No Panon Mon Nasarag so Ag-impanmatoor na Asawam

SI Margarita tan say masiken to a si Raul, et abayag a saniban nanlingkor ed si Jehova a sigpot-panaon. * Balet sanen nianak so panguloan da, kalkalnan naandi so relasyon nen Raul ed si Jehova. Ag-abayag et nagmaliw ya imoral so kabibilay to tan adispelosip. Oniay inkuan nen Margarita: “Sanen agawa iya, singa ak la ompatey. Talagan asugatay pusok, tan agko amtay gawaen ko.”

Duman klase met balet so ag-impanmatoor na asawa nen Jane. Ag-abayag kayari impankasal da, sikatoy minaltrato nen masiken to. Oniay inkuan nen Jane: “Diad samay sankaunaan ya impanmaltrato to’d siak, ameneng ak, tan abebbeba lay pakanengneng ko’d inkasiak. Tua, onkerew met na perdona balet ta sakitan to ak lamet. Pigapigay taon ya onia lan oniay nagagawa. Say amtak et, lapud Kristiano ak, obligado ak a mamerdona tan lingwanay ginawa to. Abaloan ko, agak manmamatoor no ibagak ed arum so problema mi, anggan diad saray elder ed kongregasyon. Inisip kon ompan walay nepeg kon gawaen pian aroen ak na masiken ko. Sanen tinaynan to kamin sanina, ninonot kon kulang so sagpot ko, ya wala ni komoy ginawak odino imbagak pian napansiansiay panamaley mi.”

 Singa si Margarita tan Jane, ompan lapud ag-impanmatoor na masiken mo et naapektoay emosyon, kabibilay, tan espiritualidad mo. Odino ompan sakey kan asawan laki ya asakitan tan nanairapan lapud agnanmatoor so asawam. Mapatpatnag a manbibilay itayo la ed “mair-irap a panaon” ya impasakbay na Biblia. Ipapanengneng na sayan propesiya a “diad kaunoran iran agew” et nagulo iray pamilya, a kaslakan et naandi lay aroan ditan. Wala iramay mangibabagan lingkor ira na Dios balet ta ag-itan napatnagan ed panagbilay da. (2 Tim. 3:1-5) Anggan saray tuan Kristiano et agnipuera ed sarayan problema. Kanian, no bilang ta agnanmatoor so asawam, anto so makatulong ed sika pian nasarag mo itan?

Iparam so Panmoriam ed Panmoria nen Jehova

Diad gapo, ompan agmo napanisiaan ya sarag ka manayan sakitan na inad-arom. Ompan tetelen mo ni ingey inkasika ed ginawan kasalanan na asawam.

Balet, tandaan mo ya anggan say perpekton toon si Jesus et trinaidor na sakey a panmamatalkan tan inad-aro to. Si Jesus et nannodnonot a maong tan nampikasi antis ton pinili iray sankaapitan a kakaaro to, saray apostol. Amin na saramay 12 et napanmatalkan a lingkor nen Jehova. Kanian seguradon nanermen a maong si Jesus sanen “nagmaliw a traidor” si Judas. (Luc. 6:12-16) Balet, agtinetel nen Jehova si Jesus ed samay ginawa nen Judas.

Tua, anggapo ‘tay perpekton asawa. Amin tayo et nalilingo. Oniay realistikon insulat na pinuyanan a salmista: “No sika, Jehova, et uninengen mo so saray kasulitan, O Katawan, siopa kasi naani makaalagey?” (Sal. 130:3) Pian naalig na sanasawa si Jehova, nepeg ya palabasen day kalilingoan na balang sakey.​—1 Ped. 4:8.

Balet, “kada sakey ed sikatayo et mikuentaan ed Dios parad sikaton dili.” (Roma 14:12) No say sakey et apasalan to lan pansalitaay ansakit odino kabiley asawa to, sikato so walaan na eebatan ed si Jehova. Kagula nen Jehova so inkaruksa tan makapasakit a panagsalita. Kanian, anggapon balot so makatunongan a rason pian tratoen na sakey so asawa to diad paraan ya talagan andian na aro tan respeto. (Sal. 11:5; Efe. 5:33; Col. 3:6-8) Diad tua, no naynay ya alablabas so kasasanok na sakey a Kristiano tan agto itan pagbabawian, nepeg a sikatoy ekalen ed kongregasyon. (Gal. 5:19-21; 2 Juan 9, 10) Anggapoy nepeg a pakakonsiensiaan na sakey no idalem to ed saray elder so makapuy a gagawaen na asawa to. Mapangasi si Jehova ed saray biktima na ontan a panagmaltrato.

Sano akikalugoran so sakey ya asawa, sikatoy akapankasalanan aliwa labat a diad asawa to, noagta dia met ed si Jehova. (Mat. 19:4-9; Heb. 13:4) No samay matoor ya asawa et ontutumbok ed saray prinsipyoy Biblia, anggapoy nepeg ton pakakonsiensiaan ed impikalugoran na asawa to.

Tandaan mon amta nen Jehova so naliliknam. Indeskribe toy inkasikato bilang asawa na bansan Israel, tan diad Salita to et dakel so salaysay a mangipapatnag na impanermen to sanen espiritual ya akikalugoran itan a bansa. (Isa. 54:5, 6; Jer. 3:1, 6-10) Seguradon nanenengneng nen Jehova iray onteterter ya luam lapud ag-impanmatoor na asawam. (Mal. 2:13, 14) Tan amta ton kakkaukolan moy ligliwa tan panamaseseg.

No Panon Kan Ligliwaen nen Jehova

Say sakey a paraan a liligliwaen nen Jehova iray lingkor to et diad panamegley na kongregasyon. Ontan so agawa’d si Jane. Oniay inkuan to: “Dugaruga imay imbisita na manangasikasoy sirkito ta saman imay panaon ya agaylay ermen ko. Amta ton nadi-depress ak a maong lapud ididiborsyo ak la nen asawak. Talagan angiganay panaon pian nipaliwawa  to’d siak iray teksto a singa say 1 Corinto 7:15. Saray teksto ed Biblia tan say maaron simbawa to so akatulong pian agak la nakonsiensia tan ondeey nonot ko.” *

Apaneknekan nen Margarita, ya asalambit la nen niman, ya iiter nen Jehova so praktikal a tulong diad panamegley na kongregasyon. Inkuan to: “Sanen talagan agmagbabawi so masiken ko, inmalis kamin saniina ed sananey a syudad. Kasabi mi diman, akalmo ak na duaran kuarto a naabangan mi. Kaimbuasan to, sanen maer-ermen kon aayosen iray awit mi, walay tinmoktok. Say abaloan ko et ‘amay akanggaway abung, ya kaabay mi kuarto to. Anta manaya, samay agin angiyaral ed si nanay ko tan tinmulong pian naamtaan na pamilya mi so katuaan. Agto inilaloan a makapannengneng kami ta linma labat diman pian iyaralan toy Biblia imay akanggaway abung. Diad saman ya impannengneng mi et nainawaan ak, tan inyakis ko’d sikato. Impaliwawak so kipapasen ko, tan nan-akisan kami. Tinulongan to kamin makaatendi ed aral diad saman a mismon agew. Inabrasa kami na kongregasyon, tan nanggaway uksoyan iray elder pian natulongan ak ya asikasoey espiritual a pankaukolan min saniina.”

No Panon a Makatulong so Arum

Makatulong so kada membro na kongregasyon diad praktikal iran paraan. Singa bilang, sanen manaanap na trabaho si Margarita, walay sakey a pamilyan kakongregasyon to ya angiyopresin bantayan iray anak to kayari eskuela, no nakaukolan.

“Say pisalsalamatan ko,” kuan nen Margarita, “et sano miulop iray agagi ed siak tan ed saray anak ko diad lawak na kimeyan.” Panamegley na ontan iran praktikal a suporta, saray membro na kongregasyon et ‘makapantutulongan a manakbat ed saray bengatlan makapabelat,’ diad ontan et nasusumpal da so “ganggan na Kristo.”​—Gal. 6:2.

Saramay nanairapan lapud kasalanan na arum et apresyaen dan tuloy so ontan iran praktikal a tulong. Si Monique et tinaynan na asawa to, kanian bukor to lay mamabaleg ed apatiran ugugaw tan manbayar ed $15,000 ya utang da ed credit card. Inkuan to: “Maad-aro ed siak iray kaagian ko. Agkami seguro akabangon no anggapoy suporta ra. Inikdan ak nen Jehova na mangiyaansakit iran agagi, ya nansakripisyo parad saray anak ko. Malikeliket ak ta onaaligwas ira ed espiritual lapud tulong na agagi. No kaukolan koy  simbawa, wadtan iray elder. Tan no kaukolan kon ibesngaw so naliliknak, ondedengel ira.”​—Mar. 10:29, 30.

Siempre, natebek na maaron kaaro no kapigan agmatukoy a pantongtongan so maermen ya asagmak na arum. (Ecl. 3:7) Oniay inkuan nen Margarita: “Mas labay kon pantongtongan mi ran agagin bibii so nipaakar ed panagpulong mi, saray iyaaralan mi na Biblia, saray anak mi​—anggan anto, basta aliwan say problemak. Aapresyaen ko so panutulong da’d siak ya lingwanan so apalabas ko tan makabangon lamet.”

Kontroley Tendensian Ombawi

Walaray pankanawnawan imbes ya tetelen moy inkasika ed impankasalanan na asawam et nayarin ansakisakit laingen so linawam ta maniirap ka lapud ginawa to. No em-eman mo itan a liknaan, nayarin onkapuy so determinasyon mon mansiansian matoor ed si Jehova. Singa bilang, ompan manggawa kay paraan pian makabawi ed asawam.

No naliliknam a singa labay moy ombales ed ginawa to, nodnonot moy ehemplo nen Josue tan Caleb. Inrisga na sarayan matoor a lalaki so bilay da pian man-espiya ed Insipan a Dalin. Kulang na pananisia iramay arum ya espiya tan nilagyat da ray totoo ya ag-unoren si Jehova. Labay ni ingen na arum ya Israelita a tupakey Josue tan Caleb sanen pinaseseg day nasyon a mansiansian matoor. (Num. 13:25–14:10) Lapud ag-inunor na bansan Israel si Jehova, pati si Josue tan Caleb et nanteyengteyeng ed kalawakan diad loob na 40 taon, aliwan lapud kasalanan da, noag lapud kasalanan na arum.

Nayarin adismaya si Josue tan Caleb, balet ta ag-ira nan-imbel na sakit na linawa ed saray kanasyonan da. Say ninonot da la et say panaglingkor da ed si Jehova. Kayari na 40 taon ed kalawakan, sikara labat tan saray Levita diad henerasyon da so nansiansian mabilay tan akaloob ed Insipan a Dalin.​—Num. 14:28-30; Jos. 14:6-12.

Nayarin abayag ka lan nanairapan lapud ag-impanmatoor na asawam. Tan anggano makapansian kayo bilang, siansia nin naapektoay emosyon tan kabibilay mo kayari na satan. Balet, imbes a pinonot moy aliwliwan agawa’d sika, tandaan mo a si Jehova so akauley ed saramay gagalaen dan agtumboken iray estandarte to, a singa ed samay ginawa to ed saray Israelita diad kalawakan.​—Heb. 10:30, 31; 13:4.

Sarag Mo ’Tan!

Imbes ya mannonot kay negatibo, a mamakapuy ed sika, saray espiritual a bengatla so nonot mo. Oniay inkuan nen Jane: “Akatulong ed siak so idengel ed saray rekording na The Watchtower tan Awake! pian nasarag koy problemak. Napapabiskeg ak met ed aral. Tan lapud lanang ak a mankokomento, nalilingwanan ko ray problemak. Makakatulong met so pampupulong ko. Legan kon tutulongan so arum a nawalaay pananisia ed si Jehova, napapabiskeg koy mismon pananisiak. Tan lapud walaray iyaaralan koy Biblia, akaapasakey so nonot ko ed saray mas importantin bengatla.”

Oniay inkuan nen Monique ya asalambit nen niman: “Lapud regular ak ya mimiaral tan mabetbet ak a manpupulong, makakapan-anos ak. Sikamin saniina et lalon inmapit ed sakey tan sakey tan ed kongregasyon. Naamtaan ko ray kakapuyan ko lapud sayan asagmak ko. Subok iya ed siak, balet diad tulong nen Jehova et sarag ko ’ya.”

Nasarag mo met so onia ran problema. Tua, ansakisakit so ag-impanmatoor na asawam, balet komon ta panggunaetan mon unoren iyan simbawa nen Pablo: “Ag-itayo ontutundan manggawa na maabig, ta diad manepeg a panaon et manani itayo no ag-itayo onkesaw.”​—Gal. 6:9.

[Saray paimano ed leksab]

[Litrato ed pahina 31]

Aapresyaen na saramay tinaynan na kaasawaan da so piulop ed sikara diad ministeryo