Say Betang na Masanton Espiritu ed Pakasusumpal na Gagala nen Jehova

“[Say] salitak ya ompaway ed sangik . . . sumpalen to naani so kaliktan ko, tan onaligwas naani ed bengatla a pangiyakaran ko ed sikato.”​—ISA. 55:11.

1. Ipaliwawa so pandumaan na plano tan gagala.

ISIPEN pan walay duaran laki a parehon manbiahen akakotse. Say sakey et nononoten toy ondalan ed espisipikon rota. Samay sakey balet et sankanonot toy destinasyon to, ingen ta dakel so amta ton rota a mamaarap ed satan. Kanian no bilang ta walay onlesan problema, sarag ton umaney rota to. Say pandumaan na paraan na sarayan duaran laki et mangipapanengneng ed pandumaan na plano tan gagala. Say plano et mipara ed pakawalaay detalyadon rota, bangta say gagala et mankabaliksan a walad nonot na sakey so destinasyon to balet ta agto labay ya ibagan walay espisipikon rota a dalanen to.

2, 3. (a) Antoy laktipen na gagala nen Jehova, tan antoy ginawa to sanen nankasalanan si Adan tan Eva? (b) Akin a nepeg tayon talosan so pakasusumpal na gagala nen Jehova?

² No nipaakar ed panusumpal nen Jehova ed linawa to, sikatoy walaan na sakey a gagala a nasumpal diad ilabas na panaon, aliwan sakey a plano ya agla nauman. (Efe. 3:11) Laktipen na satan a gagala so orihinal a ginetma to parad katooan tan dalin, salanti, sayan mundo et magmaliw a paraiso a panayaman na perpekton totoo, tan walaan ira na kareenan tan liket ed andi-angga. (Gen. 1:28) Sanen nankasalanan si Adan tan Eva, nanggawan tampol si Jehova na uksoyan pian naseguron nasumpal  so gagala to. (Basaen so Genesis 3:15.) Inggetma nen Jehova a say simbolikon bii et mamawala na “ilalak” odino bini a mangekal ed amin a kaugsan tan maneral ed sengegan na satan, si Satanas.​—Heb. 2:14; 1 Juan 3:8.

³ Anggapoy pakayari ed tawen odino diad dalin a makaamper ed pakasumpal na gagala na Dios. (Isa. 46:9-11) Akin? Lapud uusaren nen Jehova so masanton espiritu to. Satan a mabisbiskeg a puersa et mangagarantiya a say gagala na Dios et ‘nasumpal.’ (Isa. 55:10, 11) Maabig no talosan tayo no panon a nasusumpal so gagala na Dios tan onkiwas unong ed satan. Akadepende ed satan so bilay tayo ed arapen. Sakey ni, ombiskeg so pananisia tayo no natatalosan tayo no panon ya uusaren nen Jehova so masanton espiritu to. Kanian, pantongtongan tayo pa so betang na espiritu​—nensaman, natan, tan ed arapen​—diad pakasusumpal na gagala nen Jehova.

Say Betang na Masanton Espiritu Nensaman

4. Panon a kalkalnan imparungtal nen Jehova so gagala to?

⁴ Nensaman et kalkalnan imparungtal nen Jehova so gagala to. Diad primero et “sagradon sekreto” no siopa imay insipan a Bini. (1 Cor. 2:7) Linmabas ni so 2,000 taon insan tinukoy lamet nen Jehova so nipaakar ed bini. (Basaen so Genesis 12:7; 22:15-18.) Inter nen Jehova ed si Abraham so sipan a walaan na baleg a kasumpalan. Ipapabitar na samay balikas a “dia ed ilalak mo” a say Bini et nianak bilang too, tan say panlapuan to et diad poli nen Abraham. Seguradon interesadon maong si Satanas sanen niparungtal iyan detalye. Talagan anggapo lay arum a labay na sayan Kalaban noag say deralen odino nalaokan so poli nen Abraham pian naamper so gagala na Dios. Balet imposible itan a nagawa ta uusaren na Dios so agnanengneng ya espiritu to. Panon?

5, 6. Panon ya inusar nen Jehova so espiritu to pian salimbengan iray indibidual a panlapuan na Bini?

⁵ Inusar nen Jehova so espiritu to pian salimbengan iray indibidual a panlapuan na Bini. Oniay inkuan nen Jehova ed si Abram (Abraham): “Salimbengan ta ka’d kaatapan.” (Gen. 15:1, Maung a Balita) Si Jehova et ag-angangga’d salita. Singa bilang, imanoen tayo pa no antoy agawa nen manga 1919 B.C.E. sanen temporaryon nanayam si Abraham tan Sara ed Gerar. Say ari na Gerar a si Abimelec et agto amta a si Sara et asawa nen Abraham, kanian impaala toy Sara pian magmaliw ya asawa to komon. Posible kasin inmaneobra iya nen Satanas pian ag-ilukon nen Sara so ilalak nen Abraham? Anggapoy imbaga na Biblia nipaakar ed saya. Balet ta nabasa tayo a walay ginawa nen Jehova. Diad kugip nen Abimelec et pinasakbayan Ton agto didiwiten si Sara.​—Gen. 20:1-18.

⁶ Ag-aminpinsan ya inliktar nen Jehova si Abraham tan say kapamilyaan to. (Gen. 12:14-20; 14:13-20; 26:26-29) Kanian, oniay inkuan na salmista nipaakar ed si Abraham tan saray ilalak to: “Ag-inyabuloy na Dios a pairapen ira na anggan siopa, tan diad panangiyagel to’d sikara, pinapasakbayan to ray arari. Inkuan to, ‘Agyo didiwiten iray aripen kon pinilik; agyo papasakitan iray propetak!’”​—Sal. 105:14, 15, MB.

7. Panon a sinalimbengan nen Jehova so bansan Israel?

⁷ Inusar met nen Jehova so espiritu to pian salimbengan so Israel nensaman, say bansa a panlapuan na insipan a Bini. Panamegley na espiritu nen Jehova et inter to so Ganggan ed Israel, kanian apansiansia so tuan panagdayew, tan saray Judio et ag-arutakan ed espiritual, moral, tan pisikal. (Exo. 31:18; 2 Cor. 3:3) Nen panaon na saray Ukom, pinabiskeg na espiritu nen Jehova so pigaran lalaki pian iliktar so Israel ed saray kalaban da. (Uko. 3:9, 10) Diad inlalabas na saray siglo ya anggad inkianak na manunan kabiangan na bini nen Abraham a si Jesus, maseguron inusar so masanton espiritu pian nasalimbengan so Jerusalem, Betlehem, tan say templo. Sarayan pasen et walaan na betang ed impakasumpal na saray propesiya nipaakar ed si Jesus.

8. Antoy pakapatnagan a say masanton espiritu et direktan kinmana diad bilay tan ministeryo na Anak na Dios?

 ⁸ Say masanton espiritu et direktan kinmana diad bilay tan ministeryo nen Jesus. Lapud masanton espiritu, walay milagron agnin balot agawa tan aglan balot naulit, salanti, innginew, inlukon, tan inyanak na birhen a si Maria so perpekton Anak ya ag-akatawir na ipapatey. (Luc. 1:26-31, 34, 35) Diad saginonor, sanen ugaw ni Jesus, sikatoy sinalimbengan na espiritu manlapud ipapatey. (Mat. 2:7, 8, 12, 13) Nen ngalngali la man-30 si Jesus, sikatoy nilanaan na Dios na masanton espiritu, tinuro ton manawir ed trono nen David tan ingganggan ton manpulong. (Luc. 1:32, 33; 4:16-21) Panamegley na masanton espiritu et naikdan na pakayari si Jesus a manggaway milagro. Pinaabig to ray mansasakit, amakan na dakel a totoo, tan amaoli na inaatey. Sarayan makapakelkelaw a ginawa nen Jesus et alimbawa na saray gawaen to sano manuley la diad dalin.

9, 10. (a) Panon a napatnagan a say masanton espiritu et walad saray inmunan-siglon disipulo nen Jesus? (b) Anton pananguman ed pakasusumpal na gagala nen Jehova so niparungtal nen inmunan siglo?

⁹ Manlapu la nen Pentecostes 33 C.E. et inusar nen Jehova so espiritu to pian lanaan so arum nin kabiangan na bini nen Abraham, a dakel ed sikara et agnanlapud poli nen Abraham. (Roma 8:15-17; Gal. 3:29) Say masanton espiritu et napatnagan a walad saray inmunan-siglon disipulo nen Jesus, tan satan so amabiskeg ed sikaran manpulong tan manggaway makapakelkelaw iran kimey. (Gawa 1:8; 2:1-4; 1 Cor. 12:7-11) Panamegley na saratan a mamilagron regalo, imparungtal na masanton espiritu so pananguman ed panusumpal nen Jehova ed gagala to. Agla usaren nen Jehova so abayag lan uksoyan parad panagdayew diad templo ed Jerusalem. Say aabobonan to la et say kapkapangiletneg a Kristianon kongregasyon. Manlapu la’d saman, uusaren nen Jehova itan a nilanaan ton kongregasyon pian nasumpal so gagala to.

¹⁰ Inusar nen Jehova so masanton espiritu pian manalimbeng, mangiter na pakayari, tan manlana. Pigara labat iraya ed saray paraan nen Jehova pian nasumpal so gagala to. Diad panaon tayo ey? Panon ya uusaren nen Jehova so espiritu to pian nasumpal so gagala to? Kaukolan tayo itan a naamtaan lapud labay tayoy mikoopera ed espiritu to. Aralen tayo pa sirin so apatira ed saray paraan na panguusar nen Jehova ed espiritu to natan.

Say Betang na Masanton Espiritu Natan

11. Antoy mangipapanengneng ya ontutulong so masanton espiritu pian magmaliw a malinis iray totoo na Dios, tan panon mon nipanengneng a paiwawanwan ka ed espiritu?

¹¹ Unona, ontutulong so masanton espiritu pian magmaliw a malinis iray totoo na Dios. Kaukolan a malinis ed moral iray lingkor nen Jehova. (Basaen so 1 Corinto 6:9-11.) Walaray nagmaliw a tuan Kristiano a dati et imoral so kagagawa ra. Sikaray managlawan, managkalugoran, tan homoseksual. Tua, aliwan mainomay a naekal so pilpilalek a manresulta ed kasalanan. (Sant. 1:14, 15) Balet ta sarayan totoo et ‘naurasan la,’ a mangipapanengneng ya inuman da lay kabibilay da pian napaliket so Dios. Antoy makatulong ed sakey a mangaaro’d Dios pian nalabanan toy makapuy iran pilalek? Say ontulong et say “espiritu na Dios,” kuan na 1 Corinto 6:11. No mansiansia kan malinis ed moral, ipapanengneng mon paiwawanwan ka ed espiritu.

12. (a) Unong ed pasingawey ed si Ezequiel, panon ya iwawanwan nen Jehova so organisasyon to? (b) Panon mon nipanengneng a mikokoopera ka ed espiritu?

¹² Komadua, uusaren nen Jehova so espiritu to pian iwanwan so organisasyon to. Diad pasingawey ed si Ezequiel, say kabiangan na organisasyon nen Jehova a walad tawen et inrepresenta na karwahe a lawas onggagalaw pian sumpalen so gagala nen Jehova. Anton puersa so mamapagalaw ed karwahe pian onla ed sakey a direksion? Say masanton espiritu. (Eze. 1: 20, 21) Tandaan tayo a duara so kabiangan na organisasyon nen Jehova, say sakey et walad tawen tan say sakey et wadiad dalin. No samay kabiangan a walad tawen et iwawanwan na masanton espiritu, ontan met sirin ed kabiangan a wadiad dalin. No matoor ka ed kabiangan na organisasyon nen Jehova a wadiad dalin tan matulok ed pangiwawanwan na satan, ipapanengneng mon makapibabansag ka ed karwahe nen Jehova tan mikokoopera ka ed masanton espiritu to.​—Heb. 13:17.

13, 14. (a) Siopa imay tinukoy nen Jesus a “kailalakan” diad Mateo 24:34? (b) Mangiter na alimbawa a mangipapanengneng ya ontutulong so masanton espiritu pian nalinewan iray katuaan ed Biblia. (Nengnengen so kahon a “Makapibabansag Ka Ta ed Ililiwawa na Katuaan?”)

¹³ Komatlo, uusaren nen Jehova so masanton espiritu pian ipalinew iray katuaan ed Biblia. (Uli. 4:18) Sayan magasin et abayag lan uusaren na “matoor tan makabat ya aripen” a manunan paraan pian kalkalnan niparungtal so liwawa na katuaan. (Mat. 24:45) Singa bilang, pantongtongan tayo pa imay “kailalakan” a sinalambit nen Jesus. (Basaen so Mateo 24:32-34.) Diad sayan teksto, siopay tutukoyen nen Jesus a kailalakan? Ipapaliwawa na artikulon “Kiwawala nen Kristo​—Anto so Pakatalos Yo ed Saya?” a say tutukoyen nen Jesus et aliwan saray marelmeng a totoo, noagta saray disipulo to a magano lan nalanaan na masanton espiritu. * Saray alanaan a papatumbok nen Jesus nen inmunan siglo tan diad panaon tayo so makanengneng ed tanda tan makatebek ed kabaliksan na satan, salanti, si Jesus et “wala la ed arap na saray puerta.”

¹⁴ Antoy pakatalos tayo ed sayan eksplinasyon? Anggaman agtayo amtay eksakton kabayag na sayan “kailalakan,” maabig no amta tayo so pigaran bengatla nipaakar ed salitan “kailalakan.” Kaslakan lan ontutukoy itan ed totoo a nandurumay edad da tan nambilay ed espisipikon peryodo na panaon. Aliwa met itan ya andukerukey a panaon, tan walay panganggaan na satan. (Exo. 1:6) Anto sirin so labay ya ibaga nen Jesus? Mapatnag ya ipapabitar to a saray arum ya alanaan a makaimaton ed igapo na baleg a kairapan et nasabian da nin mabilay iramay alanaan ya akatebek ed saray tanda nen 1914. Walay gapoan na satan a kailalakan, tan seguradon walay panganggaan met na satan. Say nanduruman kabiangan na tanda et nagagawa la, a mangipapanengneng ya asingger lay baleg a kairapan. No lawas kan akaparaan tan mantultuloy ya akabantay, ipapanengneng  mon makapibabansag ka ed ililiwawa na katuaan tan paigigiya ka ed masanton espiritu.​—Mar. 13:37.

15. Antoy mangipapanengneng a papabiskegen itayo na masanton espiritu pian niyabawag tayoy maong a balita?

¹⁵ Komapat, papabiskegen itayo na masanton espiritu pian niyabawag tayoy maong a balita. (Gawa 1:8) Seguradon saya so rason no akin a nipupulong la ed interon mundo so maong a balita! Ompan sakey ka ed saramay mabapbaing odino talawan a manpulong, ya inisip mon, ‘Agkon talaga nayarian so manpulong ed kaabungan!’ Balet natan, masetseseg ka la ed sayan kimey. * Anggano walaray isusumpa odino panamasegsegang, ag-intunda na dakel a matoor a Tasi nen Jehova so panagpulong. Say masanton espiritu labat so makapangiter ed sikatayo na biskeg pian ontalona itayo anggaman walaray makasbel, tan pian nagawaan tayo iray bengatlan imposible no diad dilin biskeg tayo. (Miq. 3:8; Mat. 17:20) No gagawaen moy anggaay nayarian mo ed panagpulong a kimey, ipapanengneng mon mikokoopera ka ed espiritu.

Say Betang na Masanton Espiritu ed Arapen

16. Akin et matalek itayo a salimbengan nen Jehova iray lingkor to diad baleg a kairapan?

¹⁶ Diad arapen, usaren nen Jehova so masanton espiritu to diad makapadinayew iran paraan pian nasumpal so gagala to. Konsideraen tayo pa so nipaakar ed pananalimbeng. Naamtaan tayo ya inusar nen Jehova so espiritu to nensaman pian salimbengan so pigaran indibidual tan say bansan Israel. Kanian kombinsido itayo ya usaren to met itan a makapanyarin espiritu pian salimbengan iray lingkor to diad manasingger lan baleg a kairapan. Agtayo la kaukolan ya amtaen so espisipikon paraan nen Jehova pian protektaan to itayo diad satan a panaon. Imbes, matalek itayo ta amta tayon say imano nen Jehova et walad saray mangaaro’d sikato tan seguradon tulongan to ra panamegley na masanton espiritu to.​—2 Awa. 16:9; Sal. 139:7-12.

17. Panon ya usaren nen Jehova so masanton espiritu to diad balon mundo?

¹⁷ Panon ya usaren nen Jehova so masanton espiritu to diad balon mundo? Usaren to itan pian nisulat iramay balon lukot a nalukasan. (Apo. 20:12) Antoy karga na saratan? Saray espisipikon kakaukolanen nen Jehova ed sikatayo sanlegan na sanlibon taon. Pitamitam mo ta’n usisaen so karga na saratan a lukot? Talagan pitalaran tayo so pambilay ed balon mundo. Agnatukor na nonot tayo so karakep na bilay ed satan a panaon sano naawat tayoy daakan a bendisyon lapud usaren nen Jehova so masanton espiritu pian sumpalen so gagala to parad dalin tan katooan.

18. Antoy nepeg mon panggunaetan?

¹⁸ Agtayon balot lilingwanan a seguradon nasumpal so gagala nen Jehova lapud uusaren to so masanton espiritu to, say sankabiskegan a puersa ed interon uniberso. Kaiba ka ed satan a gagala. Kanian komon ta panggunaetan mon kerewen ed si Jehova so masanton espiritu to tan paigiya ka ed satan. (Luc. 11:13) Diad ontan et naawat mo so bilay ya inggagala nen Jehova ed totoo, salanti, say andi-anggaan a bilay diad Paraiso.

[Saray paimano ed leksab]

Kasin Nanonotan Mo?

• Diad antoran paraan ya inusar nen Jehova so masanton espiritu to nensaman pian nasumpal so gagala to?

• Panon ya uusaren nen Jehova so espiritu to natan?

• Panon ya usaren nen Jehova so espiritu to diad arapen pian nasumpal so gagala to?

[Tepetepet Parad Panagaral]

[Kahon ed pahina 10]

Makapibabansag Ka Ta ed Ililiwawa na Katuaan?

Lawas ipapalinew nen Jehova ed totoo to iray katuaan ed Biblia. Antoray pigaran liwawa a naamtaan tayo panamegley na Say Panag-Bantayan?

▪ Anton positibon bengatla nipaakar ed iyaaligwas ed espiritual so impabitar na samay ilustrasyon nen Jesus nipaakar ed lebadura? (Mat. 13:33)​—Hulyo 15, 2008, pahina 19-20.

▪ Kapigan anampot so panagtawag ed saray Kristiano parad mangatatawen ya ilalo?​—Mayo 1, 2007, pahina 30-31.

▪ Antoy kabaliksan na pandayew ed si Jehova “diad espiritu”? (Juan 4:24)​—Hulyo 15, 2002, pahina 15.

▪ Iner a saban so panlilingkoran na baleg ya ulop? (Apo. 7:15)​—Mayo 1, 2002, pahina 30-31.

▪ Kapigan nagawa so panangibiig ed saray karnero tan kanding? (Mat. 25:31-33)​—Oktubre 15, 1995, pahina 18-28.