‘Agka Natatakot. Tulongan Ta Ka’

PINASAKBAYAN nen Jesus iray papatumbok to: “Say Diablo so ag-ontundan mangipriso ed arum ed sikayo pian nasubok kayon maong.” Antis to ni ‘tan balet et oniay imbaga nen Jesus: “[Agyo] tatakotan iray magano [yo] lan sagmaken.” Anggad natan et ipapa-ipriso nin siansia nen Satanas iray tuan Kristiano pian ontunday panagpulong na Panarian, kanian walan walay posibilidad a pasegsegangen ira na gobierno. (Apo. 2:10; 12:17) Panon tayo sirin ya iparaan so inkasikatayo ed saray patit nen Satanas tan ‘ag-iratan takotan,’ a singa impaseseg nen Jesus?

Siempre, maslak ed sikatayo et asali to lay tinmakot. Balet ta papaseguroan itayo na Salita na Dios a diad tulong nen Jehova et ag-itayo nadaeg na takot. Panon? Say sakey a paraan ya tutulongan itayo nen Jehova pian nasarag tayoy isusumpa et impaamta to la’d sikatayo iray patit nen Satanas tan saray alipores to. (2 Cor. 2:11) Makaaral itayo nipaakar ed saya no nengnengen tayo imay agawa ed saray Judio nensaman. Nengnengen tayo met so pigaran alimbawa na matoor iran kaagian tayo ed sayan panaon ya ‘akatalindeg sumpad saray masilib a paraan na Diablo.’​—Efe. 6:11-13.

Say Insumpa Na Mauges Ya Ari

Nen komawalon siglo B.C.E., say mauges ya ari na Asirya a si Senakerib et analo ed nantutumbokan ya impibakal to ed nanduruman nasyon. Kanian mataletalek a nasakop to met iray totoo nen Jehova tan say syudad da ya Jerusalem, a say ari ditan et say matakot ed Dios a si Ezekias. (2 Ara. 18:1-3, 13) Seguradon inmaneobra nen Satanas iyan situasyon. Labay ton naandi so tuan panagdayew diad dalin kanian sinugsogan toy Senakerib pian nasumpal iyan plano to.​—Gen. 3:15.

Imbaki nen Senakerib si Rabsases bilang pinagkasangiyan to diad Jerusalem a kaibay baleg ya armada pian paskaren iray Judio ya onsuko la. * (2 Ara. 18:17) Getma nen Rabsases a pakapuyey linawa na saray Judio pian agla ra milaban. Antoray paraan ya ginawa to pian ontakot iray Judio?

Matoor Anggano Nisian

Oniay imbaga nen Rabsases ed saray representanti nen Ezekias: ‘Onia so kuan na baleg ya ari, say ari ed Asirya, Anto so panmamatalkan mo a paniilaloan mo? . . . Natan, nia, manmamatalek ka ed saya a pisit a kawayan salanti, say Ehipto.’ (2 Ara. 18:19, 21) Aliwan tua iyan akusasyon nen Rabsases, ta ag-akialyansay Ezekias ed Ehipto. Nia ay so labay labat a papawayen nen Rabsases: ‘Kaskasian  kayo kalamor. Anggapon balot so ontulong ed sikayo.’

Diad linmalabas iran dekada et ontan met so labay a papawayen na saray onsusumpa ed tuan panagdayew. Sinali dan isian iray tuan Kristiano ed saray kaagian da pian ontakot ira. Insalaysay na sakey ya agin bii no antoy akatulong ed sikaton ag-ontakot anggano sikatoy nipriso lapud pananisia to tan piga-pigay taon a nisian ed saray agagi: “Akatulong so pikakasi pian onapit ak ed si Jehova . . . Sankanonot ko imay panamaseguro ed Isaias 66:2 ya iimanoen na Dios iray ‘duka tan walaay maralit ya espiritu.’ Satan so lawas mamapabiskeg tan manliligliwa ed siak.” Onia met so imbaga na sakey ya agin laki a pigay taon ya imbartolina: “Amoriak ya anggan say mainget a selda et singa met kaawang na uniberso sano say sakey et maapit ed Dios.” On, sarayan duaran Kristiano et maapit ed si Jehova kanian akapansungdo ira anggano nisian ira’d agagi. (Sal. 9:9, 10) Amta na saray niprison Tasi ya sarag na saray manamasegsegang ya isian ira ed pamilya, kakaaro, tan kapananisiaan da, balet ta anggapon balot so makapangisian ed sikara ed si Jehova.​—Roma 8:35-39.

Talagan importanti sirin ya lawas tayon paeletey relasyon tayo’d si Jehova! (Sant. 4:8) Nepeg a naynay tayon tepetay sarili tayo: ‘Talaga ta’n maapit ak ed si Jehova? Kasin paigigiya ak ed Salita to diad saray desisyon ko ed inagew-agew?’ (Luc. 16:10) No gagawaen tayoy anggaay nayarian tayo pian mansiansia itayon maapit ed Dios, anggapoy rason pian ontakot itayo. Oniay inkuan nen propeta Jeremias sanen imbalikas toy liknaan na saray napapairap a Judio: “Tinawag ko so ngaran mo, O Jehova, ed paway na kalepsagan a panangipukokan . . . Inmasingger ka ed agew ya intawag ko ed sika. Sika inkuan mo, Agka [natatakot].”​—Tag. 3:55-57.

Anggapoy Agawaan na Panamalikdo

Pinalikdo nen Rabsases iray Judio pian manduaruwa ira. Inkuan to: ‘Aliwa ta a saray atagey a pasen nen Jehova tan saray altar to so inekal nen Ezekias? . . . Si Jehova inkuan to ed siak, Ontatdang ka sumpa ed sayan dalin, tan bagbagen mo.’ (2 Ara. 18:22, 25) Dia et ikakatunongan nen Rabsases ya ag-ilaban nen Jehova iray totoo To ta ag To ra aabobonan. Balet diad tuay tua et naliliketan si Jehova ed si Ezekias tan ed saray Judio ya pinmawil ed tuan panagdayew.​—2 Ara. 18:3-7.

Ontan met natan, nayarin walay ibaga na saray manamasegsegang a tua met ya impormasyon pian panisiaan tayo ira, balet ta laokan da itan na tila pian ontuboy panduaruwa ed isip tayo. Singa bilang, walaray pankanawnawan impaamta ra’d saray agagi tayon walad prisoan ya akikompromiso la so agin mangidadaulo ed kimey diad bansa ra, kanian sarag da met la kunon taynan so pananisia ra. Balet ta ag-apalikdo iray Kristianon walaan na pakatebek ed satan ya panagkatunongan.

Ontan so agawa ed sakey ya agin bii nen Sankamundoan a Guerra II. Legan a walad prisoan, impanengneng da’d sikato iray dokumento a mamapaneknek ya akikompromiso la so sakey ya agin laki a walaay pribilehyo’d organisasyon. Sikatoy tinepetan na imbestigador no panisiaan to iman a Tasi. Oniay ebat na agin bii: “[Sayan laki] et too met labat ya agperpekto.” Imbaga to met ya  saman a laki et inusar na Dios sanen ontutumbok ni’d prinsipyoy Biblia. “Balet saray ibabaga to natan et sumlang la ed Biblia, kanian agko la ipasen ya agik.” Makabat ya inyaplika na sayan agin bii iyan simbawa ed Biblia: “Agyo iyan so panmatalek yo ed saray priprinsipe, nisay dia ed anak na too, a dia ed sikato anggapo so tulong.”​—Sal. 146:3.

Say suston pikakabat ed Salita na Dios tan panangiyaplika ed saray simbawa to so ontulong pian ag-itayo napalikdo na panagkatunongan a mamakapuy ed determinasyon tayon manmatoor. (Efe. 4:13, 14; Heb. 6:19) Kaukolan tayo sirin ya iprayuridad so inagew-agew a panagbasay Biblia tan personal a panag-aral pian duga nin siansiay panagnonot tayo anggan sano onsabi desdes. (Heb. 4:12) On, natan lay panaon a nepeg tayon paaralemen so pikakabat tayo tan pabiskegey pananisia tayo. Oniay inkuan na agin pigay taon ya imbartolina: “Labay kon pasesegen so balang sakey a pablien so amin ya espiritual a tagano ya iiter ed sikatayo, ta onsabin onsabi panaon a talagan balbaleg so naitulong na satan ed sikatayo.” No natan et aaralen tayon maong so Salita na Dios tan saray publikasyon ya itatarya na matoor tan makabat ya aripen, ‘ipanonot’ na masanton espiritu iratan ya inaral tayo sano onsabi iray subok ed bilay.​—Juan 14:26.

Pinabiskeg Anggano Walay Panamagyaw

Pinagyaw nen Rabsases iray Judio. Inkuan to: “On, sige, diad ngaran na emperador palugaran ta kayo. Ikdan ta kayoy duan libon kabayo no makalmo kayoy lalakin onkabayo’d sikara. Agkayo makasimbang ed anggan sankaabebaan lan opisyal na Asirya.” (2 Ara. 18:23, 24, Maung a Balita) Diad panmoriay too, talagan imposiblin natalo nen Ezekias tan saray Judio so makapanyarin armada na Asirya.

Mipadpara, singa ompatnag ya anggapoy laban tayo ed saray manamasegsegang, lalo la no suportado ira na gobierno. Ontan so agawa diad panaon na Nazi nen Sankamundoan a Guerra II. Pinagyaw da so dakel a lingkor na Dios. Deneskribe na sakey ya agin laki ya pigay taon ya apriso no panoy impamagyaw ed sikato. Aminsan et sikatoy tinepetan na opisyal: “Anengneng moy impamaltog ed agim? Anto ey, akaaral ka la?” Oniay ebat to: “Tasi ak nen Jehova tan agbalot manguman itan.” “E, onsublay ka la sirin a paltogen,” so kuan to imay opisyal. Balet ta siansian mapekder imay agi, tan tinundaan da met lanlamang a pagyawen. Akin et ag-ataktakot ed panamagyaw da? Oniay ebat to: “Nanmatalek ak ed ngaran nen Jehova.”​—Uli. 18:10.

No sigpot so pananisia tayo’d si Jehova, aliling to et baleg itan a samper a manalimbeng ed sikatayo ed amin ya taktika nen Satanas a mamakapuy ed espiritualidad tayo. (Efe. 6:16) Maabig sirin no ipikasi tayo’d si Jehova ya tulongan to itayon pabiskegey pananisia tayo. (Luc. 17:5) Napabiskeg tayo met so pananisia tayo panamegley na saray uksoyan na matoor tan makabat ya aripen. No bilang ta walay mamagyaw ed sikatayo, napabiskeg itayo’d samay impaseguro nen Jehova ed si propetan Ezequiel sanen inganggan Ton pasakbayan iray totoon anawet so ulo ra: ‘Ginawak a singa diamante ya anawet nen say bato so moling mo. Agka natatakot ed sikara.’ (Eze. 3:9) On, tulongan itayo met nen Jehova a magmaliw a mapekder a singa anaw-awet a diamante, no panon a tinulongan to si Ezequiel nensaman.

Resistian Iray Pananagyat

Nalmoan na saray onsusumpa ya sano ginawa da lay amin a paraan balet ta siansia nin matoor so sakey a Kristiano, no maminsan et mas epektiboy makapasagyat iran opresi. Ontan so ginawa nen Rabsases nensaman. Oniay imbaga to ed saray wadman ed Jerusalem: “Onia so kuan na ari ed Asirya, Mipakna kayo ed siak, tan ompaway kayo ed siak . . . Angga ed onsabi ak tan iyakar ta kayo ed dalin a singa  say dili a dalin yo, dalin na bukel tan balo ya alak, dalin na tinapay tan ubasan, dalin na saray olibo tan dilo, pian manbilay kayo, tan agkayo ompatey.” (2 Ara. 18:31, 32) Say pangan na tinapay tan iyinum na balon alak et seguradon makapasagyat ed saramay manaayam ed Jerusalem ya apaliberan na sundalo!

Walaray opisyal ya angusar ed sayan paraan pian pakapuyey determinasyon na sakey a misioneron nipriso. Imbaga ran sikatoy iyakar da ed “marakdakep ya abung” a walad “balibalin hardin” diad loob na anem bulan pian sikatoy makapannonot. Balet ta determinado iyan agi a mansiansian matoor tan tinalindegan toy prinsipyo to bilang Kristiano. Antoy akatulong ed sikato? Oniay inkuan to: “Say iisipen kon tuan ilalo et say Panarian . . . . Mabiskeg so pananisiak lapud kabat ko so nipaakar ed panarian na Dios, segsegurado ak ed satan, agkon balot itan nanduaruwaan, kanian agda ak balot atangguyor a mikompromiso.”

Talaga ta’n ipapasen tayo a tuan ilalo so Panarian na Dios? Asungdoan nen patriarkan Abraham, apostol Pablo, tan si Jesus a mismo iray mairap a subok lapud talagan inilaloan da so Panarian. (Fil. 3:13, 14; Heb. 11:8-10; 12:2) Ontan met ed sikatayo, no lawas tayon iyuuna so Panarian ed bilay tayo tan sankanonot tayo iray agmanganggan bendisyon na satan, sarag tayon resistian iray pananagyat a mangiter na temporaryo labat a pakainawaan ed saray subsubok.​—2 Cor. 4:16-18.

Ag-itayo Paulyan nen Jehova

Anggaman ginawa la nen Rabsases so amin a paraan pian taktakoten iray Judio, siansia nin nanmatalek si Ezekias tan saray sakop to ed si Jehova. (2 Ara. 19:15, 19; Isa. 37:5-7) Diad pikakasi et kinerew day tulong nen Jehova. Inebatan to itan diad impangibaki toy anghel pian pateyen so 185,000 a sundalo ed kampo na saray Asiryano diad sanlabi labat! Diad kaimbuasan, nanapuran pinmawil si Senakerib ed Ninive lapud kababaingan to, kaibay dagdaiset ya akera ed armada to.​—2 Ara. 19:35, 36.

On, agpinaulyan nen Jehova iray lingkor ton nanmatalek ed sikato. Tan ipapanengneng na saray naeksperiensya na agagi tayo ed sayan panaon ya agmet mamaulyan si Jehova natan. Mataletalek tayo sirin ed sayan ipapaseguro na Ama tayo ed tawen: ‘Siak si Jehova a Dios mo, a mangitagey na kawanan a limam, a kuan ko ed sika, Agka natatakot. Tulongan ta ka.’​—Isa. 41:13.

[Paimano ed leksab]

[Blurb ed pahina 13]

Diad Biblia, masulok a 30 beses a pinaseguroan a mismo nen Jehova iray lingkor to ya: ‘Agka natatakot’

[Litrato ed pahina 12]

Antoy piparaan na saramay taktika nen Rabsases ed taktika na saray onsusumpa ed lingkor na Dios natan?

[Saray litrato ed pahina 15]

No maapit itayo’d si Jehova, sarag tayoy mansiansian matoor anggano walay subok