Pakainawaan Iray Espiritual a Bengatla

“Sakbat yo so pakok . . . pian nainawaan iray kamarerwa yo.”​—MAT. 11:29.

1. Antoy inyuksoy na Dios diad Palandey Sinai, tan akin?

SANEN inggapo so Ganggan a sipanan diad Palandey Sinai, kabiangan ed satan so uksoyan nipaakar ed sinimban Sabaton. Oniay ingganggan nen Jehova ed bansan Israel panamegley na pinagkasangiyan ton si Moises: “Mankimey kayo na anem agew ed loob na sakey simba, balet agkayo mankikimey ed komapiton agew, pian makapampainawa ray ariripen tan saray sangkailin komikimey yo, a pati saray ayayep.” (Exo. 23:12, Maung a Balita) On, bilang konsiderasyon ed saramay sakop na Ganggan, maaron inyuksoy nen Jehova so sakey agew pian “makapampainawa” ira.

2. Panon ya agunggonaan so bansan Israel lapud impanngilin da ed Sabaton?

² Kasin say Sabaton et panaon labat na panagrelaks? Andi, noagta importante itan a kabiangan na panagdayew na saray Israelita ed si Jehova. Lapud panngingilin ed Sabaton, saray ulo na pamilya so makapambabangat ed sankaabungan da pian naaralan da so ‘dalan nen Jehova a manggawa na kaptekan.’ (Gen. 18:19) Pankanawnawa met itan na pamilya tan sankakaaro a makapan-iiba pian nadalepdep iray kimkimey nen Jehova tan maliket a makapanlilimog. (Isa. 58:13, 14) Nagkalalo ed amin, ipapabitar na Sabaton so panaon sano diad arapen et niwalay tuan inawa panamegley na Sanlibon Taon ya Uley nen Kristo. (Roma 8:21) Diad panaon tayo balet ey? Iner tan panon a naromog na saray tuan Kristiano, ya interesado ed kimkimey nen Jehova, so ontan a pakainawaan?

Pakainawaan so Pilimog ed Agagi

3. Panon a nampapabiskegan iray inmuunan siglon Kristiano, tan antoy resulta?

³ Indeskribe nen apostol Pablo so Kristianon kongregasyon bilang “lusek tan seklang na katuaan.” (1 Tim. 3:15) Saray inmuunan Kristiano et atulongan diad impamaseseg tan impangaro ra’d balang sakey. (Efe. 4:11, 12, 16) Sanen walad Efeso si Pablo, sikatoy apaseseg na saray agagi ed kongregasyon na Corinto lapud imbisita ra ed sikato. Imanoen pay epekto na satan ed si Pablo, oniay inkuan to: ‘Manliket ak ed kiwawala nen Estefanas tan si Fortunato tan si Acaico, ta nainawaan ak lapud sikara.’ (1 Cor. 16:17, 18) Ontan met, sanen linma si Tito ed Corinto pian manlingkor ed saray agagi diman, binales nen Pablo so sulat na kongregasyon, a kuan to: “Nainawaan so espiritu [nen Tito] lapud sikayon amin.” (2 Cor. 7:13) Diad panaon tayo met natan, talagan naiinawaan iray Tasi nen Jehova lapud makapabiskeg ya ulopan da.

4. Panon itayon napapaseseg diad aral?

⁴ Seguradon apaneknekan mo la a saray aral ed kongregasyon et lapuan na pirmin liket. Ditan et “makapanpapasesegan [itayo], diad panamegley na pananisia na kada sakey.” (Roma 1:12) Saray agagi et agtayo labat la basta kabat odino sagpaminsan a nakakaulop. Sikara so tuan kakaaro, a rerespetoen tan aaroen tayo. No regular itayon mililimog ed sikara diad aral, mas naliketan tan naligliwa itayo.​—Filem. 7.

5. Panon itayon makapanpapasesegan diad saray kombension tan asemblea?

⁵ Napaseseg itayo met diad saray tinaon a  kombension tan asemblea. Sarayan mas baleg a pantitipon et aglabat mangitatarya na manangiter-bilay a danum na katuaan a manlalapud Salita na Dios, say Biblia, noagta pankanawnawa met iya pian “inatnat” so pipiulop tayo. (2 Cor. 6:12, 13) Panon to balet no mabaing itayo tan naiirapan itayon onasingger ed arum? Say sakey a paraan pian nakabat tayo ray agagi et diad pamboluntaryo ed kombension. Alimbawa, diad sakey ya internasyonal a kombension et akitulongan so sakey ya agin bii, tan oniay inkuan to: “Likud ed pamilyak tan ed daiset a kakaarok, wala labat lay pigaran kabat ko’d man. Balet, sanen akitulongan ak a manlinis, dakel so akabat kon agagi! Malikeliket ak!”

6. Antoy sakey a paraan a napaseseg itayo legan a manbabakasyon?

⁶ Saray Israelita nensaman et mamitlo ed sakey taon ya oonla ed Jerusalem pian selebraan so taloran piesta bilang panangidayew. (Exo. 34:23) Kanian ititilak day kaumaan odino lakoan da, tan pigay agew iran manbaroy ed maraborabok iran dalan. Anggaman ontan, kapagno onsasabi ira’d templo tan nanenengneng da iramay ‘mangigagalang ed si Jehova,’ sikaray ‘magaygayaga.’ (2 Awa. 30:21) Mipadpara, dakel ed saray lingkor nen Jehova natan so ‘magaygayaga’ ya ombibisita ed sangan opisina tayo kaiba iray pamilya ra. Diad onsublay a bakasyon yo, nayari yo kasin ipila’d eskedyul yo so ibisita ed Bethel?

7. (a) Panon a makagunggona iray panduroypo? (b) Antoy nagawaan tayo pian magmaliw a makapalikliket tan makapabiskeg iray panduroypo?

⁷ Saray panduroypo a kaiba iray pamilya tan kakaaro et makapaseseg met. Oniay inkuan na makabat ya Arin Solomon: “Anggapo so bengatla a magmaong nipaakar ed too nen say pangan to tan iyinum to, tan panggawa to ed kamarerwa to a manliket a maong ed kimey to.” (Ecl. 2:24) No manduroypo itayo, ag-itayo labat narepreskoan noagta mas onelet so panangaro tayo ed kaagian legan tayo ran nakakabat a maong. Kanian, pian napagmaliw tayon makapalikliket  tan makapabiskeg irayan okasyon, maabig no daiset labat so imbitaan tan seguroen a naaasikaso so amin, lalo la no walay itaryan de-alkohol ya iinumen.

Pakainawaan so Ministeryo

8, 9. (a) Antoy pidumaan na mensahe nen Jesus ed saray eskriba tan Fariseo? (b) Antoray nagunggona tayo no inabang tayo so katuaan?

⁸ Makulikuli si Jesus ed ministeryo, tan pinaseseg to ray disipulo to a magmaliw met ya ontan. Mapatnag iya ed samay imbaga to: “Dakel so aanien, balet daiset so mankikimey. Mikasi kayo sirin ed Katawan na panag-ani a mangibaki na saray mankimey ed aanien to.” (Mat. 9:37, 38) Say mensahen imbangat nen Jesus et talagan pakainawaan, satan et “maong a balita.” (Mat. 4:23; 24:14) Miduman tuloy itan ed makapabelat iran totontonen ya impasakbat na saray Fariseo ed totoo.​—Basaen so Mateo 23:4, 23, 24.

⁹ Sano inanabang tayo ed arum so mensahe na Panarian, natutulongan tayo ran napenek so espiritual a pankaukolan da. Ontan met, lalon ontanek ed nonot tan puso tayo so mablin katuaan ed Biblia. Talagan duga imay imbaga na salmista: “Idayew yo si Jehova; ta maong so mankanta na pangidaydayew ed Dios tayo; ta makapalikliket ed linawa.” (Sal. 147:1) Nayarian yo kasin lalon pansagpotan ya inabang so nipaakar ed si Jehova, diad ontan et lalo kayon magmaliw a maliket?

10. Kasin say italona tayo ed ministeryo et akadepende ed pangawat na arum ed mensahe tayo? Ipaliwawa.

¹⁰ Tua, diad arum iran teritorya et mas dakel so maawat ed maong a balita nen say diad arum. (Basaen so Gawa 18:1, 5-8.) No diad teritorya yo et pigpigaray mangaawat ed mensahe na Panarian, say pangiteenan mo lay imanom et say maabig a nagagawaan mo’d ministeryo. Tandaan ya aliwan andi-kakanaan so pansasagpot mon pangipakabat ed ngaran nen Jehova. (1 Cor. 15:58) Sakey ni, say italona ed ministeryo tayo et ag-akadepende ed no antoy reaksion na totoo. Makapanmatalek itayo a seguradon ikdan nen Jehova na pankanawnawa iray maptek-impanpuson totoo a mangawat ed mensahe na Panarian.​—Juan 6:44.

Pakainawaan so Panagdayew na Pamilya

11. Anton responsabilidad so inter nen Jehova ed atateng, tan panon dan nagawaan itan?

¹¹ Responsabilidad na matakot ed Dios ya atateng ya ibangat ed ananak da so nipaakar ed si Jehova. (Deu. 11:18, 19) No sakey kayon ateng, kasin walay eskedyul yon bangatan iray anak yo na nipaakar ed maaron Ama tayo? Pian nagawaan yo iyan seryoson responsabilidad yo tan naasikasoy pankaukolan na pamilya yo, angitarya si Jehova na dakel tan makagunggonan espiritual a tagano a singa saray libro, magasin, video, tan audio recording.

12, 13. (a) Panon a makagunggona so Panagdayew na Pamilya diad labi? (b) Panon a naseguro na atateng a makapabiskeg so panagdayew na pamilya ra?

¹² Niarum ni, angiyuksoy so matoor tan makabat ya aripen na Panagdayew na Pamilya diad labi. Satan a labi et inggana pian sinimban naaral na kada pamilya so Biblia. Apaneknekan na dakel a lapud sayan uksoyan et inmelet so aroan da tan inmapit ira ed si Jehova. Balet panon a naseguro na atateng a napabiskeg na panagdayew na pamilya ra so espiritualidad na kada membro?

¹³ Kaukolan a say Panagdayew na Pamilya diad labi et aliwan makapasawa tan alablabas a seryoso. Say dadayewen tayo et “maliket a Dios,” tan labay ton maliket itayo met a mandayew ed sikato. (1 Tim. 1:11; Fil. 4:4) Satan a labi, a panaral ed mablin katuaan ed Biblia, et talagan sakey a bendisyon. Nayarin itukoy-tukoy na atateng so metodo ra ed panagbangat tan usaren day imahinasyon tan dunong da. Alimbawa, say ginawa na sakey a sanasawa et kinerew da ed samploy taon ya anak dan si Brandon, ya manggawa na report nipaakar ed no “Akin ya Inusar nen Jehova so Uleg a Mangirepresenta ed si Satanas?” Abayag lan nonodnonoten nen Brandon iyan tepet lapud labalabay toy uleg, tan pankelawan to no akin ya  impara itan ed si Satanas. No diad arum a pamilya balet, iyaakto da no maminsan iray istorya, a babasaen da ed Biblia so betang da. Saray arum nin pamilya et iyaakto da iray istorya balet ta agda la babasaen. Saray onian metodo na panagbangat et makapalikliket tan nawalaay pankanawnawa iray anak yo a mibiang. Diad ontan, saray prinsipyo na Biblia et ontalos ed kapusoan da. *

Paliisan Iray Pakabelatan

14, 15. (a) Akin et lalon onloloor iray problema diad sarayan kaunoran ya agew? (b) Anto ni kaaruman a problema a nayarin nasagmak tayo?

¹⁴ Diad sarayan kaunoran ya agew na mauges a sistema na bengabengatla, lalon onloloor iray problema. Dakel iray andiay trabaho tan mairap-bilay. Maslak ni ingen ed saray walaan na trabaho et singa kuno “botbot” so bulsa ra, ta aliwan magenap so sueldo ra. (Ikompara so Aggeo 1:4-6.) Saray politiko tan arum nin lider et agda nasarag ya ekalen so terorismo tan arum nin lapuan na kaugsan, anggan antoy pansasagpot da. Tan dakel a totoo so naeermenan lapud dilin kalilingoan da.​—Sal. 38:4.

¹⁵ Saray tuan Kristiano et agnipuepuera ed problema tan pananesdes na sistema nen Satanas. (1 Juan 5:19) Ontan met, nayarin wala ni kaaruman a problema na saray disipulo nen Kristo lapud pansasagpot dan mansiansian matoor ed si Jehova. Oniay inkuan nen Jesus: “No pinasegsegang da ak, pasegsegangen da kayo met.” (Juan 15:20) Balet, anggaman sikatayoy “napapasegsegang,” ag-itayo “napapaulyanan ed kairapan.” (2 Cor. 4:9) Akin?

16. Antoy makatulong pian mansiansia itayon maliket?

¹⁶ Inkuan nen Jesus: “Dago kayo ed siak, amin yon mansasagpot tan nabebelatan, tan pampainawaen ta kayo.” (Mat. 11:28) No sigpot itayon manmamatalek ed dondon bagat nen Kristo, nibagan impalima tayo lay bilay tayo ed si Jehova. Diad ontan et nipagamor ed sikatayo so “pakayari a mas mabiskeg nen say pakayari na too.” (2 Cor. 4:7) “Say mananulong,” odino say masanton espiritu na Dios, so mamabiskeg ed pananisia tayo pian agtayo labat naanosan iray subok tan kairapan noagta mansiansia itayo met a maliket.​—Juan 14:26; Sant. 1:2-4.

17, 18. (a) Antoy nepeg a panalwaran na saray tuan Kristiano? (b) Antoy pansumpalan no unaen iray panliliket?

¹⁷ Saray tuan Kristiano natan et nepeg a manalwar ed impluensya na sayan mundon nigalet ed panliliket. (Basaen so Efeso 2:2-5.) Ta no andi et nayari itayon napatitan na “pilalek na laman tan say pilalek na mata tan say panangipangta na sakey ed saray kaykayarian to ed bilay.” (1 Juan 2:16) Odino nayarin lingo tayon isipen a say panggawa ed pilpilalek na laman so lapuay liket. (Roma 8:6) Singa bilang, wala ray arum a totoo a nagmaliw ya adik ed druga, de-alkohol iran iinumen, pornograpiya, delikadon isports, odino arum nin marutak a kagagawa pian penekey pilpilalek da. Tandaan, say gagala na “saray masilib a paraan” nen Satanas et pian mamalikdo. Pipikeweten toy pakatebek na totoo ed no antoy tuan makapnek ed bilay.​—Efe. 6:11.

¹⁸ Tua, anggapoy uges na pangan, iyinum, tan dugan panagligliwaan, no aliwan alablabas.  Balet, agtayo aabuloyan a saratan a bengatla et manuna la ed bilay. Importantin tuloy so inkabalanse tan panagdangka, lalo la ed sayan panaon a pambibilayan tayo. Nayarin napabelatan itayo na personal iran aktibidad ya anggad punton magmaliw itayo lan “mangiras [inaktibo] odino agmabunga nipaakar ed suston pikakabat ed Katawan tayon Jesu-Kristo.”​—2 Ped. 1:8.

19, 20. Panon tayon nawalaan na tuan pakainawaan?

¹⁹ No say panagnonot tayo et unong ed saray totontonen nen Jehova, natebek tayo ya antokaman a likeliket ya iyoopresi na sayan mundo et temporaryo labat. Amoria itan nen Moises, tan ontan ti’ met. (Heb. 11:25) Say katuaan to, say tuan pakainawaan a mangipagamor na magnayon a liket tan inkapnek et manlalapud panggawa ed linawa na Ama tayon walad tawen.​—Mat. 5:6.

²⁰ Komon ta ipasen tayo a saray espiritual a bengatla so pakainawaan tayo lawas. Diad ontan et ‘nipulisay tayo iray ag-inkamaridios tan minumundo iran pilalek legan tayon aalagaren so maliket ya ilalo tan say maglorian kiparungtal na makapanyarin-amin a Dios tayo tan si Kristo Jesus a Manangilaban tayo.’ (Tito 2:12, 13) Kanian komon ta determinado itayon mansiansia ed pako nen Jesus diad pampasakop ed autoridad to tan pangunor ed panangiwanwan to. No ontan, nawalaan tayo na tuan liket tan pakainawaan!

[Paimano ed leksab]

Antoy Ebat Mo?

• Panon a naiinawaan odino napapaseseg iray totoo nen Jehova natan?

• Akin a nibagan say ministeryo et pakainawaan tayo tan na saray pupulongan tayo?

• Antoy nagawaan na saray ulo na pamilya pian naseguron makapabiskeg so panagdayew na pamilya ra?

• Antoray sengegan na pakabelatan tayo ed espiritual?

[Tepetepet Parad Panagaral]

[Saray litrato ed pahina 26]

No sakbaten tayo so pako nen Jesus, nainawaan itayo ed dakel ya aspekto