Tepetepet na Saray Manbabasa

Diad antoran sirkumstansya a nayarin ikonsidera so pampabautismo lamet?

Walaray kipapasen a nayarin labay na bautismadon indibidual ya ikonsidera so inkapeteg na bautismo to tan isipen ton sikatoy manpabautismo lamet. Singa bilang, diad panaon na bautismo na sakey ya indibidual et nayarin walay iyaamot to odino mibibiang ed saray kagagawan pakadispiloan to no sikatoy peteg lan abautismoan. Kasin nayarin idedika to lamet so inkasikato ed Dios? Nagawaan to itan no intunda to la iray agmakasulatan a kondukta to. Kanian, say sakey ya indibidual ya abautismoan legan ton gagawaen itan a seryoson kasalanan et nayarin manpabautismo lamet.

Panon to balet iramay indibidual ya agmanggagawa na kasalanan sanen abautismoan ira balet ta kayari ran abautismoan et akagawa ra na kasalanan a mankaukolan na pakapormay hudisyal a komite? Nayarin irason ton agto atalosan so gagawaen to ed saman a panaon tan ibaga to a say bautismo to et aliwan peteg. Sano katongtongen na saray elder so akagawa na kasalanan, agda itetepet so nipaakar ed bautismo to tan no kasin samay dedikasyon tan bautismo to et peteg. Ta diad tua et nadngel to so Makasulatan a paliwawa nipaakar ed kaimportantian na bautismo. Mapekder ton inebatan iramay tepet ed dedikasyon tan bautismo. Insan nampales tan sikatoy nipalgep ed danum. Kanian makatunongan sirin so pangibaga a talagan atalosan to so inkaseryoso na ginawa to. Kaukolan sirin a sikatoy tratoen na saray elder bilang bautismadon indibidual.

No kuestionen na indibidual so inkapeteg na bautismo to, nayarian na saray elder ya ipanengneng ed sikato so The Watchtower na Marso 1, 1960, pahina 159 anggad 160, tan Pebrero 15, 1964, pahina 123 anggad 126, a no iner et detalyadon nipaliwawa so nipaakar ed pampabautismo lamet. Personal a desisyon so pampabautismo lamet lapud arum niran rason (singa say kakulangan na kakabatan ed Biblia sanen abautismoan so sakey).

Antoran bengatla so nepeg ya ikonsidera na saray Kristiano no walay kaiba ran manaayam ed sakey ya abung?

Mankaukolan itayon amin na napanayaman. Amayamay balet natan so andian na dilin ayaman. Nayarin lapud kipapasen na panagbilay, bunigas odino arum niran rason et kaukolan a maniiba iray sankakanayon ed saksakey ya abung. Diad arum a lugar, nayarin manaayam a sankakaiba iray sankakanayon ed saksakey a kuarto kanian ngalngali anggapo lay privacy da.

Agresponsabilidad na organisasyon nen Jehova so pangitarya na saray detalyadon totontonen nipaakar ed no anto so manepeg a panayaman na saray amin a kabiangan na kongregasyon. Papasesegen iray Kristiano a mandesidin base’d Kasulatan no kasin say uksoyan da ed ayaman et aabobonan na Dios odino andi. Antoray pigara ed sarayan prinsipyo?

 Say manunan ikonsidera et say epekto ed sikatayo tan ed espiritualidad tayo na panayam a kaiba so arum a totoo. Siopa irayan totoo? Kasin mandadayew ira ed si Jehova? Kasin manbibilay ira unong ed estandarte na Biblia? “Agkayo patitilaan” kuan nen apostol Pablo. “Saray mauges a kaulop deralen da so saray maong ya ugugali.”​—1 Cor. 15:33.

Ipapaliwawa na Kasulatan a kokondenaen nen Jehova so pilalawanan tan pikakalugoran. (Heb. 13:4) Kanian no aabuloyan na uksoyan yo ed ayaman a makapan-abay so laki tan bii ed dukolan anta agmet ira sanasawa, malinew ya ag-itan aabobonan na Dios. Seguradon aglabay na sakey a Kristiano so manayam ed sakey ya abung a kokonsintien so imoralidad.

Kaaruman ni, papasesegen na Biblia so amin a malabay a makagamor ed panangabobon na Dios ya ‘ibatikan da so pilalawanan.’ (1 Cor. 6:18, NW) Kanian, makabat sirin parad sakey a Kristiano so ipaliis ed antokaman ya uksoyan ed ayaman a nayarin manangguyor ed sikaton manggawa na imoralidad. Singa bilang, isipen pan manaayam so pigaran Kristiano ed saksakey ya abung. Kasin say panayam ed ontan a kipapasen et managyat ed sakey a mikompromiso? Anto kasi no naamtaan na duaran indibidual ya agsanasawa a bukbukor day atilak ed abung lapud inmalis ya agano iray kakaiba ra? Ontan met, niiyan ed kapeligroan so moralidad na duaran mangugustoan no manayam ira ed saksakey ya abung. Sakey a makabat a kiwas so ipaliis ed saratan a situasyon.

Agmet nayarin mantultuloy a manayam ed saksakey ya abung iramay nan-diborsyo. Say akaugalian da lan maapit a relasyon ed balang sakey et nayarin manresulta ed imoralidad.​—Uli. 22:3.

Say sakey nin importantin bengatla a konsideraen et say panmoria na arum. Nepeg ya ikday imano so uksoyan ed ayaman ya ipapasen na sakey a Kristiano a makatunongan, balet ta mamalesay negatibon impresyon ed komunidad. Agtayo labay a say kondukta tayo et maneral ed ngaran nen Jehova. Oniay impangipaliwawa nen Pablo: “Paliisan yoy magmaliw a pakatiroran ed saray Judio ontan met ed saray Griego tan ed kongregasyon na Dios, ta anggan siak et papaliketen ko so amin a totoo ed amin a bengatla, ya agko aanapen so pankaabigan kon dili noagta say pankaabigan na dakel, ta pian nilaban ira.”​—1 Cor. 10:32, 33 NW.

Talagan mairap so pananap na komportablen ayaman a walaan na marakep ya uksoyan parad saramay malabay a manumbok ed saray matunong ya estandarte nen Jehova. Balet kaukolan na saray Kristiano a ‘seguroen a naynay no antoy makapaliket ed Katawan.’ Nepeg da met a seguroen ya anggapoy agmakanepegan a nagagawa ed abung da. (Efe. 5:5, 10, NW) Kakaukolanen na saya so pangipikasi na saray Kristiano ed panangiwanwan na Dios tan panggawa da’d anggaay nayarian da pian nasalimbengan so pisikal tan moral a kipapasen da ontan met ed masanton ngaran nen Jehova.