Itultuloy Yon Pabiskegen so Kongregasyon

“Itultuloy yon ligliwaen tan pabiskegen so sakey tan sakey.”​—1 TES. 5:11.

1. Antoran bendisyon so nagagamoran tayo lapud membro itayo na Kristianon kongregasyon, balet antoran problema so siansia nin naeeksperiensya tayo?

TALAGAN baleg a bendisyon so pagmaliw a membro na Kristianon kongregasyon. Walaan kay maabig a relasyon ed si Jehova. Lapud manmamatalek ka ed Salita to bilang giya, nasasalimbengan ka ed mauges iran epekto na agmakristianon kabibilay. Wadtan met iray tuan kakaaro a malabay ya maong so pansumpalan mo. On, dakel so bendisyon. Balet, dakel a Kristiano so mipupuligesgesan ed nanduruman klase na problema. Walaray mankaukolan na tulong pian natalosan da so mas aralem iran bengatla ed Salitay Dios. Say arum et mansasakit odino maer-ermen, odino nayarin maniirap ira lapud epekto na makapuy iran desisyon da. Tan amin tayo et manbibilay ed agmaridios a mundo.

2. Antoy nepeg tayon gawaen sano maniirap odino naproproblema iray agagi tayo, tan akin?

² Siempre, agtayo labay ya nanengneng a maniirap odino naproproblema iray agagi tayo. Inyaliling nen apostol Pablo so kongregasyon ed sakey a laman tan inkuan ton “no maniirap so sakey a kabiangan, manirap met iray arum a kabiangan.” (1 Cor. 12:12, 26) Diad ontan iran kipapasen, nepeg tayon panggunaetan  a tulongan iray agagi tayo. Diad Biblia et walay pigaran salaysay nipaakar ed saray Kristiano a tinmulong ed kaagian da pian nasarag da iray problema ra. Legan tayon aaralen iratan, isip yo no panon yon naalig irayan Kristiano a tinmulong ed arum. Panon yo kasin natulongan ed espiritual iray agagi yo ta pian ombiskeg so kongregasyon nen Jehova?

“Sikatoy Impila Ra”

3, 4. Panon a tinulongan nen Aquila tan Priscila si Apolos?

³ Sanen nanayam ed Efeso si Apolos, sikatoy sakey lan maseseg ya ebanghelisador. Unong ed salaysay na Gawa, “lapud sikatoy marmarlang ed espiritu, susto so pansasalita tan pangibabangat to ed saray bengatlan nipaakar ed si Jesus, balet say kabat to labat et nipaakar ed bautismo nen Juan.” Agni atalosan nen Apolos so bautismo “ed ngaran na Ama tan ed ngaran na Anak tan ed ngaran na masanton espiritu,” ta sikatoy apulongan antis ni na Pentecostes 33 C.E na balanglan saray babangatan nen Juan a Managbautismo odino papatumbok nen Jesus. Anggaman maseseg si Apolos, kulang ni so kakabatan to. Panon a sikatoy atulongan na saray kapananisiaan to?​—Gawa 1:4, 5; 18:25; Mat. 28:19.

⁴ Sanen nadngel na Kristianon sanasawan Aquila tan Priscila so makpel a pampupulong nen Apolos diad sinagoga, sikatoy impila ra tan binangatan dan maong. (Basaen so Gawa 18:24-26.) Maar-aro iyan ginawa ra. Maseguron inasinggeran day Apolos ed mataktika tan maabig a paraan, ya anggapoy impalikna ran panagbalaw. Kaukolan to met labat a naamtaan iray impormasyon nipaakar ed inkiletneg na Kristianon kongregasyon. Seguradon pisalsalamatan nen Apolos irayan kapananisiaan to ta innabang da ed sikato iratan ya importantin detalye. Lapud naamtaan la nen Apolos irayan impormasyon, “baleg so nitulong” to’d saray agagi to ed Acaya tan mapuersa so impanpulong to diman.​—Gawa 18:27, 28.

5. Anton maaron tulong so iyoopresi na minilyon a manangiyabawag na Panarian, tan antoy resulta?

⁵ Natan, dakel ya agagi ed kongregasyon so misalsalamat ed saramay tinmulong ed sikara pian natalosan day Biblia. Nagmaliw a malet a sankaaro iramay inyaralan tan saramay angiyaral ed sikara. Pian naaralan na totoo so katuaan, kaukolan tayon iyeskedyul so regular a panangiyaral ed sikara na Biblia diad loob na pigaran bulan. Ontan so mabulos a gagawaen na saray masakripisyon manangiyabawag na Panarian lapud bibidbiren da a say nalalanor et bilay. (Juan 17:3) Talagan makapaliket a nanengneng a natatalosan na totoo so katuaan, manbibilay ira unong ed satan, tan uusaren day bilay dan manggaway linawa nen Jehova!

‘Alay Abig so Ibabaga na Agagi Nipaakar ed Sikato’

6, 7. (a) Akin a pinili nen Pablo si Timoteo pian nakaiba to’d pambiahe bilang misionero? (b) Antoy inaligwasan nen Timoteo lapud impiulop to’d si Pablo?

⁶ Sanen binmisita ira di apostol Pablo tan  Silas ed Listra legan na komaduan impanbiahe ra bilang misionero, naimano da so sakey a kalangweran a manngaray Timoteo, a manga 20 años to. “Alay abig so ibabaga na saray agagi ed Listra tan Iconio nipaakar ed sikato.” Say ina nen Timoteo a si Eunice, tan say bai ton Loida et dedikadon Kristiano, balet say ama to et agmananisia. (2 Tim. 1:5) Nayarin akabat la nen Pablo iyan pamilya diad inmunan imbisita to ed lugar da manga pigay taon lay apalabas. Balet natan et imbalikas toy pilalek ton ipila si Timoteo lapud ompatnag a nikabkabiig iyan kalangweran. Kanian diad panangabobon na mamatatken ed kongregasyon, si Timoteo et nagmaliw a kaiba nen Pablo ed panagmisionero.​—Basaen so Gawa 16:1-3.

⁷ Dakel so naaralan nen Timoteo ed sayan misionero a mas matatken nen say sikato. Tan sikatoy inmaligwas a maong, kanian asabi panaon et mataletalek si Pablo ya ibaki Timoteo pian ombisita ed saray kongregasyon bilang representanti to. Diad impiulop nen Timoteo ed si Pablo ed loob na 15 taon odino onsulok ni, sayan datin ag-eksperiensyado tan nayarin mabaing a kalangweran et inmaligwas anggad nagmaliw ya alay abig a manangasikaso.​—Fil. 2:19-22; 1 Tim. 1:3.

8, 9. Antoy nagawaan na agagi ed kongregasyon pian napaseseg iray kalangweran? Mangiter na alimbawa.

⁸ Natan, dakel a kalangweran ed Kristianon kongregasyon so walaan na baleg a potensyal. No pasesegen tan ipasal ira na saray maespiritual a kakaaro ra, nayarian dan dampoten tan awaten iray babaleg a responsabilidad ed limog na totoo nen Jehova. Kanian mangobserba kayo’d kongregasyon yo! Walara kasi naiimano yon kalangweran a mabulos a pausar ed kimey, a singa si Timoteo? Diad tulong tan panamaseseg yo, nayari iran magmaliw a payunir, Bethelite, misionero, odino ombiabiahen manangasikaso. Antoy gawaen yo pian natulongan iran dampoten iratan?

⁹ Si Martin, a 20 taon lan manlilingkor ed Bethel, so makakaliket sano nanonotan toy interes ya impatnag ed sikato na manangasikaso na sirkito sanen akapan-partner ira ed panagpulong, 30 taon lay apalabas. Maligligsan inistorya na manangasikaso so impanlingkor to ed Bethel sanen sikatoy kalangweran ni. Pinaseseg toy Martin a mannonot a maong no sarag to met so pausar ed organisasyon nen Jehova ed ontan a paraan. Parad si Martin, baleg so naitulong na sayan agnalingwanan ya impantongtong da ed saray desisyon to. Maabig met so resulta no mitongtong ka ed saray kalangweran nipaakar ed saray pribilehyo a sarag dan dampoten.

 “Ligliwa Yo Iramay Maneermen”

10. Antoy alikna nen Epafrodito, tan akin?

¹⁰ Andukey tan makapabanal so impanbiahe nen Epafrodito manlapud Filipos anggad Roma pian bisitaen toy apostol Pablo, ya apriso lapud pananisia to. Sikato so imbaki na saray taga Filipos, ya awit toy regalo ra parad apostol tan labay to met so mansiansia diman pian natulongan toy Pablo ed mairap a kipapasen to. Balet legan a walad Roma, si Epafrodito et nansakit “anggad ngalngali la ompatey.” Lapud inisip ton agto agawaay misyon to, sikatoy nanermen a maong.​—Fil. 2:25-27.

11. (a) Akin ya agtayo pankelawan no walaray nadi-depress diad kongregasyon? (b) Antoy inrekomenda nen Pablo pian natulongan si Epafrodito?

¹¹ Nadi-depress iray totoo lapud dakel a pakakadesdesan ed sayan panaon. Unong ed estatistika na World Health Organization, sakey ed kada limaran too et nayarin nadepress diad sakey a bekta ed bilay to. Tan agnipuera iray lingkor na Dios. Say problema ed no panon a legpetey pamilya, inkamasakit, pakakadismaya lapud saray lingo, odino arum ni et nayarin pansengegay ermen. Antoy inrekomenda nen Pablo a gawaen na saray taga Filipos pian natulongan si Epafrodito? Oniay insulat to: “Sikatoy awat yo sirin a malikeliket unong a niyugali yo la ed Katawan; tan itultuloy yon pablien iray ontan a lalaki, ta nisengeg ed kimey na Katawan et sikatoy inatey lawari, ya inyan to ed kapeligroan so bilay to, ta pian napanlingkoran to ak, a saya so agyo nagawaan lapud anggapo kayo dia.”​—Fil. 2:29, 30.

12. Antoy makaligliwa ed saramay nadidismaya odino nadi-depress?

¹² Kaukolan met a pasesegen tayo iray agagi a nadidismaya odino nadi-depress. Seguradon walaray positibon nibaga tayo nipaakar ed panlilingkor da ed si Jehova. Nayarin walaray ginawa ran baleg a pananguman ed bilay da ta pian magmaliw iran Kristiano odino pian makapanlingkor ira a sigpot-panaon. Pablien tayo iratan a sagpot da, tan ipaseguro tayo ed sikara a papablien met iratan nen Jehova. Kanian anggano agla nagawaan na arum a matoor a kaagian tayo so datin gagawaen da lapud matatken odino masakit la ra, manepeg iran respetoen lapud kabayag da lan manlilingkor. Antokaman so kipapasen, oniay insimbawa nen Jehova ed amin a matoor ed sikato: “Ligliwa yo iramay maneermen, tulongan yo iramay makapuy, itultuloy yon anosan so amin.”​—1 Tes. 5:14.

“Sikatoy Mapangasi Yon Perdonaen Tan Ligliwaen”

13, 14. (a) Anton seryoson aksion so ginawa na kongregasyon ed Corinto, tan akin? (b) Antoy epekto na saman ya impandispelosip da?

¹³ Diad kongregasyon na Corinto nen inmunan siglo, walay sakey a lakin agmagbabawi ed gagawaen ton pilalawanan. Say kondukta to et mamepeligro ed kalinisan na kongregasyon tan makapabigla ni ingen ed saray agmananisia. Kanian duga labat imay ingganggan nen Pablo ya ekalen itan a too ed kongregasyon.​—1 Cor. 5:1, 7, 11-13.

¹⁴ Maabig so epekto na saman a disiplina. Aprotektaan so kongregasyon manlapud mauges ya impluensya, tan amoria na saman a laki so belat na kasalanan to kanian sikatoy masimoon a nagbabawi. Lapud napatnagan la ed saray gawa to a talagan magbabawi, imbaga nen Pablo ed komaduan sulat to ed saray agagi ed Corinto a nepeg da lan ipawil iman a too diad kongregasyon. Balet ta aliwan satan labat so kaukolan dan gawaen. Binilin met ira nen Pablo a sayan magbabawin nankasalanan et ‘mapangasi ran perdonaen tan ligliwaen, ta pian agnadaeg na alablabas a paneermen to.’​—Basaen so 2 Corinto 2:5-8.

15. Panon tayon pidenengan so magbabawin nankasalanan ya akapawil la ed kongregasyon?

¹⁵ Anto so naaralan tayo ed sayan salaysay? Makapaermen no walaray kaukolan ya idispelosip. Nayarin inyan da ed kababaingan so ngaran na Dios tan ompan aderal so maabig a reputasyon na kongregasyon. Nayarin akapankasalanan ni ra ingen ed sikatayon  mismo. Balet, no say desisyon na mamatatken a nanusisa ed kaso unong ed panangidirehi nen Jehova et makanepegan lan ipawil ed kongregasyon so magbabawin nankasalanan, pakapatnagan iya a sikatoy pinerdona la nen Jehova. (Mat. 18:17-20) Agta nepeg tayon aligen si Jehova? No manpaawet itayo tan agmamerdona, kabaliksan na satan ya onsusumpa itayo ed si Jehova. Ta pian mansiansia so deen tan pankakasakey ed kongregasyon tan nagamoran tayoy panangabobon nen Jehova, agta nepeg ya ‘ipaseguro tayoy panangaro tayo’ ed saray akapankasalanan a peteg a magbabawi tan akapawil la?​—Mat. 6:14, 15; Luc. 15:7.

“Sikatoy Mausa-usar ed Siak”

16. Akin ya adismaya si Pablo ed si Marcos?

¹⁶ Ipapanengneng na sakey nin salaysay ed Biblia ya agtayo nepeg a manem-em na sakit na linawa ed saramay akadismaya ed sikatayo. Singa bilang, adisdismaya si apostol Pablo ed si Juan Marcos. Akin? Diad samay inmunan impanbiahe di Pablo tan Bernabe bilang misionero, akila si Marcos ed sikara pian ontulong. Balet diad pambiabiahe ra et tinaynan ira nen Juan Marcos tan sinmempet la, a say rason ed saya et agsinalambit ed Biblia. Adismayan maong si Pablo ed saman kanian sanen manplaplano ira nen Bernabe parad komaduan pambiahe ra, nansangsangan da no kasin nepeg dan ipila lamet si Marcos. Lapud samay agawa ed inmunan impanbiahe ra, agla labay nen Pablo ya itagar si Marcos.​—Basaen so Gawa 13:1-5, 13; 15:37, 38.

17, 18. Panon tayon amta ya aresolbe imay problema di Pablo tan Marcos, tan antoy naaralan tayo ed saya?

¹⁷ Balet, mapatnag ya ag-inabuloyan nen Marcos a sikatoy nadismayan maong ed ag-impangitagar nen Pablo, ta intuloy to ni so manmisionero ed arum a teritorya a kaibay Bernabe. (Gawa 15:39) Napatnagan ed samay imbaga nen Pablo ed sulat to kalabas na pigaran taon a si Marcos et nansiansian matoor tan napanmatalkan. Sanen apriso si Pablo ed Roma, sinulat toy Timoteo, ya inkuan ton: “Itagar moy Marcos, ta sikatoy mausa-usar ed siak diad ministeryo.” (2 Tim. 4:11) On, kombinsido si Pablo a baleg so inaligwasan nen Marcos.

¹⁸ Walay leksion a naaralan ed saya. Abayuboan nen Marcos iray kualidad na maong a misionero. Agtinmayer so seseg to lapud ag-intagar nen Pablo. Pareho iran maespiritual a lalaki, tan ag-ira nanem-em na sakit na linawa ed balang sakey. Imbes, binidbir ni ingen nen Pablo a baleg a katulongan si Marcos. Kanian no apalabas la so sakey a problema, maabig no lingwanan la itan tan itultuloy a tulongan so arum ya onaligwas ed espiritual. Napabiskeg so kongregasyon sano say nengnengen tayo ed arum et say kaabigan da.

Say Betang Mo ed Kongregasyon

19. Antoy nitulong na kada membro na kongregasyon ed balang sakey?

¹⁹ Diad sayan “nikadkaduma tan mair-irap a panaon,” kaukolan moy tulong na saray agagi ed kongregasyon, tan kaukolan da met so tulong mo. (2 Tim. 3:1) No maminsan et ag-amta na saray Kristiano no panon dan arapen iray mairap a situasyon, balet amta itan nen Jehova. Tan usaren toy nanduruman membro na kongregasyon​—pati sika​—pian natulongan so arum a makapansiansia ed inkatunong. (Isa. 30:20, 21; 32:1,2) Ipapuso yo sirin so simbawa nen apostol Pablo! Itultuloy yon “ligliwaen tan pabiskegen so sakey tan sakey, a singa gagawaen yo la.”​—1Tes. 5:11.

Panon Yon Ebatan?

• Akin a nakaukolan tayon pabiskegen so arum diad Kristianon kongregasyon?

• Antoran klase na problema so kipapaarapan na arum a sarag tayoy ontulong?

• Akin et nakaukolan tayoy tulong na agagi diad kongregasyon tayo?

[Tepetepet Parad Panagaral]

[Litrato ed pahina 11]

Tulongan tayoy agi tayo sano walay pidedenengan ton mairap a situasyon

[Litrato ed pahina 12]

Baleg so potensyal na dakel a kalangweran ed Kristianon kongregasyon natan