Sakey ya Instrumenton Ontulong ed Saray Kalangweran a Nonoten so Manamalsa Ra

“NONOT yoy Manamalsa yo legan a wala ki ni’d kalangweran,” so insulat na makabat a toon si Solomon, 3,000 taon lay apalabas. (Ecl. 12:1, Maung a Balita) Saray Kristianon kalangweran natan so walaan na kaaruman ya uusaren ya ontulong ed sikara pian nagawaan itan. Say libron Questions Young People Ask​—Answers That Work, Volume 2, so ni-release ed “Igigiya na Espiritu na Dios” a Distriton Kombension na Saray Tasi nen Jehova ed sankamundoan, a ginmapo nen Mayo 2008 anggad Enero 2009.

Say sulat na Mananguley ya Ulop ed saray kalangweran et naromog diad beneg na arap ya apis na libro. Oniay nabasa tayon kabiangan na satan: “Ipipikasi min makatulong ed sika so impormasyon a walad sayan publikasyon pian natalonaan mo iray desdes tan subok a naaabet na saray kalangweran natan tan natulongan to ka met a manggawa na desisyon a mitunosan ed linawa na Dios.”

Talagan labay na saray atateng a pabalegen iray ananak da “diad panagdisiplina tan panamilin nen Jehova.” (Efe. 6:4, NW) Balet, sano manbalbalolaki tan manmarmarikit la iray ananak, dakel ed sikara so agni makapanggawa na dili ran desisyon tan manaanap iray panangiwanwan. No sakey kayon ateng na magano lan man-tinedyer ya ugaw, panon yon natulongan so anak yon napinabangan a maong iyan publikasyon? Niraya so pigaran suhestion.

▪ Mangalay personal a kopya na sayan libro tan kabisadoen itan a maong. Agto labay ya ibagan basta labat itan basaen. Salien yo met a talosan no panon a nipresenta iray ideya ed sayan libro. Imbes ya ibaga labat ed saray kalangweran no anto so duga tan aliwa, ipapasal na sayan libro so “pakayari ran mantalos.” (Heb. 5:14, NW) Mangiiter met iya na praktikal iran suhestion no panon dan nitalindeg so duga. Singa bilang, diad Kapitulo 15 (“How Can I Resist Peer Pressure?”) et wala ni ibabaga ton gawaen nen say basta pangibagay andi. Akasulat ditan iray nibase ed Biblian estratehiya tan saray praktikal a kiwas ya ontulong ed sikaran naamtaan no panon so “iyebat ed balang sakey.”​—Col. 4:6.

 ▪ Usaren iray kabiangan na libro a mangiiter na pankanawnawan nibalikas na sakey iray walad kanonotan to. Anggaman sarayan porsyon et adesinyon parad saray kalangweran, agta maabig met no ebatan yo iratan? * Alimbawa, no kokonsideraen yoy duaran tepet ed pahina 16 nipaakar ed pidi-date, salien yo pan nonoten imay panaon sanen say edad yo et mipara’d anak yo. Nayarin labay yo met ya isulat so ebat yo ed saray niganan espasyo. Insan yo tepetay inkasikayo: ‘Panon ya anguman so panmoriak ed sarayan bengatla diad inlabas na saray taon? Anton kakabatan so agamoran ko manlapud inkatayatdang ko, tan panon kon epektibon ninabang itan ed anak ko?’

▪ Respetoen so privacy na tinedyer ya anak yo. Saray eebatan a porsyon na libro so denesinyo pian naamtaan so nononoten na anak yo tan napakiwas iran mangisulat odino mamawala ed saray ebat da. Say gagala yo et say pangamta ed saray walad puso to, aliwan say walad libro to. Oniay isusuheri na seksion ya atituloan na “A Note to Parents” ed pahina 3 na libro: “Pian napaseseg yo iray kalangweran a mabulos dan isulat ed libro ra iray ebat da, ikdan yo iray privacy. Diad saginonor et nayarin sikara lanlamang so mangibaga’d saray insulat da.”

Sakey a Tulong ed Panagaral na Pamilya ed Biblia

Say Young People Ask, Volume 2, et sankaabigan a katulongan ya usaren ed Panagdayew na Pamilya. Panon yon usaren itan a libro anta anggapoy tepet ed kada parapo na satan? Sarag yo kasin paaligwasen so panagaral diad pangusar na paraan ya epektibo ed saray ananak yo?

Singa bilang, panggagayagaan na arum a pamilya so pangikokondukta na panagpasal iran sesyon sano kokonsideraen so “Peer-Pressure Planner” ed pahina 132 tan 133. Nayarin makatulong ed anak yo imay unonan tepet diman pian naamtaan iray bengatla a talagan makapaangat. Ipapatnag na komaduan tepet no iner so nayarin pakagawaan na sarayan desdes. Kayari yon konsideraen iray pansumpalan na isuko odino pangamper ed desdes, ibaga yo’d anak yo ya iparaan to lay gawaen to, balanglan awaten, amperen, odino ipawil toy desdes. Tulongan iray ananak yon magmaliw a manonot tan tulongan yo ira ed pangiprepara na saray ebat da a liknaen dan sarasarag dan ibaga tekep na talek tan kombiksion.​—Sal. 119:46.

Sakey a Katulongan Parad Maabig a Komunikasyon

Papasesegen na Young People Ask, Volume 2 iray kalangweran a mitongtong ed saray atateng da. Alimbawa, mangitatarya iray kahon a “How Can I Talk to Dad or Mom About Sex?” (pahina 63-64) tan “Talk to Your Parents!” (pahina 189) na praktikal iran suhestion no panon a nigapo so  pangonsidera ed saray sensitibon tema. Oniay insulat na 13 años a bii, “Pinabiskeg na sayan libro so linawak ya itongtong ed saray atateng ko so nipaakar ed saray bengatlan nononoten ko, anggan saray bengatlan agawaan ko la.”

Ipapaseseg met na sayan libro so maabig a komunikasyon ed arum niran paraan. Diad kada sampot na artikulo et walay kahon ya apauloan na “What Do You Think?” Aliwa labat iyan repaso, noagta nayari met iyan usaren bilang giya ed pantotongtong na pamilya. Sakbay na satan et wala ni kahon ya apauloan na “Action Plan!” Sayan kahon et mangiiter ed saray kalangweran na pankanawnawan mangisulat ed saray espisipikon dalan no panon dan niyaplika iray naaralan da ed satan a kapitulo. Akasulat ed kada sampot a kabiangan na kahon ya “Action Plan!” so onia: “Say labay kon itepet ed saray atateng ko nipaakar ed sayan tema et . . . ” Ontulong iya ed saray kalangweran pian makagamor iray makanan simbawa manlapud saray atateng da.

Sabien so Puso!

Bilang ateng, say gagala yo et say panabi ed puso na ananak yo. Makatulong ed sikayo so Young People Ask, Volume 2, pian nagawaan iya. Imanoen no panon ya inusar na sakey ya ama iyan libro pian niwala so maabig a komunikasyon ed anak ton bii.

“Walaray labalabay mi nen anakon Rebekah a panakaran, pambisikletaan, tan pampasyaran. Sarayan gagawaen mi so mamapawala na pankanawnawa a nibalikas to iray iisipen to.

“Say unonan binasa mi ed sayan libro et say sulat na Mananguley ya Ulop tan say ‘A Note to Parents.’ Labay kon nalikna na ana’ko a sikatoy walaan na kawayangan a mangisulat ed ebat to, a singa ibabaga na pahina 3. Agko babasaen iray insulat to.

“Inabuloyan kon si Rebekah so manpili na saray kapitulo a labay ton pantongtongan mi tan no panon min pantongtongan itan. Say unonan tema a pinili ton pantongtongan mi et ‘Should I Play Electronic Games?’ Agkon balot naisip a satan so pilien to! Balet ta sikatoy walaan na makatunongan a rason. Pigara’d saray kakaaro to so manggagalaw na makapasagyat balet ta makapataktakot iran video game. Agko amta a mabitabitar manaya ditan so karawalan tan mabanday iran salita! Balet apantongtongan min amin iratan sanen gagawaen mi imay “Action Plan!” ed pahina 251. Akatulong met itan ed si Rebekah pian niparaan toy ibaga to no bilang ta walay managyat ed sikaton manggalaw na video game.

“Diad sayan pankanawnawa, ag-insekreto nen Rebekah no antoy insulat to’d libro to. Legan na panagaral mi et ibabalikas toy nalilikna to. Mansusublayan kami ed panagbasa, tan labay to met a pantongtongan so amin a bengatla, pati saray litrato tan kahon. Pankanawnawak iya pian ninabang ko’d sikato iray panmoriak sanen say edad ko et singa sikato, tan ibaga to met la’d satan iray kipapasen natan. Labay ton ibaga so amin ya amta to!”

No sakey kayon ateng, seguradon malikeliket kayo sanen ni-release iyan libro. Walaan kayoy pankanawnawan usaren a maong itan natan. Iilaloan na Mananguley ya Ulop a say libron Questions Young People Ask​—Answers That Work, Volume 2 et magmaliw a bendisyon ed pamilya yo. Komon ta natulongan itayon amin na saya, nagkalalo la’d saray pinabpablin kalangweran diad ‘pantultuloy a panakar unong ed espiritu.’​—Gal. 5:16, NW.

[Paimano ed leksab]

[Kahon ed pahina 30]

No Anto so Ibabaga na Arum a Kalangweran

“Saya so klase na libro a kaukolan moy onyurong, walay lapis mo tan basaen mo tekep na pandalepdep. Say katuaan to et satan so adesinyo a singa “diary” a sarag mon isulat ditan iray bengatla parad personal a panagdalepdep mo tekep na gagala a nawalaay sankaabigan a panagbilay.”​—Nicola.

“Dakel so mangiimpluensya ed siak a mi-date, pati saramay totoon walaan na maabig ya intension. Akombensi ak na unonan seksion na sayan libro ya anggano antoy ibaga na siopaman, Agak ni akaparaan a mi-date.”​—Katrina.

“Tinmulong ed siak so kahon ya ‘Are You Thinking of Getting Baptized?’ pian seryosoen so bautismok. Satan so amakiwas ed siak ya usisaen lamet so paraan na panagaral tan panagpikasik.”​—Ashley.

“Anggaman imbangat ak lay atateng ko manlapud inkaugaw, imbangat ak na sayan libro a mankatunongan ed saray kundang a gawaen ko’d bilay ko. Tinulongan ak met na saya a nawalaan na mas lukas a komunikasyon ed atateng ko.”​—Zamira.

[Litrato ed pahina 31]

Atateng, kabisadoen a maong iyan libro

[Litrato ed pahina 32]

Gawaen yon kalat so panabi ed puso na anak yo