“Itultuloy Moy Manseet ed . . . Panagbangat”

“TATAWAGEN yo ak a, ‘Managbangat,’ tan, ‘Katawan,’ tan duga kayo, ta ontan ak.” (Juan 13:13) Diad satan ya imbaga nen Jesus ed saray disipulo to et indanet toy papel to bilang managbangat. Insan, sanen magano lan ompawil ed tawen et oniay ingganggan to’d saray papatumbok to: “Onla kayo sirin tan ibangat yo iray totoo ed amin a nasyones pian magmaliw iran disipulok, . . . ya ibangat yo ran mangunor ed amin a bengatlan ingganggan ko ed sikayo.” (Mat. 28:19, 20) Diad inlabas na panaon, indanet met nen apostol Pablo ya importante so pangibangat ed Salita na Dios. Oniay imbilin to ed Kristianon matatken a si Timoteo: “Itultuloy moy manseet ed panagbasa diad publiko, panamilin, tan panagbangat. . . . Morekdek mo irayan bengatla; saraya so iyulom, pian nanengneng na amin a totoo so iyaaligwas mo.”​—1 Tim. 4:13-15.

Singa met nensaman, say panagbangat et importantin kabiangan na ministeryo tan Kristianon pantitipon tayo natan. Panon tayon makapantultuloy a manseet ed panagbangat, tan panon iyan makatulong pian onaligwas itayo’d panagbangat na Salita na Dios?

Aligen so Sankamaongan a Managbangat

Dakel so asagyat ed paraan na panagbangat nen Jesus. Oniay imbaga na managsulat na Ebanghelyo a si Lucas nipaakar ed reaksion na saramay wadman ed sinagoga diad Nazaret ed impanbangat nen Jesus: “Marakep so imbaga ran amin nipaakar ed sikato tan pandinayewan da iray makapasagyat ya ibabaga to.” (Luc. 4:22) Diad impanpulong na saray disipulo nen Jesus et inalig day alimbawa to. Pinaseseg nen apostol Pablo iray kapara ton Kristiano: “Alig yo ak komon, a singa pangaalig ko ed si Kristo.” (1 Cor. 11:1) Lapud inalig nen Pablo so paraan nen Jesus, sikatoy nagmaliw ya epektibo ed ‘panagbangat diad arap na karaklan tan diad kabkaabungan.’​—Gawa 20:20.

Nambabangat “ed Tindaan”

Say sakey a paneknek a si Pablo et marundunong a manbangat “diad arap na karaklan” et nabasa ed Gawa kapitulo 17. Nisalaysay ditan so imbisita to ed Atenas, Gresya. Anggan iner lawarin lingawan nen Pablo, diad karsada man odino arum nin publikon pasen, et walan walay talintao. Kampegan naalipanesan si Pablo! Balet, agto pinunuyan itan a liknaan to. Imbes, “sikatoy akikatunongan . . . diad sinagoga tan diad saramay nababanaan to ed tindaan ed inagew-agew.” (Gawa 17:16, 17) Maabig no aligen tayo iyan alimbawa! No marespeto itayon mitongtong ed amin a klase na too, ya agtayo ra uukomen, nayarin napakiwas iran ondengel tan onsabi panaon et onlukpos la ra’d panangaripen na palson relihyon.​—Gawa 10:34, 35; Apo. 18:4.

Dakel ed saray pinulongan nen Pablo diad tindaan et ag-angawat ed mensahe to. Kaiba ed saratan iray philosopher a saray sisisiaen da et misumlangan ed ipupulong to. Balet ta seguradon inkonsidera to iray komento ra anggano ag-ira mipakna. Walara ingey anawag ed sikato ya “managdokdok na bukel,” a panagdeskribe na saray Griego ed toon “malabir.” Imbaga met na arum ya: “Singano sakey [iyan] managpulong na agkabat iran dirios.”​—Gawa 17:18.

Anggaman ontan, agkinmapuy so linawa nen Pablo ed impanginsulto na saray pinulongan to. Imbes, sanen walaray nantepet no antoy ibabangat to, inusar to iyan pankanawnawa pian ipaliwaway mensahe to. Diad sayan paliwawa to et napatnagan a sikatoy marundunong a manbangat. (Gawa 17:19-22; 1 Ped. 3:15) Nengnengen tayo pa sirin iray detalye na sayan paliwawa to, a  pakaaralan tayo ed no antoray makatulong pian napaaligwas tayoy panagbangat tayo.

Sagyatey Interes Da

Oniay inkuan nen Pablo: “Lalakin taga Atenas, nanenengneng ko a diad amin a bengatla et ompatnag a mas matakot kayo ed saray dirios nen say arum. Singa bilang, legan ya . . . iimanoen kon maong iray bengatlan dadayewen yo, anengneng ko met so sakey ya altar a walay akasulat ‘Diad Sakey a Dios ya Agkabat.’ Kanian samay agyo kabat a pangiiteran yoy maridios a debosyon, saya so ipupulong ko ed sikayo.”​—Gawa 17:22, 23.

Inimanon maong nen Pablo so kaliberliber to kanian dakel so naamtaan ton impormasyon nipaakar ed saray pupulongan to. No maobserba itayo met, walaray bengatlan naamtaan tayo nipaakar ed unabung. Singa bilang, ompan walaray nanengneng tayon akasabit ed puerta odino galaw-galaw na ugugaw ed sular. No anggan panon et walay amta tayo ed kipapasen na unabung, agtayo labat nitukoy so ibaga tayo, noagta naap-apiger tayo met so pangibaga ed satan.​—Col. 4:6.

Say panagsalita nen Pablo et aliwan singa manguukom. Amta ton say “maridios a debosyon” na saray taga Atenas et base ed agsuston kakabatan. Malinew ya indanet nen Pablo no panon iran makapandayew ed tuan Dios. (1 Cor. 14:8) Importante sirin ya malinew so pangiyanunsio tayo ed maong a balita na Panarian tan diad paraan ya agmanguukom!

Nepeg a Mataktika tan Agmangidumaduma

Oniay intuloy nen Pablo: “Say Dios a nanggawa na mundo tan amin a bengatlan wadtan, sayan Sakey, a Katawan na tawen tan dalin, et agmanaayam ed saray templo a ginawa na lima, tan agto met nakaukolan a sikatoy asikasoen na totoo a singano walay nakaukolan to, lapud sikaton mismo so mangiiter na bilay tan linawa tan amin a bengatla diad amin a totoo.”​—Gawa 17:24, 25.

Diad saya et impaimano nen Pablo so Lapuan na bilay, si Jehova, a diad mataktikan paraan et tinukoy ton “Katawan na tawen tan dalin.” Talagan baleg a pribilehyo so itulong ed maptek impanpuson totoo a nandurumay relihyon tan bansa ra, pian naamtaan dan say bilay et nanlapud si Jehova!​—Sal. 36:9.

Insan imbaga nen Pablo: “Tan manlapud sakey a too et ginawa to so kada nasyon na totoo . . . tan inggeter to iray aturon panaon tan saray ketegan na panaayaman na totoo, ta pian anapen day Dios, no bilang ta mankarkarapkap iran manaanap ed sikato tan peteg a naromog da, anggaman diad tua et sikatoy ag-arawi ed balang sakey ed sikatayo.”​—Gawa 17:26, 27.

Diad panagbangat tayo et nipatnag tayoy kualidad na Dios a panlilingkoran tayo. Si Jehova et agmanangidumaduma, ta aabuloyan to ray totoo ed amin a nasyones a ‘mankarkarapkap ya mananap ed sikato tan peteg a naromog da.’ Aaligen tayoy Jehova no anggapoy pipilien tayon pulongan. Labay tayon tulongan iramay manisia ed Amalsa ya onapit ed sikato pian nabendisyonan ira diad andi-anggaan. (Sant. 4:8) Panon tayo balet a tulongan iramay agmanisia’d Dios? Makaaral tayo’d ginawa nen Pablo. Nia so intuloy ton imbaga.

“Diad panamegley to et walay bilay tayo tan onggagalaw itayo tan wala itayo, a singa imbaga na arum ed saray manag-anlong ed limog yo, ‘Ta sikatayo met so ilalak to.’ Kanian lapud ilalak itayo na Dios, agtayo nepeg ya isipen a say Sakey  a Dios et singa balitok odino pilak odino bato.”​—Gawa 17:28, 29.

Pian nainteresan tan manisia iray taga Atenas, inusar nen Pablo ed paliwawa to so imbaga na saray manag-anlong a kabkabat tan panisiaan da. Kanian no labay tayon naalay interes na totoo, ibase tayoy panagkatunongan tayo diad saray bengatlan papanisiaan da. Singa bilang, diad sulat nen Pablo ed saray Hebreo et walay imbaga ton ilustrasyon ya makakombinse ni anggad natan: “Kada abung et walay angipaalagey, balet say angipaalagey ed amin a bengatla et say Dios.” (Heb. 3:4) No mikatunongan itayo’d unabung panamegley na oniaran ilustrasyon, nayarin nakombinse ira ed ibabaga tayo. Wala ni sakey a rason no akin ya epektiboy impanbangat nen Pablo​—pinaseseg ton onkiwas iray ibabangat to.

Idanet a Kaukolan so Ikiwas a Tampol

Imbaga nen Pablo: “Tua ya inabuloyan na Dios ya onlabas iray panaon a saray totoo et andiay-pikakabat, ingen ibabaga to natan a nepeg a magbabawi so amin a katooan ed inerman a pasen, lapud inggeter to so sakey ya agew pian ukomen toy mundo unong ed inkatunong diad panamegley na sakey a toon tinuro to.”​—Gawa 17:30, 31.

Diad temporaryon impangiyabuloy na Dios ed kaugsan, inikdan to itayon amin na pankanawnawan ipatnag no anton talagay walad puso tayo. Importante sirin ya idanet tayo’d saray ibabangat tayo a kaukolan so ikiwas a tampol, tan nanengneng met komon ed panagsalita tayo a kombinsido tayo ed saray bendisyon na Panarian, ya asingsingger tayo lan nagamoran.​—2 Tim. 3:1-5.

Nanduruman Reaksion

“Sanen nadngel da so nipaakar ed kioli na saray inaatey, nanludlurey so arum, balet ibabaga na arum: “Dengelen mi ka lamet ed saya diad arum a panaon.” Kanian tinaynan la ra nen Pablo, balet akila ed sikato so pigaran lalaki tan nagmaliw iran mananisia.”​—Gawa 17:32-34.

Anggaman walaray tampol a mangawat ed mensahe tayo, ompan say arum et agtampol a nakombinse. Balet, sano atulongan tayoy anggan sakey labat ya indibidual a nawalaay suston pikakabat ed si Jehova panamegley na malinew tan simplin panangipaliwawa ed katuaan, misalsalamat itayo ta uusaren itayo na Dios pian iyasingger so totoo diad Anak to!​—Juan 6:44.

Saray Naaralan Tayo

Diad sayan paliwawa nen Pablo, dakel so naaralan tayo nipaakar ed no panon so pangibangat tayoy katuaan na Biblia. No apribilehyoan itayon manpaliwawa ed kongregasyon, panggunaetan tayon aligey Pablo. Nepeg a mataktika so panagkatunongan tayo pian natulongan iray agmananisia ya talosan tan panisiaan iray katuaan na Biblia. Nepeg a malinew so pangipasabi tayo ed saratan a katuaan, balet ta agtayo babalawen so sisisiaen na saray inmatendin aliwan Tasi. Ontan met, diad pampupulong tayo et nepeg a makakombinse tan mataktika so panagsalita tayo. No ontan so gawaen tayo, talagan iyaaplika tayo imay simbawa nen Pablo ya ‘mantultuloy a manseet ed panagbangat.’

[Litrato ed pahina 30]

Malinew, simpli, tan mataktika so panagbangat nen Pablo

[Litrato ed pahina 31]

Aaligen tayoy Pablo no ikokonsidera tayoy liknaan na saray pupulongan tayo