Sakey a Pulok, Sakey a Managpastol

“Sikayoran tinmumbok ed siak so onyurong met diad labinduan trono, pian mangukom ed labinduan tribu na Israel.”​—MAT. 19:28.

1. Panoy impideneng nen Jehova ed saray ilalak nen Abraham, tan akin et aglabay ya ibaga na saya ya imbaliwala la nen Jehova so arum a nasyon?

INAD-ARO nen Jehova si Abraham, kanian impanengneng Toy matoor a panangaro To ed saray ilalak nen Abraham. Diad masulok a 15 siglo, say nasyon na Israel a nanlapud si Abraham et impasen nen Jehova bilang pinili ton totoo, a ‘kien to a bukor.’ (Basaen so Deuteronomio 7:6.) Labay kasin ibaga na satan ya imbaliwala la nen Jehova so arum a nasyon? Andi. Diad saman a panaon, saray aliwan Israelita a malabay a mandayew ed si Jehova et naabuloyan a mitipon ed pinabli ton Israel. Sarayan akomberte odino proselita et impasen a kabiangan na satan a nasyon. Kaukolan iran tratoen na saray Israelita bilang dilin agagi ra. (Lev. 19:33, 34) Nepeg met balet a tumboken na saray proselita so amin a ganggan nen Jehova.​—Lev. 24:22.

2. Antoy makapabiglan imbaga nen Jesus, tan antoray nitepet tayo nipaakar ed satan?

² Balet, oniay makapabiglan imbaga nen Jesus ed saray kapanaonan ton Judio: “Say panarian na Dios so naekal ed sikayo tan niiter itan ed sakey a nasyon a mamapawala na saray bunga to.” (Mat. 21:43) Sioparay magmaliw a kabiangan na sayan balon nasyon, tan antoy epekto na sayan pananguman ed sikatayo?

Say Balon Nasyon

3, 4. (a) Antoy imbaga nen apostol Pedro nipaakar ed balon nasyon? (b) Sioparay kabiangan na sayan balon nasyon?

³ Sayan balon nasyon et malinew a tinukoy nen apostol Pedro sanen oniay insulat to ed saray kapara ton Kristiano: “Sikayo so ‘pinilin kapolian, saray saserdote a manari, say masanton nasyon, totoo a magmaliw a kayarian na Dios, pian iyabawag yo ed amin a pasen iray alay abig a kualidad’ na samay anawag ed sikayo manlapud kabilungetan tan angawat ed sikayo ed makapakelaw a liwawa to.” (1 Ped. 2:9) Unong a nipasakbay la, saray Judio ya angawat ed si Jesus bilang Mesias so unonan kabiangan na satan a balon nasyon. (Dan. 9:27; Mat. 10:6) Diad inlabas na panaon, kabiangan met la ed sayan nasyon so dakel ya aliwan Israelita, unong ya intuloy ni nen Pedro: “Aliwa kayon totoo na Dios nensaman, balet natan et totoo to kayo la.”​—1 Ped. 2:10.

⁴ Panon tayon nalinewan no sioparay tutukoyen nen Pedro? Diad gapo na sulat to et inkuan to: “Unong ed baleg a panangasi [na Dios] et nianak itayo lamet diad sakey ya agmanganggan ilalo diad panamegley na inkioli nen Jesu-Kristo manlapud inaatey, diad agnaderal tan agnarutakan tan ag-onkupas a tawir. Nigana itan ed tawen parad sikayo.” (1 Ped. 1:3, 4) Kanian, saray kabiangan na sayan balon nasyon et saray alanaan a Kristiano, a say ilalo ra et diad tawen. Sikara so “Israel na Dios.” (Gal. 6:16) Diad sakey a pasingawey, anengneng nen apostol Juan a say bilang na sayan “Israel na Dios” et 144,000. “Sinaliw ira ed limog na katooan bilang unonan bungabunga ed Dios tan ed Kordero” pian manlingkor a “saserdote” tan “manuley ira bilang arari a kaiba [nen Jesus] diad sanlibon taon.”​—Apo. 5:10; 7:4; 14:1, 4; 20:6; Sant. 1:18.

 Wala Ta Ni Arum ya Irerepresenta na Israel?

5. (a) Siopay tutukoyen na balikas ya “Israel na Dios”? (b) Akin a nibagan walaray pankanawnawa a mas malaknab so kabaliksan na terminon “Israel”?

⁵ Malinew sirin a say balikas ya “Israel na Dios” ed Galacia 6:16 et ontutukoy labat ed saray alanaan a Kristiano. Balet, wala ta ray pankanawnawa ya irerepresenta na nasyon na Israel so arum nin Kristiano likud ni’d saray alanaan? Say ebat et naromog ed samay imbaga nen Jesus ed saray matoor ya apostol to: “Misipanan ak ed sikayo parad sakey a panarian, no panon a say Amak et akisipanan ed siak, pian nayarian yoy mangan tan oninum diad lamisaan ko ed panarian ko, tan makayurong kayo ed saray trono pian mangukom ed labinduan tribu na Israel.” (Luc. 22:28-30) Nagawa iya legan na “pamasimbalo” odino panaon na panamalsa lamet, legay Sanlibon Taon ya Uley nen Kristo.​—Basaen so Mateo 19:28; paimano’d leksab.

6, 7. Siopa so irerepresenta na “labinduan tribu na Israel” a nabasa ed Mateo 19:28 tan Lucas 22:30?

⁶ Say 144,000 et manlingkor bilang arari, saserdote, tan ukom legan na Sanlibon Taon ya Uley. (Apo. 20:4) Sioparay ukomen tan uleyan da ey? Nabasa tayo ed Mateo 19:28 tan Lucas 22:30 ya ukomen da so “labinduan tribu na Israel.” Siopa so irerepresenta na “labinduan tribu na Israel” diad sarayan teksto? Amin na saray maniilalon manbilay ed dalin, salanti, saray manisia ed bagat nen Jesus balet ta agmagmaliw ya ari tan saserdote a kaiba to. (Agkaiba so makasaserdoten tribu nen Levi ed 12 tribu na Israel ya akaawat na tawir a dalin.) Diad sarayan teksto, say 12 tribu na Israel et ontutukoy ed saramay nagunggonaan ed espiritual lapud panlingkor na 144,000 bilang saserdote. Sarayan agkabiangan na 144,000 et totoo met na Dios, tan aaroen tan aabobonan to ra. Matukoy labat sirin a sikaray inyaliling ed saray totoo to nensaman.

⁷ Diad sakey a pasingawey, anengneng nen apostol Juan a saray 144,000 et permanente lan atatakan antis na baleg a kairapan, insan anengneng to met so agnabilang a “baleg ya ulop,” a nanlapud “amin a nasyon.” (Apo. 7:9) Saraya imay makaliktar ed baleg a kairapan tan magmaliw a sakop na Sanlibon Taon ya Uley nen Kristo. Diad satan et nakaiba da iray binilyon a napaoli. (Juan 5:28, 29; Apo. 20:13) Sikara so irerepresenta na “labinduan tribu na Israel” ya ukomen nen Jesus tan na 144,000 a kaiba ton manuley.​—Gawa 17:31; 24:15; Apo. 20:12.

8. Panon ya inrepresenta na Agew na Pananakbong so siglaotan na 144,000 tan saray totoon maniilalon manbilay ed dalin?

⁸ Sayan siglaotan na 144,000 tan saray totoon maniilalon manbilay ed dalin so inrepresenta na saray nagagawa nensaman diad tinaon ya Agew na Pananakbong. (Lev. 16:6-10) Unona ed amin, say atagey a saserdote et kaukolan a mangiyapay na kalakian a baka bilang bagat parad kasalanan ya “onkana ed sikaton dili, tan onkana’d abung to.” Kanian, say bagat nen Jesus et onkana nin unona ed sankaabungan to, salanti, saray kaiba ton manlingkor bilang saserdote diad tawen. Ontan met, walay duaran kanding ya onkana parad kasalanan na arum nin Israelita. Kanian, diad Agew na Pananakbong, say irerepresenta na tribu na saray saserdote et say 144,000 tan irerepresenta na arum nin Israelita so amin a maniilalon manbilay ed dalin. Diad saya, say balikas a “labinduan tribu na Israel,” a walad Mateo 19:28 et ag-ontutukoy ed saray  alanaan na espiritu a manlingkor bilang saserdote noagta ontutukoy iya ed amin a manisia ed bagat nen Jesus. *

9. Diad samay pasingawey ed si Ezequiel nipaakar ed templo, sioparay irerepresenta na saray saserdote, tan na saray arum a tribu?

⁹ Nia ni sananey ya alimbawa. Walay detalyadon pasingawey nipaakar ed templo nen Jehova ya anengneng nen propeta Ezequiel. (Eze., kap. 40-48) Diad satan, manlilingkor iray saserdote ed templo, a manbabangat ira tan naaawat day simbawa tan panametek nen Jehova. (Eze. 44:23-31) Ontan met, oonla ditan iray nanduruman tribu na Israel pian mandayew tan mangibagat. (Eze. 45:16, 17) Diad satan a pasingawey, irerepresenta na saray saserdote iray alanaan, tan irerepresenta na saray arum a tribu iramay maniilalon manbilay ed dalin. Idadanet na satan a pasingawey a sayan duaran grupo et mankikimey a nankakasakey parad malinis a panagdayew, tan say mangidadaulo et saray saserdote.

10, 11. (a) Anto so nanenengneng tayon kasumpalan na samay imbaga nen Jesus? (b) Antoy nitepet tayo nipaakar ed arum a karnero?

¹⁰ Walay sinalambit nen Jesus ya ‘arum a karnero’ ya agkabiangan na “melag a pulok” na saray alanaan a papatumbok to. (Juan 10:16; Luc. 12:32) Inkuan to: “Nepeg ya awiten ko met ira, tan dengelen day boses ko, tan magmaliw iran sakey a pulok, a walay sakey a managpastol da.” Napapabiskeg so pananisia tayo lapud nanenengneng tayoy kasumpalan na saya! Nankasakey so duaran grupo​—say melag a grupo na saray alanaan tan say baleg ya ulop na arum a karnero. (Basaen so Zacarias 8:23.) Anggan agmanlilingkor ed akindalem a saban na espiritual a templo iray arum a karnero, manlilingkor ira balet ed akinpaway a saban na satan a templo.

¹¹ Kanian, walaray pankanawnawan say arum a karnero et irerepresenta na saray tribu na Israel nensaman ya agmanlilingkor bilang saserdote. Balet, kabaliksan kasi na saya a sarayan maniilalon manbilay na andi-anggaan diad dalin et mangan tan oninum met na saray emblema ed Memoryal? Satan so onsublay ya ebatan tayo.

Say Balon Sipanan

12. Anton balon uksoyan so impropesiya nen Jehova?

¹² Impropesiya nen Jehova so nipaakar ed balon uksoyan parad totoo to: “Onia so pisipanan ko’d saray totoo’d Israel: Iyan ko’d sikaray ganggan ko tan isulat ko’d kapusoan da. Siak so magmaliw a Dios da, tan sikara so totook.” (Jer. 31:31-33, Maung a Balita) Panamegley na sayan balon sipanan, diad andi-anggaan et makapadinayew a nasumpal imay sipan nen Jehova ed si Abraham.​—Basaen so Genesis 22:18.

13, 14. (a) Sioparay kabiangan na balon sipanan? (b) Sioparay mangawat na gunggona na balon sipanan, tan panon iran manmamatoor ed satan?

¹³ Tinukoy nen Jesus iyan balon sipanan diad samay labi antis na impatey to. Inkuan to: “Sayan kopa et mankabaliksay balon sipanan a pinaletan na  dalak, a nepeg ya iyibung nisengeg ed sikayo.” (Luc. 22:20; 1 Cor. 11:25) Kaiba kasi so amin a Kristiano ed sayan balon sipanan? Andi. Walara labat so arum a mibiang ed balon sipanan, a singa saray apostol ya inminum ed samay kopa diad saman a labi. * Si Jesus et akisipanan lamet ed sikara a nakaiba to ran manuley ed Panarian to. (Luc. 22:28-30) Sikaray magmaliw ya ari a kaiba to ed Panarian to.​—Luc. 22:15, 16.

¹⁴ Saraman balet ey so manbilay ed dalin a sakop na Panarian to? Sikara so mangawat na gunggona na balon sipanan. (Gal. 3:8, 9) Anggaman ag-ira kabiangan, manmamatoor ira ed balon sipanan diad panguunor da ed saray kakaukolanen na satan, a singa impropesiya nen propetan Isaias: “Saray sankaili a mikasakey ed Jehova, a manlingkor ed sikato, tan mangaro ed ngaran nen Jehova, a magmaliw ira ya ariripen to, balang sakey a manngilin ed agew na sabaton ed panamabli to ed sikato a singa sagrado, tan kinawalo [odino, nanmatooran] to so saray sipan ko; anggan sikara yakar ko ra ed masanto a palandey ko, tan gawaen ko ra naani a malikeliket ed abung ko a panagpikasian.” Insan intuloy ni nen Jehova: “Ta say abung ko natawag naani ya abung na pikakasi a nipaakar ed saray amin a baley.”​—Isa. 56:6, 7.

Sioparay Nepeg a Mibiang ed Emblema?

15, 16. (a) Unong ed si apostol Pablo, anto so pribilehyo na saramay kabiangan na balon sipanan? (b) Akin ya agnepeg a mibiang ed saray emblema ed Memoryal iramay maniilalon manbilay ed dalin?

¹⁵ Saramay kabiangan na balon sipanan et “walay talek [dan] makaloob ed masanton pasen.” (Basaen so Hebreos 10:15-20.) Sikara so ‘mangawat na panarian ya agnayegyeg.’ (Heb. 12:28) Sirin, saraman labat so magmaliw ya ari tan saserdote ed tawen a kaiba nen Jesu-Kristo so nepeg ya oninum ed “kopa” a mangirerepresenta ed balon sipanan. Sarayan kabiangan na balon sipanan so insipan a mikasal ed Kordero. (2 Cor. 11:2; Apo. 21:2, 9) Saray arum ya onaatendi ed tinaon a Memoryal et marespeton mangiimaton ed satan a selebrasyon, balet ta ag-ira mibibiang ed saray emblema.

¹⁶ Pian natalosan tayo no akin a saramay maniilalon manbilay ed dalin et agmibibiang ed saray emblema, makatulong met so inkuan nen Pablo ed saray alanaan a Kristiano: “Ta kapagno kakanen yo iyan tinapay tan iinuman yo iyan kopa, iyaabawag yo so impatey na Katawan, anggad isabi to.” (1 Cor. 11:26) Kapigay “isabi” na Katawan? Sano say sankaunoran ya alanaan et mangawat lay tumang ed tawen. (Juan 14:2, 3) Malinew a walay panganggaan na tinaon a panagselebra ed Pangdem na Katawan. “Saray nakekeraan” a bini na bii a wadia ni ed dalin et mantultuloy a mibiang ed sayan pangdem ya anggad naawat da lan amin so tumang da ed tawen. (Apo. 12:17) No bilang ta saray manbilay ya andi-angga diad dalin et kanepegan day mibiang met ed saray emblema, agkomon impabitar nen Pablo a walay panganggaan na panselebra ed Memoryal.

“Sikara Naani Baley Ko”

17, 18. Panon ya asumpal so propesiyan akarekord ed Ezequiel 37:26, 27?

¹⁷ Impropesiya nen Jehova so pankakasakey na totoo to sanen inkuan to: “Manggawa ak naani na sakey a sipan na panpapaknaan [odino, sipanan na kareenan] ed sikara; sikato naani  magnayon a sipan ed sikara; et ipasen ko ra naani tan parakelen ko ra, tan iletneg ko naani santuaryok ed pegley da ed ando lan ando lawas. Say tabernakulok met wala naani ed sikara; et siak naani Dios da, tan sikara naani baley ko.”​—Eze. 37:26, 27.

¹⁸ Amin a lingkor na Dios et nagunggonaan ed kasumpalan na sayan alay abig a sipan, salanti, sayan sipanan na kareenan. On, seguradon iter nen Jehova so kareenan ed amin a matulok a lingkor to. Say bunga na espiritu to et sankapatnagan ed sikara. Walad sikara so santuaryo to, a diad saya et mangirerepresenta ed malinis a panagdayew. Peteg a nagmaliw iran “baley” to, lapud tinaynan da la so amin a klase na idolatriya tan si Jehova labat so Dios a dadayewen da.

19, 20. Sioparay kaiba ed samay tatawagen nen Jehova a “baley ko,” tan antoy nagmaliw a posible lapud balon sipanan?

¹⁹ Makapalikliket so pakaimaton natan ed pankakasakey na sayan duaran grupo! Anggaman agmaniilalon manbilay ed tawen so ondarakel a baleg ya ulop, ipapasen dan baleg a kagalangan so milimog ed saray nakekeraan ya alanaan diad dalin. Sikaray akitipon ed Israel na Dios. Lapud saya, kaiba ira ed tatawagen nen Jehova a “baley ko.” Nasusumpal ed sikara iyan propesiya: “Dakel a nasyon ontipon ira naani ed Jehova ed satan ya agew, et sikara naani baley ko; et manayam ak naani ed pegley mo.”​—Zac. 2:11; 8:21; basaen so Isaias 65:22; Apocalipsis 21:3, 4.

²⁰ Sinumpal irayan amin nen Jehova panamegley na balon sipanan. Minilyon a totoo ed nanduruman bansa so nagmaliw a kabiangan na nasyon ya aabobonan nen Jehova. (Miq. 4:1-5) Determinado iran lawas manmatoor ed satan a sipanan diad pangaawat da ed saray uksoyan na satan tan panguunor ed saray kakaukolanen to. (Isa. 56:6, 7) Kanian lawas dan panliliketan so kareenan a kaiba so Israel na Dios. Ontan komon so naliliknam​—natan tan anggad andi-anggaan!

[Saray paimano ed leksab]

Nanonotan Mo Ni?

• Sioparay “labinduan tribu na Israel” ya ukomen na 144,000?

• Diad balon sipanan, antoy betang na saray alanaan, tan panon a nagunggonaan so arum a karnero?

• Nepeg kasin mibiang so amin a Kristiano ed saray emblema ed Memoryal?

• Anton pankakasakey so impropesiyan nagawa ed panaon tayo?

[Tepetepet Parad Panagaral]

[Graph/Saray litrato ed pahina 25]

(Para aktual a format, nengnengen a publikasyon)

Dakel la natan so manlilingkor a kaiba na Israel na Dios

7,313,173

4,017,213

1,483,430

373,430

1950 1970 1990 2009