Kasin Momoriaen Yo si Jehova Bilang Ama Yo?

“KATAWAN, ibangat mo kamin manpikasi.” Sanen kinerew itan na sakey ed saray disipulo nen Jesus, oniay inyebat to: “Sano manpikasi kayo, ibaga yo, ‘Ama, napasanto komon so ngaran mo.’” (Luc. 11:1, 2, NW) Sarag komon a tawagen nen Jesus si Jehova diad pangusar to’d makapadinayew iran titulo a singa say “Makapanyarin-amin,” ‘Matalonggaring a Managbangat,’ “Manamalsa,” “Masiken na Saray Ag-agew,” tan “Ari ya andi-angga.” (Gen. 49:25; Isa. 30:20; 40:28; Dan. 7:9; 1 Tim. 1:17) Imbes, pinili nen Jesus so terminon “Ama.” Akin? Lapud labay to a makaasingger itayo ed sankatagyan a Persona ed uniberso a singa ed iyaasingger na sakey a mapaabeban ugaw ed maaron ama to.

Balet, naiirapan so arum a mangipasen ed Dios bilang Ama ra. Onia so inaksobi na Kristianon manngaran na Atsuko, * “Diad loob na pigaran taon kayari na impanpabautismok, nairapan ak ya onapit ed si Jehova tan manpikasi ed sikato a singa Ama.” Onia so imbaga ton rason no akin ya ontay nalilikna to: “Agko nanonotan no kapigan so impangipalikna nen tatay ko na panangaro to ed siak.”

Diad sarayan mauges a kaunoran iran agew, say ‘panangaro ed kapamilyaan’ ya iilaloan ed saray atateng a lalaki et ombebetel. (2 Tim. 3:1, 3, NW) Kanian agtayo la pankelawan a dakel met so makakalikna ed samay alikna nen Atsuko. Balet, walaan itayoy makatunongan iran rason pian moriaen si Jehova bilang maaron Ama tayo.

Si Jehova​—Maaron Manangitarya

No labay tayon magmaliw a singa Ama tayo si Jehova, nepeg a sikatoy kabaten tayon maong. “Anggapoy sigpot a makapikabat ed Anak noag say Ama, tan anggapo met so sigpot a makapikabat ed Ama noag say Anak tan say siopaman a labay a pangipaamtaan na Anak.” (Mat. 11:27, NW) Say sankaabigan a paraan pian nakabat tayo si Jehova bilang Ama et diad pandalepdep ed saray imparungtal nen Jesus nipaakar ed tuan Dios. Anto sirin iray imparungtal nen Jesus nipaakar ed Ama?

Diad impamidbir ed si Jehova bilang Subol na bilay to, inkuan nen Jesus: “Manbilay ak lapud Ama.” (Juan 6:57) Diad tua et utang tayo met ed Ama so kiwawala tayo. (Sal. 36:9; Gawa 17:28) Antoy amakiwas ed si Jehova pian inabang so bilay ed arum? Agta lapud aro? Kanian, manepeg labat ya aroen tayo so mangatatawen ya Ama tayo lapud satan a regalo.

Say sankatalonggaringan ya impangipatnag na Dios na panangaro to’d katooan et say impangiter to ed si Jesus bilang bagat. Lapud satan, nagmaliw a posible ed saray makasalanan a totoo so pakawalaan na maapit a relasyon ed si Jehova panamegley na inad-aro ton Anak. (Roma 5:12; 1 Juan 4:9, 10) Tan lapud say mangatatawen ya Ama tayo et Mananumpal na saray sipan to, makaseguro itayo a napanggayagaan na amin a mangaaro tan ontutulok ed sikato so ‘maglorian kawayangan na saray anak na Dios.’​—Roma 8:21.

Ontan met, say mangatatawen ya Ama tayo et ‘papabutayen’ to a naynay so agew parad sikatayo. (Mat. 5:45) Diad tua et agtayo la kaukolan ya ipikasi ni so ibutay na satan. Balet ta, talagan kaukolan tan panggagayagaan tayo so ampetang a sinag to! Kaaruman ni, say Ama tayo et agnaparaan a Manangitarya, a makaamta ed saray materyal a pankaukolan tayo antis nin kerewen tayo itan ed sikato. Kanian, agta maabig no mangigana tayoy panaon pian obserbaan tan maapresyan dalepdepen no panon so  pangaasikaso na mangatatawen ya Ama tayo ed saray pinalsa to?​—Mat. 6:8, 26.

Say Ama Tayo​—“Maaron Mananalimbeng”

Pinaseguroan na propesiya nen Isaias iray totoo na Dios nensaman: “Nakusbo iray kapalandeyan tan saray kapukdolan, balet say pikakaarok ed sika odino say sipan kon mangiter na kareenan et agmangangga, kuan nen Jehova a maaron mananalimbeng mo.” (Isa. 54:10, The Bible in Living English) Pian nidanet iyan punto, nipatnag ed samay pikakasi nen Jesus ed unor lan labi na bilay to diad dalin a si Jehova et talagan “maaron mananalimbeng.” Oniay impikasi nen Jesus parad saray disipulo to: “Wadia ra ed sayan mundo tan onla ak la ed sika. Masanton Ama, bantayan mo ra nisengeg ed ngaran mo.” (Juan 17:11, 14, NW) On, binantayan tan sinalimbengan nen Jehova iray papatumbok nen Jesus.

Say sakey a paraan ya uusaren nen Jehova pian nasalimbengan tayo’d saray pakana nen Satanas et say pangitatarya toy nipanpanaon ya espiritual a tagano panamegley na “matoor tan makabat ya aripen.” (Mat. 24:45) Importanti so pangan tayo ed satan a makapabiskeg a tagano no labay tayon ‘isulong so kompleton armas ya inter na Dios.’ Ikonsidera pa bilang alimbawa so “baleg a samper na pananisia” a lapud satan et nayarian tayon ‘erepen iray amin a mandarlang a pana na samay mauges.’ (Efe. 6:11, 16, NW) Say pananisia tayo so manprotekta ed sikatayo sumpad espiritual a kapeligroan tan paneknek itan ed pakayari na Ama tayo a manalimbeng.

Mas dakel ni naaralan tayo ed inkamaaro na mangatatawen ya Ama tayo diad maapit a pangonsidera ed inkiwas na Anak na Dios sanen sikatoy wadiad dalin. Imanoen pa imay agawa ya akarekord ed Marcos 10:13-16. Diman et imbaga nen Jesus ed saray disipulo to: “Paulyan yo so saray angkekelag ya ugugaw ya ondago ed siak.” Sanen inmasingger ed si Jesus iraman ya ugugaw, sikaray maaron nilakap tan benendisyonan to. Talagan sankapatnagan so liket da! Tan lapud imbaga nen Jesus a “Say akanengneng ed siak anengneng to so Ama,” amta tayo a labay na tuan Dios ya onasingger tayo ed sikato.​—Juan 14:9.

Si Jehova a Dios et agmanganggan Lapuan na aro. Sikato so agnaparaan a Manangitarya tan Mananalimbeng, a labay ton onapit tayo ed sikato. (Sant. 4:8) Kanian si Jehova labat so sankaabigan ya Ama!

No Panon Itayon Nagunggonaan!

Nagunggonaan itayo no manmatalek tayo’d si Jehova bilang maaron mangatatawen ya Ama tayo. (Uli. 3:5, 6) Agunggonaan si Jesus lapud sigpot ya impanmatalek to ed Ama to. “Agko bukbukor,” so inkuan nen Jesus ed saray disipulo to, “noagta kaibak so Ama ya angibaki ed siak.” (Juan 8:16, NW) On, si Jesus et lawas a tutulongan nen Jehova. Singa bilang, sanen sikatoy abautismoan et naawat toy maaron panamaseguro na Ama to ya angikuan: “Saya so Ana’ko ya inadarok, napaliketak a maong ed sikato.” (Mat. 3:15-17) Insan, antis a tuloy na ipatey to et oniay inkelyaw nen Jesus: “Ama, dia ed saray limam imatalek ko so espirituk.” (Luc. 23:46) Talagan mabiskeg so talek nen Jesus ed si Ama to.

Ontan met ed sikatayo natan. Lapud si Jehova et walad abay tayo, anto ni takotan tayo? (Sal. 118:6) Niyugali nen Atsuko, ya asalambit ed gapo na artikulo so manmatalek ed dilin biskeg to sano walaray problema to. Balet, ginapoan ton inaral so bilay tan ministeryo nen Jesus nagkalalo la’d samay maapit a relasyon to ed mangatatawen ya Ama to. Antoy resulta? Inkuan nen Atsuko: “Naaralan ko no antoy kabaliksan na pakawalaan na Ama tan say panmatalek ed sikato.” Inyarum to ni: “Agamoran koy peteg a kareenan tan liket. Talagan anggapoy rason pian pampagaan so antokaman a bengatla.”

Panon itayo nin nagunggonaan diad pangipasen ed si Jehova bilang Ama tayo? Seguradon inaro tan labay a paliketen na saray ananak iray atateng da. Lapud inad-aro na Anak na Dios so Ama to, ‘lawas ton gagawaen iray bengatla a makapaliket ed Ama to.’ (Juan 8:29) Ontan met, say panangaro tayo ed mangatatawen ya Ama so mamaseseg ed sikatayon onkiwas a sikakabat tan ‘mangidayew ed sikato diad arap na totoo.’​—Mat. 11:25, NW; Juan 5:19.

 Say Ama Tayo so ‘Mangitatagey ed Kawanan a Lima Tayo’

Angitarya met so mangatatawen ya Ama tayo na “mananulong,” salanti, say masanton espiritu. “Itonton to kayo ed amin a katuaan,” so inkuan nen Jesus. (Juan 14:15-17, NW; 16:12, 13) Sarag itayon iwanwan na masanton espiritu na Dios pian mas natalosan tayo so nipaakar ed Ama tayo. Ontulong met itan ed sikatayo pian “nigeba iray malmalet ya akaletneg,” salanti, saray abangonan, lingo, odino pikewet iran panmoria, tan diad ontan et ‘napasuko tayo so balang kanonotan pian magmaliw itan a matulok ed Kristo.’ (2 Cor. 10:4, 5, NW) Kanian, manpikasi itayo ed si Jehova parad samay nisipan a “mananulong,” tan manmatalek a “say Ama ed tawen et mas lalon mangiter na masanton espiritu ed saramay onkekerew ed sikato.” (Luc. 11:13, NW) Matukoy met so pangipikasi ed tulong na masanton espiritu pian mas onapit itayo ed si Jehova.

Nalilikna na sakey ya ugaw a sikatoy protektado, maligen, tan agnatatakot no sikatoy sankatabin na ama to. No momoriaen yo si Jehova bilang Ama yo, makapanmatalek kayo ed sayan makaligliwan balikas: “Siak si Jehova a Dios mo, a mangitagey na kawanan a limam, a kuan ko ed sika, Agka antakot tulongan [ta] ka naani.” (Isa. 41:13) On, walaan kayoy nikadkaduman pribilehyo a “manakar” a kaiba so Dios ed andi-anggaan. (Miq. 6:8) Itultuloy yon gawaen iray panlabayan to, tan naeksperiensya yoy aro, gayaga, tan inkaligen a nagamoran diad pamidbir ed si Jehova bilang Ama yo.

[Paimano ed leksab]