Marundunong ya Usaren so ‘Espada na Espiritu’
Marundunong ya Usaren so ‘Espada na Espiritu’
“Awat yoy . . . espada na masanton espiritu, salanti, say salita na Dios.”—EFE. 6:17, NW.
1, 2. Lapud kaukolan so dakel a manangiyabawag na Panarian, antoy nepeg tayon gawaen?
SANEN atebek nen Jesus so espiritual a pankaukolan na dakerakel a totoo, oniay inkuan to’d saray disipulo to: “Dakel . . . so aanien, daiset ira balet so manani. Pikasi yo sirin ed Katawan na aanien, pian mangibaki na saray manani ed aanien to.” Aliwan angangga’d salita labat si Jesus ta kayari ton imbaga itan et ‘tinawag to ray labinduan babangatan to’ tan imbaki to ran manpulong odino “manani.” (Mat. 9:35-38; 10:1, 5) Insan, sikatoy “anuro na arum a pitomplo, tan imbaki to ra a sanderwa” pian ontan met so gawaen da.—Luc. 10:1, 2.
2 Diad sayan panaon, kakkaukolan met so dakel a manangiyabawag na Panarian. Say inmatendi ed Memoryal diad sankamundoan nen 2009 serbisyon taon et 18,168,323. Mas dakel ni itan na 10 milyon nen say bilang na saray Tasi nen Jehova. On, akaparaan lan anien so uma. (Juan 4:34, 35) Kanian, kaukolan tayon ipikasi tan kerewen so kaaruman niran komikimey. Balet, base ed satan a kerew tayo, antoy nepeg tayon gawaen? Kaukolan a magmaliw itayon mas epektibon ministro legan a maseseg tayon ipupulong so Panarian tan manggagaway babangatan.—Mat. 28:19, 20; Mar. 13:10.
3. Panon ya ontutulong so espiritu na Dios pian magmaliw itayon mas epektibon ministro?
3 Naaralan tayo ed imbeneg ya artikulo a makanakana so panangigiya na espiritu na Dios pian ‘makmakpel a niyabawag so salita na Dios.’ (Gawa 4:31, NW) Satan ya espiritu so ontulong met pian magmaliw itayon marundunong a ministro. Say sakey a paraan pian mas epektibo itayo ed ministeryo et diad dugan pangusar ed sankaabigan a kagawaan ya intarya nen Jehova a Dios, salanti say Salita to, say Biblia. Apawala itan panamegley na masanton espiritu. (2 Tim. 3:16) Say mensahe na satan et pinuyanan na Dios. Kanian, sano marundunong tayon usaren so Biblia diad ministeryo, paiwawanwan itayo ed masanton espiritu. Balet, antis tayon pantongtongan no panon tayon nagawaan itan, amtaen tayo ni no panon kabiskeg itan a Salita.
‘Mabisbiskeg so Salita na Dios’
4. Anton pananguman so nagawaan na Biblia ed bilay na sakey a too?
4 Agaylay biskeg na salita odino mensahe na Dios! (Heb. 4:12) Say mensahen manlalapud Biblia et aliling toy mas makdem nen say dinanman ya espada, ta ontalos itan ya anggad pansian na pukepukel tan utek na satan. Natanek na katuaan manlapud Biblia so sankaaraleman a kanonotan tan liknaan na too, tan niparungtal to no anton talagay inkatoo na sakey. Satan a katuaan et mabisbiskeg a makapanguman ed sakey a too. (Basaen so Colosas 3:10.) On, sarag na Salita na Dios ya umaney bilay!
5. Antoray paraan a niwanwan itayo na Biblia, tan antoy resulta?
5 Niarum ni, walad Biblia so kakabatan ya agnaromog ed arum a libro. Karga na satan iray impormasyon ya ontulong ed saray totoo no panon so pambilay ed sayan magulon mundo. Say Salita na Dios et aglabat manliliwawa ed mismon dadakatan tayo noag pati diad basbas tayo. (Sal. 119:105) Balbaleg so nitulong na saya sano napoproblema itayo odino sano mandedesisyon itayo nipaakar ed panagpili na kakaaro, panagligliwaan, trabaho, kawes, tan arum nira. (Sal. 37:25; Uli. 13:20; Juan 15:14; 1 Tim. 2:9) Say pangiyaplika ed saray prinsipyon naromog ed Salita na Dios et ontulong ed sikatayo pian maabig so pidedeneng tayo’d arum. (Mat. 7:12; Fil. 2:3, 4) No aliling to et maliwliwawa so basbas tayo, natebek tayo no antoy epekto ed arapen na saray desisyon tayo. (1 Tim. 6:9) Ipapaamta met na Kasulatan so gagala na Dios ed arapen, ya ontulong pian makapambilay itayo unong ed satan. (Mat. 6:33; 1 Juan 2:17, 18) Talagan makabkabaliksan so bilay na sakey sano sikatoy paigiya ed saray prinsipyo na Dios!
6. Diad espiritual a pibabakal tayo, panon kabiskeg ya armas so Biblia?
6 Isipen pa met no panon kabiskeg ya armas so Biblia diad espiritual a pibabakal tayo. Say impanawag nen Pablo ed salita na Dios et “kampilan [odino espada] na espiritu.” (Basaen so Efeso 6:12, 17.) No dugay pangusar tayo ed mensahe na Biblia, nibulos iray totoo ed espiritual a panangaripen nen Satanas. Satan ya espada et manangisalbay bilay imbes a mamatey. Agta nepeg labat a pansagpotan tayon usaren itan diad marundunong a paraan?
Usaren Itan ed Dugan Paraan
7. Akin ya importantin kabisadoen so pangusar ed ‘espada na espiritu’?
7 Nakabisado labat na sakey a sundalo no panoy dugan pangusar ed armas to no sikatoy nanaral tan nampasal a maong. Mipara itan ed panangusar ed ‘espada na espiritu’ diad espiritual a pibabakal tayo. Oniay insulat nen Pablo: “Gawam so anggaay nayarian mo ya iyarap so inkasika ed Dios bilang makanepegan na panangabobon to, sakey a komikimey ya anggapoy nepeg ton ibaing, a dugay panguusar to ed salita na katuaan.”—2 Tim. 2:15, NW.
8, 9. Antoy makatulong pian natalosan tayo so ibabaga na Biblia? Mangiter na alimbawa.
8 Antoy makatulong ed sikatayo pian ‘dugay pangusar tayo ed salita na katuaan’ diad ministeryo? Antis tayon ninabang ed arum so ibabagay Biblia diad malinew a paraan, kaukolan a natatalosan tayo itan a mismo. Nepeg sirin ya imanoen tayon maong iray konteksto na saray balikas odino sakey a bersikulo. Unong ed sakey a diksionaryo, “say konteksto na sakey a salita odino balbalikas et saramay salita odino balbalikas antis tan kayari na satan, a mamalinew ed kabaliksan.”
9 Pian dugay pakatalos ed sakey a teksto, kaukolan a natatalosan tayo iray akapaliber a bersikulo. Say sakey ya alimbawa ed satan et samay insulat nen Pablo diad Galacia 5:13 ya oniay nabasa: “Sikayo, agagi, atawag kayo ed kabubulos; salambengat ya agyo agamilen komon so inkabulos nipaakar ed kakanaan na laman, noag ingen lapu ed aro magmaliw kayo ya ariripey sakey tan sakey.” Anto yay kabubulos a sinalambit nen Pablo? Kasin say tutukoyen to et kibulos ed kasalanan tan ipapatey, odino kibulos ed panangaripen na palson bangabangat, odino wala ni sananey? Ipapanengneng na konteksto a say sasalitaen nen Pablo et samay ‘impakabulos ed ayew na Ganggan.’ (Gal. 3:13, 19-24, NW; 4:1-5) Tutukoyen to so kawayangan bilang Kristiano. Saramay mamapabli ed satan a kawayangan et manpapaaripen ed sakey tan sakey lapud aro. Saraman balet so agmamapabli et manpapaugesan tan mankokolkol.—Gal. 5:15.
10. Pian dugay pakatalos ed kabaliksan na Kasulatan, anton impormasyon so amtaen tayo, tan iner tayo naala itan?
10 Pian duga so pakatalos ed kabaliksan na sakey a teksto, kaukolan tayon amtaen so makatulong iran impormasyon, a singa say angisulat ed satan a libro na Biblia, kapigan itan insulat, tan antoray kipapasen. Makatulong met so pangamta ed gagala no akin ya insulat itan a libro, tan no posible et pati say kipapasey komunidad, moralidad, tan relihyon na totoo legan ya isusulat itan. *
11. Antoy nepeg tayon panalwaran sano mangipapaliwawa na teksto?
11 Pian sustoy pangipaliwawa tayo ed saray katuaan a walad Kasulatan, kaukolan ya aliwa labat lan ‘duga so pangusar tayo ed salita na katuaan,’ noagta nepeg ya agtayo uusaren so Biblia a pamagyaw ed totoo. Anggaman sarag tayon idepensay katuaan panamegley na Biblia, a singa ginawa nen Jesus sanen sikatoy tinukso na Diablo, agtayo uusaren itan pian pabaingan iray katongtong tayo odino pian ipilit iray sisisiaen tayo. (Deu. 6:16; 8:3; 10:20; Mat. 4:4, 7, 10) Nepeg tayon tumboken iyan bilin nen apostol Pedro: “Awat yo ed puso yo a say Kristo a Katawan et masanto, a naynay kayon akaparaan ya onebat ed amin a mantetepet ed sikayo nipaakar ed ilalo yo, balet gawa yo itan tekep na inkaulimek tan aralem a respeto.”—1 Ped. 3:15, NW.
12, 13. Antoray ‘bengatlan malmalet ya akaletneg’ a sarag a bagbagen na Salita na Dios? Mangiter na alimbawa.
12 Sano dugay pangusar ed katuaan a walad Biblia, antoy nagawaan na satan? (Basaen so 2 Corinto 10:4, 5.) Sarag na satan a bagbagen iray “fortalezas [‘bengatlan malmalet ya akaletneg,’ NW],” salanti, iparungtal iray palson doktrina, makapuy a kagagawa, tan pilosopiya a pakapatnagay ag-inkaperpekto na karunongan na too. Sarag tayon usaren so Biblia pian ekalen so antokaman ya ideya ya “onsumpa ed kakabatan na Dios.” Peteg a makatulong iray bangat na Biblia a nauman so kanonotan na totoo pian mitunosan itan ed katuaan.
13 Alaen tayo pan alimbawa so 93 años a biin taga India. Manlapu la’d inkaugaw to et nibangat la’d sikato so reinkarnasyon. Sanen sikatoy ginmapon nanaral na Biblia panamegley na impisulatan to ed anak ton laki a manaayam ed arum a bansa, mabulos ton inawat iray nanaaralan to nipaakar ed si Jehova tan ed saray sipan To. Balet say bangat ya reinkarnasyon et nigalet la’d puso to kanian sanen insulat na anak to so nipaakar ed kipapasen na inaatey, agto itan naawat. Inkuan to: “Agko natatalosan so bangat na Biblia yo. Ta ni amin a relihyon et ibabangat dan walay walad dalem tayo ya imortal. Sakey ni, abangonan ko la ‘tay pananisian ompatey so laman tan walay agnanengneng a kabiangan tayo ya onla’d arum a laman a manga 8,400,000 danay. Say labay mon ibaga aliwan tua iya? Aliwa sirin so maslak a relihyon?” Kasin nabagbag na ‘espada na espiritu’ iyan malmalet ya akaletneg a sisisiaen? Aminpiga iran nansulatan nipaakar ed saya. Tan kayari pigaran simba et oniay insulat to ed anak to: “Natatalosan ko la natan no anton talagay katuaan nipaakar ed saray inaatey. Maliket ak ed impakaamtan napinengnengan tayo lamet manaya iray inad-aro tayon inatey sano paolien la ra. Onsabi la komon so Panarian na Dios.”
Usaren Itan Diad Paraan a Makatangguyor
14. Antoy kabaliksan na panangguyor ed saray katongtong tayo?
14 Pian epektibon nausar so Biblia diad ministeryo, aliwan magenap so basta panalambit ed saray teksto. Si Pablo et ‘anangguyor,’ tan nepeg ya ontan itayo met. (Basaen so Gawa 19:8, 9; 28:23, NW.) Say salitan “panangguyor” et mankabaliksay “pangombinse.” Say atangguyor et “manisian maong, kanian panmatalkan toy naamtaan to.” Sano tatangguyoren tayoy katongtong tayo ya awaten so sakey a bangat na Biblia, sikatoy kokombinsien tayon manmatalek ed satan a bangat. Pian nagawaan iya, kaukolan a kombinsido iray katongtong tayo a tua iray ibabaga tayo’d sikara. Nia iray nepeg tayon gawaen.
15. Panon mon nipaimano so Biblia diad paraan a respetoen itan?
15 Ipaimano so Salita na Dios diad paraan a respetoen itan. Sano ibasam so sakey a teksto, ipaimanom so kakanaan na pangamta ed kanonotan na Dios nipaakar ed pantotongtongan yo. Kayarim a tepetan tan amtaey opinyon na katongtong mo, nayarin oniay ibagam, ‘Nengnengen ta pa no antoy panmoria na Dios nipaakar ed saya.’ Odino nayarin oniay itepet mo, ‘Anto kasi nibaga na Dios ed saya?’ No oniay paraan na panangusar tayoy teksto, ipapanengneng tayo a nanlapud Dios so Biblia tan ontulong iya ed katongtong tayo pian atagtagey so pangipasen to ed satan. Nagkalalo lan importante iya sano say pupulongan tayo et manisia ed Dios balet ta agpamilyar ed ibabangat na Biblia.—Sal. 19:7-10.
16. Antoy makatulong pian nipaliwawam a maong iray teksto?
16 Aglabat la basaen iray teksto; ipaliwawa iratan. Kapagno manbabangat si Pablo, niyugali toy ‘mangipaliwawa tan mamaneknek panamegley na saray reperensya.’ (Gawa 17:3, NW) Say sakey a teksto et kaslakan lan pigapigaray punto to, kanian ompan kaukolan mon idanet so balikas ya ontukoy ed pantotongtongan yo. Nagawaan mo iya diad pangulit ed idadanet iran salita odino diad panepet ed katongtong mo pian natebek to iratan. Insan, ipaliwawam so kabaliksan na satan a parte na teksto. Kayari to, tulongan mon natebek na katongtong mo no panon ya onaplika itan ed sikato.
17. Panon kan mankatunongan manlapud Kasulatan diad paraan a makakombinse?
17 Mankatunongan manlapud Kasulatan diad paraan a makakombinse. Lapud impapuso so panagpaliwawa nen Pablo tan duga iray argumento to, makakombinse so ‘impikatunongan to ed arum manlapud Kasulatan.’ (Gawa 17:2, 4, NW) Singa si Pablo, panggunaetan mon sabien so puso na katongtong mo. ‘Agwat’ moy walad puso to diad magalang a pantepet, ta pakanengnengan itan ya interesado ka ed sikato. (Uli. 20:5) Paliisay pagmaliw a masyadon prangka odino ansakit a manalita. Ipaliwawa iray argumento diad malinew tan makatunongan a paraan. Nepeg a suportaan iratan na magenap ya ebidensya. Nepeg a nibase ed Salita na Dios iray ibabagam. Mas maabig no mangibasa ka labat lay sakey a teksto a nipaliwawam tan niyilustram, nen say pantutumbokanen moy duara odino taloran teksto. ‘Lalon makapaayat so ibagam’ no walaray onsusuportan ebidensya. (Uli. 16:23, Maung a Balita) No maminsan, ompan nakaukolan so pansukimat tan pangiter na kaaruman ya impormasyon. Samay asalambit niman a 93 años a bii et labay ton naamtaan no akin a dakdakel so manisia ed imortal a kamarerwa (odino espiritu). Sanen atalosan to no iner so nanlapuan na satan a doktrina tan no panon itan a kinmayat ed maslak a relihyon, sikatoy akombinsin awaten so bangat na Biblia. *
Lawas Marundunong ya Usaren Itan
18, 19. Akin a lawas tayon usaren so “espada na masanton espiritu” diad marundunong a paraan?
18 “Say ugali na sayan mundo nanaebas,” kuan na Biblia. Onuuges lan onuuges iray totoo. (1 Cor. 7:31; 2 Tim. 3:13) Kanian importante a lawas tayon bagbagen iray ‘bengatlan malmalet ya akaletneg’ panamegley na pangusar ed “espada na masanton espiritu, salanti, say salita na Dios.”
19 Agaylay liket tayo ta walad sikatayoy Salita na Dios, say Biblia, tan nauusar tayoy mabiskeg a mensahe to pian ekalen iray palson bangat tan natangguyor iray matuan-impanpuson totoo! Anggapoy bengatlan malet ya akaletneg a mas mabiskeg nen say satan a mensahe. Kanian diad inter na Dios a kimey tayon panangiyabawag na Panarian, gawaen tayo sirin so anggaay nayarian tayo a marundunong ya usaren so ‘espada na espiritu.’
[Saray paimano ed leksab]
^ par. 10 Say makatulong na baleg pian naala so impormasyon nipaakar ed liblibro na Biblia et saray publikasyon a singa say “Amin a Sulat et Napanmatalkan tan Makagunggona,” Insight on the Scriptures, tan saray artikulon “Say Salita nen Jehova et Mabilay” diad Say Panag-Bantayan.
^ par. 17 Nengnengen so brosyur ya Antoy Nagagawa ed Sikatayo Sano Inatey Itayo? pahina 5-16.
Antoy Naaralan Mo?
• Panon kabiskeg so Salita na Dios?
• Panon a magmaliw a ‘dugay panangusar tayo ed salita na katuaan’?
• Antoy nagawaan na mensahe na Biblia ed saray ‘bengatlan malmalet ya akaletneg’?
• Sano manpupulong, panon mon napaaligwas so panagtangguyor mo?
[Tepetepet Parad Panagaral]
[Kahon/Litrato ed pahina 12]
No Panon so Makatangguyor a Pangusar ed Salita na Dios
▪ Tulongay totoo a manrespeto ed Biblia
▪ Ipaliwawa so Kasulatan
▪ Mankatunongan diad paraan a makakombinse pian nasabi so puso
[Litrato ed pahina 11]
Aral moy dugan pangusar ed ‘espada na espiritu’