Kasin Aabuloyan Moy Jehova a Mantepet ed Sika?

LUGAN na Biblia so nilasus iran tepet a manabi ed utel na kapusoan. Diad tua, anggan si Jehova a mismo et angusar na saray tepet pian ibangat iray importantin katuaan. Singa bilang, angusar si Jehova na pigaran tepet sanen papasakbayan toy Cain a kaukolan ton ipetek so lingon kurang to. (Gen. 4:6, 7) Saray impantepet met nen Jehova ed si Isaias so amakiwas ed sikaton manggawa na duga. Sanen nadngel toy tepet nen Jehova a, “Siopa so ibakik, tan siopa so onla a nipaakar ed sikatayo?” inmebat si propetan Isaias: “Wadia ak, ibaki mo ak.”​—Isa. 6:8.

Si Jesus, say Sankatalonggaringan a Managbangat so epektibo met ya angusar na saray tepet. Akasulat ed saray Ebanghelyo so masulok a 280 iran tepet nen Jesus. Anggaman walaray pankanawnawan inusar to iray tepet pian anggapoy niyebat na saray mangikritiko ed sikato, mabetbet a say gagala to et say panabi ed puso na saray dumerengel to, a mamapakiwas ed sikaran mangusisa ed espiritualidad da. (Mat. 22:41-46; Juan 14:9, 10) Ontan met, si apostol Pablo ya angisulat ed 14 a libro na Kristianon Griegon Kasulatan et angusar na saray makakombinsin tepetepet. (Roma 10:13-15) Singa bilang, diad samay sulat to’d saray taga Roma et dakel so inusar ton tepet. Saramay akabasa ed satan so apakiwas a mangapresya ed “kaaralem na kaykayamanan tan karunongan tan pikakabat na Dios.”​—Roma 11:33.

Anggaman walaray tepet a mainomay ya ebatan, wala met iray tepet a pannonoten to kan maong. Akarekord ed saray Ebanghelyo so mabetbet ya impangusar nen Jesus ed saray tepet a pannonoten to kan maong. Diad sakey ya inkagawa et pinasakbayan nen Jesus iray disipulo to: “Manalwar kayo ed lebadura na saray Fariseo tan ed lebadura nen Herodes,” salanti, say pansimpisimpitan tan palson bangabangat da. (Mar. 8:15; Mat. 16:12) Ag-atalosan na saray disipulo nen Jesus so labay ton ibaga tan mantetetelan ira lapud alingwanan day angawit na tinapay. Imanoen pay impangusar nen Jesus na saray tepet ed tongtongan da. “Inkuan to ed sikara: ‘Akin et pansasangsangan yoy agyo impangawit na tinapay? Agyo ta ni natetebek tan natatalosan so kabaliksan na saya? Kasin naiirapan a makatalos so kapusoan yo? “Anta walaray mata yo, agkayo makanengneng, tan anta walaray layag yo, agkayo makarengel?” . . . Agyo ta ni natatalosan so kabaliksan na saya?’” Pinannonot iran maong na saray tepet nen Jesus tan apakiwas iray disipulo ton morekdeken so peteg a kabaliksan na saray salita to.​—Mar. 8:16-21.

Abuloyan Mo Ak a Mantepet ed Sika

Angusar si Jehova na saray tepet pian ipetek so kanonotan na lingkor ton si Job. Diad panamegley na dakel iran tepet, imbangat nen Jehova ed si Job so inkaandi-pikakabat to no ikompara ed Manamalsa to. (Job, kap. 38-41) Kasin iilaloan nen Jehova so pakadngel na ebat ed kada tepet? Mapatnag ya andi. Saray tepet a singa say “Iner so kawalaan mo sanen inggaton ko so saray panangipaletnegan ed dalin?” et mapatnag ya inusar pian sagyaten so panagnonot tan emosyon nen Job. Kayari na ontan iran impantetepet, ngalngali agmakasel si Job. Say nikuan to labat et: “Anto so iyebat ko ed sika? Igaton ko so limak ed tapew na sangik.” (Job 38:4; 40:4) Atalosan nen Job so punto tan nampaabeba. Balet ta aglabat ibabangat nen Jehova ed si Job so pagmaliw a mapaabeba, noagta apasimbalo met so kanonotan to. Panon?

Anggaman “naskey tan matunong” a laki si Job, sagpaminsan ya apatnagan ed saray salita to so lingon panmoria, tan saya so naimano nen Elihu sanen kinorehi toy Job lapud “pinatunong to so inkasikato a magmaong nen say Dios.” (Job  1:8; 32:2; 33:8-12) Kanian saray tepet nen Jehova so angipetek met ed pakatalos nen Job. Diad panamegley na sakey a bagyo et oniay inkuan na Dios ed si Job: “Siopa kan manduaruwa ed kakabatan ko diad panamegley na saray andi-kakanaan a salitam? Alagey kan sakey a laki, ta ebatan mo ray tepeten ko ed sika.” (Job 38:1-3, Maung a Balita) Panamegley na saray tepet, kalkalnan impaimano nen Jehova so andiay geter a kakabatan tan pakayari to a singa ipapatnag na saray makapakelkelaw a pinalsa to. Akatulong iyan impakaliwawaan pian lalon manmatalek si Job ed panangukom tan pangaasikaso nen Jehova ed saray bengatla. Talagan alay abig ya eksperiensya ed si Job so impantepet a mismo ed sikato na Makapanyarin-amin a Dios!

No Panon Tayon Abuloyan si Jehova a Mantepet ed Sikatayo

Komusta itayo met? Nagunggonaan itayo kasi ed saray tepet ya akarekord ed Biblia? On! Say pandalepdep tayo ed saraman a tepet so mangitarok na daakan ya espiritual iran gunggona. Ontutulong iray mapuersan tepet ed inkaepektibo na Salitay Dios. Petepeteg, “say salita na Dios et . . . mabisbiskeg . . . tan nibiig to iray kanonotan tan getma na puso.” (Heb. 4:12) Balet, pian talagan minabang itayo, kaukolan tayon itepet iratan ed inkasikatayo, a singa itayo tetepetan a mismo nen Jehova. (Roma 15:4) Pantongtongan tayo so pigaran alimbawa.

“Agta gawaen na Ukom na amin a dalin so maalas [odino, duga]?” (Gen. 18:25) Intepet iya nen Abraham ed si Jehova diad samay pangukom To ed Sodoma tan Gomorra. Agbalot ninonot nen Abraham ya onkiwas si Jehova na agmakatunongan diad panusa to’d saray matunong a kaiba na saray mauges. Ipapatnag na tepet nen Abraham a malet so pananisia to ed inkatunong nen Jehova.

Diad panaon tayo, walaray tendensia na totoo a palbengan so nipaakar ed panangukom nen Jehova ed arapen, a singa no siopan talagay makaliktar ed Armagedon odino siopay napaoli. Imbes ya abuloyan tayo so ontan iran kanonotan a mangabala ed sikatayo, dalepdepen tayo imay intepet nen Abraham. Ontan itayo met, say impakaamta tayo’d si Jehova bilang maaron mangatatawen ya Ama tan say impakawalaan tayoy talek ed inkahustisya tan panangasi to so mamuger ed sikatayo manlapud pakadarak na panaon tan biskeg a resultay agnakaukolan a panagpaga, panduaruwa, tan andi-kanan pansusuppiatan.

“Siopa ed sikayo so makapangarum na sankasiko ed dukey na bilay to lapud pampapaga to?” (Mat. 6:27) Diad impitongtong nen Jesus ed dakel a totoo a kabiangan iray disipulo to, inusar to iyan tepet pian ipurek so pankaukolan na pangipiya na mismon bilay da ed panangasikaso nen Jehova. Ondarakel iray kapagaan lapud wala itayo la’d kaunoran iran agew na sayan mauges a sistema  na bengabengatla. Balet say pangisentro na imano ed saratan et agmamarukey na bilay tayo odino mamaaligwas ed kualidad na kabibilay.

Sano pampapagaan tayoy kipapasen tayo odino na saray inad-aro tayo ed bilay, say pandalepdep ed tepet nen Jesus so ontulong ed sikatayon nawalaan na dugan panmoria ed saray kapagaan tayo. Makatulong itan pian napatunda iray negatibon panmoria tan kapagaan a mamapakapuy ed nonot, emosyon, tan laman tayo. Singa ed impaseguro la nen Jesus, say mangatatawen ya Ama tayo a mamapakan ed saray ontitikyab a kamanokan tan mangakawes ed saray tanaman ed uma et amta to so amin a pankaukolan tayo.​—Mat. 6:26-34.

“Nayarian ta na sakey a too so mangala na apuy ed akwalan to, tan saray kawes to ag-ira napoolan?” (Uli. 6:27) Lugan na unonan siameran kapitulo na Uliran so antikey a paliwawa na sakey ya ama a manginanabang na praktikal a kakabatan ed anak to. Tutukoyen na tepet ed tagey so makapasinagem a pansumpalan na pikakalugoran. (Uli. 6:29) Sano namoria tayon mikakarinyoan tayo la odino aabuloyan tayo lay inkasikatayon mannonot na mauges iran seksual a pilalek, sayan tepet so nepeg a mamasakbay ed sikatayo a wala itayo la’d kapeligroan. Nayarin usaren met iyan tepet sano nasasagyat so sakey a too a manggawa na agmakabat a kurang. Mapatpatnag ya idadanet na saya so praktikal a simbawan naromog ed Biblia: ‘Anien mo so intanem mo’!​—Gal. 6:7.

“Siopa ka a mangukom ed lingkor ed abung na arum?” (Roma 14:4) Diad samay sulat nen Pablo ed saray taga Roma, impaliwawa to so linmesan problema ed inmunan-siglon kongregasyon. Lapud nanduruma so kulturan binalegan na arum a Kristiano, kagagawa da lay pangukom ed desisyon tan kiwas na saray kapananisiaan da. Kanian samay tepet nen Pablo so angipanonot ed sikara a kaukolan dan abrasaen so balang sakey tan ipia ra so panangukom ed si Jehova.

Ontan met natan, nanduruma so kulturan binalegan na saray lingkor nen Jehova. Ingen, pinankakasakey To itayo. Kasin mikokoopera tayo ed satan a pankakasakey? No kagagawa tayo so pangukom a tampol ed impakalingo na agi tayo, maabig no itepet tayo met ed inkasikatayo imay intepet nen Pablo!

Mas Onapit Itayo ed si Jehova Panamegley na Saray Tepet

Ipapanengneng na sarayan alimbawa no panon a papakiwasen na saray tepet a kabiangay Salita na Dios iray indibidual a mangusisa ed inkasikara. Makatulong so pangonsidera ed konteksto na kada tepet pian niyaplika tayo iratan ed dilin kipapasen tayo. Tan legan tayon babasaey Biblia, naamtaan tayo ni ray kaaruman a makatulong a tepetepet.​—Nengnengen so kahon ed pahina 14.

No abuloyan tayon ontanek ed kapusoan tayo iray tepet a naromog ed Salita na Dios, ontulong iratan ed sikatayon nitunos so kapusoan tan kanonotan tayo ed saray matunong a dalan nen Jehova. Kayari na impantepet nen Jehova, oniay inkuan nen Job: “Nadngel ko so nipaakar ed sika lapu ed panamegley na pakadngel na layag, balet natan say matak nanengneng to ka.” (Job 42:5) On, mas inmelet so pananisia nen Job ed si Jehova, a singa to nanenengneng a mismo. Diad saginonor et oniay imbalikas nen babangatan a Santiago: “Onapit kayo ed Dios, tan sikatoy onapit ed sikayo.” (Sant. 4:8) Abuloyan tayo sirin so amin a kabiangan na Salitay Dios, pati saray tepet, ya ontulong ed sikatayon onaligwas ed espiritual, tan mas malinew tayon “nanengneng” si Jehova!

[Kahon ed pahina 14]

Panon a makatulong so pangitepet mo’d inkasika na sarayan tepet pian naalig moy panmoria nen Jehova ed saray bengabengatla?

▪ “Walaan kasi si Jehova na baleg a liket dia ed bagbagat a poolan tan bagbagat, singa say panangunor ed boses nen Jehova?”​—1 Sam. 15:22.

▪ “Say nanggawa na mata, agto kasi nanengneng?”​—Sal. 94:9

▪ “Nanengneng mo so too a makabat ed dili a matamata to?”​—Uli. 26:12.

▪ “Maong ta ed sika so pampasnok mo?”​—Jon. 4:4.

▪ “Anto so nagunggona na sakey a too no nakayarian toy interon mundo balet ta nabalang toy kamarerwa to?”​—Mat. 16:26.

▪ “Siopa so makapangisian ed sikatayo ed aro nen Kristo?”​—Roma 8:35.

▪ “Antoy walad sika ya agmo inawat?”​—1 Cor. 4:7.

▪ “Antoy piparaan na liwawa ed kabilungetan?”​—2 Cor. 6:14.

[Litrato ed pahina 15]

Anto so naaralan nen Job ed saray tepet nen Jehova?