Akin et Nepeg ya Igalang Iray Maedad La?

DIAD gilig na dayat na California, U.S.A., nanengneng so sakey ed saray kiew a sankapaboritoan a litratoen diad interon mundo. Sayan kiew et tatawagen a Lone Cypress. Ibabaga ra a saya et masulok lan 250 a taon. Lapud paot ton manbibilay, sayan marakdakep a kiew et aasikasoen a maong ed nanduruman paraan. Singa bilang, tinatakeran da itan tan say sengeg to et pinaliberan day insementon bato pian agnabwal.

Nikompara tayo iyan kiew ed maedad lan agagi tayo ya abayag lan mansusungdo. Nagagawaan da iya diad abayag lan pangipupulong day maong a balita. Impasakbay nen propeta Joel a saray “mamasiken” et iyabawag day mensahe na Biblia. (Joel 2:28-32; Gawa 2:16-21) Nonot yo pa labat so karakel na oras ya inusar da ed maseet a panutulong da ed arum a makaamta’d “maong a balita na panarian”! (Mat. 24:14) Say arum ed sarayan maedad lan manangiyabawag na Panarian et akapansungdo ed pigapigay taon a panamasegsegang odino arum nin ir-irap. No say sakey a kiew et aasikasoen lapud paot ton manbibilay tan tatakeran tan aalaren ni ingen pian agnabwal, agta mas makanepegan ni ya ikdan tayoy imano iray maedad la tan pagalangan ira?

Ingganggan nen Jehova a Dios iray totoo to nensaman: “Onalagey ka naani ed arapan na ubanan ya ulo, et pagalangan mo naani lupa na masiken.” (Lev. 19:32) Diad limog na saray lingkor nen Jehova natan, walaray alay abig ya alimbawa na saray matoor a pigay dekada lan ‘manaakar a kaibay Dios.’ (Miq. 6:8) Diad tuloytuloy a pangiyaaplika ra ed saray prinsipyo na Biblia, ipapatnag da a talagan say ubanan  ya ulo ra et “balanget na gayaga” odino karakpan.​—Uli. 16:31.

Oniay bilin nen apostol Pablo ed malangwer nin si Timoteo: “Agmo pansasalitaan na ansakit so sakey a masiken.” Imbes, si Timoteo et kaukolan a ‘mikasi ed sikato a singa to ama’ tan diad ‘saray akukulaw a singa to ra ina.’ (1 Tim. 5:1, 2) Diad ontan et singa ‘onaalagey’ si Timoteo ed arap na ubanan ya ulo. Malinew sirin ya iilaloan nen Jehova a say paraan na panagsalita tayo et pakapatnagan na ontan a respeto.

“Idaulo yoy pangipanengneng na galang ed balang sakey,” so kuan na Roma 12:10. Maseguron ipapanengneng iya na saray manangasikaso na kongregasyon ed saray maedad lan Kristiano. Balet, amin tayo so nepeg a mangipanengneng na galang ed balang sakey.

Siempre, saray kapamilyaan so manunan akanresponsabilidad ed saray atateng da tan saray laki tan bai ra. Singa ed samay kiew a Lone Cypress, walaray ginawa na totoo pian mansiansia ni itan, tan oniay itutultuloy da nin gagawaen. Kanian, wala met iray kaukolan tayon gawaen pian mansiansiay dignidad na saray ontatatken lan atateng tan saray laki tan bai tayo. Alimbawa, no maong itayon ondengel, agtayo ipilit ed sikara iray labay tayo, ya ibaliwala tayo lay liknaan da.​—Uli. 23:22; 1 Tim. 5:4.

Papablien a maong nen Jehova iray maedad lan agagi tayo. Agto ira papaulyanan. (Sal. 71:18) On, papabiskegen ira na tuan Dios pian makapansiansia ran matoor ed panaglingkor da. Komon ta itultuloy tayon asikasoen tan igalang iray maedad la.

[Saray litrato ed pahina 7]

No say kiew a Lone Cypress et kaukolan ya asikasoen, saray maedad la et kaukolan tayo met a pagalangan tan respetoen

[Credit Line]

American Spirit Images/age fotostock