“Ibabaga na Espiritu tan say Nobya: ‘Gala!’”
“Ibabaga na Espiritu tan say Nobya: ‘Gala!’”
“Ibabaga na espiritu tan say nobya: “Gala!” . . . Siopaman a napgaan et ondago komon; siopaman a malabay et mangala komon na libren danum na bilay.”—APO. 22:17, NW.
1, 2. Antoy nepeg a pangipasen tayo ed Panarian na Dios, tan akin?
ANTOY nepeg a pangipasen tayo ed Panarian na Dios? Pinaseseg nen Jesus iray papatumbok to ya ‘anapen da nin unona so panarian,’ tan impaseguro to a no ontan so gawaen da, iter na Dios so nakaukolan da. (Mat. 6:25-33) Inyaliling to so Panarian na Dios ed mabmablin perlas a sanen say sakey ya ombiabiahen negosyante et akalmo ed satan, ‘inlako toy amin a walad sikato tan sinaliw to itan.’ (Mat. 13:45, 46) Agta nepeg met labat ya ipasen tayon sankaimportantian a kimey so panangipulong ed Panarian tan panaggaway babangatan?
2 Unong a naaralan tayo ed apalabas a duaran artikulo, nipanengneng tayon iwawanwan itayo na espiritu na Dios no makpel itayon mangiyaabawag ed Salita na Dios tan marundunong a manguusar ed satan diad ministeryo. Satan met ya espiritu so ontulong na baleg ed regular a pibiang tayo ed panagpulong. Nengnengen tayo no panon.
Imbitasyon Parad Amin!
3. Anton klase na danum so iyoopresi ed amin a totoo?
3 Walay iyiimbita ed amin a totoo panamegley na masanton espiritu. (Basaen so Apocalipsis 22:17.) Iimbitaan iran ondago tan oninum na sankaespesyalan a klase na danum pian naandi so pakakapgaan da. Balet, aliwa iyan literal a danum. Anggaman importante itan pian nabilay so amin a pinalsa, aliwan satan so natutukoy dia. Sananey so tinukoy nen Jesus sanen inkuan to ed sakey a Samaritana diad abay na bobon: “Siopaman ya oninum ed danum ya iter ko ed sikato et agbalot napegaan, ta say danum ya iter ko ed sikato et magmaliw a singa subol na danum ed loob to a mansusbol pian mangiter na bilay ya andi-anggaan.” (Juan 4:14, NW) Sayan nikadkaduman danum ya iyiimbitan inumen na totoo et mangiter na bilay ya andi-anggaan.
4. Panon a linmesa so pankaukolan ed danum na bilay, tan antoy isisimbolo na satan a danum?
4 Linmesay pankaukolan ed sayan klase na danum sanen agtinulok na inmunan laki, si Adan, tan say asawa to a si Eva, so amalsa ed sikara, salanti si Jehova a Dios. (Gen. 2:16, 17; 3:1-6) Pinataynan iyan inmunan sanasawa ed hardin ya ayaman da ta ‘ompan iyunat nen Adan so lima to, tan mangala met ed kiew na bilay, et nabilay lawas.’ (Gen. 3:22) Lapud ananak nen Adan so amin a totoo, nipatawir to’d sikara so ipapatey. (Roma 5:12) Isisimbolo na danum na bilay so amin a probisyon na Dios a mangekal ed kasalanan tan patey ed matulok a totoo, tan mangipagamor ed sikara na andi-anggaan tan perpekton bilay diad Paraison dalin. Niwala irayan probisyon lapud dondon bagat nen Jesu-Kristo.—Mat. 20:28; Juan 3:16; 1 Juan 4:9, 10.
5. Siopa so lapuan na imbitasyon a ‘mangala na libren danum na bilay’? Ipaliwawa.
5 Siopa so lapuan na imbitasyon a ‘mangala na libren danum na bilay’? Amin a probisyon ed bilay panamegley nen Jesu-Kristo a sigpot a nitarya ed katooan legan na Sanlibon Taon ya Uley to et niyaliling ed “sakey a malinis ya ilog na danum na bilay a manesiab a singa kristal.” Satan ya ilog et nanengneng ya “ompapaway ed trono na Dios tan say Kordero.” (Apo. 22:1) Kanian, say Manangiter-Bilay a si Jehova so Lapuan na satan a danum. (Sal. 36:9) Iiter to itan panamegley na ‘Kordero,’ si Jesu-Kristo. (Juan 1:29) Sayan simbolikon ilog so paraan nen Jehova pian ekalen ed katooan so amin a mauges ya epekto na ag-intulok nen Adan. On, si Jehova a Dios so Lapuan na imbitasyon a “gala.”
6. Kapigan ginmapon inmagus so “ilog na danum na bilay”?
6 Anggaman say sigpot ya iyagus na “ilog na danum na bilay” et legan na Sanlibon Taon ya Uley nen Kristo, inmagus la itan diad “agew na Katawan,” a ginmapo nen 1914 sanen nagmaliw ya ari ed tawen so “Kordero.” (Apo. 1:10) Kanian, kayari na satan et walaray intaryan probisyon ed bilay. Kaiba’d satan so base ed Biblia iran probisyon, ta say mensahe to et tatawagen a “danum.” (Efe. 5:26) Iimbitaan so amin a ‘mangala ed danum na bilay’ diad idengel ed maong a balita na Panarian tan onkiwas base ed satan. Balet, diad agew na Katawan, siopa so mangipapasabi na imbitasyon?
Inkuan na “Nobya: Gala!”
7. Diad “agew na Katawan,” sioparay inmunan angipasabi na imbitasyon a “gala”, tan sioparay inimbitaan?
7 Say inmunan angipasabi na imbitasyon a “gala” et saray membro na nobya, salanti saray Kristianon nilanaan na espiritu. Sioparay inimbitaan da? Siempre, aliwan say inkasikara, noagta saramay maniilalon manbilay na andi-anggaan diad dalin kayari na “bakal na baleg ya agew na Dios, a Makapanyarin-amin.”—Basaen so Apocalipsis 16:14, 16.
8. Antoy mangipapanengneng a manlapu la nen 1918 et ipapasabi na saray alanaan a Kristiano so imbitasyon nen Jehova?
8 Manlapu la nen 1918, mangiimbita lay alanaan a papatumbok nen Kristo. Diad saman a taon, naikday ilalo so katooan lapud paliwawa ed publiko a “Saray Minilyon a Mabilay Natan et Aglan Balot Ompatey.” Naamtaan dan dakel so makapambilay diad paraison dalin kayari na bakal ed Armagedon. Diad sakey a paliwawa nen 1922 diad kombension na saray Estudyante na Biblia ed Cedar Point, Ohio, U.S.A., pinaseseg iray inmatendi ya ‘iyabawag da so Ari tan say panarian to.’ Lapud sayan kerew, atulongan iray nakekeraan a membro na nobya pian mas dakel nin totoo so naimbitaan. Nen 1929, diad isyu na The Watchtower a Marso 15 et walay artikulon atituloan na “Alay Abig ya Imbitasyon,” tan say pinagkateman teksto na satan et Apocalipsis 22:17. Diad satan et oniay nabasa: “Kaiba na matoor a nakdaan [so Sankatagyan] a mangiimbita tan mangibabagay, ‘Gala.’ Sayan mensahe et kaukolan ya ipasabi ed saramay manpipilalek ed inkatunong tan katuaan. Kaukolan a gawaen itan natan.” Anggad sayan panaon et siansia nin mangiimbita so nobya.
“Siopaman ya Onderengel et Ikuan To Komon: ‘Gala!’”
9, 10. Panon a saramay inimbitaan et mangiimbita met ed arum a mangibaga na “Gala!”?
9 Komusta balet iramay akadngel ed imbitasyon a “gala”? Naimbitaan met iran mangibagay, “Gala!” Singa bilang, diad isyu na The Watchtower ya Agosto 1, 1932 et oniay nabasa ed pahina 232: “Saray amin a mibiang ed pangiyabawag na maong a balita na panarian et pasesegen komon na saray alanaan. Agkaukolan ya alanaan ira pian niyabawag day mensahe na Katawan. Naliliketan iray tasi nen Jehova natan diad pakaamtan naabuloyan iran mangipasabi ed danum na bilay diad totoon nayarin makaliktar ed Armagedon tan nawalaay andi-anggaan a bilay diad dalin.”
10 Pian lalon nipaimano so responsabilidad na saray akaawat na imbitasyon a mangibagay “Gala!,” oniay nabasa ed The Watchtower na Agosto 15, 1934, pahina 249: “Nepeg ya ibaan na saramay kabiangan ed grupon Jonadab so simboliko a grupon Jehu, salanti, say alanaan, tan iyabawag day mensahe na panarian anggaman ag-ira kabiangan ed saray alanaan a tasi nen Jehova.” Nen 1935, nipalinew so nipaakar ed “baleg ya ulop” ya abitla’d Apocalipsis 7:9-17. Kanian lalon pinmeles so kimey a panangipasabi ed imbitasyon na Dios. Manlapu la’d saman, say lalon ondarakel a baleg ya ulop na tuan managdayew, a say bilang da natan et masulok lan pitoran milyon, so angawat ed satan ya imbitasyon. Diad impakadngel da’d mensahe, indedika ray inkasikara ed Dios, nampabautismo, tan akitulongan ed nobya diad impangimbita ed arum ya ‘oninum na libren danum na bilay.’
Inkuan na ‘Espiritu: Gala!’
11. Nen inmunan siglo C.E., panon a tinmulong so masanton espiritu diad panagpulong?
11 Sanen manpupulong si Jesus diad sinagoga ed Nazaret, nilukasan toy lukot nen propeta Isaias tan imbasa to: “Say espiritu na Katawan wala ed siak, ta nilanaan to ak a mangipulong na saray maong a balita ed saray duruka. Imbaki to ak a mangipakabat na kawayangan ed saray arakep, tan say pangipawil na pakanengneng na saray bulag, pian ibulos ko so saray nanaaposan. Pian yabawag ko so makapaliket a taon na Katawan.” Insan pian tukoyen so inkasikato, oniay inkuan to: “Natan ya agew asumpal ed kalayagan yo so sayan sulat.” (Luc. 4:17-21) Antis na insegep to ed tawen, inkuan to ed saray disipulo to: “Makaawat kayo na pakayari sano onsabi ed sikayo so masanton espiritu, tan mantasi kayo nipaakar ed siak . . . diad sankaarawian a pasen na dalin.” (Gawa 1:8, NW) On, nen inmunan siglo et baleg so agawaan na masanton espiritu diad panagpulong.
12. Diad panaon tayo, panon ya ontutulong so espiritu na Dios diad panangimbita ed saray totoo?
12 Diad panaon tayo, panon ya ontutulong so masanton espiritu na Dios diad panangimbita ed saray totoo? Si Jehova so Lapuan na masanton espiritu. Uusaren to iyan espiritu pian lukasay kapusoan tan kanonotan na saray membro na nobya pian natalosan day Salita to, say Biblia. Papakiwasen ira na sayan espiritu a mangimbita tan mangipaliwawa na saray katuaan na Kasulatan ed saramay maniilalon manbilay na andi-anggaan diad Paraison dalin. Saraman balet ey so mangaawat ed imbitasyon tan magmamaliw a disipulo nen Jesu-Kristo, insan mangiimbita met ed arum? Seguradon agmet ira papaulyanan na espiritu. Lapud abautismoan ira ‘ed ngaran na masanton espiritu,’ sikaray mikokoopera tan manmamatalek ed tulong na satan. (Mat. 28:19, NW) Sakey ni, say mensahen ipupulong na alanaan tan say ondarakel a baleg ya ulop et nanlapu ed Biblia, say libron nisulat lapud direktan panangiwanwan na espiritu na Dios. Nipapasabi sirin so imbitasyon panamegley na masanton espiritu. Diad tua et iwawanwan itayo na satan ya espiritu. Kanian, antoy nepeg ya epekto na satan ed karukey na panaon ya uusaren tayo diad pangiimbita ed arum?
‘Ibabaga Ra, Gala!’
13. Antoy ipapatnag na balikas ya “ibabaga na espiritu tan say nobya: ‘Gala!’”?
13 Say “espiritu tan say nobya” et aglabat la basta angibagay “Gala!” Diad orihinal a lenguahe, say salitan inusar et mangipapanengneng na tuloytuloy a kiwas. Lapud satan, oniay nabasa ed New World Translation: “Ibabaga na espiritu tan say nobya: ‘Gala!’” Say pupuntoen to sirin et say inkamaparanay a pangipasabi ed imbitasyon na Dios. Komusta balet iramay akadngel tan angawat ed imbitasyon? Sikaray mangibabaga met na “Gala!” Say baleg ya ulop na saray tuan managdayew et asalambit a ‘manlilingkor ed agew tan labi diad templo nen Jehova.’ (Apo. 7:9, 15) Panon a nibagan ‘manlilingkor ira ed agew tan labi’? (Basaen so Lucas 2:36, 37; Gawa 20:31; 2 Tesalonica 3:8.) Ipapanengneng na alimbawa na maedad lan propetesa a si Ana tan si apostol Pablo a say ‘panlingkor ed agew tan labi’ et mankabaliksay inkamaparanay tan inkaseseg ed ministeryo.
14, 15. Panon ya impanengneng nen Daniel ya importante so regular a panagdayew?
14 Impanengneng met nen propetan Daniel ya importante so regular a panagdayew. (Basaen so Daniel 6:4-10, 16.) Niyugali toy manpikasi ed Dios a ‘mamitlo ed sanagew, a singa gagawaen to la nen inmunan panaon.’ Balet, agto inuman itan a rotina to ed espiritual anggan sakey bulan labat, anggano amta ton sikatoy ibantak ed ungib na saray leon. Malinlinew ed saray akaimaton ya anggapo lay mas importante ni ed si Daniel nen say regular a panagdayew ed si Jehova!—Mat. 5:16.
15 Kayari na sanlabi ed ungib na leon, si Daniel et nila na ari tan oniay inkelyaw to: “O Daniel, aripen na mabilay a Dios, say Dios mo, a sikato so panlilingkoran mo a naynay, masarag a mangilaban ed sika ed saray leon?” Et tampol ya inmebat si Daniel: “O ari, manbilay ka komon a maando. Say Dios ko imbaki to so anghel to, tan pinepet to so saray sangi na saray leon, tan agda ak inano, bangta diad arap to say kaalasan sikato so aromog ed siak, et ontan met ed arap mo, O ari, anggapo so ginawak a dumsis.” Benendisyonan nen Jehova si Daniel lapud impanlingkor ton “naynay.”—Dan. 6:19-22.
16. Base ed alimbawa nen Daniel, antoray nitepet tayo’d inkasikatayo nipaakar ed pibibiang ed ministeryo?
16 Mas nilabay ni nen Daniel so ompatey nen say paulyanan so rotina to ed espiritual. Sikatayo met ey? Antoray pansasagpotan tayo natan odino mabulos a pansagpotan ni ed arapen pian maparanay tayon niyabawag so maong a balita na Panarian na Dios? Nepeg ya agtayon balot aabuloyan ya onlabas so sakey bulan ya agtayo nitongtong ed arum so nipaakar ed si Jehova. Anggad posible, agta nepeg a panggunaetan tayoy mibiang ed ministeryo a sinimba-simba? Anggano limitado lay nagawaan tayo tan diad loob na sakey bulan et 15 minutos labat so nasarag tayo, ireport tayo nin siansia itan. Akin ey? Lapud pilalek tayon itultuloy ya ibagay, “Gala!,” kaiba so espiritu tan say nobya. On, labay tayon gawaey anggaay nayarian tayo pian makapansiansian regular a manangipalapag na Panarian.
17. Antoran pankanawnawa so agtayo palampasen pian nipasabi tayoy imbitasyon nen Jehova?
17 Nepeg a panggunaetan tayon ipasabi so imbitasyon nen Jehova ed amin a pankanawnawa, aliwa labat a diad inggana tayon eskedyul a manpulong. Balanglan sikatayoy mititindaan, manbiabiahe, manbabakasyon, walad trabaho, odino paonla ed eskuelaan, pribilehyon baleg so pangimbita ed saray napepegaan pian ‘mangala na libren danum na bilay’! Anggano sesebelan na saray walad pakauley so panagpulong tayo, siansia nin manpupulong itayo, ingen ta maalwar, a nayarin agtayo dasigen iray laen tayon abung odino dakelan tayo lay panaon tayo ed impormal a panagtasi.
Itultuloy ya Ibagay, “Gala!”
18, 19. Panon mon nipanengneng a papablien moy pribilehyom bilang kakimeyan na Dios?
18 Diad masulok lan siameran dekada, say espiritu tan say nobya et mantutultuloy a mangibabagay “Gala!” ed siopaman a napepegaan ed danum na bilay. Kasin nadngelan mo la iyan makapalikliket ya imbitasyon da? No ontan, komon ta iyimbitam met iya ed arum.
19 Agtayo amta no anggad kapigan so maaron pangiimbita nen Jehova, balet no onkiwas itayo met diad pangibagay, “Gala!,” magmaliw itayon kakimeyan na Dios. (1 Cor. 3:6, 9) Talagan pribilehyo itan! Ipanengneng tayo komon a papablien tayo itan a pribilehyo tan ‘naynay itayon mangisaklang na bagat a panangidayew ed Dios’ panamegley na regular a pibiang ed panagpulong. (Heb. 13:15) Komon ta sikatayoran maniilalon manbilay diad dalin et mikasakey ed nobya diad pantultuloy a pangibagay, “Gala!” Tan komon ta dakel ni so ‘makalay libren danum na bilay’!
Antoy Naaralan Mo?
• Diad samay imbitasyon a “gala,” sioparay inimbitaan?
• Akin a nibagan nanlapud si Jehova so imbitasyon a “gala”?
• Antoy betang na masanton espiritu diad panangipasabi ed imbitasyon a “gala”?
• Akin a nepeg tayon panggunaetan so pagmaliw a regular ed ministeryo?
[Tepetepet Parad Panagaral]
[Tsart/Saray litrato ed pahina 16]
(Para aktual a format, nengnengen a publikasyon)
Itultuloy ya Ibagay, “Gala!”
1914
5,100 a manangipalapag
1918
Dakel so makagamor na bilay diad Paraison dalin
1922
“Iyabawag, iyabawag, iyabawag, so Ari tan say panarian to”
1929
Say matoor a nakdaan et mangibabagay, “Gala!”
1932
Diad samay imbitasyon a mangibagay “Gala!,” aliwa labat a saray alanaan so naimbitaan
1934
Naimbitaan a manpulong so grupon Jonadab
1935
Nipalinew so nipaakar ed “baleg ya ulop”
2009
7,313,173 a manangipalapag