Agyo Papaermenen so Masanton Espiritu nen Jehova

“Agyo papaermenen so masanton espiritu na Dios, a satan so impantatak ed sikayo.”​—EFE. 4:30.

1. Antoy ginawa nen Jehova parad minilyon a totoo, tan antoy obligasyon da?

WALAY agaylan abig a ginawa nen Jehova parad minilyon a totoon manbibilay ed sayan mundon napnoy problema. Ginawa ton posible a napaapit ira’d sikato panamegley na bogbogtong ya Anak to, si Jesu-Kristo. (Juan 6:44) Sakey ka’d saraya no indedikam lay inkasika ed Dios tan manbibilay ka unong ed satan. Lapud abautismoan ka ed ngaran na masanton espiritu, obligasyon moy manbilay a mitunosan ed satan ya espiritu.​—Mat. 28:19.

2. Antoran tepet so konsideraen tayo?

² Sikatayoran “mantatanem nipaakar ed espiritu” et walaan la na balon personalidad. (Gal. 6:8; Efe. 4:17-24) Balet, sisimbawaen tan papasakbayan itayo nen apostol Pablo ya agtayo papaermenen so masanton espiritu na Dios. (Basaen so Efeso 4:25-32.) Imanoen tayo pa iyan konseho na apostol. Antoy kabaliksan na imbaga  nen Pablo nipaakar ed pamaermen ed espirituy Dios? Panon a nagawaan itan na anggan sakey a dedikado la’d si Jehova? Tan panon tayon napaliisay pamaermen ed espiritu to?

Say Kabaliksan na Imbaga nen Pablo

3. Antoy kabaliksan na saramay salitan akasulat ed Efeso 4:30?

³ Manuna’d amin, imanoen pay insulat nen Pablo ed Efeso 4:30, a kuan to: “Agyo papaermenen so masanton espiritu na Dios, a satan so impantatak ed sikayo parad agew na kibulos yo diad panamegley na dondon.” Aglabay nen Pablo a naderal so espiritualidad na saray inad-aro ton kapananisiaan. Say espiritu nen Jehova so ‘impantatak ed sikara parad agew na kibulos da diad panamegley na dondon.’ Angga ni’d natan et satan so tatak odino “pakaseguroan nipaakar ed samay onsabi” parad saray matoor ya alanaan. (2 Cor. 1:22) Ipapabitar na sayan tatak a kayarian ira na Dios tan walay ilalo ran manbilay ed tawen. Say bilang dan amin ya atatakan et 144,000.​—Apo. 7:2-4.

4. Akin ya importantin agtayo papaermenen so espiritu na Dios?

⁴ No napaermen na sakey a Kristiano so espiritu, nayarin gapoan la itan na sigpot a pakaandi impluensya na aktibon puersa na Dios ed bilay to. Posiblin nagawa iya unong a papaneknekan na imbaga nen David kayari impankasalanan to makalanor ed si Bat-seba. Tekep na pagbabawi, sikatoy akikasi ed si Jehova: “Agmo ak ibantak ed arawi ed arap mo; tan agmo ekalen ed siak so masanto ya espiritum.” (Sal. 51:11) Saray alanaan labat a ‘matoor anggad patey’ so makaawat na “korona” ya imortal a bilay ed tawen. (Apo. 2:10; 1 Cor. 15:53) Nakaukolan met na saray Kristianon walaay ilalon manbilay ed dalin so masanton espiritu pian napansiansia day katooran da’d Dios tan naawat so regalo ton bilay base ed pananisia ed dondon bagat nen Kristo. (Juan 3:36; Roma 5:8; 6:23) Sirin, alwaran tayon amin ya agnapaermen so masanton espiritu nen Jehova.

Panon a Napaermen na Sakey a Kristiano so Espiritu?

5, 6. Panon a napaermen na sakey a Kristiano so espiritu nen Jehova?

⁵ Bilang dedikadon Kristiano, napaliisan tayoy pamaermen ed espiritu. Nagawaan tayo iya no ‘mantultuloy tayon manakar tan manbilay unong ed espiritu.’ Diad ontan et ag-itayo nadaeg na makapuy iran pilalek na laman tan agtayo mangipatnag na mauges iran ugali. (Gal. 5:16, 25, 26) Balet nayarin manguman itan. Nayarin agtayo naliklikas a napaermen so espirituy Dios no abuloyan tayoy inkasikatayo a kalkalnan nisuawi ed kagagawan kokondenaen na Salitay Dios, a pinuyanan na espiritu to.

⁶ No itultuloy tayon sumlangen so panangiwanwan na masanton espiritu, napaermen tayo itan tan si Jehova, say Lapuan na satan ya espiritu. Diad pangusisa tayo ed Efeso 4:25-32, naaralan tayo no panoy nepeg a pambilay tayo, tan makatulong itan pian agtayo napaermen so espirituy Dios.

No Panon a Napaliisan so Pamaermen ed Espiritu

7, 8. Ipaliwawa no akin a nepeg itayon matua.

⁷ Nepeg a matua itayo. Insulat nen Pablo ed Efeso 4:25: “Natan ta nilakseb yo lay katilaan, kada sakey ed sikayo so mansalita na katuaan ed kapara ton too, lapud kabiangan itayo na sakey a laman.” Nankakasakey tayo bilang ‘kabiangan na sakey a laman,’ kanian agtayo nepeg a siliban odino gagalaen a palikdoen iray kapananisiaan tayo, ta singa lanlamang itan panagtila’d sikara. Siopaman a mantultuloy a manggaway ontan et nabalang toy relasyon to’d Dios.​—Basaen so Uliran 3:32.

⁸ Saray makapalikdon panagsalita tan kakikiwas so mamuyak ed pankakasakey na kongregasyon. Kanian aligen tayo so napanmatalkan a propetan si Daniel, ya anggapoy aromog na arum ed sikaton kaugsan. (Dan. 6:4) Tan nepeg tayon tandaan so simbawa nen Pablo ed saray Kristianon walaan na mangatatawen ya ilalo, a kada kabiangan na “laman na Kristo” et  mankaukolan ed sakey tan sakey, tan nepeg a mansiansian mikasakey ed saray matuan alanaan a patumbok nen Jesus. (Efe. 4:11, 12) No labay tayoy manbilay a magnayon ed Paraison dalin, nepeg tayo met a salitaen so tua, ta saya so ontulong ed pankakasakey na sankamundoan ya impanaagi tayo.

9. Akin ya importantin tumboken so ibabagay Efeso 4:26, 27?

⁹ Nepeg a sumpaen tayoy Diablo, ya ag-iikdan na pankanawnawan deraley espiritualidad tayo. (Sant. 4:7) Tulongan itayo na masanton espiritu a nalabanan si Satanas. Singa bilang, nagawaan tayo itan no paliisay onsanok ya alablabas. Insulat nen Pablo: “Onsanok kayo, ingen ta agkayo mankakasalanan; agkomon onselek so agew a wala ni pasnok yo, tan agyo met iikdan na pankanawnawa so Diablo.” (Efe. 4:26, 27) No talagan walay rason tayon manpasnok, makatulong so pampikasin tampol pian ‘ombetel so espiritu’ tayo, tan nawalaan tayoy panangontrol ed dili imbes a manggaway pakaermenan na espirituy Dios. (Uli. 17:27) Kanian agtayo abuloyan a mansiansiay sanok tayo tan ikday Satanas na pankanawnawan tuksoen to itayon manggaway mauges. (Sal. 37:8, 9) Say sakey a paraan pian sikatoy nalabanan tayo et diad panresolbin tampol ed saray agpantatalosan unong ed simbawa nen Jesus.​—Mat. 5:23, 24; 18:15-17.

10, 11. Akin ya ag-itayo nepeg a mantakew odino magmaliw ya agmatua?

¹⁰ Ag-itayo padadaeg ed antokaman a pakatuksoan a mantakew odino magmaliw ya agmatua. Nipaakar ed panagtakew, oniay insulat nen Pablo: “Komon ta say managtakew et agla mantakew, noagta sikatoy mansagpot, a gawaen toy maong a kimey diad panamegley na saray lima to, ta pian walay inabang to ed siopaman a mankaukolan.” (Efe. 4:28) No mantakew so sakey a dedikadon Kristiano, ‘mumudmoraen toy ngaran na Dios.’ (Uli. 30:7-9) Aliwan rason so irap na bilay pian mantakew. Amta na saray mangaaro ed Dios tan kaparan ran too a talagan mauges so pantakew.​—Mar. 12:28-31.

¹¹ Aglabat binitla nen Pablo no antoy agnepeg a gawaen noagta say nepeg met a gawaen. No manbibilay tan manaakar tayo unong ed masanton espiritu, mankuli tayo pian nalegpet so pamilya tayo tan ‘wala met so inabang tayo’d siopaman a mankaukolan.’ (1 Tim. 5:8) Si Jesus tan saray apostol to et angiganay pundo parad saray mairap-bilay, balet tatakewan itan na traidor a si Judas Iscariote. (Juan 12:4-6) Talagan sikatoy ag-inwanwan na masanton espiritu. Sikatayoran paigigiya ed espiritu na Dios et “manbilay a matua ed amin a bengatla,” a singa si Pablo. (Heb. 13:18) Diad ontan et agtayo napaermen so masanton espiritu nen Jehova.

 Arum nin Paraan Pian Napaliisay Pamaermen ed Espiritu

12, 13. (a) Unong ed Efeso 4:29, anton klase na panagsalita so nepeg tayon paliisan? (b) Antoy nepeg a paraan na panagsalita tayo?

¹² Nepeg tayon alwaran so panagsalita tayo. Oniay imbaga nen Pablo: “Ag-ompaway komon ed sangi yo so abulok a salita, noagta salitaen yo so antokaman a maabig pian napabiskeg so arum unong a nakaukolan, ta pian nagunggonaan iray ondedengel ed satan.” (Efe. 4:29) Imbaga lamet dia na apostol so agnepeg a gawaen tan say nepeg a gawaen. Sikatayoy napakiwas na espirituy Dios a ‘salitaen so maabig tan makapabiskeg pian nagunggonaan iray ondedengel.’ Sakey ni, nepeg ya agtayo mangibesngaw na “abulok a salita.” Say Griegon salitan nipatalos ya “abulok” et nauusar a maneskribe ed nabubulok a prutas, sira, odino karne. No panon ya agtayo labay iratan, agtayo met labay so mansalita na ipapasen nen Jehova a mauges.

¹³ Say panagsalita tayo et nepeg a masimpit, aliwan makapasakit, “atimplaan na asin.” (Col. 3:8-10; 4:6) Nepeg a nabidbir na totoo a duma itayo sano narengel day ibabaga tayo. Kanian tulongan tayoy arum diad pansalitay “maabig pian napabiskeg” ira. Tan nalikna tayo komon imay alikna na salmista sanen inkanta to: “Abuloyan mo so saray salitak, tan say dalepdep na pusok naako ra ed pakanengneng mo, O Jehova, dampay ko, tan mananondon ko.”​—Sal. 19:14.

14. Unong ed Efeso 4:30, 31, antoray nepeg tayon ekalen ed inkasikatayo?

¹⁴ Nepeg tayon ekalen ed inkasikatayo iray sakit na linawa, sanok, makapasakit a panagsalita, tan amin a kaugsan. Kayarin amasakbay si Pablo nipaakar ed pamaermen ed espirituy Dios, insulat to: “Naekal komon ed sikayo so amin a paneem-em na sakit na linawa tan pasnok tan sanok tan paneeyagan tan makapasakit a salita pati say amin a kaugsan.” (Efe. 4:30, 31) Lapud aliwa tayon perpekto, amin tayo et kaukolan a manggunaet a mangontrol ed kanonotan tan kiwakiwas tayo. No padaeg tayo ed “paneem-em na sakit na linawa tan pasnok tan sanok,” napaermen tayoy espiritu na Dios. Ontan met so nagawa no bilangen tayo iray lingon ginawa’d sikatayo, no mantultuloy tayon ombarong, tan no agtayo mikareenan ed samay akaopendi’d sikatayo. No ibaliwala tayo lay simbawa na Biblia, nayarin niwala’d sikatayo iray ugalin manresulta ed pankasalanan tayo’d espiritu tan nasagmak tayo iray mauges ya epekto na satan.

15. No walay lingon ginawa’d sikatayo, antoy nepeg tayon gawaen?

¹⁵ Nepeg itayon mapangasi, maabagey, tan manamerdona. Insulat nen Pablo: “Ipanengneng yoy kaabigan ed balang sakey, magmaliw kayon maabagey, a mabulos kayon manpeperdonaan no panon a sikayoy mabulos met a pinerdona na Dios diad panamegley nen Kristo.” (Efe. 4:32) Anggano asakisakitan itayo ed lingon ginawa’d sikatayo, mamerdona itayo, a singa gagawaen na Dios. (Luc. 11:4) Panon to no walay kapananisiaan a nansalitay negatibo nipaakar ed sikatayo? Lapud labay tayon naresolbe itan, sikatoy asinggeran tayo. No talagan panermenan toy ginawa to tan kinmerew na perdona, perdonaen tayo. Balet wala ni kaukolan tayon gawaen. Oniay inkuan na Levitico 19:18: “Agka mangala na pamales mo, nisay  mantarok ka na anto a pangigagaem ed saray anak na katooan mo; noag say nepeg mo ya aroen so kaparam a too unong ed sikan dili. Siak si Jehova.”

Nakaukolan so Panimanon Naynay

16. Mangiter na alimbawa a nakaukolan tayoy manggawa na pananguman pian agnapaermen so espiritu nen Jehova.

¹⁶ Anggano anggapoy makakanengneng, nayari tayon natukson manggaway aglabay na Dios. Alimbawa, sakey ya agi so ondedengel ed kuestionablin musika. Agonigon lanlamang so konsiensia to lapud agto inunor so bilin na Biblia a walad saray publikasyon na “matoor tan makabat ya aripen.” (Mat. 24:45) Nayarin ipikasi to iyan problema tan nanonotan to iray salita nen Pablo ed Efeso 4:30. Lapud determinado ya agmanggawa na antokaman a mamaermen ed espirituy Dios, denesidi ton aglan balot ondengel na kuestionablin musika. Bendisyonan nen Jehova so awawey na satan ya agi. Sirin, naynay tayon manalwar ya agnapaermen so espirituy Dios.

17. Antoy nagawa no ag-itayo naynay a manimano tan manpikasi?

¹⁷ No ag-itayo naynay a manimano tan manpikasi, natukso itayon manggawa na marutak odino mauges, a mansumpal ed pamaermen ed espiritu. Lapud pawawalaen na masanton espiritu iray kualidad a mangipapatnag ed personalidad na mangatatawen ya Ama tayo, no napaermen tayo itan, Sikatoy napaermen tayo​—bengatlan agtayon balot labay a gawaen. (Efe. 4:30) Nankasalan iray Judion eskriba nen inmunan-siglo diad impangibaga ran nanlapud si Satanas iray milagro nen Jesus. (Basaen so Marcos 3:22-30.) Sarayan kakabusol nen Kristo et ‘inayew day masanton espiritu,’ kanian akagawa ray kasalanan ya agnaperdona. Agbalot komon nagawa’d sikatayo itan!

18. Panon tayon amta ya agtayo akagaway kasalanan ya agnaperdona?

¹⁸ Lapud agtayon balot labay so makagaway kasalanan ya agnaperdona, kaukolan tayon tandaan so imbaga nen Pablo nipaakar ed agpamaermen ed espiritu. Panon to balet no akagawa tayoy seryoson kasalanan? No sikatayoy nagbabawi tan tinulongan la na saray elder, nibaga tayo a pinerdona itayo la na Dios tan sikatayoy agnankasalanan ed masanton espiritu. Diad tulong na Dios, napaliisan tayon napaermen lamet so espiritu ed antokaman a paraan.

19, 20. (a) Antoray nepeg tayon paliisan? (b) Antoy nepeg a determinado tayon gawaen?

¹⁹ Uusaren na Dios so masanton espiritu to pian padaaken so aro, liket, tan pankakasakey na totoo to. (Sal. 133:1-3) Kanian, nepeg tayon paliisay pamaermen ed espiritu diad agtayo pangi-tsismis odino pangibaga na saray bengatlan pansengegan na agla panrespeto ed saray managpastol a tinuro na masanton espiritu. (Gawa 20:28; Jud. 8) Imbes, nepeg itayon ontulong ed kiwalay pankakasakey tan panagrespeto ed balang sakey diad kongregasyon. Agtayon balot ilagyat so pangru-grupo a pansengegay inkaapag-apag ed limog na totooy Dios. Oniay insulat nen Pablo: “Bilinen ta kayo natan, agagi, diad panamegley na ngaran na Katawan tayon Jesu-Kristo a nepeg a manpapakna kayon amin ed sasalitaen yo, tan nepeg ya anggapoy inkaapag-apag ed limog yo, noagta sigpot kayon mankakasakey ed nonot tan ed paraan na panag-isip.”​—1 Cor. 1:10.

²⁰ Labay tan sarag nen Jehova a tulongan itayon agnapaermen so espiritu to. Itultuloy tayoy manpikasi parad masanton espiritu tan determinadon agpaermenen itan. Komon ta itultuloy tayoy ‘mantanem nipaakar ed espiritu,’ a panggunaetan tayoy paigiya’d satan, natan tan diad andi-anggaan.

Antoy Ebat Mo?

• Antoy kabaliksan na pamaermen ed espirituy Dios?

• Panon a say espiritu nen Jehova et napaermen na anggan sakey a dedikado la’d sikato?

• Antoray paraan a napaliisan tayoy pamaermen ed masanton espiritu?

[Tepetepet Parad Panagaral]

[Litrato ed pahina 30]

Resolbien a tampol iray agpantatalosan

[Litrato ed pahina 31]

Dinan ed sarayan bunga so napatnagan ed panagsalitam?