Tepetepet na Saray Manbabasa

No isesebel nen Jehova so idolatriya, akin et agto dinusa si Aaron sanen sikatoy nanggawa na talintaon kilaw a baka?

Sanen nanggawa si Aaron na talintaon balitok a kilaw a baka, a singa nirekord ed Exodo kapitulo 32, sinumlang to so ganggan na Dios nipaakar ed idolatriya. (Exo. 20:3-5) Bilang resulta, ‘si Jehova akapasnok a mapalalo ed kinen Aaron a tawtawen to lawari, et impikaskasi nen Moises si Aaron ed saman lanlamang a panaon.’ (Deu. 9:19, 20) Kasin “mabisbiskeg so epekto” na pikakasi na matunong a toon si Moises ed situasyon nen Aaron? (Sant. 5:16) On. Lapud satan a kerew tan ed duara nin rason, ompatnag ya inebatan nen Jehova so kerew nen Moises tan agto dinusa si Aaron.

Say unona et nayarin lapud abayag lan rekord na katooran nen Aaron. Sanen niganggan si Moises ya onarap ed kinen Faraon tan ipaway iray Israelita ed Ehipto, tinuro nen Jehova si Aaron a mangiba’d si Moises tan magmaliw a pinagkasangiyan to. (Exo. 4:10-16) Tinmulok iran dua tan aminpiga iran akitongtong ed ari na Ehipto, a sinungdoan day inkaawet na puso to. Kanian legan a walad Ehipto, si Aaron so akagawa na maabig a rekord na matoor tan agnagiing a panaglingkor ed si Jehova.​—Exo. 4:21.

Imanoen met no antoy anagdag ed si Aaron a manggaway balitok a kilaw a baka. Apataplon agew lan walad palandey si Moises. Sanen naimano na ‘katooan a si Moises et abayag lan aglinmasor ed palandey,’ pinilit day Aaron a manggawa na talintaon parad sikara. Kanian, nanggawa si Aaron na balitok a talintaon kilaw a baka. (Exo. 32:1-6) Balet, ipapatnag na saray tinmumbok a kiwas nen Aaron a sikatoy ag-inmabobon ed sayan panagtalintao. Sikatoy apilitan labat. Sanen impangangga nen Moises so panagtalintao, mapekder a dinmapag ed si Jehova so amin ya anak nen Levi, pati si Aaron. Diad saman et inatey so talon libon managtalintao ya angidaulo’d panag-idolatriya.​—Exo. 32:25-29.

Diad saginonor et oniay inkuan nen Moises ed totoo: “Sikayo nankasalanan kayo na abalbaleg a kasalanan.” (Exo. 32:30) Kanian aliwa labat a si Aaron so natetel ed impankasalanan da. Sikato tan saray totoo so agunggonaan ed nikadkaduman panangasi nen Jehova.

Kayari na satan ya inkagawa, tinuro nen Jehova si Aaron pian magmaliw ya atagey a saserdote. Inkuan na Dios ed si Moises: ‘Isulong mo naani ed Aaron so saray masantos a kawes, et sikato so puyokan mo naani pian manumpal ed siak ed betang ya inkasaserdote.’ (Exo. 40:12, 13) Mapatnag sirin a penerdona nen Jehova so impakalingo nen Aaron. On, si Aaron et matoor ed panangiyalibansay tuan panagdayew, aliwan sakey a managtalintao.