Walay Kaligenan Diad Limog na Saray Lingkor na Dios

‘Pisalamatan ta ka ed loob na baleg a muyongan.’​—SAL. 35:18.

1-3. (a) Antoy nayarin pakapeligroay espiritualidad na saray Kristiano? (b) Iner so pakaromogan na proteksion na saray lingkor na Dios?

SANEN walad bakasyon si Joe tan asawa to, linma ra’d dayat pian nengnengen iray coral reef tan nanduruman klase na sira. Linmangoy ira’d mas aralem pian mas nabista da iray coral reef. Sanen akasabi ra’d araldalem lan parte na dayat, inkuan na asawa nen Joe, “Arawdawi la amo iyay kawalaan ta.” “Agka mapaga,” kuan nen Joe. “Siak so akauley.” Nagugunoyan balet et mankelaw si Joe ta anggapo lay nanengneng ton sira. Anta manaya et nitan lay pating a mamapaarap ed sikato. Ataktakot si Joe. Diad saman a bekta et singa anggapo lay nagawaan to. Sanen pigaran metros labat lay kaarawi to imay pating, angumay direksion to tan biglan naandi.

² Mipadpara, say sakey a Kristiano et nayarin nalagyat ed saray iyoopresi na sistema nen Satanas​—saray panagligliwaan, trabaho, tan kaykayarian​—tan ompan agto naam-amtaan et mamapaarap la manaya ed aliling to et aralem a parte na dayat. “Lapud samay naeksperiensyak, amoriak ya importante no iner so pilien tayon pansiansiaan,” kuan nen Joe, a sakey ya elder. “Mansiansia ka ed pasen a maligen tan maliket​—diad kongregasyon!” On, agka onaarawi ed kongregasyon, ta napeligroy espiritualidad mo. No bilang ta akaarawi ka, pawil kan tampol. Ta no andi, naderal so relasyon mo ed si Jehova.

³ Talagan mapeligro natan iyan mundo ed saray Kristiano. (2 Tim. 3:1-5) Amta nen Satanas ya antikey lay panaon to, kanian ‘aanapen ton buagen’ iramay agmalikas. (1 Ped. 5:8; Apo. 12:12, 17) Balet ta walay proteksion tayo. Intaryaan nen Jehova iray lingkor to na maligen ya espiritual a salimbengan, salanti, say Kristianon kongregasyon.

4, 5. Antoy iisipen na dakel a totoo nipaakar ed arapen da, tan akin?

⁴ Iisipen na dakel a totoo ya aliwan maligen so bilay diad sayan panaon. Mapagpaga ira lapud wadtan nin siansiay krimen, kaguloan, irap na bilay, tan nadederal lay planeta tayo. Anggapoy nipuera ed itatatken tan sakit. Tan anggan saramay maksil so laman da tan walaay trabaho, abung, tan kuarta et maniisip no kasin mansiansia ya ontay kipapasen da.

⁵ Ontan met, dakel so totoon naproproblema ed emosyon. Abaloan dan magmaliw iran maliket tan kontento no mangasawa tan manpamilya ra, balet makapaermen ta andi met lanlamang manaya. No nipaakar met ed espiritualidad, nawewetwet iray dakel a relihyoso, a panduaruwaan da no kasin duga so bangat na relihyon da. Lalo la ta walaray lider na relihyon a mauges so kagagawa ra tan agnibase’d Biblia so ibabangat da. Kanian isipen laingen na dakel ya anggapo lay nailaloan noag say siensia tan say kamaongan na kapara ran too. Agla sirin pankelawan ya agaylay inkanegatibo na totoo, tan walara ingey agda la labay a nonoten a maong so nipaakar ed arapen da.

6, 7. (a) Akin et duma so panmoria na saray lingkor na Dios ed saray aliwan lingkor na Dios? (b) Antoy aralen tayo ed sayan artikulo?

⁶ Talagan duma so panmoria na saramay kabiangan na Kristianon kongregasyon ed  saramay agkabiangan na satan! Tua, dakel ed saray probleman nasasagmak na arum et nasasagmak tayo met iran lingkor nen Jehova, balet ta duma so reaksion tayo. (Basaen so Isaias 65:13, 14; Malaquias 3:18.) Akin? On, ta naaralan tayo’d Biblia no akin ya oniay kipapasen na katooan, tan akaparaan tayon mangarap ed saray problema’d bilay. Kanian agtayo napapagaan a maong nipaakar ed arapen. Bilang lingkor nen Jehova, naproprotektaan itayo ed saray palson bangat, imoral a kagagawa, tan ed epekto na saratan. Nalilikna sirin na saray kabiangan na Kristianon kongregasyon so kaligenan ya agnaeeksperiensya na arum.​—Isa. 48:17, 18; Fil. 4:6, 7.

⁷ Diad sayan artikulo et aralen tayo so pigaran alimbawa ya ontulong pian lalo tayon napabli so kaligenan a walad saray lingkor nen Jehova, ya anggapo’d arum. Sarayan alimbawa et mamakiwas ed sikatayon usisaen so panagnonot tan kagagawa tayo tan no kasin sarag tayo nin nagkalalon niyaplika iray bilin na Dios.​—Isa. 30:21.

‘Ngalngali Sinmipa Iray Salisalik’

8. Antoy lawas a kakaukolanen nen Jehova ed saray lingkor to?

⁸ Manlapu la nensaman, panggugunaetan na saray manlilingkor tan manguunor ed si Jehova a paliisan so maapit a pipiulop ed saray agto lingkor. Diad tua, impasakbay la nen Jehova a niwalay gulaan ed baetan na saray lingkor to tan saray patumbok nen Satanas. (Gen. 3:15) Lapud mapekder a tutumboken na saray totoo na Dios iray prinsipyo To, dumay awawey da ed saray totoo ed kaliberliber da. (Juan 17:15, 16; 1 Juan 2:15-17) Tan aliwa itan a mainomay parad sikara. Wala ni ingen iray pankanawnawa a panduaruwaan da no kasin duga so gagawaen dan pansasakripisyo.

9. Isalaysay so pakakagonigonan na samay nansulat ed Salmo 73.

⁹ Sakey ed saray lingkor nen Jehova a nanduaruwa no kasin dugay desisyon to et samay nansulat ed Salmo 73, a nayarin sakey ed saray ilalak nen Asaf. Tinepet na sayan salmista no akin a singa onaaligwas, maliket,  tan onaasenso so bilay na saray mauges, balet ta saray manggugunaet a manlingkor ed Dios et manasagmak na irap.​—Basaen so Salmo 73:1-13.

10. Akin et importantin nodnonoten mo iramay intepet na salmista?

¹⁰ Kasin asalim met lan intepet ed inkasika iyan insulat na salmista? No ontan, agmo iisipen a mauge-uges ka odino makapkapuy lay pananisiam. Dia tua, ontan met so intepet na pigaran lingkor nen Jehova, a say arum ni ingen ed sikara et angisulat ed Biblia. (Job 21:7-13; Sal. 37:1; Jer. 12:1; Hab. 1:1-4, 13) On, nepeg a nodnonoten tan awaten na amin a lingkor nen Jehova so ebat ed sayan tepet: Kasin say panlingkor tan pangunor ed Dios so sankaabigan a gawaen? Say ebat ed saya et importante pian naresolbe imay isyu a pinalesa nen Satanas ed hardin na Eden, salanti, no kasin si Jehova so makanepegan a manuley. (Gen. 3:4, 5) Kanian kaukolan tayon nodnonoten iramay intepet na salmista. Nepeg tayo kasin ibegan iray mauges a totoon singa anggapoy problema ra’d bilay? Kasin ‘isipa tayo met iray salisali tayo’ a singa panangibaga, ya itunda tayo lay panlilingkor tayo ed si Jehova tan aligen iray mauges a totoo? Satan so mismon labay nen Satanas a gawaen tayo.

11, 12. (a) Antoy akatulong ed salmista pian naekal so panduaruwa to, tan antoy naaralan tayo ed satan? (b) Antoy akatulong ed sika pian miparay konklusyon mo ed samay salmista?

¹¹ Antoy akatulong ed salmista pian naekal so panduaruwa to? Anggaman inamin ton taynan to lawari inkatunong, angumay panmoria to sanen linmoob ed “santuaryo na Dios”​—sanen sikatoy akilimog ed maespiritual a totoo diad tabernakulo odino templo na Dios tan sanen dinalepdep toy gagala na Dios. Diman amoria na salmista ya agto labay a nasagmak so pansumpalan na mauges a totoo. Atebek to a lapud panagbilay tan saray desisyon da et singa ra walad ‘andanglel a pasen,’ salanti, aliwan maligen so arapen da. Atalosan to ya amin a manaynan ed si Jehova et ‘natalagnaw’ tan mangangga iran siansia. Balet ta saramay manlilingkor ed si Jehova et suportaan To. (Basaen so Salmo 73:16-19, 27, 28.) Seguradon apaneknekan mo la iya. Parad dakel a totoo et singa makapalagyat so pambilay ya anggapoy pibabali ed arum tan ed saray ganggan na Dios, balet ta seguradon agda natakasan so mauges a resulta na ontan a panagbilay.​—Gal. 6:7-9.

¹² Anto ni naaralan tayo ed eksperiensya na salmista? Alikna toy kaligenan tan awalaay karunongan diad limog na totoo na Dios. Nagmaliw a malinew tan makatunongan so panagnonot to sanen linma ed pasen a pandadayewan ed si Jehova. Ontan met natan, diad saray aral ed kongregasyon et wadtan iray makabat a mananimbawa tan ditan tayo makakaawat na espiritual a tagano. Walay maabig a rason sirin no akin ya ingganggan itayo nen Jehova ya atendian iray Kristianon pantitipon. Ta ditan et napaseseg itayo tan napanonotan itayon onkiwas a makabat.​—Isa. 32:1, 2; Heb. 10:24, 25.

Pilipilim Iray Kaulop Mo

13-15. (a) Antoy naeksperiensya nen Dina, tan antoy naaralan tayo ed saya? (b) Akin et salimbeng so piulop ed saray kaagian?

¹³ Say marikit nen Jacob a si Dina et aliwliway nansumpalan to lapud impiulop to’d saray agmanlilingkor ed si Jehova. Nabasa tayo ed Genesis ya sikatoy lanang a mimiulop ed saray mamarikit a Canaanita diad lugar a panaayaman na pamilya to. Aliwan singa saray mandadayew ed si Jehova, anggapoy tutumboken na saray Canaanita ya atagey iran estandarte ed moral. Diad tua, papaneknekan na adiskobre na saray arkeologo a talagan alodloor so kagagawa ran panagtalintao, imoralidad, mabanday a panagdayew ed sekso, espiritismo, tan karawalan. (Exo. 23:23; Lev. 18:2-25; Deu. 18:9-12) Pawilen tayo pa  imay nansumpalan na impiulop nen Dina ed sarayan totoo.

¹⁴ Si Dina et naimano na Canaanitan manngaray Siquem, ya adeskribin ‘narayrayew a manuna ed sankaabungan nen ama to.’ ‘Inala toy Dina tan inakdolan to, tan sikatoy pinatulok to.’ (Gen. 34:1, 2, 19) Makapasinagem iyan agawa! Naisip kasi nen Dina ya nagawa iya ed sikato? Ompan labay to met labat so mikaaro ed saray kalangweran diman ed lugar da, ya ninonot ton anggapon balot so gawaen dan mauges ed sikato. Balet ta alingo-lingoy Dina.

¹⁵ Antoy naaralan tayo ed saya? Ya agtayo iisipen ya anggapoy nagawan mauges ed sikatayo no miulop itayo ed saray agmanlilingkor ed si Jehova. Ibabaga na Biblia a “say piulop ed mauges et maneral ed maong iran ugali.” (1 Cor. 15:33) Balet, say piulop ed agagi, panumbok ed atagey iran estandarte ed moral, tan say panangaro ed si Jehova et salimbeng. On, no maong iray pipiulopan mo, napaseseg kan onkiwas a makabat.​—Uli. 13:20.

“Naurasan Kayo La”

16. Antoy imbaga nen apostol Pablo nipaakar ed arum ya agagi ed kongregasyon na Corinto?

¹⁶ Dakel lay atulongan na Kristianon kongregasyon a mangitunda ed marutak a kagagawa ra. Diad samay unonan sulat nen apostol Pablo diad kongregasyon na Corinto, sinalambit toy impanguman na saray Kristiano diman lapud labay dan natumbok so estandarte na Dios. Arum ed sikara et datin managlawan, managdayew ed idolo, managkalugoran, homoseksual, matakew, buanges, tan arum ni ra. “Balet naurasan kayo la,” so kuan nen Pablo ed sikara.​—Basaen so 1 Corinto 6:9-11.

17. Panon ya anguman so bilay na dakel lapud impangiyaplika ra’d saray estandarte na Biblia?

¹⁷ Saray andiay pananisia et anggapoy tutumboken dan maabig a prinsipyo’d bilay. Say labay da et akauley ira’d bilay da odino ‘paiyaanor-anor’ labat ira ed imoral a kagagawa na totoo’d kaliberliber da, a singa saramay agagi ed Corinto nensaman antis iran nagmaliw a mananisia. (Efe. 4:14) Balet, say suston pikakabat ed Salita na Dios tan ed gagala to et walaan na pakayarin mamasimbalo ed bilay na siopaman a mangiyaaplika ed Kasulatan. (Col. 3:5-10; Heb. 4:12) Dakel ed saray kabiangan na Kristianon kongregasyon natan et ginawa ray labay dan gawaen sanen agda ni amta tan inyaplika iray matunong ya estandarte nen Jehova. Balet ta ag-ira kontento tan maliket. Alikna da labat itan sanen akilimog ira’d totoo na Dios tan nambilay a mitunosan ed saray prinsipyo na Biblia.

18. Antoy naeksperiensya na sakey a kalangweran, tan antoy papaneknekan na satan?

¹⁸ Walaray arum balet ya anaynan ed maligen a kipapasen na kongregasyon, tan agaylay pagbabawi ra. Insalaysay nen Tanya * ya sikatoy “pinabaleg ed katuaan,” balet ta nen 16 años to, tinaynan toy kongregasyon pian “naeksperiensya met so maliket a bilay ed mundo.” Bilang resulta, sikatoy alukonan tan impaekal to itan. Oniay nibaga to natan: “Samay taloy taon ya inmarawi ak ed kongregasyon et angitilak na aliling to et agla naekal a piglat ed emosyon ko. Say talagan agnaeka-ekal ed isip ko et say impamatey ko ed ana’ko. . . . Kanian nia so labay kon ipasabi ed saray kalangweran a pipilaleken dan ‘tawayan’ so  liket ed mundo anggan magano labat: ‘Aleg!’ Nayarin masamsamit itan ed gapo, balet diad kaunoran et ampaipait manaya. Puros ermen labat so niiter na sayan mundo. Asalik itan a mismo. Atawayan ko. Mansiansia kayo ed organisasyon nen Jehova! Satan labat so mangiter na liket ed bilay.”

19, 20. Anton proteksion so niiter na kongregasyon, tan panon?

¹⁹ Nonot mo pa labat no antoy nagawa met ed sika no taynan moy maligen a kipapasen na kongregasyon. Ag-anggan labay a nonoten na dakel so andi-kanan kabibilay da antis dan inawat so katuaan. (Juan 6:68, 69) Kanian no labay mon lawas a naliknay inkaligen tan naprotektaan ed irap tan ermen a kaslakan ed saray totoo diad mundo nen Satanas, mansiansia kan maapit ed saray agagi. Say pilimog ed sikara tan regular a piaral et mangipanonot ed sika a makagunggona iray matunong ya estandarte nen Jehova tan napaseseg kan unoren iratan. Manepeg labat sirin a ‘pisalamatan moy Jehova ed loob na baleg a muyongan,’ a singa ginawa na salmista.​—Sal. 35:18.

²⁰ Siempre, amin a Kristiano, antokaman ni rason, et walaray pankanawnawan mairap dan napansiansiay katooran da. Nayarin kaukolan day mangigiya ed sikara diad dugan dalan. Antoy nagawaan mo tan amin ed kongregasyon pian natulongan iray kaagian ed ontan iran situasyon? Aralen ed onsublay ya artikulo no panon mon ‘nitultuloy a naligliwa tan napabiskeg’ iray agagim.​—1 Tes. 5:11.

[Paimano ed leksab]

Antoy Ebat Mo?

• Antoy naaralan tayo ed eksperiensya na samay nansulat ed Salmo 73?

• Antoy naaralan tayo ed asagmak nen Dina?

• Akin et maligen ka diad Kristianon kongregasyon?

[Tepetepet Parad Panagaral]

[Saray litrato ed pahina 7]

Mansiansia ka ed maligen a pasen​—diad kongregasyon!