Sumpaen so Propaganda nen Satanas

‘AGKAYO papaloko. Agkayo tulongan na Dios yo. Onsuko kayo odino sagmaken yoy mauges a pansumpalan!’ Saya so imbaga nen Rabsaces, embahador nen Arin Senakerib na Sirya, ed saray manaayam ed Jerusalem. Sinakop la na saray armada na ari so dalin na Juda. Say gagala na mensahe et pian pakapuyen so talek na saray totoo ed Jerusalem tan pagyawen iran onsuko la.​—2 Ara. 18:28-35.

Kabkabat a maruksa tan bayolenti iray Asiryano. Papagyawen da iray kalaban da panamegley na makakebbiew iran detalye no panon karuksa so panagtrato ra ed saray kautibo ra. Unong ed historyador a si Philip Taylor, inusar da so “taktika a panamagyaw a tinekepay propaganda, a denisinyo pian nakontrol iray totoon walad pakauley da tan pian taktakoten iramay posiblin magmaliw a kalaban da panamegley na saray report no panon ira karamsak tan panamegley na panangontrol ed kanonotan.” Say propaganda et mabiskeg ya armas. “Aatakien na satan so nonot,” so inkuan ni nen Taylor.

Saray tuan Kristiano et mipuligesgesan aliwan diad ‘laman tan dala noag ingen sumpa ed saray mauges iran espiritu,’ salanti, sumpad saray espiritun pinalsa a nanrebelde ed Dios. (Efe. 6:12) Si Satanas so sankamanunaan ed sikara. Uusaren to met so panamagyaw a tinekepay propaganda.

Ibabaga nen Satanas a sarag ton deralen so integridad na balang sakey ed sikatayo. Diad panaon nen patriarkan Job, oniay inkuan nen Satanas ed si Jehova a Dios: “Amin a say too wala ed sikato iter to nipaakar ed bilay to.” Diad arum a salita, no pairapen mon maong so sakey a too, diad saginonor et ibeneg to lay Dios. (Job 2:4) Kasin duga si Satanas? Kasin say panagsungdo tayo et walaan na anggaan, salanti, anggad punton ikaindan tayo la ray prinsipyo na Dios pian manbilay ni? Satan so labay nen Satanas a gawaen tayo. Kanian, uusaren to iray makapalikdon propaganda pian ipurek itan ya ideya ed kanonotan tayo. Usisaen tayo pa so pigara ed saray metodon uusaren nen Satanas tan no panon tayon nipulisay iratan.

“Say Panangiletnegan Da Wala ed Dabok”

Inusar nen Satanas si Elifaz, sakey ed saray ombibisitan kaaro nen Job pian ikatunongan ya agsarag na totoo a resistian so panangataki nen Satanas. Diad impanukoy ed totoo bilang “saray manaayam dia ed saray abung a langa,” oniay inkuan nen Elifaz ed si Job: “Say panangiletnegan da wala ed dabok, a natapiak ed arap na bokbok! Et nanleetan na kabuasan tan labi sikara so nabagbag, natawtaw ira lawas ya andi bengatla a mangimano.”​—Job 4:19, 20.

Diad arum nin parte na Biblia, nikompara itayo ed “saray pananginan a gawa ed pitek.” (2 Cor. 4:7, NW) Maletey itayo lapud atawir a kasalanan tan inka-imperpekto. (Roma 5:12) No diad dilin biskeg tayo labat, mainomay itayon napalikdo nen Satanas. Balet bilang Kristiano, makapanilalo itayo ed tulong nen Jehova. Anggaman walaray kakapuyan tayo, mabli itayo ed imaton na Dios. (Isa. 43:4) Kaaruman ni, papagamoran nen Jehova na masanton espiritu iramay onkekerew ed satan. (Luc. 11:13) Iikdan itayo na satan na “pakayari a mas mabiskeg nen say pakayari na too” pian natalonaan tayo so antokaman a kairapan ya ipaarap nen Satanas ed sikatayo. (2 Cor. 4:7, NW; Fil. 4:13) No sumpaen tayo so Diablo tekep na “mabiskeg a pananisia,”  pabiskegen itayo na Dios. (1 Ped. 5:8-10) Kanian agtayo nepeg a takotay Satanas a Diablo.

Say Too et “Oninum na Karelmengan”

“Anto ta so too, pian sikato komon so malinis? Tan say nianak ed bii, pian sikato komon so matunong?” so intepet nen Elifaz. Insan to inebatan, a kuan to: “Nia, agmanmatalek ed saray sasanto [so Dios], on, saray tawen ag-ira malinis dia ed pakanengneng to. Agnagkalalo so makapadimla tan nabulok, so too ya oninum na karelmengan a singa danum!” (Job 15:14-16) Ibabaga nen Elifaz ed si Job ya anggapoy toon ipapasen nen Jehova a matunong. Ontan met so labay na Diablo a panmoria tayo. Labay ton panaburidoan tayo iray apalabas lan kasalanan tayo, tetelen tayoy inkasikatayo, tan nonoten ya ag-itayon balot naperdona. Labay to nin moriaen tayon alablabas so kakaukolanen nen Jehova ed sikatayo tan labay to met a leglemewen tayo so panangabagey, panamerdona, tan suporta na Dios.

Siempre, amin tayo et ‘nankasalan tan makulang ed gloria na Dios.’ Anggapoy imperpekton too a makadampot ed saray perpekton estandarte nen Jehova. (Roma 3:23; 7:21-23) Balet, kabaliksan kasi na satan ya anggapo lay kana tayo ed Dios. Amta nen Jehova a “say daan ya uleg a manngaran na Diablo tan Satanas” so mangaanamot ed makasalanan a kipapasen tayo. (Apo. 12:9, 10) Lapud amta na Dios a ‘dabok itayo,’ iikdan to itayoy konsiderasyon tan aliwan saray lingo tayo so naynay ya aanapen to.​—Sal. 103:8, 9, 14.

No ikaindan tayoy mauges a kagagawa tan onapit tayo ed si Jehova tekep na mapaabeba tan magbabawin puso, ‘perdonaen to itayo na daakan.’ (Isa. 55:7; Sal. 51:17) Anggan saray kasalanan tayo et “singa eskarlata, napaputi ra a singa say niebe,” kuan na Biblia. (Isa. 1:18) Determinado itayo komon sirin ya ag-onsusuko ed panggawa na linawa na Dios.

Lapud makasalanan a kipapasen tayo, ag-itayon balot nawalaan na matunong a talindeg ed arap na Dios. Nibalang nen Adan tan Eva so inkaperpekto tan say ilalon andi-anggaan a bilay, aliwan sikara labat noagta amin tayo. (Roma 6:23) Balet lapud panangaro to ed totoo, nanggawa si Jehova na paraan pian naperdona iray kasalanan tayo. Saya et nagamoran tayo no ipatnag tayoy pananisia ed dondon bagat na Anak to, si Jesu-Kristo. (Mat. 20:28; Juan 3:16) Agaylan nikadkaduman panangipatnag na “agnaparaan a kaabigan” na Dios! (Tito 2:11, NW) Nayarin naperdona iray kasalanan tayo! Kanian, akin et paimpluensyaan tayo’d si Satanas diad panisip ya ag-itayo naperdona?

‘Diwit Mo so Pukel To tan Laman To’

Ibabaga nen Satanas ya ikaindan nen Job so pananisia to no sikatoy mansakit. Diad impan-angat na Diablo ed si Jehova, oniay inkuan to: “Diwiten mo so pukel to tan laman to, et ikaindan to ka ed lupam.” (Job 2:5) Seguradon manliket so Kabusol na Dios no nipalikna to’d sikatayon andian itayo na kakanaan lapud saray beblay tayo.

 Bangbalet, ag-itayo ipulisay nen Jehova no agtayo la nagawaan iramay datin gagawaen tayo diad panlilingkor tayo ed sikato. Panon to no walay kaaro tayon sinakitan na sakey tan naapektaan so pisikal a bunigas to? Kasin nabawasan lay panamabli tayo ed sikato lapud agto la nagawaan iramay gagawaen ton pabor ed sikatayo nensaman? Siempre andi! Siansia nin sikatoy inad-aro tan pinabpabli tayo, lalo la no sikatayoy makasengeg na impakasakitan to. Agta ontan met so nailaloan tayon gawaen nen Jehova? Oniay ibabaga na Biblia: “Say Dios aliwan agmatunong pian nalingwanan to so gawa yo tan say aro ya impanengneng yo ed ngaran to.”​—Heb. 6:10.

Isasalaysay na Kasulatan so nipaakar ed “sakey a pobrin balo a bii” ya onsusuporta ed panagdayew ed Dios diad loob na dakel lan taon. Sanen naimatonan nen Jesus so impangipelag toy “duaran angkekelag a sinsilyo” ed panagpelagan na donasyon diad templo, kasin impasen nen Jesus ya anggapoy kana na impelag to? Andi, imbes sikatoy kinomendaan nen Jesus ed impanggawa toy anggaay nayarian to pian suportaan so tuan panagdayew.​—Luc. 21:1-4, NW.

No pansiansiaen tayoy integridad tayo, makaseguro itayo a mansiansian malet so relasyon tayo’d si Jehova, anggan panon kagrabe so epektoy inka-imperpekto lapud itatatken odino sakit. Agbalot ikaindan na Dios iray matoor lapu labat ta naaamper na kairapan so abilidad dan manlingkor ed sikato.​—Sal. 71:9, 17, 18.

Isulong so “Hilmit na Kilalaban”

Panon tayon naprotektaan so inkasikatayo manlapud saray propaganda nen Satanas? Insulat nen apostol Pablo: “Mantultuloy kayon mangalay biskeg ed Katawan tan diad mabiskeg a pakayari to. Isulong yoy kompleton armas ya inter na Dios ta pian makatalindeg kayo sumpad saray masilib a paraan na Diablo.” Say sakey a kabiangan na satan ya espiritual ya armas et say “hilmit na kilalaban.” (Efe. 6:10, 11, 17, NW) Lapud saray propaganda nen Satanas, nepeg tayon isulong so hilmit tan pansiansiaen itan. Proprotektaay hilmit na sundalo so ulo to. Say “panilalo ed kilalaban,” salanti, say panmamatalek tayo ed kagawa na sipan na Dios nipaakar ed maglorian balon mundo to et manalimbeng ed kanonotan tayo sumpad saray katilaan nen Satanas. (1 Tes. 5:8) Nepeg tayon pansiansiaen a masnag tan mabiskeg itan ya ilalo panamegley na maseet a panagaral na Kasulatan.

Sinungdoan nen Job iray maruksa tan makapaingongot a panangataki nen Satanas. Mabisbiskeg so pananisia nen Job ed kioli, kanian, anggan say ipapatey et ag-anismaya ed sikato. Imbes, oniay inkuan to ed si Jehova: “Ontawag ka, et onebat ak ed sika. Manpilalek ka ed gawa na saray limam.” (Job 14:15) Anggan ompatey si Job lapud pansiasiansiaen toy integridad to, sikatoy nanilalo a say panangaro na Dios ed saray matoor a lingkor To so mamakiwas ed Sikato a paolien ira.

Komon ta walaan itayo met na ontan a panagmatalek ed tuan Dios. Sarag nen Jehova a paandien so antokaman ya epekto na saray bengatla a nayarin gawaen ed sikatayo nen Satanas tan saray dedemonyo to. Nonot yo pa met irayan panamaseguro nen Pablo ed sikatayo: “Matoor so Dios, tan agto abuloyan a nipaarap kayo ed tukso ya agyo nitepel, balet sano onsabi so tukso et sikatoy manggawa met na dalan a pawayan ta pian nasungdoan yo itan.”​—1 Cor. 10:13, NW.

[Litrato ed pahina 20]

Papablien nen Jehova so matoor a panaglingkor yo

[Litrato ed pahina 21]

Isulong so hilmit na kilalaban, tan pansiansiaen itan