Itultuloy Yon Ipasal so Pakayari Yon Mantalos

MAKAPALIKLIKET a bantayan so sakey a marundunong ya atleta, salanti, sakey a gymnast a makulkulaney so laman to tan mapmaples so galaw to! Singa ed panagpasal na sakey a gymnast, ipapaseseg na Biblia ed saray Kristiano ya ipasal da met so abilidad dan mannonot.

Oniay insulat nen apostol Pablo ed saray Hebreo: “Say anawet a naakan et parad saray matatken la a manguusar ed pakayari ran mantalos tan lapud saya et nipasal itan a mangibiig ed duga tan aliwa.” (Heb. 5:14) Akin et binilin nen Pablo iray Hebreon Kristiano ya ipasal day abilidad dan mannonot a singa ed pangipapasal na gymnast ed laman to? Panon tayon nipasal so pakayari tayon mantalos?

“Managbangat Kayo La Komon”

Pian nipaliwawa so betang nen Jesus bilang “atagey a saserdote a mipadpara ed si Melquisedec,” oniay insulat nen Pablo: “Nipaakar ed sikato [si Jesus] et dakel so ibaga mi, balet mairap itan ya ipaliwawa lapud nagmaliw ya epel so pakadngel yo. Ta managbangat kayo la komon lapud kabayag lay panaon, balet kaukolan a walay mangibangat lamet ed sikayo ya igapo to ed saray mainomay a bengatla nipaakar ed sagrado iran salita na Dios; tan nagmaliw kayon singa samay mankaukolan na gatas, imbes ya anawet a naakan.”​—Heb. 5:10-12.

Mapatnag sirin a walaray Judion Kristiano nen inmunan siglo ya agni inmaligwas ed pakatalos da tan diad espiritualidad da. Singa bilang, mairap dan awaten so balon liwawa nipaakar ed Ganggan tan panagpasegat. (Gawa 15:1, 2, 27-29; Gal. 2:11-14; 6:12, 13) Ngalngali agnataynan na arum so tradisyon da nipaakar ed panagngilin na sinimban Sabaton tan say tinaon ya Agew na Pananakbong. (Col. 2:16, 17; Heb. 9:1-14) Kanian pinaseseg ira nen Pablo ya ipasal day pakayari ran mantalos pian nibiig day duga ed aliwa, tan imbaga ton ‘itultuloy day manpatatken.’ (Heb. 6:1, 2) Diad satan a simbawa to et seguradon walaray apakiwas a mandalepdep no panon dan uusaren so abilidad dan mannonot. Mapatnag ya akatulong itan pian onaligwas ira ed espiritual. Sikatayo ey?

Ipasal so Pakayari Yon Mantalos

Panon tayon ipasal so abilidad tayon mannonot pian onaligwas itayo ed espiritual? ‘Diad pangusar ed satan,’ so inkuan nen Pablo. Singa saray gymnast, a diad panag-ehersisyo ra et ipapasal da iray masel tan say laman da pian nagawaan da iray galaw a balibali tan komplikado, nepeg tayon ipasal so abilidad tayon mannonot pian nibiig tayoy duga tan aliwa.

“Say pangusar a maong ed isip et talagan makatulong ed utek,” so inkuan nen John Ratey, sakey a propesor ed clinical psychiatry diad Harvard Medical School. Unong ed si Gene Cohen, direktor ed Center on Aging, Health and Humanities diad George Washington University, “sano salien tayoy utek tayo diad pannonot na mairap, saray selula na utek et mamawala na balon dendrites, a mamawalay dakel iran synapses, odino koneksion.” *

Kanian maabig sirin no ipasal tayoy abilidad tayon mannonot tan palaknaben tayoy pikakabat ed Salita na Dios. Diad satan et mas akaparaan itayon manggawa na “ayadyarin linawa na Dios.”​—Roma 12:1, 2.

 Naynay a Pilaleken so “Anawet a Naakan”

No labay tayo so ‘mantultuloy a manpatatken,’ nepeg tayon tepetan so inkasikatayo: ‘Onaaligwas la kasi pakatalos ko ed katuaan a walad Biblia? Say pakanengneng kasi na arum ed siak et matatken ak la’d espiritual?’ Maliket so ina no painumen toy gatas tan pakanen toy anlemek a naakan so melag nin anak to. Balet nonot yo pay paga na ina no kalabas na pigaran taon, say ugaw et siansia nin agmamangan na anawet a naakan. Mipadpara, maliket itayo no say iyaaralan tayo na Biblia et idedika to lay bilay to tan manpabautismo. Balet, panon to no kalabas na panaon et sikatoy ag-onaaligwas ed espiritual? Agta makapadismaya itan? (1 Cor. 3:1-4) Iilaloan na managbangat ya onsabi panaon et magmaliw met a managbangat imay balon disipulo.

No usaren tayoy pakayari tayon mantalos sano mandedesisyon, nepeg itayon mandalepdep, tan diad saya et kaukolan so pansagpot. (Sal. 1:1-3) Agtayo aabuloyan iray pakadisturboan, a singa say pambantay ed telebisyon odino arum nin panagligliwaan ya agmasyadon mankaukolan na pannonot a maong, pian agnaamper so makabaliksan a panagdalepdep tayo. Pian napaaligwas tayoy abilidad tayon mannonot, kaukolan tayon bayuboan tan peneken so panlabay tayon manaral na Biblia tan saray publikasyon ya itatarya na “matoor tan makabat ya aripen” (Mat. 24:45-47) Niarum ni ed regular a rotina na personal a panagbasay Biblia, importante met ya ipanaon tayoy Panagdayew na Pamilya tan aralem a panagaral ed Biblia.

Unong ed si Jerónimo, sakey a manbiabiahen manangasikaso diad Mexico, aaralen toy kada balon-sabi ya isyu na Say Panag-Bantayan. Ipapanaon to met so panaral a kaibay asawa to. Inkuan nen Jeronimo, “Diad kada agew, sankaiba kamin sanasawa a manbabasay Biblia, tan manguusar kami na reperensya a singa say brosyur a ‘Good Land’.” Imbaga na sakey a Kristianon si Ronald a sikatoy mibabansag ed eskedyul na kongregasyon a panagbasay Biblia. Wala met so sakey odino duaran proyekto to ed personal a panagaral a nasumpal ed andukey a panaon. “Lapud sarayan proyekto, taltalaranan ko lay ontumbok ya eskedyul ko ed panagaral,” so inkuan nen Ronald.

Sikatayo ey? Kasin mangigagana tayo met na magenap a panaon parad personal a panagaral tan panagdalepdep ed Salitay Dios? Kasin ipapasal tayoy abilidad tayon mannonot ta pian diad ontan et makapandesisyon tayo unong ed Makasulatan iran prinsipyo? (Uli. 2:1-7) Komon ta pilaleken tayo so onaligwas ed espiritual pian nabendisyonan itayo na pikakabat tan karunongan a walad saramay nipasal da lay pakayari ran mantalos a mangibiig ed duga tan aliwa!

[Paimano ed leksab]

[Litrato ed pahina 23]

Ipapasal tayoy abilidad tayon mannonot ‘diad pangusar ed satan’