan panaon na anggaan. (Basaen so Daniel 12:3, 10.) Saray palson Kristiano et pikewet so panmoria ra ed Dios tan kunkunwarin debotado ra, balet saramay walaan na espiritual a pakatebek et idadayew day Dios “ed espiritu tan katuaan.” (Juan 4:24; 2 Tim. 3:1-5) Panggugunaetan dan ipanengneng iray kualidad a mipara ed si Kristo. Komusta ka balet? Legan tayon pantongtongan iray limaran pakabidbiran ed tuan Kristiano, tepetan mo pay inkasika: ‘Kasin say konduktak tan say ibabangat ko et mabitar a mitunosan ed Salita na Dios? Kasin napapagmaliw kon makapasagyat so katuaan ed saramay manaanap ed satan?’

Iyaplika so Salita na Dios

3. Antoy mamaliket ed si Jehova, tan antoy lalanoren na satan parad saray tuan Kristiano?

³ Oniay inkuan nen Jesus: “Aliwan balang sakey a mankuan ed siak na, Katawan, Katawan, et onloob naani ed panaria’y tawen; noag ingen say mangunor na linawa nen Amak a wala ed tawen.” (Mat. 7:21) On, aliwan say pangibaga a sakey kan Kristiano so mamaliket ed si Jehova noagta say panggawa ed nepeg mon gawaen bilang Kristiano. Parad saray tuan patumbok nen Kristo, lalanoren na satan so interon kabibilay, kaiba lay panmoria ed kuarta, trabaho, panligliwaan, minumundon kustombre tan selebrasyon, panangasawa tan arum niran klase na relasyon. Balet, saray palson Kristiano et mangaalig ed panagnonot tan kagagawa na mundo a lalon onuuges legan na kaunoran iran agew.​—Sal. 92:7.

4, 5. Panon tayon niyaplika’d bilay tayo so salita nen Jehova a walad Malaquias 3:18?

⁴ Kanian, oniay insulat nen propeta Malaquias: “Seguradon nanengneng yo lamet so pandumaan na matunong tan marelmeng, say manlilingkor ed Dios tan say agmanlilingkor ed sikato.” (Mal. 3:18, NW) Legan mon dadalepdepen itan, tepetan mo pay sarilim: ‘Mimialig ak kasi ed mundo, odino miduma ak? Pansasagpotan ko kasi mipara ed saray kaeskuelak odino katrabahok, odino mapekder ak ed saray prinsipyo na Biblia, ya ipapaliwawak ni ingey talindeg ko no nakaukolan?’ (Basaen so 1 Pedro 3:16.) Siempre, agtayo met labay so ompaway a mantunongtunongan, balet kaukolan a napatnagan a duma itayo ed saramay agmangaaro tan agmanlilingkor ed si Jehova.

⁵ No naimanom a wala ni papaaligwasen mo, akin ta no ipikasim itan, tan onggamor na biskeg manlapud regular a panagaral na Biblia, pikakasi, tan pipiaral? No lalo ya iyaaplikam so Salitay Dios, lalo kan makapawala na “maong a bunga,” pati say “bunga na saray bibil a mangiwakawak na ngaran [na Dios].”​—Heb. 13:15.

 Ipulong so Panarian na Dios

6, 7. No nipaakar ed mensahe na Panarian, antoy naimanon pandumaan na saray palso tan tuan Kristiano?

⁶ Inkuan nen Jesus: “Kaukolan ko met ya ipulong so ebanghelyo na panaria’y Dios ed saray arum a syudad; ta sikato ya so nibakian ko.” (Luc. 4:43) Akin a say Panarian na Dios so pinagkatema nen Jesus ed ministeryo to? Lapud amta to a sikato, bilang Ari na satan a Panarian, kaiba iray napaolin alanaan na espiritun agagi to, so mangekal ed saray sengegan na paniirap na totoo, salanti, say kasalanan tan say Diablo. (Roma 5:12; Apo. 20:10) Kanian, ingganggan to ray papatumbok to ya iyabawag da itan a Panarian anggad pangangga na sayan sistema na bengabengatla. (Mat. 24:14) Saray totoon mankuankuanan a patumbok nen Kristo et agmanpupulong ta diad tua et agda nayarian. Akin? Mangibaga tayo labat na taloran rason: Unona, agda nipulong so agda natatalosan. Komadua, kaslakan ed sikara et aliwan mapaabeba tan natatakot ira ompan balawen tan sumpaen ira no ipulong day mensahe na Panarian ed arum. (Mat. 24:9; 1 Ped. 2:23) Tan komatlo, anggapo’d sikara so espiritu na Dios.​—Juan 14:16, 17.

⁷ Diad biek a dapag, natatalosan na tuan papatumbok nen Kristo no anto so Panarian na Dios tan no antoy nagawaan na satan. Niarum ni, iyuuna da’d bilay da so Panarian, tan ipupulong da itan ed sankamundoan diad tulong na espiritu nen Jehova. (Zac. 4:6) Regular ka ta a mibibiang ed sayan kimey? Bilang manangiyabawag na Panarian, panggugunaetan mo kasi onaligwas? Singa bilang, kasin naaruman mo ni panaon mo ed ministeryo tan napagmaliw mo ni itan a lalon epektibo? Apaaligwas na arum so panagministeryo ra diad marundunong a panguusar ed Biblia. Si apostol Pablo, a niyugali toy mankatunongan base’d Kasulatan, so angisulat na onia: “Say salita na Dios sikatoy mabilay tan mabiskeg.”​—Heb. 4:12; Gawa 17:2, 3.

8, 9. (a) Antoran eksperiensya so mangipapanengneng ed kaimportantian na panangusar ed Biblia diad ministeryo? (b) Panon tayon napaaligwas so panangusar ed Salitay Dios?

⁸ Sanen mankakabkaabungan so sakey ya agi, imbasa to so Daniel 2:44 ed sakey a Katoliko tan impaliwawa to no panon ya iter na Panarian na Dios so tuan kareenan tan kaligenan. Oniay inkomento na laki: “Say agustoan ko et say impangusar mo’d Biblia pian ipanengneng no antoy ibabaga na satan, imbes a salambiten mo labat.” Walay sananey nin agin laki ya angibasa na sakey a teksto ed sakey a bii a say relihyon to et Greek Orthodox. Lapud saya et dakel so intepet na bii. Kanian, say agi, kaibay asawa to, so angusar lamet ed Biblia pian ebatan iray tepet. Diad saginonor, oniay inkuan na bii: “Amta yo no akin ya akitongtong ak ed sikayo? Ta kien, awi-awit yoy Biblia tan imbasa yo itan.”

⁹ Siempre, importante met iray literatura tayo tan nepeg tayon iyopresi iratan. Balet, say Biblia so manunan uusaren tayo. Kanian no agmo ni maparanay ya uusaren so Biblia diad ministeryo, agta maabig no gawaen mo itan a kalat? Nayarin mamili ka na pigaran teksto a mangipapaliwawa ed no antoy Panarian na Dios tan no panon a resolbien na satan iray problema na totoo ed lugar yo. Insan panggunaetan ya ibasa iratan sano manpupulong.

 Ag-ibabaing ya Usarey Ngaran na Dios

10, 11. Antoy pidumaan nen Jesus ed dakel a mankuan ya ontutumbok ed sikato no nipaakar ed panangusar na ngaran na Dios?

¹⁰ “Sikayo so tasik, kuan nen Jehova, et siak so Dios.” (Isa. 43:12) Ipapasen na manunan Tasi nen Jehova, a si Jesu-Kristo, a kagalangan ya usaren tan ipakabat so ngaran na Dios. (Basaen so Exodo 3:15; Juan 17:6; Hebreos 2:12.) Diad tua, lapud inyabawag nen Jesus so ngaran na Ama to, sikatoy atawag a “Tasi a Matoor.”​—Apo. 1:5; Mat. 6:9.

¹¹ Diad biek a dapag, dakel so mankuan ya irerepresenta ray Dios tan say Anak to, balet ta agda inggalang so ngaran na Dios, inekal da ni ingen itan ed saray bersion na Biblia ra. Satan a panmoria et mipadpara ed samay agano nin sulat ed saray Obispo, ya oniay niganggan ed sikara: “Agnepeg ya usaren nisay ibalikas so ngaran na Dios diad porma na tetragrammaton a YHWH” legan na saray seremonya tan misa. * Agaylan agpanagrespeto!

12. Panon a nagkalalon abidbir iray lingkor nen Jehova nen 1931?

¹² Ikikinon na saray tuan Kristiano so panangusar ed ngaran na Dios pian naalig si Kristo tan say baleg a “lurem na saray tasi” antis to. (Heb. 12:1) Diad tua, nen 1931, nagkalalon abidbir iray lingkor nen Jehova sanen inawat day ngaran a saray Tasi nen Jehova. (Basaen so Isaias 43:10-12.) Kanian, saray tuan patumbok nen Kristo et nagmaliw a ‘totoon atawag ed ngaran na Dios.’​—Gawa 15:14, 17.

13. Panon tayon natoor so kakaukolanen ed sikatayoran natatawag ed ngaran na Dios?

¹³ Panon a natoor na balang sakey ed sikatayo so kakaukolanen ed saray natatawag ed ngaran na Dios? Say sakey a paraan et nepeg a matoor tayon tasian so Dios. Oniay insulat nen Pablo: “‘Balang sakey ya ontatawag ed ngaran nen Jehova et nilaban.’ Balet, panon iran ontawag ed samay agda papanisiaan? Tan panon iran manisia ed samay agda nadngelan? Tan panon dan narengel no anggapoy mangipulong? Tan panon iran manpulong no ag-ira imbaki?” (Roma 10:13-15, NW) Sakey ni, kaukolan tayon mataktikan iwalwal iray katilaan ed relihyon a mamapauges ed Manamalsa tayo. Singa bilang, say bangat nipaakar ed impiernon apuy so ipapakasalanan da ed maaron Dios anta diad tua et maruksan kagagawa itan na Diablo.​—Jer. 7:31; 1 Juan 4:8; ikompara so Marcos 9:17-27.

14. Antoy reaksion na arum sanen naamtaan day ngaran na Dios?

¹⁴ Ibibilang mo kasin kagalangan so natawag ed ngaran na Amam a walad tawen? Tutulongan mo kasi arum pian nakabat da met itan a masanton ngaran? Nadngelan na sakey a biin taga Paris, France, ya amta na saray Tasi nen Jehova so ngaran na Dios. Kanian, sanen walay akatongtong ton Tasi, kinerew to ya ipanengneng ed sikato so ngaran na Dios diad mismon Biblia to. Sanen abasa to so Salmo 83:18, atenyeg so puso to. Sikatoy impaiyaralan na Biblia tan natan et sakey lan matoor ya agi a manlilingkor ed arum a bansa. Sanen primeron anengneng na sakey a Katolikon taga Australia so ngaran na Dios diad Biblia, sikatoy akaakis lapud liket. Natan et pigay taon to lan manseserbi bilang regular payunir. Diad agano ni, diman ed Jamaica, nen impanengneng na saray Tasi ed sakey a bii so ngaran na Dios ed mismon Biblia to, sikatoy akaakis met lapud liket. Kanian ibilang a kagalangan so natawag ed ngaran na Dios. Tan bilang pangalig ed si Jesus, ipakabat ed amin itan a mablin ngaran.

“Agyo Aaroen so Mundo”

15, 16. Antoy panmoria na saray tuan Kristiano nipaakar ed mundo, tan antoray nepeg tayon itepet ed inkasikatayo?

¹⁵ “Agyo aaroen so mundo odino saray bengatlan walad mundo. Siopaman a mangaaro ed mundo et anggapoy panangaro to ed Ama.” (1 Juan 2:15, NW) Say mundo tan say espiritu na satan et sumpa ed si Jehova tan ed masanton espiritu to. Kanian, saray tuan patumbok nen Kristo  et aglabat ompapaliis a magmaliw a kabiangan na mundo, noagta gugulaen da itan. Amta ra “a say pikakaaro ed mundo et . . . pibubusol ed Dios,” unong ya insulat nen babangatan a Santiago.​—Sant. 4:4.

¹⁶ Aliwan mainomay so panumbok ed imbaga nen Santiago, ta dakel so pakatuksoan ed sayan mundo. (2 Tim. 4:10) Satan so rason no akin ya impikasi nen Jesus iray patumbok to: “Agko pikasi ya ekalen mo ra ed mundo, noag ingen ilaban mo ra ed mauges. Ag-ira taga mundo, salanti unong ya agak taga mundo.” (Juan 17:15, 16) Tepetan mo pay inkasika: ‘Kasin panggugunaetan koy agmagmaliw a kabiangan na mundo? Amta kasi na arum so talindeg ko ed saray agmakasulatan a selebrasyon tan kustombre, pati saramay agnanlapud pagano balet ta malinew a mangipapatnag ed espiritu na mundo?’​—2 Cor. 6:17; 1 Ped. 4:3, 4.

17. Antoy nayarin mamakiwas ed saray matuan-impanpuson totoo ya ondapag ed si Jehova?

¹⁷ Seguradon busolen itayo na mundo lapud talindeg tayon nibase ed Biblia, balet nayarin nasagyat so imano na saray matuan-impanpuson totoo. Sano naimano ra a say pananisia tayo et talagan base ed Kasulatan tan napapatnagan itan ed interon kabibilay tayo, nayarin onkiwas ira, a singa da ibabaga ed saray alanaan: “Mila kami naani ed sikayo, ta sikami nadngelan mi a say Dios wala ed sikayo.”​—Zac. 8:23.

Ipatnag so Tuan Kristianon Aro

18. Antoy kabaliksan na pangipatnag na panangaro ed si Jehova tan ed kaparan too?

¹⁸ Inkuan nen Jesus: “Aroen mo so Katawan a Dios mo ed masimoon a pusom, tan dia ed masimoon a kamarerwam, tan dia ed masimoon a nonot mo.” (Mat. 22:37, 39) Satan ya aro (a·gaʹpe diad Griego) et aprinsipyoan, ikokonsidera na satan so obligasyon, prinsipyo tan moralidad, ingen ta kalaktip met na satan so mabiskeg tan aralem a liknaan. (1 Ped. 1:22) Satan so mismon kasunian na inkasiblet, lapud napatnagan itan a panangaro diad pananalita tan kagagawa ya agmakasarili.​—Basaen so 1 Corinto13:4-7.

19, 20. Mangisalaysay na saray eksperiensya a mangipapanengneng a mabiskeg so Kristianon panangaro.

¹⁹ Lapud say aro et papawalaen na masanton espiritu na Dios, sarag na saray tuan Kristiano a gawaen no antoy agnagawaan na arum, singa say panalona ed diskriminasyon ed rasa,  kultura, tan bansa. (Basaen so Juan 13:34, 35; Gal. 5:22) Bektaman a naimatonan na kinmarneron totoo itan a panangaro, talagan napapakiwas ira. Singa bilang, sanen primeron akiaral so sakey a kalangweran a Judio a taga Israel, nandinayewan to so paniiba na saray Judio tan Arabo diad pandadayew ed si Jehova. Lapud saya, sikatoy regular lan akiaral tan impaiyaralan na Biblia. Kasin ipapatnag mo so ontan ya impapuson panangaro ed agagi? Tan kasin pansasagpotan mon abrasaen iray bisita diad Kingdom Hall yo, antokaman ni nanlapuan dan bansa, kolor na baog da, odino panagbilay da?

²⁰ Bilang tuan Kristiano, pampepelengan tayon ipatnag so panangaro ed amin. Alimbawa, diad El Salvador, walay sakey a kalangweran ya agi a mangiyaaral na Biblia ed 87 años a bii a saradon Katoliko. Aminsan, nansakit na grabe so akulaw tan naospital. Nen akasempet la, binmisita ed sikato iray Tasi tan inyawitan day tagano. Manga sakey bulan da iyan ginawa. Balet, anggapon balot so karelihyonan to a binmisita ed sikato. Antoy resulta? Imbantak to ray idolo to, inmekal ed relihyon to, tan intuloy toy panaaral toy Biblia. Talagan mabiskeg so Kristianon panangaro! Mas ontalos itan ed puso nen say salita labat.

21. Panon tayon napagmaliw a seguradon maabig so arapen tayo?

²¹ Agmanbayag, oniay ibaga nen Jesus ed amin a palson Kristiano: “Agta kayo apikabkabatan a balot. Arawi kayo’d siak, sikayo a managgawa na kaugsan.” (Mat. 7:23) Kanian, komon ta mamawala itayo na bunga a kirayewan na Ama tayo tan say Anak to. Inkuan nen Jesus: ‘Amin sirin a makadngel na saraya a salitak, et sumpalen to ra, sikato so niulibay ed sakey a toon makalakal, ya impaalagey toy abung to ed tapew na baton dampay.’ (Mat. 7:24) On, no paneknekan tayo a peteg a papatumbok itayo nen Kristo, abobonan itayo na Dios, tan akaseguro so arapen tayo, a singa itan akaletneg ed baton dampay!

[Paimano ed leksab]

Natandaan Mo ni Kasi?

• Antoy pidumaan na palso tan tuan papatumbok nen Kristo?

• Antoray “bunga” a pakabidbiran na saray tuan Kristiano?

• Ta pian makapawala na maong a bunga, antoray kalat mo?

[Tepetepet Parad Panagaral]

[Litrato ed pahina 13]

Kasin maparanay mon uusaren so Biblia diad ministeryo?

[Litrato ed pahina 15]

Kasin amta na arum so talindeg mo nipaakar ed agmakasulatan iran selebrasyon?