Sikayoran Kalangweran​—Pilaleken Yon Lingkoran si Jehova

“Nonoten mo met so Manamalsam dia ed saray agew na inkaugaw mo.”​—ECL. 12:1.

1. Anto so inyimbita ed saray kalangweran ed Israel?

MANGA 3,500 a taon lay apalabas, oniay ingganggan na propeta nen Jehova a si Moises ed saray saserdote tan mamasiken ed Israel: “Pantitipon mo naani totoo, saray lalaki tan bibii, tan saray angkelag . . . , ta pian narengel da tan natumbok da tan ontakot ira ed Jehova a Dios yo, tan sumpalen da a gawaen so saray amin a salsalita na kaptekan.” (Deu. 31:12) Imanoen a saray binilin a mitipon pian mandayew et saray lalaki, bibii, tan angkelag ya ugugaw. On, anggan saray kalangweran so naimbitaan pian dengelen, aralen, tan tumboken iray ganggan nen Jehova.

2. Panon ya impanengneng nen Jehova ya iyaansakit to ray kalangweran diad saray kongregasyon nen inmunan siglo?

² Nen inmunan siglo, siansia nin impanengneng nen Jehova ya iyaansakit to ray kalangweran a walad limog na totoo to. Singa bilang, pinuyanan toy apostol Pablo ya ilaktip iray bilin parad kalangweran diad pigaran sulat to ed saray kongregasyon. (Basaen so Efeso 6:1; Colosas 3:20.) Lapud inyaplika na sarayan kalangweran a Kristiano iratan a bilin, lalon inmaralem so panangaro ra ed maaron Ama ra ed tawen tan sikaray benendisyonan to.

3. Panon a nipapatnag na saray kalangweran natan so pilalek dan lingkoran so Dios?

³ Natan ey? Kasin naiimbitaan met a mitipon iray kalangweran pian dayewen si Jehova? On! Talagan naliliketan so amin a totoo na Dios lapud nanenengneng da a seseryosoen na dakel a kalangweran diad interon mundo iyan bilin nen Pablo: “Nonoten tayo so sakey tan sakey pian makapansasagyatan itayo a mangaro tan manggawa na maabig, ya agtayo papaulyanan so pantitipon tayo, a singa niyugali na arum, noagta manpapasesegan itayo, nagkalalo la ta nanenengneng yon asingsingger lay agew.” (Heb. 10:24, 25) Ontan met, dakel ya ananak so kaiba na saray atateng da diad panangipulong ed maong a balita na Panarian na Dios. (Mat. 24:14) Tan kada taon et nilibon kalangweran so manpapabautismo lapud impapuson panangaro ra ed si Jehova, tan nabebendisyonan ira diad impagmaliw dan disipulo nen Kristo.​—Mat. 16:24; Mar. 10:29, 30.

Awaten so Imbitasyon​—Natan La

4. Kapigan manepeg ya awaten na saray kalangweran so imbitasyon a lingkoran so Dios?

⁴ Oniay ibabaga na Eclesiastes 12:1: “Nonoten mo met so Manamalsam dia ed saray agew na inkaugaw mo.” Parad sikayoran kalangweran, anto kasi dugan edad pian awaten yo itan a maaron imbitasyon a dayewen tan lingkoran si Jehova? Anggapoy espisipikon edad ya ibabaga na Biblia. Kanian, agmo komon iisipen ya uga-ugaw ka ni pian tuloken tan lingkoran si Jehova. Antokamay edad mo, komon ta agmo ipapaleen so pangawat ed sayan imbitasyon.

5. Panon a natulongan na atateng so anak da ya onaligwas ed espiritual?

⁵ Dakel ed sikayo so tinulongan na ateng yo pian onaligwas ed espiritual. Nibagan mipara  kayo ed si Timoteo nensaman. Sanen ugaw ni, imbangat ed sikato na ina ton si Eunice, tan bai ton si Loida, iray masanton sulsulat. (2 Tim. 3:14, 15) Nayarin ontan met so pangipapasal ed sika na atateng mo. Iyaaralan da ka na Biblia, kaiba da kan manpikasi, miaral, mi-asembli, tan manpulong. On, say panangibangat ed Salita na Dios et ambelat a responsabilidad ya inter nen Jehova a mismo ed atateng mo. Kasin aapresyaen moy panangaro tan panangiyansakit da ed sika?​—Uli. 23:22.

6. (a) Unong ed Salmo 110:3, anton klase na panagdayew so makapaliket ed si Jehova? (b) Antoy aralen tayo natan?

⁶ Legan yon ontatatken balet, labay nen Jehova a “napaneknekan yo ed inkasikayo so maong tan makapaliket tan ayadyarin linawa na Dios,” a singa si Timoteo. (Roma 12:2) Kabaliksan na satan a miaral, manpulong, tan mitulongan ka ed saray kimey ed kongregasyon, aliwan lapud labay itan na atateng mo, noagta labay mon mismo a gawaen so linawa na Dios. Napaliket moy Jehova no sikatoy mabulos mon lingkoran. (Sal. 110:3) Panon mon nipatnag sirin a pipilaleken mon maong a tuloken tan lingkoran si Jehova? Aralen tayo natan so taloran importantin paraan pian nagawaan itan, salanti, say panagaral, panagpikasi, tan maong a kondukta. Sansakeyen tayo pa iraya.

Kabaten Mon Maong si Jehova

7. Akin a maabig ya alimbawa si Jesus no nipaakar ed panagaral na Kasulatan, tan antoy akatulong ed sikato?

⁷ Say unonan paraan a nipatnag mo a pipilaleken mon maong a lingkoran si Jehova et diad inagew-agew a panagbasay Biblia. No regular mon babasaen so Salita na Dios, napenek moy espiritual a pankaukolan mo tan nawalaan kay mablin kakabatan. (Mat. 5:3) Maabig ya ehemplo ed saya si Jesus. Sanen 12 años to ni labat, sikatoy nalmo na saray ateng to diad templo “ya akayurong ed pegley na saray managbangat, ya ondedengel ed sikara tan tetepetan to ra.” (Luc. 2:44-46) Anggano ugaw ni Jesus, labalabay to lan aralen tan talosan so Kasulatan. Antoy akatulong ed sikato ey? Seguradon akatulong na baleg so impansagpot na ina ton si Maria, tan say pinagka-ama ton si Jose. Bilang lingkor na Dios et imbangat day Jesus nipaakar ed si Jehova manlapu la’d inkaugaw to.​—Mat. 1:18-20; Luc. 2:41, 51.

8. (a) Kapigan nepeg ya igapon ipurek na atateng ed ananak da so panangaro ed Salita na Dios? (b) Mangisalaysay na eksperiensyan mamaneknek ya importantin ibangat so ananak manlapud inkaugaw.

⁸ Ontan met natan, amta na saray Kristianon atateng ya importantin ipurek da ed ananak da so panangaro ed Salita na Dios manlapud inkaugaw. (Deu. 6:6-9) Ontan so ginawa na sakey ya agi a manngaray Rubi ag-abayag kayari ton inyanak so panguloan to a si Joseph. Inagew-agew ton babasaan na My Book of Bible Stories. Tan diad ibabaleg nen Joseph et ibabangat ton mangipatlep na saray teksto. Agunggonaan kasi si Joseph ed satan? On, ta sanen makasalita la, sarag to lan isalaysay ed dilin salita to so dakel ya istorya’d Biblia. Tan sanen limay taon to ni labat et naikdan lay betang ed Teokratikon Eskuelaan Parad Ministeryo.

9. Akin ya importante so pambasa ed Biblia tan pandalepdep ed nababasam?

⁹ Sikayoran kalangweran, pian lalon onaligwas so espiritualidad yo, kaukolan ya iyugali yon basaen ya inagew-agew so Biblia, tan itultuloy yo itan anggad itatken yo. (Sal. 71:17) Akin et makatulong ed iyaligwas mo so panagbasay Biblia? Imanom pa iyan imbaga nen Jesus sanen nampikasi ed Ama to: “Saya so mankabaliksan na bilay ya andi-anggaan, a kabaten da ka, say saksakey a tuan Dios.” (Juan 17:3) On, legan mon kakabaten si Jehova, sikatoy magmaliw a mas tudtua ed sika tan lalom a napaaralem so panangarom ed sikato. (Heb. 11:27) Kanian, kapagno manbabasa kay Biblia, pankanawnawam itan a mas nakabat si Jehova. Tepetan moy inkasika: ‘Diad sayan salaysay, anto ta so naaralan ko nipaakar ed personalidad  nen Jehova? Panon a napatnagan ed saya ya inaro tan iyaansakit ak na Dios?’ No ipanaon mon dalepdepen irayan tepet, natulongan kan naamtaan so panmoria tan nalilikna nen Jehova tan no antoray labay ton gawaen mo. (Basaen so Uliran 2:1-5.) Singa say kalangweran a si Timoteo, ‘natangguyor kan manisia’ ed nanaaralan mo ed Kasulatan, tan napakiwas kan masimoon a manlingkor ed si Jehova.​—2 Tim. 3:14.

Napaaralem na Pikakasi so Panangarom ed si Jehova

10, 11. Panon kan natulongan na pikakasi pian lalom a pilaleken so panlingkor ed Dios?

¹⁰ Say komaduan paraan pian lalom a pilaleken so interon puso a panaglingkor ed si Jehova et diad panamegley na pikakasim. Oniay nabasa ed Salmo 65:2: “O sika a dengelen mo so pikakasi, amin a laman ondago ed sika.” Anggaman say Israel so nasyon a pinili nen Jehova, saray sankailin oonla ed templo to et siansia nin makaasingger ed sikato diad pikakasi. (1 Ara. 8:41, 42) Anggapoy lalabien na Dios. Saramay manguunor ed ganggan to et napapaseguroan a dengelen to ra. (Uli. 15:8) Seguradon diad samay atukoy ya “amin a laman” et kaiba kayo ran kalangweran.

¹¹ Say sankaaro et lalon onapit ed sakey tan sakey no maabig so komunikasyon da. Anganko labalabay mon ibaga ed maapit a kaarom iray nononoten tan naliliknam. Mipadpara, makapitongtong ka ed Manamalsam panamegley na impapuson pikakasi. (Fil. 4:6, 7) Sano manpipikasi ka, ibesngaw mo ed si Jehova iray naliliknam a singa ka mitotongtong ed maaron ateng odino maapit a kaaro. Diad tua, baleg so pikonektaan na panagpikasim diad panangarom ed si Jehova. No mas maapit so pikakaarom ed si Jehova, naimanom a mas makabkabaliksan iray pikakasim.

12. (a) Akin et aliwan saray salita labat so importante pian magmaliw a makabkabaliksan so pikakasim? (b) Antoy ontulong pian namoriam ya asingger si Jehova ed sika?

¹² Nonot mo balet ya aliwan saray salita labat so importante pian magmaliw a makabkabaliksan so pikakasim, noagta kaiba met ed satan no antoy walad pusom. Kanian diad panagpikasim, ipaliknam ya inad-arom, rerespetoen, tan sigpot mon panmamatalekan si Jehova. Legan mon natetebek so ebat nen Jehova ed saray pikakasim, ditan mo mas namoria a “si Jehova [et] asingger ed amin ya ontawag ed sikato.” (Sal. 145:18) On, onapit si Jehova ed sika, tan pabiskegen to kan onsumpa ed Diablo tan manggawa na duga iran desisyon.​—Basaen so Santiago 4:7, 8.

13. (a) Panon ya akatulong ed sakey ya agi so pikakaaro ed Dios? (b) Panon a makatulong ed sika so pikakaaro ed Dios pian napidenengan moy desdes na arum?

¹³ Imanoen tayo pa no panon ya apabiskeg si Cherie lapud maapit a relasyon to ed si Jehova. Nen haiskul to et dakel so naawat ton tropeo tan medalya ta ataragey iray grado to tan maomaong ed isport. Kanian kapan-graduate to, sikatoy inopresian na scholarship parad kolehyo. Oniay inkuan nen Cherie: “Singano balibali iyan oportunidad, tan pipiliten ak na saray coach tan kaeskuelak ya  awaten ko itan.” Amoria to balet a no mankolehyo et dakel a panaon so usaren to’d panagaral tan pampraktis ed isport, ingen ta daiset lay panaon ton manlingkor ed si Jehova. Antoy desisyon nen Cherie? Oniay inkuan to: “Nampikasi ak ed si Jehova, tan nandesisyon ak ya ag-awaten so scholarship, imbes et nan-aplay ak a regular payunir.” Natan et limay taon to lan manpapayunir. Inkuan to: “Anggapoy pagbabawian ko. Maliket ak ta amtak a naliliketan si Jehova ed desisyon ko. Talagan no unaen moy Panarian na Dios, saray arum nin bengatla et niarum ed sika.”​—Mat. 6:33.

Ipatnag na Maong a Konduktam a ‘Maralus so Pusom’

14. Panon tayon amta a papablien a maong nen Jehova so maong a konduktam?

¹⁴ Say komatlon paraan a nipanengneng mon mabulos kan manlilingkor ed si Jehova et diad maong a konduktam. Bebendisyonan nen Jehova iray kalangweran a mansiasiansian malinis ed moral. (Basaen so Salmo 24:3-5.) Say kalangweran a si Samuel et agto inalig iray imoral ya ananak na Atagey a Saserdoten si Eli. Tan say maong a kondukta to et naimano na arum. Oniay inkuan na Biblia: “Binmaleg si ugaw a Samuel, tan binmaleg met so panangaroy Katawan tan saray totoo ed sikato.”​—1 Sam. 2:26, Maung a Balita.

15. Antoray rason no akin a nepeg mon pansiansiaen so maong a konduktam?

¹⁵ Manbibilay itayo ed mundo a saray totoo et maaro ed inkasikaran dili, mapaatagey, agmatulok ed atateng, agda amtay misalamat, aliwan matoor, masesebeg, agda aaroen so kamaongan, makinon, mas inaro ra so likeliket nen say Dios​—pigara iraya ed ug-ugalin sinalambit nen Pablo. (2 Tim. 3:1-5) Kanian diad onian mauges a kaliberliber et talagan mairap a pansiansiaen so maong ya ugali. Balet, kapagno gawaen mo no antoy duga tan paliisan moy manggaway aliwa, papaneknekan mon wala ka’d dapag nen Jehova diad isyu nipaakar ed no siopay manepeg a manuley ed uniberso. (Job 2:3, 4) Naliliketan ka met lapud amtam ya uunoren mo iyan maaron bilin nen Jehova: ‘Ana’ko, onkabat ka tan paliket moy pusok, pian naebatan ko so mamabalaw ed siak.’ (Uli. 27:11) Ontan met, lalom a pilaleken so panlingkor ed si Jehova ta amtam ya aabobonan to ka.

16. Panon ya apaliket na sakey ya agi so puso nen Jehova?

¹⁶ Sanen tinedyer ni so agin manngaran na Carol, talagan inyaplika to iray prinsipyo na Biblia, tan naimano na arum so maong a kondukta to diad eskuelaan. Anto balet so resulta? Sikatoy binalaw na saray kaklase to ta agsarag na konsiensia ton nipasal ed saray prinsipyoy Biblia so panselebra ed saray holiday tan say pansaludo’d bandira. Diad saraman a situasyon et nipaliwawa toy pananisia to ed arum. Kalabas na dakel a taon, akaawat si Carol na card a nanlapud datin kaklase to. Oniay akasulat: “Labalabay ta kan kontaken pian misalamat ak. Naimanok so maabig ya alimbawam bilang kalangweran a Kristiano tan say maong a konduktam, ontan met ed pakpel mon agmanselebra ed saray holiday. Sika so sankaunaan a Tasi nen Jehova ya akabat ko.” Baleg so epekto na alimbawa nen Carol ed sayan kaklase to kanian diad saginonor et impaiyaralan na Biblia. Diad samay card ya impawit  to’d Carol et imbaga ton sikatoy masulok lan 40 taon a bautismadon Tasi! Singa si Carol, nayarin napakiwas yo ran kalangweran natan iray matuan impanpuson totoo pian kabaten da met si Jehova lapud determinado tan makpel yon iyaaplika iray prinsipyoy Biblia.

Idadayew na Saray Kalangweran si Jehova

17, 18. (a) Antoy nibaga yo ed saray kalangweran diad kongregasyon yo? (b) Antoy ilalo na saray kalangweran a matakot ed Dios?

¹⁷ Amin tayo ran kabiangan na sankamundoan ya organisasyon nen Jehova et maliket a makakanengneng ed libolibon maseseg a kalangweran a kaiba tayo ed tuan panagdayew! Ipapatnag na sarayan kalangweran a pipilaleken dan maong so panlingkor ed si Jehova diad inagew-agew a panagbasay Biblia, panagpikasi, tan maong a kondukta ra. Sarayan uliran a kalangweran et lapuan na liket na atateng da tan amin a lingkor nen Jehova.​—Uli. 23:24, 25.

¹⁸ Saray matoor a kalangweran et kaiba ed saray makaloob ed balon mundo ya insipan na Dios diad arapen. (Apo. 7:9, 14) No onsabi la itan a panaon, awaten da so dakdakel a bendisyon legan ya onaaralem so panangaro ra ed si Jehova, tan sikatoy dayewen da ed andi-anggaan.​—Sal. 148:12, 13.

Kasin Nipaliwawam?

• Panon a makapibiang natan ed tuan panagdayew iray kalangweran?

• Pian nagunggonaan ka ed panagbasay Biblia, akin a kaukolan moy mandalepdep?

• Panon a makatulong so panagpikasi pian onapit ka ed si Jehova?

• No maong so kondukta na sakey a Kristiano, antoy papaneknekan to, tan antoy maabig a resulta?

[Tepetepet Parad Panagaral]

[Litrato ed pahina 5]

Kasin niyugalim la so inagew-agew a panagbasay Biblia?