Mansiansian Mabiskeg ed Espiritual Legan ya Aasikasoen so Mansasakit a Kanayon

KAYARIN naamtaan a walay tumor ed asingger na spinal column nen Kim, sakey a Tasi, adiskobre a walay kanser to. * “Sanen nakal lay tumor to,” kuan na masiken ton si Steve, “si Kim et nanpa-radiotherapy tan chemotherapy. Balet bilang epekto na panagtambal et sikatoy kinmapuy tan ngalngali agla makagalaw.”

Naisip yo kasi so pirmin ermen nen Steve legan ton nanenengneng so inad-aro ton asawa a manaanos ed sayan makapakapuy a sakit? Nayarin wala met so membro na pamilya yon naiirapan lapud ompapalalon sakit odino lapud epekto na itatatken. (Ecl. 12:1-7) No ontan so kipapasen, amta yo a pian naasikaso yo iran maong, kaukolan yo met ya asikasoey laman yo. No onkapuy so espiritualidad yo, nayarin onkapuy met so emosyon tan laman yo, tan ompan agyo la nitarya iray pankaukolan na arum a membro na pamilya yo. Panon yon napansiansia a balanse so espiritualidad yo legan yon aasikasoey mansasakit odino maedad lan kanayon yo? No bilang ta wala, anto so nagawaan na saray membro na Kristianon kongregasyon pian nipanengneng so konsiderasyon ed saray mansasakit?

Panon a Mansiansian Balanse?

Pian napansiansia yon balanse so espiritual tan pisikal a bunigas yo legan yon aasikasoey mansasakit a kanayon yo, nakaukolan kayon onadapta, tan makabat a mangusar ed oras tan biskeg yo. Diad “saray mapaabeba wala so kakabatan,” kuan na Uliran 11:2. Unong ed saya, say salitan “mapaabeba” et kabaliksan toy pamidbir ed limitasyon tayo. Pian naseguron say gagawaen yo labat et saramay talagan sarag yo, maabig no usisaen yoy eskedyul tan saray responsabilidad yo.

Impanengneng nen Steve so kakabatan tan inkamapaabeba diad impangusisa to lamet ed karakel na trabaho to. Likud ni ed sekular a trabaho to, sikatoy manlilingkor a coordinator  tan manangasikaso na serbisyo ed sakey a kongregasyon na Saray Tasi nen Jehova diad Ireland. Sikatoy membro met na Hospital Liaison Committee ed lugar da. “Agbalot imbaga nen Kim a sikatoy napapaulyanan ko lapud karakel na oras ya uusaren ko ed sarayan responsabilidad,” kuan nen Steve. “Balet amtak ya agko la nasarag irayan amin a responsabilidad.” Antoy ginawa nen Steve? “Kayarik a nampikasi,” kuan to, “nandesisyon ak ya onekal nin coordinator na kongregasyon. Nantultuloy ak a nanlingkor bilang elder, balet impabtang ko’d arum so pigaran responsabilidad ko, kanian niiter ko’d si Kim so panaon tan atension a nakaukolan to.”

Asabi panaon, inmabig si Kim. Inaral lamet di Steve tan Kim so kipapasen da, tan lapud suporta nen Kim et ayarian lamet nen Steve a gawaen iray responsabilidad to’d kongregasyon. “Naaralan min gawaen iray kimey ya iyaabuloy labat na kipapasen mi,” so imbaga nen Steve. “Misalsalamat ak ed si Jehova lapud impanulong to’d siak, ontan met ed si asawak lapud mabulos a suporta to anggan walay sakit to.”

Imanoen met so eksperiensya nen Jerry, sakey ya ombiabiahen manangasikaso, tan say asawa ton si Maria. Nakaukolan dan umanen iray kalat da pian naasikasoy matatken lan atateng da. “Pilalek min sanasawa so manlingkor  a misionero ed sananey a bansa,” kuan nen Maria. “Balet si Jerry et saksakey ya anak, tan nakaukolan lan asikasoen iray ateng to. Kanian nandesidi kami a mansiansia’d Ireland pian naasikaso ira. Lapud satan, naasikaso mi tatay nen Jerry legan a sikatoy walad ospital antis na impatey to. Natan et inagew-agew min nakokumustay nanay nen Jerry, tan mainomay mi iran natulongan no nakaukolan da itan. Talagan balbaleg so tulong tan suporta na kongregasyon a kawalaan na nanay nen Jerry, kanian akapansiansia kami ed panagbiahen kimey.”

No Panon a Makatulong so Arum

Sanen pantotongtongan no anton materyal a tulong so iter ed saray maedad lan balo ed kongregasyon, insulat nen apostol Pablo: “No walay siopaman ya agto tataryaan iramay walad pudir to, tan nagkalalo la iramay membro na pamilya to, impulisay to lay pananisia tan mauges ni nen say too ya andian na pananisia.” Impanonot nen Pablo ed saray kapara ton Kristiano a pian ‘makapaliket ed imaton na Dios’ iray kiwas da, nakaukolan dan itarya so pinansyal a pankaukolan na saray maedad lan atateng da ontan met ed laki tan bai ra. (1 Tim. 5:4, 8) Balet, sarag tan nepeg na arum ed kongregasyon so mangitarya na praktikal a tulong.

Nengnengen tayo met so kipapasen nen Hakan tan si Inger, maedad lan sanasawa a manaayam ed Sweden. “Sanen naamtaan a walay kanser nen asawak,” kuan nen Hakan, “agonigon kamin dua ta maligsa tan mabiskeg si asawak. Natan balet et kaukolan ya inagew-agew kamin onla ed ospital pian manpatambal, tan say epekto na satan et makapakapuy. Legan a walay sakit nen Inger, sikatoy wala labat ed abung, tan kaukolan met a wadman ak pian mangasikaso ed sikato.” Panon a tinmulong iray kakongregasyon nen Hakan tan Inger?

Inyuksoy na saray elder ed kongregasyon so pakadngel na sanasawa ed saray kristianon pantitipon panamegley na hook-up. Niarum ni, panamegley na personal ya ibibisita tan itatawag ed telepono et naynay ya amta na saray agagi so kipapasen mi. Mangipapawit met ira na sulat tan kard. “Alikna mi so suporta na saray agagi ontan met ed tulong nen Jehova,” kuan nen Hakan. “Makanakana irayan ginawa ra pian mansiansian mabiskeg so espiritualidad mi. Misalsalamat ak ta inmabig a siansia si Inger, tan makapiaral kami lamet ed Kingdom Hall.” Sano gawaen na amin a membro na kongregasyon so anggaay nayarian da pian tulongan iray mansasakit odino maedad la a walad limog da, papaneknekan da a sikaray ‘kaaro a lawas mangipapanengneng na panangaro tan agi no walay gonigon.’​—Uli. 17:17, Maung a Balita.

Papablien nen Jehova Iray Sagpot Yo

Talagan makapakesaw so pangasikaso ed mansasakit a kanayon. Ingen, oniay insulat nen Arin David: “Mapalar so mangimano na duka,” a singa say toon mankaukolan na tulong lapud sakit.​—Sal. 41:1.

Akin et maliket iramay mangaasikaso na mansasakit? “Say walaan na panangasi ed duka pautangen to si Jehova,” kuan na Uliran 19:17, “et say maong a gawa to ipawil to ed sikato a bayaran.” Interesado a maong si Jehova ed pankaabigan na saray matoor a lingkor ton mansasakit, tan bebendisyonan to iramay mangipapanengneng na panangasi ed sikara. Inkanta nen salmistan David: “Si Jehova pabiskegen to [so ontan a too] ed tapew na dukolan na pansasagpot. Sika gawaen mo so amin a dukolan to ed kasakitan to.” (Sal. 41:3) Makaseguro itayo a sano makasagmak na kairapan odino trahedya iramay mangaasikaso ed saray mansasakit, tulongan ira nen Jehova.

Talagan makapaliket a naamtaan ya iimanoen tan papablien nen Jehova a Dios so pangaasikaso tayo ed saray mansasakit a kanayon tayo! Anggaman mankaukolan na sakripisyo ed biang tayo so ontan a panangasikaso, papaseguroan itayo na Biblia a lapud “saratan a bagat et napapaliket a maong so Dios.”​—Heb. 13:16.

[Paimano ed leksab]

[Saray litrato ed pahina 18]

Mansiansian balanse ed espiritual tan awaten so tulong na arum