Binmiskeg so Talek Mi’d si Jehova Lapud Pansusungdo Mi

Unong ed salaysay nen Ada Dello Stritto

Kakkasumpal kon kinopya ed notebook ko so teksto ed sayan agew. Trentay sais ko la, balet ta duay oras kon insulat itan ya antikey a teksto. Amta yo no akin? Ipaliwawa nen Mommy so rason.​—Joel

SIKAMI nen masiken ko et abautismoan bilang Tasi nen Jehova nen 1968. Awalaan kami na duaran maligligsan anak a lalaki, si David tan Marc. Insan ko inlukon so bolirek mi a si Joel. Nen 1973 et sikatoy inyanak kon kulang na bulan diad sakey ya ospital ed baley na Binche, a manga 60 kilometro manlapud Brussels, Belgium. Say belat to et 1.7 kilo labat. Sanen pinmaway ak la’d ospital, impatilak ni na doktor si Joel pian naaruman so belat to.

Pigaran simba lay apalabas balet ta anggapoy inaligwasan nen Joel, kanian inawit mi nen masiken kon si Luigi ed pediatrician. Kayarin ineksamin na doktor, inkuan ton, “Agkayo nabibigla ah. Walay problema ed si Joel.” Agkami akaskasel. Diad saman et alikas kon singa walay graben sakit na ana’ko. Insan impireg na doktor si masiken ko, ya inkuan ton, “Walay trisomy 21 na baby yo.” Sayan sakit et tatawagen met a Down syndrome. *

Agaylay ermen mi’d saman ya imbaga na doktor, kanian kinmonsulta kami’d sananey ya espisyalista. Ngalngali sakey oras ton ineksamin a maong si Joel, tan agbalot nansalita. Parad sikami nen Luigi et saman la so sankabayagan a sakey oras. Bangnen kien et asumpal a siansia so eksaminasyon, tan inkuan na doktor ya, “Kakkaukolan kayo na anak yo.” Insan maul-ulimek ton inkuan, “Balet maong nin siansiay kipapasen nen Joel ta inar-aroy atateng to!” Matalareter so luak ya angampopo ed si Joel, insan mi la insempet. Diad saman et waloy simba to ni labat.

Apabiskeg Kami na Saray Pantitipon tan Ministeryo

Asukayan diad sinmusublay iran eksaminasyon a walay problema na puso nen  Joel tan sikatoy kukkulang na Vitamin D. Lapud baleg so puso to, napipitpit so bala to tan magmainomay laingen a naimpeksion. Ag-abayag, sanen apat bulan la nen Joel, naalisay pneumonia tan kaukolan min ipaospital lamet. Sikatoy in-quarantine. Maer-ermen kami ta agaylay paniirap to. Labay mi komon a nabembenan tan nalakap, balet ta samploy simba ya agkami naabuloyan a gawaen itan. Anggapo lay arum a nagawaan mi nen Luigi noag say nengnengen labat so anak mi, tan manpikasi.

Kaleganan na satan, siansia nin mimiaral kami, kaiba ra di David tan Marc, a diad saman et mantaon na 6 tan 3. Kapagno wala kami’d Kingdom Hall, sankalikna mi panangiyansakit nen Jehova. Ditan et kaiba mi ray agagi tan amta min sarag min ipaawit ed si Jehova so problema mi, kanian anggan panon et kalmado kami. (Sal. 55:22) Anggan saray nars ya angasikaso’d si Joel et naimano ran akatulong so pipiaral mi pian mansiansia kamin balanse.

Ontan met, akikasi ak ed si Aman Jehova ya ikdan to ak na biskeg a manpulong. Imbes di mankulong ak ed abung a manakakis, labay kon ibaga ed arum no akin a panmamatalekan ko so insipan na Dios a diad arapen et naandi lay sakit, tan no akin ya amabiskeg ed siak itan. Kada no makapanpupulong ak et naliliknak ya eebatan nen Jehova iray pikakasik.

“Makapakelaw!”

Malikeliket kami sanen nisempet min siansiay Joel! Balet diad kaimbuasan et naermenan kami lamet ta biglan linmoor so sakit to, kanian kaukolan min ibatik lamet ed ospital. Kayarin ineksamin na saray doktor, inkuan da ed sikami: “Anem bulan labat lay pambilay nen Joel.” Kalabas na duay bulan, nen manga waloy bulan to, singano tinmua imay imbaga na saray doktor ta grabe lan talagay kondisyon to. Inkuan na sakey a doktor ed sikami: “Pasensia ki’la. Anggapo lan talagay nagawaan mi.” Insan inkuan to ni: “Si Jehova labat so makatulong ed sikato.”

Pinawil koy Joel ed kuarto to ed ospital. Anggano pinasyay pakakagonigon ko tan naknaksawan ak la, agko labay a taynan so ana’ko. Walaray agagin bibii a nansusublayan ya angiba’d siak pian naasikaso nen Luigi so duara nin anak mi. Kalabas na sakey simba et biglan naataki si Joel. Manapuran nila na saray nars ed kuarto to balet ta anggapoy agawaan da. Kayari pigaran minuto, oniay inyesaes na sakey ed sikara, “Anggapo la . . . ” Manakakis ak a pinmaway. Nampikasi ak ed si Jehova balet ta agko amtan ibaga no panon kasakit so naliliknak. Kalabas na manga 15 minuto, tinawag ak na nars tan kuan ton, “Oneengas lamet si Joel!” Inegnaan to ak tan inkuan ton, “Gala ta nengneng mo.” Et tua ya ompaparok lamet so puso nen Joel! Tampol a nibalita iya ed interon ospital. Sikatoy nila na saray nars tan doktor tan imbaga ran, “Makapakelaw!”

Asurprisa Kami Sanen Apat Taon To

Sanen ugaw ni Joel, naynay kamin babagaan na pediatrician ya, “Aro yon maong si Joel.” Lapud aliklikna mi nen Luigi so maaron panangiyansakit nen Aman Jehova sanen  nianak si Joel, labay min naliklikna met na anak mi so panangaro mi. Dakel so pankanawnawa min ipalikna itan ta talagan kakkaukolan toy tulong mi.

Anggad impanpitoy taon nen Joel et tinaon a nauulit labat so nagagawa. Kapagno Oktubre anggad Marso, mantutumbokay pansakit to kanian pawilpawil kami’d ospital. Kaleganan na satan et panggugunaetan ko met a naasikaso so duara nin anak mi a si David tan Marc. Tan mitutulongan met ira ed pangasikaso ed si Joel. Et walaray makasurprisan resulta na saya. Singa bilang, pigaran doktor so angibaga ya aglan balot makaakar si Joel. Balet aminsan, sanen apat taon to et inkuan nen Marc, “Gala Joel, ipanengneng mo’d si Mommy ya sarag mo!” Agko ilaloan a makakukbang na pigara si Joel! Agaylay liket mi, kanian nampikasi kamin sankapamilyaan pian pisalamatay Aman Jehova. Wala met iray pankanawnawan anggano melag labat so nagawaan nen Joel et maar-aro min kokomendaan.

Maabig so Pansumpalan na Pangibangat Manlapud Inkaugaw

Anggad posible et ipipila mi Joel ed saray aral. Pian agnaalisay sakit, papayurongen mi ed stroller ya asakobay plastik. Anggaman ontan so situasyon to, panlikliketan to nin siansiay miaral.

Papasesegen kami na saray agagi tan maar-aro da kamin tutulongan. Walay sakey ya agin lanang ton ipapanonot imay walad Isaias 59:1: “Nia, say lima nen Jehova ag-apatikey, pian agto nayarian so mangilaban komon; say layag to agmet apuletan, pian agto nayarian so ondengel komon.” Sayan teksto et akatulong ed sikami a manmatalek ed si Jehova.

Legay ibabaleg nen Joel, nanggunaetan min ipamoria ed sikato ya importanti’d bilay to so panlingkor ed si Jehova. Lanang min itotongtong so nipaakar ed si Jehova, diad ontan et nawalaay malet a panangaro ed Sikato. Impikasi mi ed si Jehova a bendisyonan to komon iray sagpot mi pian maabig so pansumpalan na panangibangat mi ed si Joel.

Nen kakkapan-tinedyer nen Joel, malikeliket kami ta labalabay ton itongtong iray katuaan a walad Biblia. Sanen 14 años to, legan a manpapaabig ed operasyon, aliketan ak sanen inkuan nen Joel ya, “Mommy, ikdan ko amo na libron Makapambilay na Ando lan Ando si Doktor?” Kalabas na pigaran taon, kaukolan ya operaan lamet si Joel. Amta min posible ya agto la iya nilabas. Inibaan mi si Joel a nanggawa na sulat, tan antis na operasyon to et inter to itan ed saray doktor. Akasulat ed satan so talindeg to nipaakar ed dala. Tinepetan na doktor si Joel, “Et, onian talagay labay mo?” Mapekder ya inkuan nen Joel, “On, Dok.” Talagan aliketan kami ed impanengneng ton talek ed Manamalsa to tan ed determinasyon ton Sikatoy paliketen. Anggan say staff na ospital et masuporta ed sikami, tan pisalsalamatan mi itan.

 Inmaligwas so Espiritualidad nen Joel

Sanen 17 años nen Joel, sikatoy nampabautismo ed danum bilang simbolo na dedikasyon to ed Dios. Agmin balot nalingwanan iman! Agaylay liket min nanengneng so inyaligwas to ed espiritual. Anggad natan et siansia nin inad-aro to si Jehova tan masetseseg parad katuaan. Diad tua, naynay ton ibabaga ed saray nakakatongtong to ya, “Say katuaan so bilay ko!”

Nen man-20 años lay Joel, naaralan toy manbasa tan mansulat. Panir-irapan to kalamor itan. Kada no walay antikey a salitan nisulat to, panlikliketan to. Manlapu la’d saman, kinabuasan ton babasaen so teksto ed Usisaen so Kasulatan ya Inagew-agew. Insan to pansagpotan a kopyaen ed notebook to so teksto. Saratan ya insusulat to et papablien min maong!

Labay nen Joel a masakbay kami’d aral pian naabrasa toy amin ya onsabi ed Kingdom Hall. Panliketan to met so mankomento tan mibiang ed demostrasyon. Ontutulong met ed sound system tan arum nin kimey. No sarag na laman to, sinimba a mimilan manpulong. Nen 2007, inyanunsio ed kongregasyon mi a si Joel et aturon ministeryal a lingkor. Akaakis kami ed liket. Talagan maaron bendisyon iya nen Jehova!

Alikna Mi Tulong nen Jehova

Nen 1999, walay adalan mi lamet a subok. Adisgrasya si Luigi ta abangga na palpalaran a drayber so kotse mi. Kaukolan a putoten so sakey a sali to, tan aminpigan naoperaan ed spinal column. Nanmatalek kami lamet ed si Jehova, tan alikna mi panamabiskeg to ed saray lingkor ton mankakkaukolan. (Fil. 4:13) Anggan pukol lay Luigi, panggugunaetan mi magmaliw a positibo. Lapud agla makapantrabaho, dakel so panaon to’d si Joel. Kanian, mas malaem met lay panaon ko ed espiritual iran kimey. Ontan met, mas naikdan nen Luigi na imano so espiritual a pankaukolan na pamilya mi tan na kongregasyon. Tan anggad natan et sikatoy coordinator na ulop na mamatatken.

Lapud sarayan mairap a situasyon mi, mas dakel so panaon min sankakaiba bilang pamilya. Diad ilalabas na panaon, naaralan mi magmaliw a makatunongan tan agmaniilalo na alabas. No nadidismaya kami, ibebesngaw mi ed si Jehova so nalilikna mi. Makapaermen balet ta sanen adulto tan akabiig la ray anak min si David tan Marc, kalkalna la ran tinmunda a nanlingkor ed si Jehova. Komon ta ompawil ni ran siansia ed si Jehova.​—Luc. 15:17-24.

Diad inlalabas na taotaon, aliklikna mi tulong nen Jehova tan naaralan mi manmatalek ed sikato diad kada subok a nadadalan mi. Makabkabaliksan ed sikami imay walad Isaias 41:13: “Siak, si Jehova a Dios mo, a mangitagey [odino, mamemben] na kawanan a limam, a kuan ko ed sika, Agka antakot, tulongan ta ka.” Naliligliwa kami ta amta min malet a bebembenan nen Jehova so lima mi. Talagan nibaga mi a binmiskeg so talek mi’d si Aman Jehova lapud pansusungdo mi ed saray subok.

[Paimano ed leksab]

[Saray litrato ed pahina 16, 17]

Si Joel, kaibay Mommy ton si Ada

[Litrato ed pahina 18]

Si Ada, Joel, tan Luigi

[Litrato ed pahina 19]

Labalabay nen Joel ya abrasaen iray agagi diad Kingdom Hall