Saray Inmunan Kristiano tan Saray Dirios na Roma

SI Pliny the Younger, a gobernador na Bitinia, et nansulat ed Emperador na Roma a si Trajan, a kuan to: “Oniay gagawaen ko ed saramay aakusaan a Kristiano ya inyarap ed siak. Tetepetan ko ra no Kristiano ra, tan no bidbiren da, piduaen tan pitloen ko ran tepetan, tekep na panamagyaw a nadusa ra. No siansia ni, sikara lay ipapatey ko.” Balet nipaakar ed saramay ag-amidbir a Kristiano ra diad impangayew da’d Kristo tan indakmomo ra ed estatua na emperador tan ed saray imahen na dirios ya inyan nen Pliny diad korte, inkuan to: “Inisip ko a manepeg iran ibulos.”

Pinasegsegang iray inmunan Kristiano lapud sikaray agnandayew ed emperador tan ed saray imahen na nanduruman dirios. Komusta balet so arum a relihyon ed interon Empiryo na Roma? Antoran dirios so dadayewen da, tan antoy panmoria na saray Romano ed saratan? Akin a pinasegsegang iray Kristiano ed agda impanbagat ed saray dirios na Roma? Saray ebat ed sarayan tepet et ontulong ed sikatayon mangarap ed pareho iran pakasubokan na katooran tayo’d si Jehova.

Saray Relihyon na Empiryo

No panon a dakdakel so lenguahe tan kultura ed Empiryo na Roma, ontan met so karakel na dirios a dadayewen ditan. Anggaman parad saray Romano et nidumaduma so Judaismo, impasen da itan a religio licita, odino bibidbiren a relihyon, tan prinotektaan da. Diad templo ed Jerusalem et mamidua’d sakey agew a manbabagat iray Judio na duaran kordero tan sakey a baka parad Cesar tan nasyon na Roma. Ag-importante’d saray Romano no kasin sakey odino dakel a dios so napapaliket ed sarayan bagat. Say importante, sayan gagawaen na saray Judio et magenap lan prueba na katooran da ed Roma.

Diad saray kulto ed Roma et kasmak so nanduruman klase na paganon panagdayew. Dakdakel so mangaawat ed Griegon alamat, tan kasmak lay panagparles. Saramay ipapasen a misteryoson relihyon ed Bukig so mamapaseguro a saray deboto ra et ag-ompatey, makapitongtong a mismo ed dios, tan makaasingger ed dirios panamegley na misteryoso iran ritual. Kinmayat irayan relihyon ed interon empiryo. Nen inmuuna iran siglo C.E. et kabkabat iray kulto na dios a si Serapis tan diosan si Isis na Ehipto, siran-diosa a si Atargatis na Sirya, tan agew a dios a si Mithra na Persia.

Malinlinew so impaneskribe na libro na Biblia a Gawa  ed kasmak a paganon panagdayew ya akapaliber ed saray inmunan Kristiano. Singa bilang, naynay a kaulop na Romanon prokonsul na Ciprus so sakey a Judion managparles. (Gawa 13:6, 7) Diad Listra, abaloan na totoo a si Pablo tan Bernabe et sikara’may Griegon dirios a si Hermes tan Zeus. (Gawa 14:11-13) Sanen walad Filipos si Pablo, walay nabet ton sakey ya aripen a biin managparles. (Gawa 16:16-18) Diad syudad na Atenas, inkuan nen Pablo a saray manaayam ditan et ‘ompatnag a mas matakot ed saray dirios nen say arum.’ Walay anengneng to met ditan ya altar ya akaukitan na “Diad Sakey a Dios ya Agkabat.” (Gawa 17:22, 23) Saray taga Efeso et mandadayew ed diosan si Artemis. (Gawa 19:1, 23, 24, 34) Diad isla na Malta, inkuan na totoo a sakey a dios si Pablo lapud anggapoy mauges ya agawa’d sikato sanen aketket na uleg. (Gawa 28:3-6) Kanian, kaukolan a manalwar iray inmunan Kristiano pian ag-ira naimpluensyaan na sarayan makadutak ed puron panagdayew da.

Say Relihyon na Roma

Diad ilalaknab na sakop na empiryo, panisiaan na saray Romano a saray balon dirios ya akabatan da et sikara lanlamang iramay dirios a dati da lan kabat, a duma labat so nengneng da. Kanian imbes ya ekalen na saray Romano iray kulto ed bansan nasasakop da, saratan so aawaten tan ilalaok da’d panagdayew da. Kanian say relihyon na Roma et nanduruma, no panon a nanduruma met so kultura na saray totoo ditan. Agkakaukolanen ed relihyon na Roma so pandayew ed saksakey a dios. Saray totoo et makapandayew ed pigapigaran dirios.

Say sankatageyan ed saray dati lan dirios na Roma et si Jupiter, a tinawag dan Optimus Maximus, say sankanayarian tan sankabalgan. Inisip da a sarag toy ompatnag panamegley na dagem, uran, kirmat, tan karol. Ibabaga na arum a say agi tan asawa ton si Juno, ya ipapasen dan bulan a diosa, so manbabantay ed amin a kabibilay na bibii. Si Minerva ya anak a bii nen Jupiter et diosa na saray produkton gawa’d-lima, propesyon, art, tan guerra.

Dakdakel so dirios na saray Romano. Si Lares tan Penates et dirios na pamilya. Si Vesta et diosa na dangdangan ed abung. Say duaran-lupa a si Janus et dios na amin a gapoan. Walay sakey a dios parad kada anapan. Saray Romano et mandadayew ni ingen ed dirios a mangisisimbolo ed saray kualidad. Si Pax et mamapasiansia na  deen, si Salus et bunigas, si Pudicitia et kasimpitan, si Fides et katooran ed asawa, si Virtus et inkakpel, tan si Voluptas et panliliket. Amin a gawaen na Romano ed publiko tan pribadon bilay et iisipen dan akadepende’d panlabayan na dirios. Sirin, ta pian naseguron maabig so pansumpalan na sakey a kimey, nepeg a paliketen imay dios a parad satan a kimey panamegley na ritual iran dasal, panagbagat, tan pampiesta.

Say sakey a paraan pian naseguro so panlabayan na saray dirios et say pananap na saray tanda. Say sankamanunaan ed saratan et say pangusisa ed saray walad dalem na eges na imbagat ya ayayep. Say kipapasen tan itsura na saratan et iisipen dan pakapatnagan no kasin aabobonan na dirios odino andi so kimey a gawaen.

Nen magano lan manampot so komaduan siglo B.C.E., anisiaan na Roma a saray manunan dirios to et kapetekan na pigaran dirios na Griego​—si Jupiter et si Zeus, si Juno et si Hera, tan arum nira. Inawat met na saray Romano so alamat nipaakar ed dirios na Griego. Sarayan alamat et agbalot mangirayew ed saratan a dirios, a walaan met na kakapuyan tan limitasyon a singa saray totoo. Alimbawa, si Zeus et deneskribe bilang managmolestya na bibii tan ugugaw, tan akisekso ed saray bibii ed dalin tan ed saramay ipapasen a diosa. Lapud mabanbanday a kagagawa na sarayan dirios, a mabetbet a panlikliketan diad saray teatro nensaman, saray mandadayew ed saratan et awalaan na rason pian gawaen iray marutdutak a pilalek da ed sekso.

Nayarin walaray pigaran edukadon totoo ya ipapasen dan peteg ya agawa iratan ya alamat. Parad arum balet et istorya labat iratan a walaan na isisimbolo. Angangko et satan so sengegan na impantepet nen Poncio Pilato ya, “Anto so katuaan?” (Juan 18:38) Mitukoyan iya ed “kaslakan a nalilikna na saray de-aral a totoo, a say panasali ran naamtaan so katuaan ed saratan a bengatla et andi-kakanaan.”

Panagdayew ed Emperador

Legan na uley nen Augusto (27 B.C.E. anggad 14 C.E.), ginmapo so panagdayew ed emperador. Dakel a totoo so akaliknay utang na linawa ed si Augusto, nagkalautla’d saray probinsya ed Bukig a mansasalitay Griego, ta sikatoy amawala na inkaaligwas tan kareenan kayari na abaybayag a panaon na guerra. Pirawat na totoo a mantultuloy iran naprotektaan na sakey a manuley a nanengneng da. Labay dan walay pakauley a mamaandi inkaapag-apag lapud relihyon, manuporta ed nasyonalismo, tan pankasakeyen na satan so interon mundo panamegley na “manangisalba” to. Kanian, say emperador et igagalang a singa dios.

Anggaman ag-inmabuloy si Augusto a sikatoy tawagen na arum bilang dios sanen mabilay ni, impilit to a nepeg a dayewen so Roma bilang sakey a dios​—say Roma Dea. Sanen inatey si Augusto, sikatoy indeklaran sakey a dios. Kanian say inkarelihyoso tan inka-nasyonalistiko na totoo ed saratan a probinsya et nipaarap la ed sentro na empiryo tan saray manuley na satan. Sayan panagdayew ed emperador, a kinmayat a tampol ed amin a probinsya, so nagmaliw lan paraan na panangipatnag na galang tan katooran ed Roma.

Si Domitian, ya emperador manlapud 81 anggad 96 C.E., so sankaunaan a manuley ed Roma ya angiganggan a sikatoy dayewen bilang dios. Nen panaon to, binidbir na saray Romano a duma iray Kristiano ed saray Judio tan sinumpa ra so Inkakristiano ya ipapasen dan balon kulto. Nayarin legan na uley nen Domitian a nipriso si apostol Juan diad isla na Patmos lapud ‘pantatasi to nipaakar ed si Jesus.’​—Apo. 1:9.

Say libron Apocalipsis et insulat nen Juan legan a nipriso. Tinukoy to ditan si Antipas, a  sakey a Kristianon pinatey ed Pergamo, say pinagkasentro na panagdayew ed emperador. (Apo. 2:12, 13) Nayarin diad saman a panaon et inobliga na emperador iray Kristiano a mibiang ed saray ritual na relihyon na Roma. Antokaman so kipapasen, kasabi na 112 C.E., unong ed samay sulat ed si Trajan ya abitla diad gapo, ingganggan nen Pliny a saray Kristiano ed Bitinia et mibiang ed saratan a ritual.

Indayew nen Trajan so impangasikaso nen Pliny ed saray kason inyarap ed sikato, tan ingganggan to a pateyen iray Kristianon agmandayew ed dirios na Roma. “Balet,” insulat nen Trajan, “no ibaga na sakey a sikatoy aliwan Kristiano, tan paneknekan to itan diad itawag to ed dirios tayo, sikato lay perdonaen (anggaman datin nansuspetsaan) lapud impagbabawi to.”

Agmakapanisia iray Romano a walay relihyon a saray patumbok to et kinaukolan a mandayew ed saksakey a Dios. Agkinaukolan itan na dirios na Romano, kanian akin et kaukolanen itan na Dios na saray Kristiano? Parad saray Romano, say pandayew ed dirios da et panamidbir ed sistema na politika, kanian say agpandayew ed saratan et ipapasen a panagrebelde. Amoria nen Pliny ya agton balot napilit iray Kristiano a mikompromiso. Parad saray inmunan Kristiano, agkatooran itan ed si Jehova, tan mas nilabay na dakel so ompatey nen say mandayew ed emperador a sakey a palson dios.

Akin a nepeg itayon interesado ed saya? Diad arum a pasen, saray ombaley et kakaukolanen a mangigalang ed saray simbolo na bansa ra. Sikatayoran Kristiano et rerespetoen tayoy autoridad na saray gobierno. (Roma 13:1) Balet nipaakar ed saray seremonyan panangigalang ed saray bandira, napakiwas itayon ‘ibatikan so idolatriya’ tan ‘paliisan iray idolo’ lapud kakaukolanen nen Jehova a Dios so nikabkabiig a debosyon tayo tan isisimbawa itan na Salita to. (1 Cor. 10:14; 1 Juan 5:21; Nah. 1:2) Inkuan nen Jesus: “Si Jehova a Dios mo so nepeg mon dayewen, tan sikato labat so nepeg mon panlingkoran.” (Luc. 4:8) Kanian pansiansiaen tayo komon so katooran tayo’d Dios a dadayewen tayo.

[Blurb ed pahina 5]

Si Jehova lambengat so pandadayewan na saray tuan Kristiano

[Saray litrato ed pahina 3]

Saray inmunan Kristiano et agnandayew ed emperador odino ed saray imahen na dirios

Emperador Domitian

Zeus

[Credit Lines]

Emperador Domitian: Todd Bolen/Bible Places.com; Zeus: Nilitrato nen Todd Bolen/Bible Places.com, diad Archaeological Museum of Istanbul

[Litrato ed pahina 4]

Saray Kristiano ed Efeso et agnandayew ed kabkabat a diosan si Artemis.​—Gawa 19:23-41